Read Tunen Hɛ́bɛlɛ 12 Bible Online

Hɛ́bɛlɛ 12 - Tunen bible

Hɛ́bɛlɛ 12

¹Nɔ́yɛ́, tɔ lɛa nɛŋɛ́lɛ́nátɔ́ na yɛ́ɛ́yɛ́ iloŋo yɛŋɛ́ŋa yɛ́ bááyɛ́ bɛndɔ ɔbá bá ndɔ Huɛlɛ́ lúmínínə. Nɔyɛ́, tɔ́ yatɛ́ yikimə bɛ́yákáláka ɔyɛ́á yɛ́ lɛ ndɔ ókóto ɔwá tɔ ɛnɔ́mɛ yɛ́ ilumininə ɔŋgɔ́kɔ. Tɔ́ bɔbɛ́á tɛbákɛ́na ɔbɔ́á bɔ́ bəsú lɛ́á bɛ́ɔ́lɔ́kɔ́kɛ́nátɔ; Huɛlɛ́ a ka bəsú lɛna ɔwá tɔ tɛbákɛ́na, tɔ́ mútə́yí mɔlɛ́lá ɛ́ta, tɔ lɛ tɔmbɔ.

²Ikúílí tɔ ndɔ tɛbɛna, tɔ́ mə́súə́ məə́sə tálá á Yə́susu. Wɛɛ́ya a ná kɛ́áka ɔwá tɔ Huɛlɛ́ lúmínínə. Wɛɛ́ya a ndɔ kɛa ɔwá tɔ káfámá á Huɛlɛ́ busíə́. A ka nɛhɔnɔ bɛ́sáŋɔ́na ɔnɛ́á a ná bámɛ́nɛ́na, a ka luminə ɔ uwínə ɔ ɔmbásá, ɛŋaná ɛsɛ́má ɔbɛ́kɔ́lɔmɔna ɔyɛ́á abáka yɛ́ nda bááyɛ́ fámɛ́ná ɔbá bá lɛ́á ɔ́mɔ́kɛ́nátɔ́ ɔ ɔmbásá. Isíŋáka, a báka tuənə́tɔ́ ɔ mɔkátá wɔ́ bɛnɔ́mɛ ɔ hikómo hɛ́ Huɛlɛ́.

³Nɔyɛ́, nɔ́ wɛ́ɛ́yɛ́ bílúmíníə́ ɔwá bakɛamabɛ́á bá ná tə́kə́sə́kə, a ka ísə́biniə ɔkɛaka ɔwá makátá má lɛ bənú tɔ́mbɔ, nɔ́ makɛ́nda kusə́nə.

⁴Nɔ nabáka ɔ bɔbɛ́á unuəsiə, nɔ nana nɔ́á ɔkafámáká ɔ uwə́ə́.

⁵Nɔ lɛ yɛ́ɛyɛ ɛtambá yɛ́ buhuhə fəlíə́ ɔyɛ́á Huɛlɛ́ a ndɔ bənú hɛ́na ɛ́sɛ́á ɔ ɔwayɛ́ baná a sɛ́á: «Á wamɛ́á mɔná, ɔ lɛ fə́nə́ ɔ ikúílí Isə́lúkú a ndɔ aŋɔ́á mənyəsiə, ɔ lɛ liŋə́ ɔ ikúílí a ndɔ aŋɔ́á bándɔ́na.

⁶Ikúílí Isə́lúkú a ndɔ mɔndɔ mənyəsiə, ɔ́ niɔŋɔ́, a ndɔ wɛɛ́ya hikiə; a ndɔ bááyɛ́ bəkimə sɔ́kɔ́tɛa ɔbá a ndɔ sinə ɛ́sɛ́á báyɛ́á baná.»

⁷Ikúílí Huɛlɛ́ a ná lumínə ɔwá ɔ məsə́kə siəkínə, a ndɔ siə ɔwá ɔ kɔma. Huɛlɛ́ a ndɔ bənú bɛ́kɛna ɛ́sɛ́á báyɛ́á baná; ɔ́ uwə́níə́ mɔná abáka isə́ a lɛ sɔ́kɔ́tɛ́á əə́?

⁸Ábá Huɛlɛ́ a sá bənú sɔ́kɔ́tɛa ɛ́sɛ́á abáka a báyɛ́á baná bəkimə sɔ́kɔ́tɔkɛa, nɔ́ manyá ɔwá nɔ lɛa baná bá ŋgóŋgoló, nɔ lɛ bá tiísi yɛ báyɛ́á baná.

⁹Tɔ́ lɛa na bíə́súə́ bisə́ háha ɔ misí ikúílí bá ndɔ bəsú sɔ́kɔ́tɛa, tɔ ná hɔ́ánána ɔ uwəbú ulúbúnə. Ɔ ɔyáyɛ́na nɔ́yɛ́, tɔ ná hɔ́ánána ɔ yəsúə́ Isə́ ɔwá a lɛ́á ɔ nɔɔ́mɛná ulúbúnə, ikúílí ɔ ná bílólósólíə́, ɔ ŋɔ nɔmɔkɔ ɔwayɛ́ busíə́.

¹⁰Bíə́súə́ bisə́ bá lɛ bəsú sɔ́kɔ́tɔkɛa ɛlɔ́áyɛ́ tɛ́tɛ́á yɛ ikúílí ɔwɔŋgɔkɔnɔ ɔ ɛnya ɔyɛ́á bá ná bɛkɔa siəkínə. Mba, abáka Huɛlɛ́ a bəsú sɔ́kɔ́tɔkɛa ɛlɔ́áyɛ́ búə́súə́ buɛsɛ ɔkɛaka ɔwá, tɔ bámɛ́nɛ́ná ɛŋaná hɛkɔma ɛ́sɛ́á wɛɛ́ya.

¹¹Ikúílí bá ná mɔndɔ sɔ́kɔ́tɛ́á, abáka a lɛ nɛhɔnɔ ɔ́kɔ́ ɔ umisíúmə́, mba, abáka a bá na busə́kə ɔ mɔlɛ́má. Əlimə yɛ ikúílí ábá mɔlɛ́má wɔ́ ná nə́yə́níə́, a kɛndaka tɛ́nɛ́mátɔ́ ɛ́sɛ́á bá ná wɛɛ́ya lɛ́na ikúílí bá ná wɛɛ́ya sɔ́kɔ́tɛa.

¹²Nɔ́yɛ́, nɔ́ makátá óníníə́ ɔmá má lɛ́á tɔmbɔ́tɔ́ na moŋgóndi ɔmá má ndɔ ndɛ́ŋɛ́la.

¹³Nɔ́ ɛnɔ́mɛ sɔkɔ́náka ɔkɛaka ɔwá nɔ kɛndáká muɛsɛ umə́. Nɔ́yɛ́ mbá wɛ́ɛ́yɛ́ ɔwá a ndɔ bítímbə a sɔ́ ŋɔ mɔkɔlɔ́ bínyúə́lə; mba, á báá niŋə́tɔ́ ɔ ɔyáyɛ́ná.

¹⁴Nɔ́ ányá ɔ ɔkɛa ɔwá nɔ báá ɔ bumbə́nú na bɛndɔ bəkimə, nɔ́ niŋə́kə ɔ buɔmɔ́ bɔnaŋanaŋa na Isə́lúkú á Huɛlɛ́ bɔkɔasɛ́á, ɛŋana bɔɛ́ta ata mɔndɔ a sa ndá wɛɛ́ya sínə.

¹⁵Nɔ́ bɛ́tátáká ɔwá mɔndɔ a lɛ bɛɛ́la bɛɛsɛ kinə́ ɔbɛ́á Huɛlɛ́ a ndɔ índiənə. Nɔ́ bɛ́tátáká tɔ́na ɔwá, ata mɔndɔ uwənú ətíə́ a lɛ híáná ɛ́sɛ́á isə́kə́ki yɛ́ bɔlɔŋɔ́tɛ́, yɛ́ sá bá nɔ́yɛ́, a ŋɔ bɔsɔ́kɔ́ bɛndɔ bəəŋí híə́nəsiə bisə́kə́ki.

¹⁶Nɔ́ bɛ́tátáká tɔ́na ɔwá, ata ɔmɔtɛ́ ɔ uwənú ətíə́ a lɛ híáná mɔndɔ wa nɛbambɛa, mɔndɔ a sá hɔ́ánana ɔ bɔɔ́la bɔ́ Huɛlɛ́ uyəniə, ɔ́maná ɛ́sɛ́á á Ɛsawú a ná kɛ́áka, a ka báá mɔná busíə́ mba, a ka yáyɛ́á ɛbɔ́ka índiə á yayɛ́á ikukə yɛ́ munínyə́ ɛlɔ́áyɛ́ bɔ́labɔ́nɛ́á.

¹⁷Nɔ ndɔ nɔ́yɛ́ manya muɛsɛ, əlimə yɛ ikúílí, a ka siəkə ɔwá yayɛ́á Isə́ a wɛɛ́ya bɛsɔ́nɔ índíə́, mba, wɔ́ɔwɔ a ná wɛɛ́ya bulə́kə, a ka isə́ bɛ́tɔ́kɔ́lɔkɛna na malɛlá, mba, ata bɔkɔa bɔ́ sa sə́njiə.

¹⁸Ɛnaka nɔ tɔ́mbálɛla á Huɛlɛ́ busíə́, nɔ sa bá nɔ ndɔ ɔŋgɔ ɔ bɔɔ́la ɔbɔ́á bá ndɔ sinə na məə́sə, ɛ́sɛ́á bɔ́ ná báá ɔ ɔmáá wɔ́ Sináya, ɔhá nɔ́ sa hiwə sinə kɔnjɔ́kɔ́tɔ, ata ibínə́binə, ndamánamana, ata umbúínyi mɔŋɛ́ŋa,

¹⁹nɔ sa iluluməki yɛ́ mɔsɛ́bɛ́ ɔ́kɔ, ata nióni nɛ́ Huɛlɛ́. Ɛnaka ɛndɛkɛ Ísilahɛ́lɛ bá nɛ́ɛ́yɛ́ nióni ɔ́kɔ́, bɔkɔ́lɔ́ma bɔŋɛ́ŋa bɔ́ ná bəə́bu itíə́, bá ná sáŋɔ́na ɔwá bá lɛ tíkə́ nióni nɛ́ Huɛlɛ́ ɔ́kɔ tɔ́na.

²⁰Ɔ taká, yɛ́ sa bá ɔwá bá umbə́ndə́ wɔ́ Huɛlɛ́ ísə́bíníə́ ɔwá wɔ́ ndɔ laa wɔ́ sɛ́á: «Ata ɛ́yánɛ́ mɔndɔ ɔwá a ŋɔ ɔmáá mɔkátá tála, ata mɛnyama, bá ŋɔ wɛɛ́ya ɔ́nɔ́kɔ na miɔkɔ.»

²¹Bɛ́ɛ́yɛ́ bɛkɔa ɔbɛ́á bá ná síə́kínə, bɛ́ ka bəə́bu bɔkɔ́lɔ́ma bɔŋɛ́ŋa itiəsiə. Ata á Mósisi bɛ́muɛ́tɛ́ a ka laa a sɛ́á: «Bɔkɔ́lɔ́ma bɔŋɛ́ŋa bɔ́ mɛaŋɔ́á báka, mɛ ndɔ kílímə.»

²²Mba, uwənú, nɔ ka tɔ́mbálɛla ɔ ɛmɛ́ŋɛ́ yɛ ɔmáá wɔ́ Síyono á bətínə́ yɛ Huɛlɛ́ ɔwá a lɛ́á muɔmɔ́, á Yəlúsalɛma ɔyɛ́á yɛ́ lɛ́á ɔ nɔɔ́mɛná ɔhá Huɛlɛ́ a lɛ́á. Nɔ ka tɔ́mbálɛla ɔ ɛmɛ́ŋɛ́ yɛ ɔmbana muiŋí wɔ́ bɛáŋgɛlɛ, bikúílí bikimə bá lɛa ɔ ɛŋganda.

²³Uwənú, nɔ ka tɔ́mbálɛla ɔ ɛmɛ́ŋɛ́ yɛ ilúkunə yɛ́ baná bə́búsíə́ bá Huɛlɛ́, bááyɛ́ ɔbá məə́nyə má lɛ́á tilə́kə́tɔ́ ɔ nɔɔ́mɛná. Nɔ ka tɔ́mbálɛla á Huɛlɛ́ busíə́, á mukə́lə́siə wa mɔsá mukimə. Nɔ ka tɔ́mbálɛla ɔ busíə́ bɔ́ bátaká ɔbá bá bá lɛ́á á Huɛlɛ́ ɛmɛ́ŋɛ́.

²⁴Uwənú, nɔ ka tɔ́mbálɛla ɔ ɛmɛ́ŋɛ́ yɛ Yə́susu á Mubísúmbə́niə wa nɛtɔana niɔ́sɔ, nɔ ka tɔ́mbálɛla ɔ ɛmɛ́ŋɛ́ yɛ máyɛ́á manɔ́ŋɔ́ ɔmá na maáta a ná nɛtɔana hákɛ́na, mááyɛ́ manɔ́ŋɔ́ má ndɔ bəsú bɔkɔa bɔŋɛ́ŋa hɛ́na ɔyáyɛ́na manɔ́ŋɔ́ má Ábɛlɛ.

²⁵Nɔ bɛ́tátáka, nɔ lɛ kɔtɔ́ ɔ wɛ́ɛ́yɛ́ ɔwɔ́kɔ ɔwá a ndɔ bənú hɛ́na, bááyɛ́ ɔbá bá sa wɛ́ɛ́yɛ́ ɔ́kɛ́na ɔwá a ná ndá bəə́bu mənyə́síə́ ɔ misí, bá sa bɛ́ɔ́lɔ́ ɔ ɛsɔ́kɔ́tɛa yɛ́ Huɛlɛ́. Ɔ yáyɛ́na nɔ́yɛ́, tɔ sa ósó ɔbɛ́ɔ́lɔ ɔ ɛsɔ́kɔ́tɛa yɛ́ Huɛlɛ́ ábá tɔ sá nɛ́áyɛ́á nióni ɔ́kɔ́ ɔwá a ndɔ bəsú hɛ́na hə́ə́ní ɔ bɛlɔndɔ́ ɔmbáŋá.

²⁶Nɛ́áyɛ́á nióni nɛ́ ka misí ndəndəməliə ɔ yítə́ní ikúílí kokóóko, mba, isíŋáka, a ndɔ bəsú bílíhə́niə a sɛ́á: «Tátá ɔ́maná misí mɛ́ ŋɔ ndəndəməliə ɔ yɛ́mɔtɛ́ ikúílí tɔ́na, mba, na nɔɔ́mɛná tɔ́na.»

²⁷Bɛ́áyɛ́á bɛtambá ɔbɛ́á a ndɔ laa a sɛ́á: «Ɔ yɛ́mɔtɛ́ ikúílí tɔ́na» bɛ́ ndɔ siə ɔlaa ɔwá, bɛɛ́la bikimə ɔbɛ́á Huɛlɛ́ a ná tábɔ́náka, ɔbɛ́á bɛ́ ndɔ misí tuŋulə, bɛ́ ŋɔ kílímələ, bɛ́ nímínə́ tɔ́na ɔkɛaka ɔwá, bɛɛ́la ɔbɛ́á bɛ́ sa ósó ukílímə bɛ́ tikənə.

²⁸Nɔ́yɛ́, tɔ́ Huɛlɛ́ mohóloniə híə́níníə́ bɔkɔasɛ́á, a ndɔ kɛa ɔwá tɔ́ fínə́ ɔ bɔnɔŋɔ ɔbɔ́á bɔ́ sa ósó ukílímə. Tɔ́ wɛɛ́ya mohóloniə híə́níníə́ na ɔkɛa yatɛ́ ɔyɛ́á a ndɔ hikiə, na hibə́təniə, na ɔwayɛ́ ɔwɔkɛ́na.

²⁹Ɔ taká, yəsúə́ Huɛlɛ́ ɔwá tɔ ndɔ nyama a lɛa ɛ́sɛ́á hiwə ɔhɛ́á hɛ́ ndɔ bɛɛ́la sə́sə́miə.