Read Tunen Hɛ́bɛlɛ 11 Bible Online

Hɛ́bɛlɛ 11 - Tunen bible

Hɛ́bɛlɛ 11

¹Ilumininə yɛ́ lɛa yɔnɛ́nɛna yɛ́ bɛkɔa ɔbɛ́á tɔ ndɔ nánɛna, na yɛmɛ́nɛna yɛ́ bɛ́ɛ́yɛ́ ɔbɛ́á tɔ lɛ ndɔ sinə.

²Bɛndɔ bá buɔnɔ́ bá ka Huɛlɛ́ lumininə, ɔ́ ɛlɔ́áyɛ́ nɔ́yɛ́ Huɛlɛ́ a ná bəə́bu lumínə.

³Ɔ tɔ́mbákɛna na ilumininə, tɔ ndɔ ɔ́kɔ muɛsɛ ɔwá, Huɛlɛ́ a ka bɔɛ́na tábɔ́naka na yáyɛ́á ɛtambá ɔ nindínə́ ɔnɛ́á, bɔɔ́la ɔbɔ́á tɔ ndɔ sinə na məə́sə, bɔ́ ndɔ húlínə na yatɛ́ ɔyɛ́á tɔ lɛ ndɔ sinə.

⁴Ɔ tɔ́mbákɛna na ilumininə, Ábɛlɛ a ka nɛhánɛna nɛɛsɛ índiə á Huɛlɛ́, nɛ́ ka bámɛnɛna nɛɛsɛ yáyɛ́ná nɛ́ Káyɛna. Nyɔnɔ na yɛ́táyɛ́ ilumininə á Huɛlɛ́ a ná wɛɛ́ya ɛ́lɛ́nɛ́ná wataká, Huɛlɛ́ bɛ́múɛ́tɛ́ a ka nɛɛ́ta luminə. Ɔ tɔ́mbákɛna na yáyɛ́á ilumininə Ábɛlɛ a nabáka ɔ ɔhɔ́ɔ́ ata nɔ́yɛ́ ɛ́sɛ́á a lɛ́á wə́ə́tɔ.

⁵Ɔ tɔ́mbákɛna na ilumininə, Huɛlɛ́ a ka Hɛ́nɔkɔ ákánana ɔ nɔɔ́mɛná wɛɛ́ya muɔmɔ́, bá lɛ ndɔ wɛɛ́ya sinə tɔ́na, a sa bá wə́ə́tɔ. Ɔ taká, Huɛlɛ́ a ka nɛ́áyɛ́á nibítíkə hikəkiə, ɔ́ ɛlɔ́áyɛ́ nɔ́yɛ́ a ná wɛɛ́ya ákánána ɔ nɔɔ́mɛná.

⁶Huɛlɛ́ a sa ósó ɔ nibítíkə nɛ́ mɔndɔ uhikiə abá sá lumininə ɔ ɔwayɛ́. Ɔ taká, wɛ́ɛ́yɛ́ ɔwá a ndɔ tɔ́mbálɛla á Huɛlɛ́ ɛmɛ́ŋɛ́, a ná hɔ́ánána ɔ luminə ɔwá Huɛlɛ́ a booko, á lumínə́ tɔ́na ɔwá, a ndɔ mɔsábɔ́náná índiə ɔ bááyɛ́ ɔbá bá ndɔ wɛɛ́ya siə.

⁷Ɔ tɔ́mbákɛna na ilumininə, Nówa a ka Huɛlɛ́ ɔ́kɛ́na, a ná wɛɛ́ya mənyə́síə́ ɔwɔŋgɔkɔnɔ bɛkɔa ɔbɛ́á ɛkasɛ bɛ́ bɛ́kɛ́áka, a sa bá a ndɔ bɛ́táyɛ́ bɛkɔa sinə, mba, a ka wɛɛ́ya ɔ́kɛ́na. A ka Huɛlɛ́ ɔ́kɛ́na, a ná lánjɛ tábɔ́náka ɛ́sɛ́á Huɛlɛ́ a ná wɛɛ́ya lɛ́na, a ná fínə́ umə́ na nɛ́áyɛ́á nikúlə nikimə, Huɛlɛ́ a ná bəə́bu nuəkə́níə́. Nɔ́yɛ́, a ná ínə́níə́ ɔwá nibítíkə nɛ́ bə́ə́ní nɛ́ sa bá nɛɛsɛ bɔkɔasɛ́á, bá sa Huɛlɛ́ lumininə, a ka ayɛ́ Huɛlɛ́ luminə, nɔ́yɛ́ Huɛlɛ́ a ná wɛɛ́ya ɛ́lɛ́nɛ́ná wataká.

⁸Ɔ tɔ́mbákɛna ná ilumininə, Ábɛlaháma a ka Huɛlɛ́ ɔ́kɛ́na ɛnaka a wɛɛ́ya ɛ́lɛ́ákɛ́na: A ná mɔkɛnda ɛtá ɔ ɔwákaka ɔ bɔnɔŋɔ ɔbɔ́á Huɛlɛ́ a ná bílíhə́níə́ ɔwá bɔ́ ŋɔ híána bɔ́áyɛ. A ná ákáná tɔ́na a lɛ manyá ɔ ɛbɔ́ka ɔyɛ́á a ndɔ ákána.

⁹Ɔ tɔ́mbákɛna na ilumininə, a ná falábáká ɛ́sɛ́á mukiníə́nú ɔ misí ɔyɛ́á Huɛlɛ́ a ná wɛɛ́ya bílíhə́níə́, a ka tuənəkinə ɔ kɔ́mbɔ na Ísakɛ na Yákɔbɔ ɔbá bá ná nɛkaka kusə́nə́ ɛ́sɛ́á wɛɛ́ya.

¹⁰Ɔ taká, Ábɛlaháma a ka bá a ndɔ bətínə́ táta ɔyɛ́á yɛ́ lɛ́á na bɛtɛ́kɛ́ná ɔ́nɔ́kɛ́nátɔ, ɔyɛ́á Huɛlɛ́ wɛɛ́ya bɛ́múɛ́tɛ́ a ná bílúmə́kíníə́ nəníə́ mbá á mɛɛ́ta falábáka, a ná mɛɛ́ta falábáka.

¹¹Ɔ tɔ́mbákɛna na ilumininə, Salá wɛɛ́ya tɔ́na, ata ɔ ɔwayɛ́ bulunú, Huɛlɛ́ a ka kɛaka ɔwá a báá hɔ́ánánátɔ́ a ayɛ́ ɛndɛkɛ kusə́nə bɔkɔasɛ́á, a ka bá a ndɔ manya ɔwá, Huɛlɛ́ a ŋɔ nɛ́áyɛ́á nɛkaka úndúsiniə.

¹²Ɔ́ ɛlɔ́áyɛ́ nɔ́yɛ́, ata nɔ́yɛ́ ɛ́sɛ́á Ábɛlaháma a ná bá yɔ́kɔ́bɔ́nɔ́tɔ́, hoóyi na uwə́ə́, a ka baná bíə́nəkə bəəŋí ɛ́sɛ́á tusənji tɔ́ ɔmbáŋá, ɛ́sɛ́á mɔsɛ́á wɔ́ ɛsɛ́lɛ́ yɛ́ nɔmɔ́ ɔwá ata mɔndɔ a sa ósó ɔfana.

¹³Ábɛlaháma na bááyɛ́ bɛndɔ bəkimə bá ka wə́kunə ɛŋaná ukusənə yatɛ́ ɔyɛ́á Huɛlɛ́ a ná bəə́bu bílíhə́níə́, mba, ɔ tɔ́mbákɛna na yə́búə́ ilumininə, bá ka manya ɔwá, bá lɛa na bɛ́táyɛ́ bɛɛ́la, bá ka báá na nɛhɔnɔ. Bá ka manya tə́lə́ŋu ɔwá bá ka báá bəkiníə́nú, batɛká ɔ misí.

¹⁴Bááyɛ́ ɔbá bá ndɔ hɔ́ɔ́ nɔ́yɛ́, bá ndɔ ínə́niə tə́lə́ŋu ɔwá, bá ndɔ bɔnɔŋɔ buinə́buinə́ siə ɔbɔ́á bɔ́ lɛ́á yəbúə́ tiísi yɛ bɔnɔŋɔ.

¹⁵Ata bá yɛ́ɛ́yɛ́ misí bɛ́kɔ́lɔ́mɔ́na ɔyɛ́á bá ná tíkə́, há bá ka siəkə ɔ ndahíáná umə́.

¹⁶Ɔ taká, bá ka báá na ilókí yɛ́ bɔnɔŋɔ buɛsɛ ɔhá bá ŋɔ ákaka umə́, ɔ́ niɔŋɔ́ á nɔɔ́mɛná. Ɔ́ ɛlɔ́áyɛ́ nɔ́yɛ́ Huɛlɛ́ a sa sɛ́ma ɔwá bá wɛɛ́ya ɛ́lɛ́ákɛ́nɛ́ná yəbúə́ Huɛlɛ́ bɔkɔasɛ́á, a ka bəə́bu bɔnɔŋɔ tábɔ́nakɛna ɔ nɔɔ́mɛná.

¹⁷Ɔ tɔ́mbákɛna na ilumininə, Huɛlɛ́ a ka Ábɛlaháma kɔsɔna, a ná wɛɛ́ya lɛ́na ɔwá, a wɛɛ́ya wayɛ́á mɔná á Ísakɛ índíə́ ɛ́sɛ́á nɛhánɛna, a ná lumínə́. A ka báá hoóyi ɔ yáyɛ́á yohí yɛ́ mɔná ɔhánɛna,

¹⁸mbá nɔ́yɛ́ Huɛlɛ́ a ka wɛɛ́ya bílíhə́niə ɔwá, á Ísakɛ a ŋɔ kɛaka yayɛ́á ɛndɛkɛ yɛ́ bunə.

¹⁹Ɔ taká, Ábɛlaháma a ka bá a ndɔ manya ɔwá, Huɛlɛ́ a báka na iŋgínə́ yɛ bəwə́nú ɔ uhuŋuəsiə. Ɔ́ ɛlɔ́áyɛ́ nɔ́yɛ́ a ná wɛɛ́ya wayɛ́á mɔná híə́níníə́, ɔ́maná ɛ́sɛ́á a ná hɔŋɔ́á ɔ nyɛmbɛ́. Nɔ́yɛ́ yɛ́ ka báá bɔkɔa ɔbɔ́á ɛkasɛ bɔ́ ndáfama.

²⁰Ɔ tɔ́mbákɛna na ilumininə, Ísakɛ a ka Yákɔbɔ na Ɛsawú sana ɔwɔŋgɔkɔnɔ na bɛkɔa ɔbɛ́á bɛ́ ŋɔ nda bəə́bu fámɛ́ná ɔ bikúílí bɛ́ ɔ́sákɔna.

²¹Ɔ tɔ́mbákɛna na ilumininə, Yákɔbɔ a ná baná bá Yɔ́sɛbɛ saná ubusíə́ ɔbɔ́á a ndɔ wə́ə́; a ná bítínínə ɔ ɛnjá yɛ́ wə́yíə́ mulúmbə, a ná Huɛlɛ́ nyámáka.

²²Ɔ tɔ́mbákɛna na ilumininə, Yɔ́sɛbɛ, ɔ nisúki nɛ́ bɔ́áyɛ́á buɔmɔ́, a ka hɔ́ɔ́kɔ nəníə́ á ɛndɛkɛ Ísilahɛ́lɛ bá ŋɔ fámáka ɔ bɔnɔŋɔ bɔ́ Ikíbíto, nəníə́ tɔ́na bá ŋɔ kɛaka na bɛ́áyɛ́á biuhə́.

²³Ɔ tɔ́mbákɛna na ilumininə, isə́ na inyə́ yɛ Mósisi, ɛnaka bá wɛɛ́ya bíə́nə́, bá ka siəkinə ɔwá a lɛa hɛkákátɔ, bá sa umbə́ndə́ wɔ́ munəni bɛ́kɛna, bá ná wɛɛ́ya bítə́ ɔkafámáká miilí ɛ́lálɔ́.

²⁴Ɔ tɔ́mbákɛna na ilumininə, ɛnaka Mósisi a híáná mɔhɔ́mɔ́, a sa hikiə ɔwá bá wɛɛ́ya ɛ́lɛ́ákɛ́nɛ́ná mɔná wa milóní yɛ Falahɔ́ŋɔ.

²⁵A ka hikəkiə ɔwá, a ɛmɔ́kɛ́ nyááká ɛ́sɛ́á báyɛ́á bənísə́ á bɛndɔ bá Ísilahɛ́lɛ, á ilúkunə yɛ́ Huɛlɛ́, yáyɛ́ná ɔ ɔbáá ɔ nɛhɔnɔ wɛɛ́ya ɔ bɔbɛ́á nuúmə́. Abáka yɛ́ɛ́yɛ́ ɛnya yɛ nɛhɔnɔ nɛ́ lɛ mɔŋa.

²⁶A ka siəkinə ɔwá ɛmɔ́kɛ́ ɔnyáá ɛ́sɛ́á Kilísitusu, wɛ́ɛ́yɛ́ ɔwá Huɛlɛ́ a ŋɔ lɔ́ma ɔ misí, yɛ́ lɛa na mɔsɛ́ŋɛ́ yáyɛ́ná nɛbɔ́ŋɔ ɔnɛ́á nɛ́ lɛ́á ɔ Ikíbíto. A ka bá a ndɔ kəsínə á mɔsɛ́ŋɛ́ ɔwá a ŋɔ kusənə.

²⁷Ɔ tɔ́mbákɛna na ilumininə, Mósisi a ka hɔalɛna ɔ Ikíbíto, a lɛ hilóbi hɛ́ munəni kɔlɔma, a ná ɛ́mbɛ́nɛ́na ɔ wákaka ɔ́maná ɛ́sɛ́á a ndɔ Huɛlɛ́ sinə ɔwá bá sa ndə́sinə.

²⁸Ɔ tɔ́mbákɛna na ilumininə, a ná Básɛ́ka[1] tíkə́, a ná manɛ́na ɔwá bá manɔ́ŋɔ́ má mɛnyama fofókíə́ ɔ tɔkɔ́kɛ ɔkɛaka áŋgɛlɛ ɔyɛ́á Huɛlɛ́ a ná lɔ́má ɔ bɛndɔ ɔwɔ́nɔ, yɛ́ lɛ baná bə́búsíə́ bá ɛndɛkɛ Ísilahɛ́lɛ ɔnɔ.

²⁹Ɔ tɔ́mbákɛna na ilumininə, Ɛndɛkɛ Ísilahɛ́lɛ bá ka nɔmɔ́ nɛnyɔakánɔ́ bíásakɛna ɛ́sɛ́á ɔ misí yɛ kɔ́tákátɔ, mba, ɛnaka bɛndɔ bá Ikíbíto bá ɔŋgɛ́na ɔ uwəbú, mənífə́ má ná bəə́bu bəkimə mɛna.

³⁰Ɔ tɔ́mbákɛna na ilumininə, Ɛndɛkɛ Ísilahɛ́lɛ bá ka bətínə́ yɛ Yəlíko bɛ́nɛ́ŋɛ́lakɛna tunó tɔ́lɛ́ndálɔ, ɔ tunó tɔ́lɛ́ndɔ́lɔ́mɔnɔ, ɛmbambala yɛ́ mɔkákɔ yɛ́ bətínə́ yɛ́ ná sukúnúə́kíə́.

³¹Ɔ tɔ́mbákɛna na ilumininə, muəndú wa mɔkɛnda á Lahábɛ a ka batɛ́ka bá Ísilahɛ́lɛ káha na bumbə́nú bukimə, ɛlɔ́áyɛ́ nɔ́yɛ́, ɛnaka bɛndɔ bá Ísilahɛ́lɛ bá báá ɔ bokóyíkoyi bá Huɛlɛ́ ɔwɔ́nɔ, bá sa wɛɛ́ya ɔ́nɔ.

³²Mɛ háha hɔ́kɛ́na ɔ ɔwanɛ́ mbá mɛ tíkə́ ɔwanɛ́ əə́? Ikúílí yɛ́ lɛ bá ɔkɛaka ɔwá tɔ́ hɔ́kɛ́na ɛsalɛ yɛ́ Kɛtɛhɔ́ŋɔ, Balákɛ, Sámɛsɔ́ŋɔ, yɛ́ Yɛfɛtɛ́, Ndə́witi, Sámuɛlɛ na bə́ə́ní bɔhɛ́nátɔtányɛ́ bəkimə.

³³Ɔ tɔ́mbákɛna na yə́búə́ ilumininə, bɔ́mɔtɛ́ bá ka mɔnɔŋɔ nuəkiə, bá ná nɔba, bá ka taká bɛ́kɛakɛna ɔ uwəbú buɔmɔ́, bá ná kusə́nə́ tɔ́na yatɛ́ ɔyɛ́á Huɛlɛ́ a ná bílíhə́níə́. Bɔ́mɔtɛ́ bá ná minuə yɛ́ biŋgoyó kuiyíə́kíə́.

³⁴Bɔ́mɔtɛ́ bá ná tuwə tɔ́ kɔnjɔ́kɔ́tɔ́ tɔŋɛ́ŋa niməkə, bɔ́mɔtɛ́ bá ná bɛ́ɔ́lɔ́ ɔ mɛkɔ́átá yɛ́ bilə́. Bɔ́mɔtɛ́ bá ka báá tɔmbɔ́tɔ́ ɛ́sɛ́á bɛnákɛnákɛ, mba Huɛlɛ́ a ka bəə́bu óníniə. Bɔ́mɔtɛ́ bá ka báá banɔabilə́ baŋɛ́ŋa, bá ná mɛlɔ́ŋɔ́ yɛ́ bilə́ yɛ́ mɔnɔŋɔ mənə́mənə́ búlə́kə.

³⁵Ɔ tɔ́mbákɛna na yə́búə́ ilumininə, bəwə́nú bá bɔ́mɔtɛ́ bəəndú bá ka hɔŋɔakɛ, bá ka bəə́bu siəkinə na mə́búə́ məə́sə. Bɔ́mɔtɛ́ ɔbá bá ná hɔ́ŋɔ́ákɛ́á, bá ka luminə ɔwá bá bəə́bu təkə́sə́kə́ ɔ nindínə́ ɔnɛ́á bá wə́kúnə. Bá ka hikəkiə ɔ ɛmɔ́kɛ́ ɔnyáá ɔkɛaka ɔwá bá buɔmɔ́ bɔ́ ikúíllíə́kimə kusə́nə́ əlimə yɛ ikúílí.

³⁶Bɔ́mɔtɛ́ bá ka luminə ɔwá bá bəə́bu kɔbaka, bá bəə́bu hɔ́ányáka, bá bɔ́mɔtɛ́ hákɛ́na ɔ mɛsáŋa, bá bəə́bu hákɛ́na ɔ ɛbɔka.

³⁷Bá ka bɔ́mɔtɛ́ ɔ́nɔ́kɔ na miɔkɔ, bá ná bɔ́mɔtɛ́ sɛ́káká na bɛsɔ́ bɛkɛ́tɛ báfandɛ́, Bɔ́mɔtɛ́ bá ná wə́kúnínə ɔ mɔkɔ́átá. Ɔ yɛ́mɔtɛ́ ikúílí, lɛŋábákátɔ́ na bɛɔfɔ bɛ́ ɛndɔ́mbá ata bɛ́ imúínyi, bá húlə́ nəyəkə, tɔndɔ́ányɛ́, bá bəə́bu təkəsəkə, bá bəə́bu indomí índiəkinə.

³⁸Bá húlə́ nəyəkə ɔ makɔ́tákɛ na ɔ ɛmáá, bá tuənəkinə ɔ imbóko yɛ́ misí nuúmə́, na yɛ́ miɔkɔ; yɛ́ɛyɛ misí yɛ́ sa bá ɛbɔ́ka yɛɛsɛ ɔwá bá tuənə́kínə.

³⁹Bááyɛ́ bɛndɔ bá ka Huɛlɛ́ lumininə, ɔ́ ɛlɔ́áyɛ́ nɔ́yɛ́ Huɛlɛ́ a ná bəə́bu lumínə, Mba, bá sa kusənə yatɛ́ ɔyɛ́á Huɛlɛ́ a ná bílíhə́níə́.

⁴⁰Nɔ́yɛ́, Huɛlɛ́ a ka bɔkɔa buɛsɛ tə́tə́niə ɛlɔ́áyɛ́ əsú yáyɛ́ná yatɛ́ ɔyɛ́á bááyɛ́ bɛndɔ bá ná báá bá ndɔ bɛ́kɔ́lɔmɔna. Yɛ́ sa bá hɔ́ánánátɔ́ ɔwá a bəə́bú bɔ́táyɛ́ bɔɔ́la índíə́ ɛŋaná bəsú.