Read Tunen 2 Timotíó 3 Bible Online

2 Timotíó 3 - Tunen bible

2 Timotíó 3

¹Manyá náana muɛsɛ ɔwá; bikúílí bɛ́ natákátɔ́ bɛ́ ŋɔ ndáfámá ɔ mɔɔsɛ́ má nitifə́.

²Ɔ taká, bɛndɔ bá ŋɔ bá na yoŋí, bɛŋgɔ́áyɛ́ bɛ́ mɔnɛ́á, bá ŋɔ bá bá ndɔ bíbə́liə, na niə́mə; bá ŋɔ bá bá ndɔ Huɛlɛ́ kɔ́ba, bá lɛ bíə́búə́ bisə́ ɔkɛna, bá lɛ buɛsɛ mánya, bá lɛ bɛkɔa bɛ́ Huɛlɛ́ lubunə.

³Bá ŋɔ bá na mɛlɛ́má mɛbɛ́á, ɛŋaná mahana, na mɔláŋa, na macaŋa, bɛndɔ ɔbá bá ndɔ manɔ́ŋɔ́ óloko, bá lɛ buɛsɛ hikíə́,

⁴bəlúə́ bɔsɔ́kɔ́, bá sulu liŋəkə, úndúə́tɔ́ na niə́mə; bá hikəkiə ɔ bíə́búə́ bilókílókí yáyɛ́ná Huɛlɛ́.

⁵Bá ŋɔ bɛkɔa bɛ́ ilumininə tə́tə́kəniə ɔbɛ́á bɛ́ ndɔ sinənə, mba, bá ŋɔ yayɛ́á injiŋə bɛ́sáŋɔna. Ɔ lɛ kində́níə́ tɔ́na na bááyɛ́ bɛndɔ!

⁶Ɔ taká, bɔ́mɔtɛ́ ɔ uwəbú ətíə́, bá húlə́ fíə́kinə ɔ məə́bə, tuəndə́ndú tɔ́ tɔmbɔ́kɔ́tɔ́ tɔ́ kɔakɔnɛna ɔ uwəbú tɔlámba, ɔbá bá lɛ́á na mabɛ́á məəŋí, bá bɛ́niasaka ɔ məndínə́ na məndínə́ má bilókílókí,

⁷tɔ́táyɛ́ tuəndə́ndú tɔ́ báka ɔbánɔ́ bikúílí bikimə ɔ ɔwɔkɔ́na, mba, ɛŋaná ɔkafámá ɔ taká ɔmanya.

⁸Hɔ́ánánátɔ́ ɛ́sɛ́á Yánɛsɛ na Yámbɛ́lɛsɛ bá ná Mósisi ɛ́ŋɛ́mána, nɔ́yɛ́, bááyɛ́ bɛndɔ bá ná taká ɛ́ŋɛ́mána tɔ́na. Ɔ́ bɛndɔ ɔbá bá lɛ ndɔ bɛkɔa sinə muɛsɛ, bɛndɔ bá ilumininə yɛ́ ndəmə.

⁹Mba, bá sa ndá əbú tɛkɔ́nɔ́á ɔ uwəbú mabɛ́kɔ́lɔmɔna, ɔ taká, búə́búə́ bɔlɛmanyá bɔ́ ŋɔ fámálana ɔ busíə́ bɔ́ bɛndɔ bəkimə, ɛ́sɛ́á iŋgətí yɛ bááyɛ́ báfandɛ́.

¹⁰Mba, ɔwáwɔ, ɔ ka ɔŋgɔkɛna muɛsɛ muɛsɛ ɔ ɔwámɛ bilə́líə́, ɔwámɛ nibítíkə, ɔwámɛ bɛfɛka, ɔwámɛ ilumininə, ɔwámɛ nisíbiniə, ɔwámɛ nibo, ɔwámɛ nitiŋiminə,

¹¹mámɛ́á mətəkəsənə na mámɛ́á məsə́kə ɔmá mɛ ná síə́kínə, ɔ Aŋatiɔ́sɛ, ɔ Ikɔniɔ́mɔ, ɔ Lísitɛlɛsɛ. Yatɛ́ nindínə́ nɛ́ mətəkəsənə mɛ́ sa sinə! Mba, ata nɔ́yɛ́, Isə́lúkú a ka mɛaŋɔ́á hutunə ɔ bɛ́ɛ́yɛ́ bikimə.

¹²Bá ŋɔ bááyɛ́ bəkimə təkəsəkə tɔ́na ɔbá bá ŋɔ siəkə uniŋə ɔ bɔkɔ́lɔ́ma bɔ́ Huɛlɛ́ na ɔ nɛtɔana na Yə́susu Kilísitusu.

¹³Bɛndɔ bá ɛŋgásɔ́ na bənímbə́ bɔsɔ́kɔ́ bá ŋɔ ayakɛna ɔ bɔbɛ́á, bá ŋɔ bɔ́mɔtɛ́ nímbə́kə, bá əbú bínímbə́kə́ tɔ́na.

¹⁴Mba ɔwáwɔ, ɔ ndɔ mukúniə manya muɛsɛ ɔwá a ná aŋɔ́á nɔ́yɛ́ úkúnə́kíə́, ɔ́nɛ́nɛ́na ɔ yatɛ́ ɔyɛ́á ɔ ná ɔ́kɔ́náka, ɔ ná lumínə́ tɔ́na na yɛmɛ́nɛna yikimə.

¹⁵Ɔ taká, ɔbalakɛna ɔ ɔwáwɔ bɔlɔ́matɔ́ bukimə, ɔ ndɔ Mətilə Manaŋanaŋa manya; ɔ tɔ́mbákɛna na ilumininə ɔ Yə́susu Kilísitusu, má óso ɔ ɔwáwɔ ɛmanya uwíndiə ɔyɛ́á yɛ́ ŋɔ aŋɔ́á kɛndakana ɔ nibínuəniə.

¹⁶Yatɛ́ yikimə ɔyɛ́á yɛ́ lɛ́á ɔ Mətilə, yɛ́ ndɔ húlínə na Huɛlɛ́, yɛ́ báka na mɔsɛ́ŋɛ́ ɛlɔ́áyɛ́ taká uwukúniə, bɛkanja ufə́mə́ləniə, ɛlɔ́áyɛ́ tɔkɔma ɔtábɔ́na na uwukúniə wɔ́ uniŋə ɔ yatɛ́ ɔyɛ́á yɛ́ lɛ́á tɛ́nɛ́mátɔ,

¹⁷ɔkɛaka ɔwá mɔnyɛna wa Huɛlɛ́, a báá bɛ́tábɔ́nákátɔ́ muɛsɛ ɛlɔ́áyɛ́ bɛnyɛná bɛɛsɛ bikimə ɔ ɔkɛa.