Read Tunen 2 Timotíó 4 Bible Online

2 Timotíó 4 - Tunen bible

2 Timotíó 4

¹Mɛ ndɔ aŋɔ́á manɛna na iŋgínə́ yikimə ɔ busíə́ bɔ́ Huɛlɛ́, na ɔ bɔ́ Yə́susu Kilísitusu ɔwá a ŋɔ bɔɔmɔ́ na bəwə́nú kə́lə́səkiə ikúílí tɛ́tɛ́á, mɛ ndɔ aŋɔ́á manɛna na iŋgínə́ yikimə tɔ́na ɛlɔ́áyɛ́ nɛndahíáná nɛ́ Kilísitusu, na nɛ́ nɛ́áyɛ́á Nɛmanɛna ɔwá,

²ɔ Ɛtambá yə́mbə́lə́kə́níə́ na yɛmɛ́nɛna yikimə ata ikúílí yɛɛsɛ mbá ata ɔ yɛbɛ́á, kɔ́áyáka, kɛnyáka, hɔ́ɔ́kɔ́ na makɛ́nda, úkúnə́kíə́ tɔ́na na nisíbiniə nɛ́ hɔ́ánánátɔ.

³Ɔ taká, ikúílí yɛ́ lɛa ɔ ɔsákɔna ɔyɛ́á bɔ́mɔtɛ́ bɛndɔ bá sɔ́ ŋɔ tiísi yɛ bilə́líə́ hikiə ɔwɔ́kɔ tɔ́na, mba, bá ŋɔ húlə́ bíə́búə́ bisə́lúkú ɔ́ŋgɔkɔ biəŋí ɔbá bá ŋɔ bəə́bu bɛkɔa lakɛna ɔbɛ́á bíə́búə́ bilókílókí bɛ́ ndɔ hikiə ɔwɔ́kɔ.

⁴Bá ŋɔ məlúə́ bíníbəkə, bá lɛ taká ɔ́kɔ, bá hikəkiə ɔbánɔ́ ɔwɔ́kɔ á tɔŋanáŋana tɔ́ bɛkanja.

⁵Mba ɔwáwɔ, bámɛ́nɛ́ná muyə́lə́ ɔ bɛkɔa bikimə, ísə́bíníə́ məsə́kə, nyɔ́ɔ́kɔ́ bɔ́áwɔ́á buolí bɔ́ mutúmbə́ləniə Imbə́nú Yɛɛsɛ, úndúsíníə́ bɔ́áwɔ́á bɔsɔ́ma muɛsɛ bɔ́ mɔnyɛna wa Huɛlɛ́.

⁶Ɔ taká, mɛ lɛa hoóyi ɔ ɔwámɛ buɔmɔ́ ɔ ɔnama á Huɛlɛ́, mɛ ná bɔ́ámɛ́á bɔsɔ́ma úndúsíníə́, yámɛ́á ikúílí yɛ́ məə́luəkə yɛ́ nɔ́ ndafama.

⁷Mɛ ná ituəmə yɛɛsɛ nɔ́áka, mɛ ná mɔlɛ́lá hɔa, mɛ ná ilumininə tə́tə́níə́.

⁸Nɛcabɛla nɛ́ nɛnɔba nɛ́ bátaká mɛ ndɔ táta isíŋáka ɔnɛ́á, Isə́lúkú á mukə́lə́siə wataká, a ŋɔ mɛaŋɔ́á índiə ɔ buɔsɛ́ bɔ́ mikə́lə́kí; mba, tátá ɔ ɔwámɛ bíbúə́, na bááyɛ́ bəkimə tɔ́na ɔbá, na nibo nikimə, bá ndɔ ikúílí yɛ́ nɛ́áyɛ́á nɛfámálana táta.

⁹Ányɔ́wánya, ɔ ndá mɛaŋɔ́á kɔ́áná tɔfá.

¹⁰Ɔ taká, Tɛ́masɛ a ka mɛaŋɔ́á tɛbakɛna bɔkɔasɛ́á, a ndɔ hikiə mɔŋɛ́ŋa á misí yɛ yɛ́ɛyɛ ɛhanyɛ. A ka ákána ɔ bətínə́ yɛ́ Tɛsalɔnɛ́ka, Kɛlɛsáŋɛsɛ ɔ bɔnɔŋɔ bɔ́ Kalasíə́, Títi ɔ bɔnɔŋɔ bɔ́ Talamasíə́.

¹¹Á Lúkasɛ bíbúə́ a lɛ́á na mɛaŋɔ́á. Káká, Ɛtá Mə́líkusu ákánáná wɛɛ́ya, ɔ taká, a lɛ mɔsɛ́ŋɛ́ ɛlɔ́áyɛ́ bɔ́ámɛ́á buolí.

¹²Mɛ ka Tisíki lɔ́ma ɔ bətínə́ yɛ Ɛfɛ́sɛ.

¹³Ɛnáká ɔ́ ndásá ɔ bətínə́ yɛ Tɔlɔwásɛ, ɔ bɔlɛŋa bɔ́ nikə húlə́nə ɔbɔ́á mɛ ná tíkə́ á Kálábusu ɔmbɛ́la, ɔ tuəfulə húlə́nə tɔ́na, sulusulu ɔ tɔ́ mukunə́ mɔŋɛ́ŋa, ɔ tɔ́ bɛɔfɔ.

¹⁴Alɛkɛsándɛlɛ á mulúnə́, a ka mɛaŋɔ́á bɔbɛ́á kɛaka ɛmbáta, Isə́lúkú a ŋɔ wɛɛ́ya híə́niniə ɔwɔŋgɔkɔnɔ bɛ́áyɛ́á bɛnyɛná.

¹⁵Ɔwáwɔ tɔ́na bítə́tə́kə́níə́ wɛɛ́ya, ɔ taká, a ka bísúmbə́niə na iŋgínə́ yikimə ɔ yatɛ́ ɔyɛ́á tɔ ndɔ laa.

¹⁶Ikúílí yíbúsíə́ yɛ́ nɛ́ámɛ́á nɛbɛ́kála, ata mɔndɔ a sa mɛaŋɔ́á híkə, bəkimə bá ka mɛaŋɔ́á tɛbakɛna. Huɛlɛ́ á bəə́bu nɛasɛ́na.

¹⁷Mba, Isə́lúkú a ka mɛaŋɔ́á híkə, a ná mɛaŋɔ́á óníníə́ ɔkɛaka ɔwá, mɛ yayɛ́á mɛsɔ́ma túmbə́lə́kə́níə́ hɔ́ánánátɔ́ ɔ nindínə́ ɔnɛ́á, bəkimə ɔbá bá lɛ bá Bɛyútɛnɛ bá yɛɛ́ta ɔ́kɔ́kɛ́ná muɛsɛ. A ná mɛaŋɔ́á hútúnə́ tɔ́na ɔ munuə wɔ́ iŋgoyó.

¹⁸Isə́lúkú a ŋɔ mɛaŋɔ́á hutunə tɔ́na ɔ məndínə́ ɔbánɔ́ má mabɛ́á məkimə, a ŋɔ kɛaka mɛ́ fínə́ ɛŋaná hɛkabalɛ ɔ nɛmanɛna nɛ́ Huɛlɛ́ ɔ nɔɔ́mɛná. Tuúmə tɔ́ bámɛ́nɛ́ná tɔ́áyɛ, ɔ tɔɛya na tɔɛya. Amɛna!

¹⁹Hólíə́ Bilísika na Akílasɛ, hɔ́ánánátɔ́ na nikúlə nɛ́ Ɔnɛsifɔ́lɔ.

²⁰Ɛlasátɛ a ka tíkə́nə ɔ bətínə́ yɛ Kɔlɛ́ŋɛ́tɛ, mɛ ka Tɔlɔfímɔsɔ tíkə ɔ yɛ Milɛ́tɛ, a ndɔ náá.

²¹Ányɔ́wánya ɔkɛaka ɔwá, ɔndafámá ubusíə́ bɔ́ ikúílí yɛ́ əmbumə. Ibulúsu, Bútɛsɛ, Líni, Kolótia na bənísə́ bəkimə bá ná aŋɔ́á hólíə́.

²²Isə́lúkú a báá na aŋɔ́á. Nyɔnɔ yɛ Huɛlɛ́ yɛ́ báá tɔ́na na bənú bəkimə.