Read Tunen Títi 2 Bible Online

Títi 2 - Tunen bible

Títi 2

¹Mba, ɔwáwɔ, úkúnə́kíə́ yatɛ́ ɔyɛ́á yɛ́ lɛ́á hɔ́ánánátɔ́ ɔ bilə́líə́ bɛ́ taká.

²Lɛná tɔkala tɔ́ bɛndɔ ɔwá bá bɛ́kɔ́bɔ́kɛ́na, bá bíbə́tə́kíə́, bá ná hɔ́ánána ɔbáá na mabɛ́kɔ́lɔmɔna maasɛ, ɔ́nɛ́nɛ́nátɔ́ ɔ tiísi yɛ ilumininə, na ɔ nibo, na nitiŋiminə.

³Hɔ́ánánátɔ, lɛná tɔkala tɔ́ bəəndú ɔwá bá bítíkə́kə́ ɛ́sɛ́á bɛndɔ banaŋanaŋa, bá lɛ sɔkɔ́nɔ, bá lɛ híáná bɛɔlɛ́ bɛ́ məluku, bá índiəkinənə á məlíhə́ní maasɛ,

⁴nɔ́yɛ́, bá bɛsɔ́mbɔna bɛ́ bəəndú úkúnə́kíə́ ɔwá, mɔɛ́ta tɛ́á a yayɛ́á ibə́ na bááyɛ́á baná híkə́kíə́.

⁵Bá bámɛ́nɛ́ná na mabɛ́kɔ́lɔmɔna maasɛ, bá lɛ bambɛ́á, bá yəbúə́ miímə yɛ nɛbɛ́lɛna tə́tə́kə́níə́ muɛsɛ, na malɔŋa maasɛ, mɔɛ́ta tɛ́á bílólósólíə́tɔ́ á yayɛ́á ibə́ ɔkɛaka ɔwá, bɛndɔ bá lɛ ɛtambá yɛ́ Huɛlɛ́ kɔba.

⁶Hɔ́ánánátɔ́, índíə́kínə́ makɛ́nda ɔ bɛnɔ́kɔ́nɔkɔ bɛ́ bɛndɔ ɔwá, bá bámɛ́nɛ́ná na mabɛ́kɔ́lɔmɔna maasɛ

⁷ɔ bɛkɔa bikimə. Aŋɔ́á bɛ́múɛ́tɛ́, ɔ ná hɔ́ánána ɔ iŋgətí yɛ bɛnyɛná bɛɛsɛ uwinə́niə. Bɛ́áwɔ́á binə́níníə́ bɛ́ bámɛ́nɛ́ná bɛ́ taká, bɛ́ ɔ́nɔ́kɛ́nátɔ.

⁸Bɛ́áwɔ́á bɛtambá bɛ́ bámɛ́nɛ́ná tɛ́nɛ́mátɔ, bɛ́ báá tɔ́na ɔbɛ́á bá sa ósó utə́ŋə́niə ɔkɛaka ɔwá, mubəniə á sɛ́má bɔkɔasɛ́á, a sa hɛkɔma hɛbɛ́á bɔ́ŋɔ ɔ uwəsú ulúmə.

⁹Bɛɔlɛ́ bá bámɛ́nɛ́ná bílólósólíə́tɔ́ ɔ bɛkɔa bikimə ɔ busíə́ bɔ́ bíə́búə́ bisə́lúkú. Bá kɛáka ɔwá bíə́búə́ bisə́lúkú bá báá na nɛhɔnɔ na bəə́bu. Bá lɛ bəə́bu bɛ́kámɔ́sɔ́ná mɔbɛ́á,

¹⁰ata ɔ uwəbú uwobínə. Bá bítíkə́kə́ hɔ́ánánátɔ́, na yɔkɛ́nana uwəbú busíə́. Nɔ́yɛ́ mbá bá ŋɔ binə́níníə́ bɛ́ Huɛlɛ́ ɔ wəsúə́ Munuəniə lúbúnəkə ɔ bɛkɔa bikimə.

¹¹Ɔ taká, Huɛlɛ́ a ka yayɛ́á nyɔnɔ fə́mə́ləniə ɔyɛ́á yɛ́ ndɔ nibínuəniə índiə ɔ bɛndɔ bəkimə.

¹²Yɛ́ ndɔ bəsú ínə́niə ɔ bɔlɔŋa bɔbɛ́á na bilókílókí bɛ́ misí ɔbɛ́sáŋɔ́na ɔkɛaka ɔwá, tɔ niŋə́kə́ isíŋáka ɔ buɔmɔ́ bɔ́ nɛbɛ́hálɛna, bɔ́ bátaká na yɔkɛ́nana á Huɛlɛ́.

¹³Ɔ́ nɔ́yɛ́ tɔ ndɔ ikúílí yɛ́ nɛhɔnɔ táta ɔyɛ́á tɔ ndɔ nánɛna, hinó ɔhɛ́á tuúmə tɔ́ yəsúə́ Huɛlɛ́ ɔ mɛŋɛ́ŋa na Munuəniə á Yə́susu Kilísitusu tɔ́ ŋɔ ɛ́nána.

¹⁴A ka bɛ́hánɛna wɛɛ́ya bɛ́múɛ́tɛ́ ɛlɔ́áyɛ́ əsú, ɔkɛaka ɔwá a bəsú háŋɔ́ná ɔ məndínə́ məkimə má bɔbɛ́á, a ka kɛaka tɔ́na tɔ ná híáná yáyɛ́á ilúkunə yɛ́ naŋátɔ, hoóyi na ilókí yikimə yɛ́ biolí bɛɛsɛ ɔkɛa ikúílí tɛ́á.

¹⁵Ɔ́ nɔ́yɛ́ ɔ ná hɔ́ánána ɔ bɔsɔ́kɔ́ uwukúniə, na bufəyí bukimə ɛlɔ́áyɛ́ makɛ́nda uwíndiə ɔ bááyɛ́ ɔbá bá ndɔ aŋɔ́á ɔ́kɔ, na uwəbú ɔkɔ́áyɛna. Ata mɔndɔ a lɛ tíkə́ aŋɔ́á yomosiə.