Read Tunen 2 Timotíó 2 Bible Online

2 Timotíó 2 - Tunen bible

2 Timotíó 2

¹Nɔ́yɛ́, ɔwáwɔ, á wamɛ́á mɔná, ɔ́nɛ́nɛ́na ɔ nyɔnɔ ɔyɛ́á yɛ́ ndɔ bəsú húlínə na Yə́susu Kilísitusu.

²Yatɛ́ ɔyɛ́á mɛ́ ná aŋɔ́á úkúnə́kíə́ ɔ busíə́ bɔ́ bəmbóŋímboŋi bəəŋí, índíə́ yɛɛ́ta ɔ tokó yɛ bɛndɔ ɔkɛaka ɔwá, bəə́bu bɛ́múɛ́tɛ́ tɔ́na bá bámɛ́nɛ́ná hɔ́ánánátɔ́ ɔ bənə́bənə́ uwukúniə.

³Ísə́bíníə́ nɛ́áwɔ́á nioko nɛ́ məsə́kə ɛ́sɛ́á tiísi yɛ mɔkɔfɔnɛa wa Yə́susu Kilísitusu.

⁴Abáka mɔkɔfɔnɛa ɔwá a lɛ́á ilúkunə yɛ́ banɔabilə́, a lɛ bɛkɔa bɛ́ buɔmɔ́ bɔ́ mɔsá sókóbíə́, ábá a ndɔ siə ɔkɛa yatɛ́ ɔyɛ́á yayɛ́á isə́lúkú a ndɔ hikiə.

⁵Hɔ́ánánátɔ́ tɔ́na, abáka mɔnɔa a hɛŋgɛtɛ́nɛ́á hɛ́ nɛnɔba kusənə ábá a ná nɔ́áka ɛ́sɛ́á bɛtɛ́nɛ́mɛ́ná bɛ́ ndɔ siə.

⁶Mɔnyɔɔ ɛtɔbɔtɔ́bɔ́ ɔwá a ná ɛmɔ́kɛ́ nyááká ɔ buolí, wɛɛ́ya a ná hɔ́ánána ɔtaŋa ɔ nɛ́áyɛ́á nioko nɛ́ tɔtámátámá tɔ́ məhuə ukusənə.

⁷Ɔ́kɔ́kɛ́ná muɛsɛ yatɛ́ ɔyɛ́á mɛ ndɔ aŋɔ́á lɛna: Ɔ taká, Isə́lúkú a ŋɔ aŋɔ́á bɛkɔa bikimə mənyəsiə ɔbɛ́á bɛ́ ná tikənə.

⁸Bɛ́kɔ́lɔ́mɔ́ná Yə́susu Kilísitusu ɔwá a ná hɔ́ŋɔ́á ətíə́ yɛ bəwə́nú, ɔwá a lɛ́á ɔ hikúlə hɛ́ Ndə́witi ɔwɔŋgɔkɔnɔ Imbə́nú Yɛɛsɛ ɔyɛ́á mɛ ndɔ nɔŋɔna.

⁹Ɔ́ ɛlɔ́áyɛ́ yɛ́táyɛ́ Imbə́nú Yɛɛsɛ mɛ́ ndɔ ɛmɔ́kɛ́ nyáá ɔ nindínə́ ɔnɛ́á mɛ báka na mɛsáŋa ɛ́sɛ́á mucəŋə. Mba, ɛtambá yɛ́ Huɛlɛ́ yɛ́ lɛ bá ɔ mɛsáŋa!

¹⁰Ɔ́ ɛlɔ́áyɛ́ nɔ́yɛ́ mɛ́ ndɔ bikimə ísə́biniə ɛlɔ́áyɛ́ bɛtɛ́fa ɔkɛaka ɔwá, bəə́bu tɔ́na bá nibínuəniə na tuúmə tɔ́ ikúílíə́kimə kusə́nə ɔtɔ́á tɔ ndɔ húlínə na Yə́susu Kilísitusu.

¹¹Ɔ́ tiísi yɛ ɛtambá yɛ́ɛyɛ ɔyɛ́á bá ná hɔ́ánána ɔ nɛkɔmba ɔtálɛ́na: Ábá tɔ lɛ wə́ə́tɔ́ na wɛɛ́ya, na wɛɛ́ya tɔ́na tɔ ŋɔ nɔmɔkɔ.

¹²Ábá tɔ ná ísə́bíníə́ na wɛɛ́ya, na wɛɛ́ya tɔ́na tɔ ŋɔ manakɛna. Ábá tɔ ná wɛɛ́ya bɛ́sáŋɔ́ná, wɛɛ́ya tɔ́na a ŋɔ əsú bɛ́sáŋɔ́na.

¹³Ábá tɔ lɛ bá na yɔkɛ́nana, a ayɛ́ lɛa na yɔkɛ́nana, ɔ taká, a sa ósó ɔbɛ́sáŋɔ́na wɛɛ́ya bɛ́múɛ́tɛ́.

¹⁴Bɛ́kɔ́lɔ́mɔ́nɛ́ná bɛ́ɛ́yɛ́ bɛkɔa ɔ bɛndɔ bəkimə. Hɔ́kɛ́ná bəə́bu á Huɛlɛ́ busíə́ ɔwá, bá lɛ yɛ́nɛ́na ɔ mitə́ŋítə́ŋí yɛ́ bɛtambá. Yítə́yí mitə́ŋítə́ŋí yɛ́ lɛa ndəmə, yɛ́ ndɔ bááyɛ́ nənəsiə ɔbá bá ndɔ bɛɛ́ta ɔ́kɔ.

¹⁵Bɛ́ányɛ́na ɔ ubítíkə muɛsɛ á Huɛlɛ́ busíə́ ɛ́sɛ́á mɔndɔ wa ɔ́nɔ́kɛ́nátɔ, ɛ́sɛ́á mɔnyɛna ɔwá a lɛ ndɔ ɛsɛ́má ɔ́kɔ ɔ ɔwayɛ́ buolí, ɔwá a ndɔ ɛtambá yɛ́ taká nɔŋɔna hɔ́ánánátɔ́.

¹⁶Bítə́tə́kə́níə́ bilə́kə́tə́ bɛ́ ndəmə ɔbɛ́á bɛ́ lɛ́á nifəŋə na ilumininə, bááyɛ́ ɔbá bá ndɔ bɛɛ́ta ɔŋgɔ, bá ŋɔ ákaka hata na Huɛlɛ́ ɔ nɔ́yɛ́ ɔyáyɛ́na.

¹⁷Bíə́búə́ bilə́líə́ bɛ́ lɛa ɛ́sɛ́á ɛyɛkákɛ yɛ́ itóni. Ɛmɛnɛ́ na Filítoso bá lɛa ɔ uwəbú umúlə.

¹⁸Bá ka ɛnɔ́mɛ yɛ́ taká nana, bá bɛndɔ lakɛna ɔwá nɛhɔŋɔa nɛ́ ka tɔ́mba buɔnɔ́; nɔ́yɛ́ bá ndɔ ilumininə yɛ́ bɛndɔ bəəŋí kuəsiə.

¹⁹Ata nɔ́yɛ́, nɛtɛ́kɛ́ná nɛ́ ɔ́nɔ́kɛ́nátɔ́ ɔnɛ́á Huɛlɛ́ a ná hákɛ́na abáka nɛ́ lɛ kɔa. Ɔ́ bɛtambá bɛɛ́bɛ ɔbɛ́á bɛ́ lɛ́á kə́tə́kə́tɔ́ umə́, bɛ́ sɛ́á: «Isə́lúkú a ndɔ bɔayɛ́ manya, ata ɛ́yánɛ́ tɔ́na ɔwá a ndɔ niínyə nɛ́ Isə́lúkú tə́nə, á ákáná hata na bɔbɛ́á.»

²⁰Tátá ɔ́maná bɛfána na tusíní tɔ́ kóolo na tɔ́ sílíba tɔ́ booko ɔ miímə mɛŋɛ́ŋa, mba, tɔ́mɔtɛ́ tɔ́ booko tábɔ́nákátɔ́ na bɔlɛ́á na ɔmɛtá. Tɔ́ɔtɔ ɛlɔ́áyɛ́ tuúmə, túíní ɛlɔ́áyɛ́ bikúílí bɛ́ ndəmə.

²¹Nɔ́yɛ́, wɛ́ɛ́yɛ́ ɔwá a ndɔ bɛ́álɔ́na na bɛ́táyɛ́ binə́níníə́, a ŋɔ báá ɛ́sɛ́á hisíní hɛ́ tuúmə, a ŋɔ báá mɔsɛ́ŋɛ́ ɛlɔ́áyɛ́ yayɛ́á isə́lúkú, mɔsɛ́ŋɛ́ tɔ́na ɛlɔ́áyɛ́ ayɛ́, hɔ́ánánátɔ́ ɔ buolí buɛsɛ bukimə ɔ ɔkɛa.

²²Ɔwáwɔ á wamɛ́á mɔná á Timotíó, tɛbákɛ́ná bilókílókí bɛ́ bɔnɔ́kɔ́, síə́kə́ á nibítíkə nɛ́ tɛ́nɛ́mátɔ, ilumininə, nibo, bumbə́nú na báaba ɔbá bá ndɔ Isə́lúkú baŋɛna na mɔlɛ́má úmotí.

²³Níásá mitə́ŋítə́ŋí yɛ́ bɔála na yɛ́ ndəmə: Ɔ ndɔ manya ɔwá yɛ́ ndɔ bɛɔmɔ́nɔ húlə́nə.

²⁴Mba, ɛlɔ́áyɛ́ mɔnyɛna wa Isə́lúkú, a sá hɔ́ánana ɔ ɔwɔmɔ́nɔ; a ná hɔ́ánána ɔbáá ɛbɔ́yɛ́ ɔ busíə́ bɔ́ bəkimə, hɔ́ánánátɔ́ ɔ bɛndɔ uwukúniə na ɔ uwəbú uwisíbiniə.

²⁵A ná hɔ́ánáná ɔ bámɛɔ́kɔ ɔlɛ́ha na buyoyoní: Mɔndɔ a lɛ ndɔ manya, Huɛlɛ́ á óso ɔ uwəbú ikúílí uwíndiə yɛ́ malɔŋa ɔ ɔkɔ́ŋɔ́na na taká ɔ ɔmanya.

²⁶Nɔ́yɛ́, bá ŋɔ bɛ́manya, bá bɛ́ɔ́lɔ́ ɔ tɔlámba tɔ́ yití ɔwá a ná bəə́bu halɛ́na, a ná bəə́bu tuəníníə́ ɔ matá ma wə́yíə́ usiə.