Read Tunen Filómono 1 Bible Online

Filómono 1 - Tunen bible

Filómono 1

¹Ɔwámɛ á Báwolo ɔwá mɛ lɛ́á ɔ ɛbɔka ɛlɔ́áyɛ́ Yə́susu Kilísitusu, na munísə́ á Timotíó, mɛ ndɔ nɔ́yɛ́ tilinə ɔ yəsúə́ ɛŋgɔ́áyɛ́ yuhikiə na ikindəniə yɛ́ buolí á Filómono.

²Áfia tɔ́na ɔ wəsúə́ munísə́ ɔ muəndú na Alakíbi ɔ yə́súə́ ikindəniə yɛ́ bilə́, ɔ ilúkunə tɔ́na ɔyɛ́á yɛ́ ndɔ kɔtana ɔ ɔwáwɔ miímə.

³Huɛlɛ́ ɔ yəsúə́ Isə́ na Isə́lúkú á Yə́susu Kilísitusu bá bənú nyɔnɔ na bumbə́nú índíə́.

⁴Ikúílí tɛ́á ɔyɛ́á mɛ ndɔ kálɛ́na ɛlɔ́áyɛ́ áwɔ, mɛ ndɔ yamɛ́á Huɛlɛ́ mohóloniə híə́niniə;

⁵Mɛ ndɔ ɔ́kɔ ɛ́sɛ́á bá ndɔ hɛ́na ɔwɔŋgɔkɔnɔ nɛ́áwɔ́á nibo ɛlɔ́áyɛ́ bəlumininə na yáwɔ́á ilumininə á Isə́lúkú á Yə́susu Kilísitusu.

⁶Mɛ ndɔ Huɛlɛ́ bata ɔwá, ilumininə ɔyɛ́á ɔ ndɔ afana na bəsú, yɛ́ báá yɛɛsɛ ɔkɛaka ɔwá, bɛndɔ bá buɛsɛ bukimə manyá ɔbɔ́á tɔ ná ósó ɔkɛa ɛlɔ́áyɛ́ Kilísitusu ɔnyɛna.

⁷Á munísə́, mɛ báka na nɛhɔnɔ na makɛ́nda ɔ mɔlɛ́má, ɔ taká, ɔ ka mɔlɛ́má wɔ́ bəlumininə óníniə na nɛ́áwɔ́á nibo.

⁸Ata nɔ́yɛ́ ɛ́sɛ́á, ɔ bɔlatɔ́ na Kilísitusu, mɛ ndɔ laa na kuənjə ɔ ɔwáwɔ ɔbata yatɛ́ ɔyɛ́á ɔ ná hɔ́ánána ɔkɛa.

⁹Ɔwámɛ á Báwolo á hɛkala hɛ́ mɔndɔ ɔwá mɛ lɛ́á isíŋáka mɔndɔ wa ɛbɔka ɛlɔ́áyɛ́ niínyə na nibo nɛ́ Kilísitusu, mɛ ná hikə́kíə́ ɔ ɔwáwɔ ɔbata.

¹⁰Mɛ ndɔ aŋɔ́á bɛ́tɔ́kɔ́lɛna ɛlɔ́áyɛ́ Ɔnɛsímə ɔ wamɛ́á mɔnámbɛna ɔ Kilísitusu nuúmə́ háha ɔ ɛbɔka.

¹¹Ɔ bííní bikúílí, a ka báá bɔɔ́la bɔ́ ndəmə ɛlɔ́áyɛ́ áwɔ, mba, isíŋáka, a lɛa na mukunə́ ɛlɔ́áyɛ́ áwɔ na mɛaŋɔ́á.

¹²Ɔwayɛ́ ɔwá a lɛ́á ɛsalɛ yɛ́ wə́míə́ mɔlɛ́má, isíŋáka, mɛ ndɔ aŋɔ́á wɛɛ́ya híə́niniə.

¹³Ikúílí ɔyɛ́á mɛ lɛ́á ɔ ɛbɔka ɛlɔ́áyɛ́ Imbə́nú Yɛɛsɛ, há mɛ ka hikəkiə ɔwayɛ́ utə́tə́niə ɔ ɔwámɛ ɛmɛ́ŋɛ́ ɔkɛaka ɔwá, a mɛaŋɔ́á nyɔ́kɛ́na ɔ ɔwáwɔ ɛlɔ́á.

¹⁴Mba, mɛ sa hikiə ɔ nɔ́yɛ́ ɔkɛa aŋɔ́á ɛŋaná uluminə ɔkɛaka ɔwá, ɔ lɛ buɛsɛ kɛ́á ɔ yəə́kə ɔmbáŋá, mba, ɔ́ bɔɛ́ta kɛ́áká na mɔlɛ́má naŋátɔ.

¹⁵Yɛ́ óso ɔbáá ɔwá, bá ka Ɔnɛsímə álɔ́na na aŋɔ́á ɛlɔ́áyɛ́ tɛ́tɛ́á yɛ ikúílí ɔkɛaka ɔwá, bá aŋɔ́á wɛɛ́ya híə́níníə́ ɛlɔ́áyɛ́ ikúílíə́kimə.

¹⁶Isíŋáka, a lɛ bá yɔɔ́ndɔ yɛ́ itə́mbí, mba, a báka ɔ yáyɛ́ná yɔɔ́ndɔ; munísə́ wuhikiə. A báka na mukunə́ sulusulu ɛlɔ́áyɛ́ ámɛ, mba, a ná hɔ́ánána ɔ nɔ́yɛ́ ɔbáá ɔ ɔyáyɛ́na ɛlɔ́áyɛ́ áwɔ ɔ ɔwayɛ́ bɔlɔŋa bɔ́ mɔsá, ata ɛ́sɛ́á kilísitənə.

¹⁷Ábá ɔ ndɔ mɛaŋɔ́á sinə ɛ́sɛ́á wawɔ́á munísə́ ɔ ilumininə, káhá wɛɛ́ya ɛ́sɛ́á mɛaŋɔ́á bɛ́múɛ́tɛ́.

¹⁸Ábá a ka aŋɔ́á tɛŋakɛnɛna, ataná ɔ ndɔ wɛɛ́ya kála, ɛtɛ́na ɔ ɔwámɛ niínyə.

¹⁹Mɛaŋɔ́á Báwolo, ɔ́ wə́míə́ mɔkátá wɔ́ utilə wúuwu, mɛaŋɔ́á bɛ́múɛ́tɛ́ mɛ ŋɔ aŋɔ́á híə́niniə; mɛ lɛ ndɔ aŋɔ́á bɛ́kɔ́lɔmɔnɛna ɔwá, ɔ báka tɔ́na na bɔ́ámɛ́á buhínə, ɔ́ bɔ́áwɔ́á buɔmɔ́ bɔ́ aŋɔ́á bɛ́múɛ́tɛ́.

²⁰Ɛ́ɛ! Á munísə́, kɛ́áká yatɛ́ ɔyɛ́á mɛ ndɔ siə ɛlɔ́áyɛ́ nibo nɛ́ Isə́lúkú, óníníə́ wə́míə́ mɔlɛ́má ɔ Kilísitusu nuúmə́.

²¹Ɔ yɛ́ɛyɛ ikúílí ɔyɛ́á mɛ ndɔ aŋɔ́á tilinə, mɛ ndɔ manya muɛsɛ muɛsɛ ɔwá, ɔ ŋɔ mɛaŋɔ́á índiə yatɛ́ ɔyɛ́á mɛ ndɔ aŋɔ́á bata. Mɛ ndɔ manya ɔwá, ɔ ŋɔ nɔ́yɛ́ kɛaka ɔ ɔyáyɛ́na.

²²Tábɔ́nákɛ́ná mɛaŋɔ́á bɛsianɛ́ná ikúílí ɛ́mɔtɛ́. Mɛ ndɔ nánɛna ɔwá, nyɔnɔ na mə́núə́ mabɛ́kálɛ́na, mɛ ŋɔ nda bənú híánɛ́na.

²³Ɛbafalásɛ ɔwá a lɛ́á ɔ ɛbɔka na mɛaŋɔ́á ɔ niínyə nɛ́ Yə́susu Kilísitusu, a ndɔ aŋɔ́á bíhólíə́,

²⁴Mə́líkusu, Alisitálɛ́kɛsɛ, Tɛ́masɛ na Lúkasɛ ɔ bɛ́ámɛ́á bikindəniə bɛ́ buolí, bá ndɔ aŋɔ́á bíhólíə́ tɔ́na.

²⁵Nyɔnɔ yɛ Isə́lúkú á Yə́susu Kilísitusu yɛ́ bámɛ́nɛ́ná na bənú.