Read Tunen 1 Timotíó 6 Bible Online

1 Timotíó 6 - Tunen bible

1 Timotíó 6

¹Bááyɛ́ bəkimə ɔbá bá lɛ́á ɔ buɔlɛ́, bá bíə́búə́ bisə́lúkú bə́tə́kíə́ hɔ́ánánátɔ́ ɔkɛaka ɔwá, bɛndɔ bá lɛ binə́níníə́ na niínyə nɛ́ Huɛlɛ́ kɔba.

²Bɛ́mɔtɛ́ bɛɔlɛ́ ɔbɛ́á bisə́lúkú bá lɛ́á bəlumininə, bá lɛ kinə́ ɔ uwəbú ubə́tiə na ɔlaa ɔwá, bəə́bu bə́búə́ bənísə́. Ɔ nifəŋə, bá bəə́bu nyɔkɛ́ná muɛsɛ ɔ ɔyáyɛ́na bɔkɔasɛ́á, uwəbú ɔbá bá ndɔ buolí buɛsɛ nyɛna, bá báka bənísə́ baasɛ búhikiə. Ɔ́ nɔ́yɛ́ ɔ ná hɔ́ánána ɔlaa na uwukúniə.

³Ábá mɔndɔ a ndɔ bilə́líə́ binə́binə́ ínə́niə, ábá a lɛ ndɔ ɔŋgɛna ɔ tiísi yɛ bɛtambá bɛ́ yəsúə́ Isə́lúkú á Yə́susu Kilísitusu, na binə́níníə́ ɔ wɔŋgɔkɔnɔ yə́súə́ ilumininə,

⁴a báka undúə́tɔ́ na niə́mə, mɔlɛmanyá tɔ́na. A lɛa na mɔɔ́mbɔ wɔ́ ilókí yɛ́ mitə́ŋítə́ŋí na bɛtambá bɛ́ bɛɔmɔ́nɔ. Ɔmɔ́tɔ́yɛ́, məə́sə matatánɛ, mɔnjálɔ́nana, mɔsɔkɔnɔ na bɛfɛka bɛbɛ́á,

⁵mitə́ŋítə́ŋí tɔ́na yɛ́ ɛŋaná nisúki ɔ ətíə́ yɛ bɛndɔ bá ɛŋaná ɛmanya, ɔbá bá lɛ ndɔ taká manya ɔhá bɛ́ ndɔ húlínə. Bá əbú fɛkaka ɔwá, nɛkɔmba ɔtálɛ́na á Huɛlɛ́ nɛ́ ndɔ nɛbɔ́ŋɔ húlə́nə.

⁶Ɛ́ɛ! Nɛkɔmba ɔtálɛ́na á Huɛlɛ́ nɛ́ báka na mɔsɛ́ŋɛ́ ɔ ɔyáyɛ́na ɛlɔ́áyɛ́ wɛ́ɛ́yɛ́ ɔwá a ndɔ bílə́nə na yatɛ́ ɔyɛ́á a lɛ́á itíə́nə́tɔ.

⁷Ɔ taká, ata bɔɔ́la tɔ sa húlə́nə ɔ ndasákɔ́ná ɔ misí; hɔ́ánánátɔ́, tɔ sa ósó utilənə ata bɔɔ́la.

⁸Nɔ́yɛ́, ábá tɔ lɛa na bɔ́labɔ́nɛ́á, tɔ lɛa na bɔlɛŋa bɔ́ ɔbɛ́háá, nɔ́yɛ́ yɛ́ ná bəsú hɔ́ánánɛ́na.

⁹Mba, bááyɛ́ ɔbá bá lɛ́á na ilókí yɛ́ nɛbɔ́ŋɔ, bá ndɔ kɔɛna ɔ tɔlámba tɔ́ mɔkɔ́lɛna, ɔ bilókílókí biəŋí bɛbɛ́á, bɛ́ ɛŋaná mɔsɛ́ŋɛ́ ɔbɛ́á bɛ́ ndɔ bɛndɔ bɔtɔyɔ́ bɔ́ ɛŋaná iŋgətí na bunímə́ húlə́ninə.

¹⁰Ɔ taká, uhikiə wɔ́ mɔnɛ́á wɔ́ lɛ́á indínə́ yɛ manya məkimə má məsə́kə. Bɔ́mɔtɛ́ ɔbá bá ná nɔ́yɛ́ bíndíə́, bá ka nanaka hata na ilumininə, bá ná mətuŋulə úndúsíə́ ɔ uwəbú mɛlɛ́má nuúmə́.

¹¹Mba ɔwáwɔ á mɔndɔ ɔwá ɔ ndɔ Huɛlɛ́ kɔ́lɔ́ma, túmə əlimə ɔ bɛ́ɛ́yɛ́ bɛkɔa, siə́kə ɔ ɔkɛa yatɛ́ ɔyɛ́á yɛ́ lɛ́á tɛ́nɛ́mátɔ, bítíkə́kə́ ɛ́sɛ́á Huɛlɛ́ a ndɔ hikiə, tálɛ́ná nɛ́áwɔ́á nɛkɔmba ɔ ɔwayɛ́, hikə́kíə́ bəkúlə́kulə, tiŋímínə́ ɔ bɛkɔa ɔbɛ́á Huɛlɛ́ a ndɔ siə, bámɛ́nɛ́ná na mɔlɛ́má tɔmbɔ́kɔ́tɔ́ ɔ busíə́ bɔ́ bəkúlə́kulə.

¹²Nɔ́áka á ituəmə yɛɛsɛ yɛ́ ilumininə, bítínínə ɔ buɔmɔ́ bɔ́ ikúílíə́kimə ɔbɔ́á Huɛlɛ́ a ná aŋɔ́á ɛ́lɛ́ákɛ́nɛ́na, ɛnaka ɔ́ ɛbɛ́mɛ́nɛna yɛɛsɛ yɛ́ yáwɔ́á ilumininə fə́mə́lə́níə́ ɔ busíə́ bɔ́ bəmbóŋímboŋi bəəŋí.

¹³Ɔ busíə́ bɔ́ Huɛlɛ́ ɔwá a ndɔ buɔmɔ́ índiə ɔ bɛɛ́la bikimə, ɔ busíə́ bɔ́ Yə́susu Kilísitusu ɔwá a ná imbóŋi híə́níníə́ á Bɔ́ŋɔ́sú Bilátɛ busíə́ ɔ tɔ́mbákɛna na nifə́mə́ləniə nɛ́ ɛbɛ́mɛ́nɛna yɛɛsɛ yɛ́ ilumininə, mɛ ndɔ aŋɔ́á manɛna ɔwá:

¹⁴Bítə́tə́kə́níə́ umbə́ndə́, bámɛ́nɛ́na ɛŋaná məhilə́, ɛŋaná hɛkabalɛ ɔkafámáká ɔ ikúílí ɔyɛ́á yəsúə́ Isə́lúkú á Yə́susu Kilísitusu a ŋɔ fámálana.

¹⁵Nɛ́táyɛ́ nɛfámálana nɛ́ ŋɔ bíúndúsiniə ɔ ikúílí ɔyɛ́á Huɛlɛ́ a ná tínímíə́. Ɔwayɛ́ ɔwá a lɛ́á hɛyábálá hɛ́ buɛsɛ, a Mɔmanɛna bíbúə́ wa bikimə, á Munəni wa bənəni, á Isə́lúkú yɛ bisə́lúkú.

¹⁶Wɛɛ́ya bíbúə́ á sa ndə́wəə, a ndɔ tuənə ɔ ɛsakɛsakɛ ɔyɛ́á ata mɔndɔ a sa ósó ɔbɛ́nyálɛla, ata mɔndɔ a sa ndá wɛɛ́ya sinə, a sa ndóósó ɔwayɛ́ usinə. Tuúmə na injiŋə yɛ ikúílíə́kimə tɔ́ bámɛ́nɛ́ná tɔ́áyɛ! Amɛna.

¹⁷Manɛ́na ɔ bambiaŋɛ bá yɛ́ɛyɛ misí ɔwá bá lɛ bíbə́líə́, bá lɛ yə́búə́ ɛnánɛna tálɛ́ná ɔ nɛmbiaŋɛ ɔnɛ́á nɛ́ ndɔ tɔ́mba, mba, ɔ Huɛlɛ́ ɔwá a ndɔ bəsú maasɛ índiə ɔ ɔyáyɛ́na, ɔkɛaka ɔwá tɔ nɛɛ́ta yákɔ́bɔ́ákɛ́na.

¹⁸Manɛ́na bəə́bu tɔ́na ɔwá bá buɛsɛ kɛáka, bá báá na nɛmbiaŋɛ ɔ bɛnyɛná bɛɛsɛ, bá hánáka, bá bɛɛ́la afákáná na bɔsɔ́kɔ́.

¹⁹Nɔ́yɛ́, bá nɛbɔ́ŋɔ nɛɛsɛ na nɛ́ ɔ́nɛ́nátɔ́ bɛ́mbátákɛna ɛlɔ́áyɛ́ ikúílí yɛ́ ɔsákɔna, ɔkɛaka ɔwá bá bítínínə ɔ tiísi yɛ buɔmɔ́.

²⁰Á wamɛ́á munísə́ wuhikiə á Timotíó, tə́tə́níə́ muɛsɛ yatɛ́ ɔyɛ́á bá ná aŋɔ́á ínə́kíníə́, bɛ́sáŋɔ́ná bilə́kə́tə́ bɛ́ ndəmə ɔbɛ́á bɛ́ lɛ́á nifəŋə na ilumininə, bɛfɛka tɔ́na ɔbɛ́á bá ndɔ laa ɔwá bɛ́ ndɔ ɛmanya húlə́nə.

²¹Bɔ́mɔtɛ́ bá ka fɛka ɔwá bá ka yɛ́táyɛ́ ɛmanya kusənə, mba, bá ka ilumininə bɛ́sala. Nyɔnɔ yɛ Isə́lúkú yɛ́ báá na bənú!