Read Tunen 2 Timotíó 1 Bible Online

2 Timotíó 1 - Tunen bible

2 Timotíó 1

¹Ɔwámɛ á Báwolo, mɔsɔ́másɔma wa Yə́susu Kilísitusu, ɛ́sɛ́á Huɛlɛ́ a ná nɔ́yɛ́ híkə́kíə́, mɛ ná hɔ́ánána ɔ buɔmɔ́ ɔnɔŋɔna ɔbɔ́á Huɛlɛ́ a ná bílíhə́níə́ ɔ tɔ́mbákɛna na Yə́susu Kilísitusu.

²Mɛ ndɔ tilinə á Timotíó ɔ wamɛ́á mɔná ɔwá mɛ ndɔ hikiə, Huɛlɛ́ á Isə́ na Yə́susu Kilísitusu ɔ yəsúə́ Isə́lúkú bá aŋɔ́á nyɔnɔ, iwə́mɛɛ́lɔ na bumbə́nú índíə́.

³Mɛ ndɔ Huɛlɛ́ mohóloniə híə́niniə ɔwá mɛ ndɔ nyɛna na nibíkə́lə́siə naŋátɔ́ ɛ́sɛ́á bɛ́ámɛ́á bisə́kínə́, bulúə́ na buɔsɛ́ tɛ́á, mɛ ndɔ aŋɔ́á bɛ́kɔ́lɔmɔna ikúílí tɛ́á ɔyɛ́á mɛ ndɔ bɛ́kálɛ́na.

⁴Ikúílí ɔyɛ́á mɛ ná bɛ́áwɔ́á bililíní bɛ́kɔ́lɔmɔna, mɛ báka na ilókí yɛŋɛ́ŋa ɔ ɔwáwɔ usinə, ɔkɛaka ɔwá mɛ báá úndúə́tɔ́ na nɛhɔnɔ.

⁵Mɛ ndɔ yáwɔ́á ilumininə yɛ́ taká bɛ́kɔ́lɔmɔna ɔyɛ́á yɛ́ aŋɔ́á lɛ́á. Yáwɔ́á inyə́kínə́ á Lɔ́yisi na yáwɔ́á inyə́ á Ɛnísɛ bá ka bá na yɛ́táyɛ́ ilumininə ubusíə́ bɔ́ ikúílí. Mɛ lɛa ɛ́mɛ́nɛ́nátɔ́ ɔwá yɛ́ aŋɔ́á báka tɔ́na.

⁶Ɔ́ ɛlɔ́áyɛ́ nɔ́yɛ́ mɛ ndɔ aŋɔ́á bɛ́kɔ́lɔmɔnɛna ɔwá, ɔ niəbə hunyíə́ ɔnɛ́á Huɛlɛ́ a ná aŋɔ́á indíə́ ɛnaka mɛ aŋɔ́á makátá talɛna.

⁷Ɔ taká, tátá mɔlɛ́má wɔ́ bɔkɔ́lɔ́ma á Huɛlɛ́ a ná bəsú índíə́, mba, mɔlɛ́má wɔ́ iŋgínə́, wɔ́ nibo na wɔ́ nɛbɛ́hálɛna.

⁸Ɔ lɛ sɛ́má ɔ imbóŋi uhíə́niniə á yəsúə́ Isə́lúkú, ɔ lɛ sɛ́má tɔ́na ɛlɔ́áyɛ́ ámɛ ɔwá mɛ lɛ́á ɔ ɛbɔka ɛlɔ́áyɛ́ ayɛ́. Mba, ɔ́nɛ́nɛ́nátɔ́ ɔ injiŋə yɛ Huɛlɛ́, nyááka ɛmɔ́kɛ́ na mɛaŋɔ́á ɛlɔ́áyɛ́ Imbə́nú Yɛɛsɛ.

⁹Á Huɛlɛ́ a ná bəsú núə́kə́níə́, a ná bəsú ɛ́lɛ́ákɛ́na ɔkɛaka ɔwá búə́súə́ buɔmɔ́ bɔ́ báá bɔnaŋanaŋa. A sa nɔ́yɛ́ kɛa ɛlɔ́áyɛ́ bíə́súə́ bɛnyɛná, mba, ɛlɔ́áyɛ́ wə́yíə́ mɔanɔ wɔ́ bɛ́múɛ́tɛ́ na yayɛ́á nyɔnɔ. A ka bəsú yɛ́táyɛ́ nyɔnɔ índiə ubusíə́ bɔ́ nɛbɔ́tɛ́ná nɛ́ misí, ɔ tɔ́mbákɛna na Yə́susu Kilísitusu.

¹⁰Isíŋáka, bɛndɔ bá óso ɔ yɛ́táyɛ́ nyɔnɔ usinə ɔ tɔ́mbákɛna na nɛfámálana nɛ́ wəsúə́ Munuəniə á Yə́susu Kilísitusu. Ɔ tɔ́mbákɛna tɔ́na na Imbə́nú Yɛɛsɛ, a ná nyɛmbɛ́ nímə́síə́, a ná buɔmɔ́ na bɔnɔmɔ bɔ́ ikúílíə́kimə fə́mə́lə́níə́.

¹¹Ɔwámɛ ɛ́sɛ́á mɔsɔ́másɔma na muinə́niə, Huɛlɛ́ a ka mɛaŋɔ́á bɔsɔ́ma túə́niə bɔ́ Imbə́nú Yɛɛsɛ uyəmbələniə.

¹²Ɔ́ ɛlɔ́áyɛ́ nɔ́yɛ́ mɛ ndɔ mátáyɛ́ məsə́kə ísə́biniə. Mba, mɛ lɛ nɔ́yɛ́ bá na ɛsɛ́má, ɔ taká, mɛ ndɔ manya ɔ ɔwanɛ́ mɛ ná nɛ́ámɛ́á nɛkɔmba talɛna, mɛ lɛa ɛ́mɛ́nɛ́nátɔ́ ɔwá, a báka na iŋgínə́ yɛ utə́tə́niə yatɛ́ ɔyɛ́á a ná mɛaŋɔ́á índíə́, ɔkafámáká ɔ hinó hɛ́ bikə́lə́síníə́.

¹³Ɛtɛ́ná iŋgətí ɔ tiísi yɛ bɛtambá ɔbɛ́á mɛ ná aŋɔ́á lákɛ́na, tiŋímínə́ ɔ ilumininə na nibo ɔnɛ́á nɛ́ bəsú lɛ́á ɔ bɔlatɔ́ na Yə́susu Kilísitusu.

¹⁴Tə́tə́kə́níə́ bɛkɔa bɛɛsɛ ɔbɛ́á ɔ ná kúsə́nə́ ɔ tɔ́mbákɛna na Umbúínyi Mɔnaŋanaŋa ɔwá wɔ́ lɛ́á ɔ uwəsú nuúmə́.

¹⁵Ɔ ndɔ nɔ́yɛ́ manya ɔwá, bɛndɔ bəkimə bá Ásia bá ka mɛaŋɔ́á bɛ́sáŋɔna, sulusulu, á Fíkɛlɛ na Ɛlɛmɔ́kɛlɛ.

¹⁶Isə́lúkú á nikúlə nɛ́ Ɔnɛsifɔ́lɔ mɛɛ́luwə́ə́ bɔkɔasɛ́á, a ka bá a ndɔ mɛaŋɔ́á óníniə, a sa ɛsɛ́má ɔ́kɔ tɔ́na ɛlɔ́áyɛ́ ámɛ, ɔwámɛ ɔwá mɛ lɛ́á ɔ ɛbɔka.

¹⁷Ɔ nifəŋə, ɛnaka a ndáfáma ɔ Lɔ́ma, a ka ánya, a ná mɛaŋɔ́á síə́kə, a ná mɛaŋɔ́á bɔŋɔ.

¹⁸Ɔ ndɔ biolí bikimə manya muɛsɛ yáyɛ́ná mɔndɔ mukimə ɔbɛ́á a ná mɛaŋɔ́á nyɔ́kɛ́na ɔ Ɛfɛ́sɛ, Isə́lúkú á wɛɛ́ya mɛɛ́luwə́ á Huɛlɛ́ busíə́ ɔ hinó hɛ́ bikə́lə́síníə́.