Read Tunen Títi 1 Bible Online

Títi 1 - Tunen bible

Títi 1

¹Ɔwámɛ á Báwolo, mɔnyɛna wa Huɛlɛ́, mɔsɔ́másɔma wa Yə́susu Kilísitusu. Huɛlɛ́ a ka mɛaŋɔ́á tínímiə ɔ bááyɛ́ ɔ uhúlə́nə ɔbá a ná tɛ́fá ɔ ilumininə. Mɛ́ kɛ́áká tɔ́na ɔwá bá taká manyá ɔyɛ́á yɛ́ lɛ́á hɔ́ánánátɔ́ ɔ ilumininə yɛ́ bikilísitənə,

²Bá yɔnɛ́nɛna yɛ́ buɔmɔ́ bɔ́ ikúílíə́kimə kusə́nə ɔyɛ́á Huɛlɛ́ ɔwá abáka a lɛ kanja, á ná bílíhə́níə́ ubusíə́ bɔ́ bikúílí,

³Huɛlɛ́ ɔ wəsúə́ Munuəniə, a ka yɛɛ́ta fə́mə́ləniə ɔ bikúílí ɔbɛ́á a ná tínímíə́ ɔ tɔ́mbákɛna yáyɛ́á ɛtambá ɔ imbə́nú ɔyɛ́á a ná mɛaŋɔ́á bítíə́, a ná manɛ́ná tɔ́na ɔwá mɛ yɛɛ́ta yəmbə́lə́kə́níə́.

⁴Mɛ ndɔ híihi hiəfulə tilinə á Títi, ɔ wamɛ́á mɔná wa taká ɔwá tɔ lɛ́á ilumininə ɛ́mɔtɛ́: Huɛlɛ́ á Isə́ na Yə́susu Kilísitusu ɔ wəsúə́ Munuəniə, bá aŋɔ́á nyɔnɔ na bumbə́nú índíə́.

⁵Ábá mɛ ka aŋɔ́á tíkə ɔ bɔnɔŋɔ bɔ́ Kɛlɛ́tɛ, ɔ́ kɛaka ɔwá ɔ bɛkɔa hɔ́nála ɔ utikəlinə, ɔ́ bəkúkə tínímə́kíə́ ɔ mɔlɔ́á wɔ́ bilúkunə ɔ bətínə́ na bətínə́ tɛ́á ɛ́sɛ́á mɛaŋɔ́á bɛ́múɛ́tɛ́ mɛ ná aŋɔ́á báta.

⁶Mukúkə a ná hɔ́ánána ɔbáá ɛŋaná hɛkabalɛ, bɛ́lɛ́nátɔ́ muəndú ɔmɔtɛ́, báyɛ́á baná bá ná hɔ́ánána ɔbáá bəlumininə, bá lɛ bəə́bu sɔ́kɔ́nɛ́na ɔwá bá báka na malɔŋa mabɛ́á, na mafamɔ.

⁷Ɔ taká, Mutíkə tɛ́á a lɛa mɔkɛndana wa bɛkɔa bɛ́ Huɛlɛ́, ɔ́ ɛlɔ́áyɛ́ nɔ́yɛ́, a ná hɔ́ánána ɔbáá ɛŋaná hɛkabalɛ, a lɛ fáhá uliŋə, a lɛ bíndíə́ ɔ məluku, a lɛ caŋába, a lɛ məndíbə́ siə.

⁸A ná hɔ́ánána ɔbáá mɔkáhábɛndɔ, ɔwá á ndɔ buɛsɛ hikiə, mɔndɔ wa mabɛ́kɔ́lɔmɔna maasɛ, wa tɛ́nɛ́mátɔ, mɔnaŋanaŋa, mɔbɛ́kɔ́bɛ́na,

⁹bɛ́ɔ́lɔ́kɔ́kɛ́nátɔ́ muɛsɛ ɔ Ɛtambá yɛ́ nɛkɔmba ɔyɛ́á yɛ́ lɛ́á huɛ́ na bilə́líə́. Nɔ́yɛ́, a ŋɔ báá hɔ́ánánátɔ́ ɔ bɔsɔ́kɔ́ ɔ makɛ́nda uwíndiə ɔ tɔ́mbákɛna na tiísi yɛ bilə́líə́. Na bááyɛ́ ɔ níə́búə́ níbínímbə uwinə́niə ɔbá bá lɛ ndɔ bɛ́áyɛ́á bilə́líə́ luminə.

¹⁰Ɔ taká, bəəŋí, sulusulu ətíə́ yɛ́ bikilísitənə bɛ́ Bɛyútɛnɛ, bá lɛa na mafamɔ, bá ndɔ lə́kə́tə, bá nímbə́kənə tɔ́na.

¹¹Bá ná hɔ́ánána ɔ uwəbú ɔ minuə ukuiyiə. Bá ndɔ nikúlə nikimə ɔ məə́bə ndúmbúlə, ikúílí ɔyɛ́á bá ndɔ bəə́bu úkúniə yatɛ́ ɔyɛ́á yɛ́ lɛ bá hɔ́ánánátɔ ɛlɔ́áyɛ́ mɔsábɔ́náná ɔwá wɔ́ ndɔ ɛsɛ́má húlə́nə.

¹²Wɔmɔtɛ́ mɔhɛ́nátɔtányɛ́ ɔ uwəbú ətíə́ a sɛ́á: «Bɛndɔ bá Kɛlɛ́tɛ bá booko bikúílí bikimə bakanjakanja, mɛnyama yɛ ɛŋgásɔ́, ɛmbíákɛ́, bá bɛ́kɔ́lɔmɔkɔna há ɔnɛ́á.»

¹³Yatɛ́ ɔyɛ́á a ndɔ laa, yɛ́ báka imbóŋi yɛ taká. Kɔ́áyákɛ́ná bəə́bu muɛsɛ muɛsɛ, ɔkɛaka ɔwá bá bá na ilumininə yɛ́ ɛŋaná məhilə́.

¹⁴Bá lɛ bɛ́ɔ́lɔ́kɛ́ná tɔ́na ɔ tɔŋanáŋana tɔ́ Bɛyútɛnɛ na bikotí bɛ́ bɛndɔ ɔbá bá ndɔ taká əlimə túmə.

¹⁵Bikimə bɛ́ lɛa naŋátɔ́ ɛlɔ́áyɛ́ bááyɛ́ ɔbá bá lɛ́á naŋátɔ. Mba, ata bɔɔ́la bɔ́ naŋátɔ́ bɔ́ lɛ bá ɛlɔ́áyɛ́ bááyɛ́ ɔbá bá lɛ́á bɛ́táfálákátɔ, bááyɛ́ tɔ́na ɔbá bá lɛ ndɔ hikiə ulumininə, ɔ nifəŋə, níə́búə́ nibíkə́lə́siə na yəbúə́ ɛmanya yɛ́ báka bɛ́táfálákátɔ.

¹⁶Bá ndɔ fə́mə́ləniə ɔwá bá ndɔ Huɛlɛ́ manya, mba, bíə́búə́ bɛnyɛná bɛ́ ndɔ nifəŋə ínə́niə. Tátá bɛndɔ ɔbá bá ná hɔ́ánána uhikiə, bɛndɔ ɔbá bá lɛ ndɔ nɛmanɛna bə́tiə, bá sa ósó ɔ buɛsɛ ɔkɛa.