Read Tunen Títi 3 Bible Online

Títi 3 - Tunen bible

Títi 3

¹Bɛ́kɔ́lɔ́mɔ́nɛ́ná bəlumininə ɔwá, bá ná hɔ́ánána ubílólosoliə ɔ busíə́ bɔ́ bakɛndana na bamanɛna, bá bəə́bu ɔ́kɔ́kɛ́nɛ́na, bá báá hoóyi ɔ ɔkɛa yatɛ́ yikimə ɔyɛ́á yɛ́ lɛ́á yɛɛsɛ.

²Bá lɛ ɔsɔ́kɔ́ kɔba, bá lɛ ɔ́mɔnɔ, bá bámɛ́nɛ́ná bá bumbə́nú na nibítíkə nɛɛsɛ, bá báá na mɔlɛ́má wɔ́ uhikəniə, bɛbɔ́yɛ́ ɔ busíə́ bɔ́ bɔsɔ́kɔ́ bəkimə.

³Ɔ taká, bəsú tɔ́na tɔ ka bá buɔnɔ́ balɛmanyá, bəcəŋə, nanákátɔ, bɛɔlɛ́ bɛ́ məndínə́ məkimə má bilókílókí na məsiomo má misí. Tɔ ka bá tɔ ndɔ ŋgásɔ́bɔa, na ɛhɔ́tɔ́hɔ́tɔ, tɔ ka bá nyəkə́; tɔ bányákana bəsú na bəsú.

⁴Mba, ɛnaka Huɛlɛ́ ɔ wəsúə́ Munuəniə á wə́yíə́ mɔlɛ́má muɛsɛ na nɛ́áyɛ́á nibo fə́mə́lə́níə́ ɛlɔ́áyɛ́ bɛndɔ,

⁵a ka bəsú nuəkəniə, tátá bɔkɔasɛ́á tɔ ka bɛnyɛná bɛ́ bátaká kɛaka, mba, ɛlɔ́áyɛ́ yáyɛ́á iwə́mɛɛ́lɔ. A ka bəsú nuəkəniə, a ná bəsú bíə́nə́síə́ ɔ buɔmɔ́ buɔ́sɔ ɔ tɔ́mbákɛna na mənífə́ má nɛsɔa, na Umbúínyi Mɔnaŋanaŋa.

⁶A ka bəsú wútə́yí Umbúínyi Mɔnaŋanaŋa ayɛna ɔ ɔyáyɛ́na, ɔ tɔ́mbákɛna na wəsúə́ Munuəniə á Yə́susu Kilísitusu.

⁷Ɔkɛaka ɔwá, ɛ́sɛ́á a ná bəsú híə́nə́síə́ bátaká ɔwayɛ́ busíə́ ɔ tɔ́mbákɛna na yayɛ́á nyɔnɔ, tɔ́ híáná bɛtilíkinənə yɛ́ buɔmɔ́ bɔ́ ikúílíə́kimə ɔyɛ́á tɔ ndɔ nánɛna.

⁸Yɛ́ɛyɛ Ɛtambá yɛ lɛa hɔ́ánánátɔ ɔ nɛkɔmba ɔtálɛ́na. Mɛ ndɔ siə ɔwá ɔ ɛ́mbɛ́nɛ́ná mɔŋɛ́ŋa ɔ yɛ́ɛ́yɛ́ ɛsalɛ ɔkɛaka ɔwá, bááyɛ́ bəkimə ɔbá bá ná níə́búə́ nɛkɔmba tálɛ́ná á Huɛlɛ́, bá bíndíə́ na yəbúə́ iŋgínə́ yikimə, bá bámɛ́nɛ́ná bá busíə́ ɔ bɛkɔa bɛɛsɛ ɔkɛa. Nɔ́yɛ́ yɛ́ lɛ́á yɛɛsɛ na mɔsɛ́ŋɛ́ ɛlɔ́áyɛ́ bəkimə.

⁹Túmə əlimə ɔ mitə́ŋí yɛ́ ndəmə na usiə wɔ́ nihúlínə́ nɛ́ nikúlə ɔ ɔmanya. Túmə əlimə tɔ́na ɔ mitə́ŋí na ɔwɔŋgɔkɔnɔ umbə́ndə́ wɔ́ Mósisi. Ɔ taká, bɛ́ɛ́yɛ́ bikimə bɛ́ lɛa ndəmə ɛŋaná mɔsɛ́ŋɛ́.

¹⁰Ábá ɔ ná wɛ́ɛ́yɛ́ ókósíə́ ɔ ikúílí yíbúsíə́ ɔwá a ndɔ kɛsalɛ́á háá, ɔ bikúílí bɛ́fandɛ́, álɔ́ná wɛɛ́ya ɔ ilúkunə;

¹¹ɔ taká, ɔ ndɔ manya ɔwá, yɛ́ɛ́yɛ́ ɛnya yɛ mɔndɔ a báka nanákátɔ, mɔkɛamabɛ́á, a ndɔ bɛ́hɔ́kɛna wɛɛ́ya bɛ́múɛ́tɛ́.

¹²Ɛnáká mɛ́ Alɛtɛmásɛ mbá ata á Tisíki lɔ́má ɔwáwɔ busíə́, ɔ fáhaka ɔkɛaka ɔwá ɔ ndá mɛaŋɔ́á kɔ́ána ɔ bətínə́ yɛ Nɛkɔbɔlísi, ɔ taká, mɛ ka bɛtɛ́nɛ́mɛ́ná ɛta ɔwá, ɔ umə́ mɛ ŋɔ ikúílí yɛ́ əmbumə túmbə́kiə.

¹³Sókóbókíə́ na ilókí yikimə Sɛ́nasɛ á mukə́lə́siə na Abolóso ɔ uwəbú mɔkɛnda mukimə ɔkɛaka ɔwá, bá lɛ sɔ́ká ata bɔɔ́la.

¹⁴Bə́súə́ bɛndɔ bá ná hɔ́ánána ɔbáá bə́búsíə́ ɔ bɛkɔa bɛɛsɛ ɔkɛa ɛlɔ́áyɛ́ tɔkɔma túbúsíə́ ɔsɔ́mba, yatɛ́ ɔyɛ́á bá ndɔ sɔ́ka, yɛ́ lɛ bəə́bu aŋgɛna. Nɔ́yɛ́, bá ŋɔ bá na tɔtámátámá tuəŋí ɔ uwəbú buɔmɔ́.

¹⁵Bəkimə ɔbá bá lɛ́á na mɛaŋɔ́á, bá ndɔ bənú bíhóliə. Bíhólíə́ bááyɛ́ bəkimə tɔ́na ɔbá bá ndɔ bəsú hikiə ɔ ilumininə. Huɛlɛ́ á bənú bəkimə nyɔnɔ índíə́.[1]