Read Tunen Hɛ́bɛlɛ 10 Bible Online

Hɛ́bɛlɛ 10 - Tunen bible

Hɛ́bɛlɛ 10

¹Umbə́ndə́ wɔ́ Mósisi wɔ́ lɛa ɔbánɔ́ iŋgətí ɔyɛ́á yɛ́ ndɔ bəsú bɛkɔa ínə́niə ɔbɛ́á bɛ́ lɛ́á ɔ ɔsákɔna; wɔ́ lɛ bá tokó yɛ bɛɛ́la bɛɛsɛ bɛ́ nitifə́. Bɛndɔ bá ndɔ mahánɛna híánɔlɔna hiɔŋɔ tɛ́á, ɔ nɛ́táyɛ́ nindínə́ bá ndɔ siə ɔbɛ́nyálɛla á Huɛlɛ́ busíə́. Mba, mááyɛ́ mahánɛna má sa ósó ɔ uwəbú unəŋəsiə á Huɛlɛ́ busíə́.

²Ata bááyɛ́ ɔbá bá ndɔ Huɛlɛ́ lúbúnə ɔ nɛ́táyɛ́ nindínə́ bá bámɛnɛna naŋátɔ́ ɔ ɔwayɛ́ busíə́ ikúílí ɛ́mɔtɛ́ ɔ mɛɛ́lɔ yɛ bikúílí bikimə, há bá lɛ bá tɔ́na, há abáka bá lɛ mahánɛna índíə́ tɔ́na.

³Mba ɔ taká, ɔ tɔ́mbákɛna na mááyɛ́ mahánɛna, bɛndɔ bá ndɔ mə́búə́ mabɛ́á bɛ́kɔ́lɔmɔna hiɔŋɔ tɛ́á.

⁴Bɔkɔasɛ́á manɔ́ŋɔ́ má bɛfɔŋɔ na má bikitə má sa ósó ɔ mabɛ́á ɔsɔ́tɔ ata ɔ hííní hinó.

⁵Ɔ́ ɛlɔ́áyɛ́ nɔ́yɛ́, ɔ ikúílí Kilísitusu a ná báá ɔ ndásákɔ́na ɔ misí, a ka Huɛlɛ́ lɛna sɛ́á: «Ɔ sa hikiə ɔwá bá mɛnyama ɔ́nɔ́kɔ́ ɔ ɔwáwɔ uwíndiə ɔ bɛnamá ata mahánɛna, mba, ɔ ka kɛaka ɔwá mɛ báá na mɛɛ́lɔ.

⁶Ɔ sa luminə ata bɛfɔná bɛ́ hakákátɔ́ ɔ bɛnamá, mbá ata mɛnyama yɛ́ ɔ́nɔ́kɔ́tɔ́ ɛlɔ́áyɛ́ nɛnɛasɛna nɛ́ mabɛ́á.

⁷Nɔ́yɛ́, mɛ ka aŋɔ́á lɛna ɔwá; á yamɛ́á Huɛlɛ́, ɔ́ mɛaŋɔ́á wɔ́ɔwɔ, mɛ ka ndasá ɔ ɔkɛa yatɛ́ ɔyɛ́á ɔ ndɔ siə. Hɔ́ánánátɔ́ ɛ́sɛ́á bá ná tílə́kə ɔ ɔwáwɔ hiəfulə.»

⁸Kilísitusu a ná naŋɔ́ laa a sɛ́á: «Huɛlɛ́ a sa luminə ɔwá bá mɛnyama ɔ́nɔ́kɔ́ mbá bá wɛɛ́ya índíə́ ɔ bɛnamá, ata mahánɛna, ata bɛfɔná bɛ́ hakákátɔ, mbá ata mɛnyama yɛ́ ɔ́nɔ́kɔ́tɔ́ ɛlɔ́áyɛ́ nɛnɛasɛna nɛ́ mabɛ́á. A sa hikiə, nɔ́yɛ́ yɛ́ sa bá muɛsɛ ɛlɔ́áyɛ́ ayɛ́, mbá bá lɛ nɔ́yɛ́ kɛaka ɛ́sɛ́á Umbə́ndə́ wɔ́ ndɔ bata.»

⁹Əlimə yɛ nɔ́yɛ́, a ná kɔndá a sɛ́á: «Ɔ́ mɛaŋɔ́á wɔ́ɔwɔ, mɛ ka ndasá ɔ ɔkɛa yatɛ́ ɔyɛ́á ɔ ndɔ siə.» Ikúílí Kilísitusu a ndɔ hɔ́ɔ́ nɔ́yɛ́, a ndɔ ínə́niə ɔwá Huɛlɛ́ a ndɔ bɛnamá bɛ́ buɔnɔ́ húə́siə ɔkɛaka ɔwá, a hɛŋákɛ́na na nɛhánɛna niɔ́sɔ.

¹⁰Yə́susu Kilísitusu a ka kɛaka yatɛ́ ɔyɛ́á Huɛlɛ́ a ndɔ siə, a ka bɛ́hánɛna ikúílí ɛ́mɔtɛ́ ɛlɔ́áyɛ́ bikúílí bikimə ɔkɛaka ɔwá, Huɛlɛ́ a bəsú nə́ŋə́síə́ ɔ uwəsú mabɛ́á.

¹¹Ɔ nɛtɔana nɛ́ buɔnɔ́, Bətitiəmahánɛna bá lɛ tɛ́nɛ́maka buɔsɛ́ tɛ́á ɔ uwəbú bɔsɔ́ma uwundúsiniə na bɛnamá ɔhíánɔlɔna uwíndiə bikúílí biəŋí ɔbɛ́á bɛ́ sa ósó ɔ mabɛ́á ɔsɔ́tɔ.

¹²Ɔ nifəŋə, Kilísitusu a ka nɛhánɛna índiə ikúílí ɛ́mɔtɛ́ ɔ mɛɛ́lɔ yɛ bikúílí bikimə ɛlɔ́áyɛ́ mabɛ́á ɔsɔa, isíŋáka a lɛa tuənə́tɔ́ ɔ mɔkátá wɔ́ bɛnɔ́mɛ wɔ́ Huɛlɛ́ ɛlɔ́áyɛ́ ikúílíə́kimə.

¹³A ndɔ táta ɔwá Huɛlɛ́ a kɛ́áka ɔwá báyɛ́á bokóyíkoyi bá báá nɛbɛ́lɛ́nɛ́ná nɛ́ máwɔ́á makɔlɔ́.

¹⁴Ɔ tɔ́mbákɛna na nɛ́áyɛ́á nɛhánɛna bíbúə́, a ka kɛaka ɔwá bɛndɔ ɔbá a ná mabɛ́á sɔáka bá híáná bááyɛ́ ɔbá Huɛlɛ́ a ná nə́ŋə́síə́ ɔ ikúílíə́kimə.

¹⁵Nɔ́yɛ́ Umbúínyi Mɔnaŋanaŋa a ndɔ bəsú lɛna tɔ́na ɔwá, bɛ́ɛ́yɛ́ bɛkɔa bɛ́ lɛa taká, a ka taŋa ɔ ɔlaa a sɛ́á:

¹⁶«Isə́lúkú a ka fə́mə́ləniə ɔwá, əlimə yɛ tɔ́táyɛ́ tunó, ɔ́ nɛtɔana nɛ́ɛnɛ mɛ ŋɔ hákɛna na bəə́bu. Mɛ ŋɔ yə́míə́ imbə́ndə́ tiləkə ɔ uwəbú mɔlɛ́má, na uwəbú mafɛka.»

¹⁷A ná kɔndá tɔ́na a sɛ́á: «Ata mə́búə́ mabɛ́á mbá ata túə́búə́ tɔkɔma, mɛ sa ndábɛ́kɔ́lɔ́mɔ́ná tɔ́na.»

¹⁸Nɔ́yɛ́, ikúílí bá ná mabɛ́á má mɔndɔ nɛasɛ́na, abáka muití a lɛ nɛhánɛna índíə́ tɔ́na ɛlɔ́áyɛ́ mabɛ́á.

¹⁹Ɛlɔ́áyɛ́ nɔ́yɛ́, á bənísə́, tɔ lɛa na kuənjə yɛ ufínə ɔ ɛbɔ́ka yɛnaŋanaŋa ɔhá Huɛlɛ́ a lɛ́á, ɔ tɔ́mbákɛna na manɔ́ŋɔ́ má Yə́susu ɔmá a ná ólókóko ɔ nɛhánɛna.

²⁰Yə́susu a ka nɛbata sələniə uwəsú busíə́, nɔ́yɛ́, ɛ́sɛ́á a lɛ́á muɔmɔ́, a ka bəsú ɛnɔ́mɛ yɔɔ́sɔ kuninə ɔyɛ́á yɛ́ ndɔ bəsú ákánana ɔ buɔmɔ́ bɔ́ ikúílíə́kimə, nɛbata ɔnɛ́á a ná sələ́níə́, ɔ́ yayɛ́á mɛɛ́lɔ yɛ bɛ́múɛ́tɛ́ ɔyɛ́á bá ná ɔ́mɔ́kɛ́na.

²¹Tɔ báka na Mutitiəmahánɛna mɔŋɛ́ŋa ɔwá a lɛ́á ɔ mɔlɔ́á wɔ́ ilúkunə ɔyɛ́á yɛ́ lɛ́á yɛ́ Huɛlɛ́.

²²Nɔ́yɛ́, tɔ́ tɔ́mbálɛ́la nə́ə á Huɛlɛ́ busíə́ na wə́súə́ mɔlɛ́má mukimə, na nɛkɔmba nikimə, tɔ lɛ bíyə́bə́ bɔkɔasɛ́á, Yə́susu a ka yə́súə́ mɛlɛ́má sɔaka na máyɛ́á manɔ́ŋɔ́, a ná yəsúə́ mɛɛ́lɔ sɔáká na mənífə́ naŋátɔ.

²³Huɛlɛ́ a ka bəsú bɔɔ́la bílíhə́niə, a ndɔ kɛa yatɛ́ ɔyɛ́á a ná laa, nɔ́yɛ́, tɔ́ yəmbə́lə́níə́ ɔ mianyɔ́ yatɛ́ ɔyɛ́á a ná bəsú bílíhə́níə́.

²⁴Tɔ́ ənú híkə́kə́nə́ bəsú na bəsú ɔkɛaka ɔwá, tɔ bá na makɛ́nda ɔ uhikəniə, na bɛkɔa bɛɛsɛ ɔkɛa.

²⁵Tɔ lɛ kɔtɔ́ ɔ uwəsú manyáná ɛ́sɛ́á abáka bɔ́mɔtɛ́ bɛndɔ bá kɛaka. Ɔ nifəŋə, tɔ́ ənú makɛ́nda índíə́kínə́nə́ bəsú na bəsú, nɔ ndɔ manya muɛsɛ ɔwá, hinó ɔhɛ́á Isə́lúkú á Yə́susu a ŋɔ ndahíáná hɛ́ lɛa hoóyi.

²⁶Ɔ taká, ábá mɔndɔ a ndɔ ɛnɔ́mɛ yɛ́ taká manya mbá a lɛ ndɔ hikiə ɔwɔŋgɛna umə́, nɛhánɛna nɛ́ lɛ bá tɔ́na ɔnɛ́á nɛ́ óso bɔ́táyɛ́ bɔbɛ́á ɔsɔ́tɔ.

²⁷Yɛ́ nɔ́ tíkə́nə ɔwá, mɔndɔ a ɛsɔ́kɔ́tɛa yɛ́ Huɛlɛ́ tátáká na bɔkɔ́lɔ́ma bukimə, yɛ́ɛ́yɛ́ ɛsɔ́kɔ́tɛa yɛ́ lɛa ɔwá, a ŋɔ ákána ɔ nɛsanákɛ́ nɛ́ hiwə hɛŋɛ́ŋa ɔhá bəcəŋə bá Huɛlɛ́ bá ŋɔ fíə́kinə.

²⁸Nɔ ndɔ manya ɔwá, ɛnakaka mɔndɔ a umbə́ndə́ wɔ́ Mósisi nɔkɔ́ ɔ busíə́ bɔ́ bəmbóŋímboŋi báfandɛ́ ata bálálɔ́, bá lɛ muití ɔ́nɔ́kɔ ɛŋaná mahana.

²⁹Ábá yɛ́ lɛa nɔ́yɛ́ ɔ mɔndɔ ɔwá a ndɔ umbə́ndə́ wɔ́ Mósisi nɔkɔ, məsə́kə maŋɛ́ŋa má ŋɔ báá ɛlɔ́áyɛ́ wɛ́ɛ́yɛ́ ɔwá a ndɔ Mɔná wa Huɛlɛ́ yəniə, ɔwá a ndɔ manɔ́ŋɔ́ má nɛtɔana ndɛ́ŋɛ́lɛna ɔmá bá ná wɛɛ́ya nəŋə́síə́, na wɛ́ɛ́yɛ́ ɔwá a ndɔ Umbúínyi Mɔnaŋanaŋa kɔ́ba ɔwá wɔ́ ndɔ bɛkɔa bɛɛsɛ kɛa ɔ bɛndɔ.

³⁰Ɔ taká, tɔ ndɔ nɔ́yɛ́ manya ɔwá, Isə́lúkú á Huɛlɛ́ a ka laa a sɛ́á: «Mɛaŋɔ́á mɛ ŋɔ imbunə híə́niə, mɛaŋɔ́á mɛ ŋɔ mɔɛ́ta tɛ́á wə́yíə́ mɔsábɔ́náná índiə.» A ná láá tɔ́na a sɛ́á: «Mɛaŋɔ́á mɛ ŋɔ bɛndɔ bá yámɛ́á ilúkunə kə́lə́səkiə.»

³¹Ɛmɔ́kɛ́ na wɛ́ɛ́yɛ́ ɔwá a ŋɔ kɔɛna ɔ makátá má Huɛlɛ́ ɔwá a lɛ́á muɔmɔ́!

³²Nɔ́ bílúníníə́ ɛ́sɛ́á nɔ ná bámɛ́nɛ́nɛ́na ɔ́ yítə́ní ikúílí, nɔ ka məsə́kə siəkinə mɔŋɛ́ŋa ɛnaka nɔ́ isəmú yɛ́ Huɛlɛ́ kúsə́nə, ituəmə yɛ́ iŋgínə́ nɔ́ ná nɔ́áka, mba, nɔ ka ísə́biniə.

³³Ɔ yɛ́mɔtɛ́ ikúílí, bá ka bənú kɔ́báka bá ná bənú təkə́sə́kə ɔ nɛnáka. Ɔ yɛ́mɔtɛ́ ikúílí tɔ́na, bɔ́mɔtɛ́ bá ka báá hoóyi ɔ ɛmɔ́kɛ́ yɛ bəkúlə́kulə ɔ ɔwafana.

³⁴Nɔ ka nioko nɛ́ məsə́kə má bɛndɔ bá ɛbɔka afakana, ikúílí bá ná bɔ́áwɔ́á bɔɔ́la ɛtá, nɔ ka luminə na nɛhɔnɔ ɔ bɔɛ́ta ɔniasa, nɔ manyaka muɛsɛ ɔwá nɔ lɛa na nɛbɔ́ŋɔ nɛɛsɛ ɔnɛ́á nɛ́ sá ndáhɔa.

³⁵Ɛlɔ́áyɛ́ nɔ́yɛ́, nɔ́ níə́núə́ nɛkɔmba tálɛ́ná bikúílí bikimə á Huɛlɛ́, nɔ ŋɔ mɔsábɔ́náná kusənə tɔ́na.

³⁶Yɛ́ lɛa ɔwá nɔ báá na nitiŋiminə ɛlɔ́áyɛ́ ɔkɛa yatɛ́ ɔyɛ́á Huɛlɛ́ a ndɔ siə, nɔ́yɛ́ mbá nɔ́ kusə́nə́ yatɛ́ ɔyɛ́á a ná bənú bílíhə́níə́.

³⁷Ɔ taká, Huɛlɛ́ a ndɔ laa ɔ ɔwayɛ́ hiəfulə a sɛ́á: «Ikúílí tɛ́tɛ́á, yɛ́ nɔ́ tíkə́nilə tɔ́na tɛ́tɛ́á, wɛ́ɛ́yɛ́ ɔwá a ná hɔ́ánána ɔndasá, a ŋɔ ndafama, a sɔ́ ŋɔ nə́ŋə́liniə.

³⁸Ɛlɔ́áyɛ́ nɔ́yɛ́, wɛ́ɛ́yɛ́ ɔwá a lɛ́á wataká ɔwámɛ busíə́, a ŋɔ nɔmɔkɔ ɔ tɔ́mbákɛna na ilumininə, mba, ábá a ná mɛaŋɔ́á bɛ́sáŋɔ́ná, mɛ sa ndábá tɔ́na na yáyɛ́á ilókí.»

³⁹Tɔ lɛ bá ətíə́ yɛ bááyɛ́ ɔbá bá ndɔ híána na əlimə, ɔbá bá ndɔ ákána ɔ uwəbú bunímə́. Ɔ nifəŋə, tɔ báka ɔbánɔ́ bááyɛ́ ɔbá bá ndɔ lumininə, tɔ ndɔ kɛnda tɔ́na ɔ ɛnɔ́mɛ ɔyɛ́á yɛ́ ndɔ bəsú ákánana ɔ nibínuəniə.