Read Tunen Hɛ́bɛlɛ 13 Bible Online

Hɛ́bɛlɛ 13 - Tunen bible

Hɛ́bɛlɛ 13

¹Nɔ́ hikə́kə́níə́ ikúílí tɛ́á bənú na bənú ɛ́sɛ́á baná bá ninyə́.

²Nɔ lɛ fəlíə́ ɔ bááyɛ́ bəkimə ɔkáha ɔ uwənú ɔmbɛ́la. Ɔ taká, nyɔnɔ na nɛ́táyɛ́ nɛkáhána, bɔ́mɔtɛ́ bá ka bɛáŋgɛlɛ káha bá lɛ bɛ́mánya.

³Nɔ lɛa bábɛ́bɔka fəlíə́, nɔ́ bəə́bu bɛ́kɔ́lɔ́mɔ́kɔ́ná ɔ́maná ɛ́sɛ́á nɔ ka báá ɔ ɛbɔka na bəə́bu. Nɔ́ bááyɛ́ bɛ́kɔ́lɔ́mɔ́ná tɔ́na ɔbá bá ndɔ məsə́kə índiə bɔkɔasɛ́á, bənú tɔ́na nɔ lɛa bɛndɔ ɔbá bá ósó ɔ məsə́kə uwíndiəkinə.

⁴Mɔɛ́ta tɛ́á a nɛ́áyɛ́á nɛbɛ́lɛna bə́tə́kíə́, muəndú á báá na yɔkɛ́nana á yayɛ́á ibə́, mɛlɛ́mɛndɔ́ á wayɛ́á muəndú. Huɛlɛ́ a ŋɔ bánɛ́bambɛa sɔ́kɔ́tɛ́a na bááyɛ́ bə́nilókóno.

⁵Nɔ lɛ sulú mɔlɛ́má háá ɔ mɔnɛ́á, nɔ́ siəkínə́ yatɛ́ ɔyɛ́á yɛ́ ná bənú hɔ́ánánɛ́na bɔkɔasɛ́á, Huɛlɛ́ a ka laa a sɛ́á: «Mɛ sa ndá aŋɔ́á fə́líə́, mɛ sa ndá aŋɔ́á níásá bíbúə́.»

⁶Ɔ́ ɛlɔ́áyɛ́ nɔ́yɛ́ tɔ óso ɔwɛmɛ́nɛna na nɛkɔmba nikimə tɔ sɛ́á: «Isə́lúkú á Huɛlɛ́ a lɛa wamɛ́á mɔkamɛla, mɛ lɛ ndɔ kɔ́lɔ́ma ata bɔkɔa; yatɛ́ ɛ́kɛ mɔndɔ a mɛaŋɔ́á kɛaka əə́?»

⁷Nɔ́ bə́núə́ bakɛndana bə́búsíə́ bɛ́kɔ́lɔ́mɔ́na ɔbá bá ná taŋá ɔ uwənú ɛtambá yɛ́ Huɛlɛ́ ɔnɔŋɔnɛna. Nɔ́ siəlínə́ ɛ́sɛ́á bá ná nɔ́mɔ́kɔ, nəníə́ bá ná wə́kúnə, nɔ́ iŋgətí ɛ́tɛ́na ɔ uwəbú ilumininə.

⁸Abáka Yə́susu Kilísitusu a lɛ sə́njíə́, nɔ́yɛ́ yɛ́ ná bámɛ́nɛ́na naánɛkɔla, nɔ́yɛ́ a lɛ́á niɔfɛ́nɛ, nɔ́yɛ́ a ŋɔ báá tɔ́na bulílə́ na ɔ bikúílí ɔbánɔ́ bikimə.

⁹Nɔ lɛ bɛ́níása ɔwá bɛkɔa biɔ́sɔ ɔbɛ́á bá ndɔ bənú ínə́niə ɔwɔŋgɔkɔnɔ na Huɛlɛ́, bɛ́ lɛ bənú nə́nə́síə́. Bá ndɔ bənú ínə́niə ɔwá bɛ́labɔ́nɛ́á bɛ́ ndɔ bənú óníniə ɔ ɛnɔ́mɛ yɛ́ Huɛlɛ́. Bááyɛ́ ɔbá bá ndɔ ɔŋgɛna ɔ bɛ́ɛ́yɛ́ bilə́líə́, bá sa ndá mɔsɛ́ŋɛ́ kúsə́nə ɔ yɛ́táyɛ́ ɛsalɛ. Á Huɛlɛ́ na wə́yíə́ mɔlɛ́má muɛsɛ a ndɔ mɔndɔ óníniə ɔ ɔwayɛ́ ɛnɔ́mɛ.

¹⁰Bətitiəmahánɛna ɔbá bá ndɔ mahánɛna índiə ɔ yanda yɛ́ Huɛlɛ́, bá lɛ bá na kuənjə ɔ nɛhánɛna ɔ ɔnɛ́á uwəsú niɔlɔ nɛ́ mahánɛna.

¹¹Abáka Mutitiəmahánɛna mɔŋɛ́ŋa a fínə ɔ ɛbɔ́ka ɔyɛ́á Huɛlɛ́ a lɛ́á na manɔ́ŋɔ́ má mɛnyama ɛlɔ́áyɛ́ mabɛ́á má bɛndɔ ɔsɔa. Mba, bá ɛkɔɔ́lɛa yɛ́ mɛnyama hakaka hata na kɔ́mbɔ.

¹²Yɛ́ ka báá nɔ́yɛ́ na Yə́susu, a ka ɛmɔ́kɛ́ nyááka mɔŋɛ́ŋa, bá ka wɛɛ́ya ɔ́nɔ́kɔ hata na bətínə́ ɔkɛaka ɔwá, a bɛndɔ nəŋə́síə́ ɔ tɔ́mbákɛna na máyɛ́á manɔ́ŋɔ́ má bɛ́múɛ́tɛ́.

¹³Tɔ́ ənú fə́mə́níə́ nə́ə hata na kɔ́mbɔ ɔ ɔwayɛ́ nɛnyáná, tɔ́ lumínə ɔ ɛmɔ́kɛ́ ɔnyáá ɛ́sɛ́á wɛɛ́ya.

¹⁴Ɔ taká, tɔ lɛ bá na tiísi yɛ bətínə́ háha ɔ misí ɔyɛ́á yɛ́ lɛ́á ɔ bikúílí bikimə, wə́súə́ mɔlɛ́má wɔ́ lɛa háátɔ́ ɔ bətínə́ ɔ ɛbɔ́ka ɔyɛ́á tɔ ŋɔ nɔmɔkɔ ikúílíə́kimə.

¹⁵Nɔ́yɛ́, tɔ́ Huɛlɛ́ nyámáka ɛŋaná nisúki ɔ tɔ́mbákɛna na Yə́susu, ɔ́maná ɛ́sɛ́á nɛhánɛna ɔnɛ́á tɔ ndɔ wɛɛ́ya índiə, bɛtambá ɔbɛ́á bɛ́ ndɔ fáma ɔ uwəsú munuə, bɛ́ báá ɛlɔ́áyɛ́ Huɛlɛ́ ɔnyama ɔ busíə́ bɔ́ bɛndɔ.

¹⁶Nɔ lɛ fəlíə́ ɔ buɛsɛ ɔkɛa na ɔwɔlɔ́nɔ bənú na bənú bɔkɔasɛ́á, ɔ yɛ́ɛ́yɛ́ ɛnya yɛ mahánɛna abáka Huɛlɛ́ a hikəkiə.

¹⁷Nɔ́ bə́núə́ bakɛndana ɔ́kɔ́kɛ́nɛ́na, nɔ́ bílólósólíə́ ɔ uwəbú busíə́. Ɔ taká, bəə́bu bá ndɔ bənú sókóbiə bɔkɔasɛ́á, bá ŋɔ binífúnínə́ índiəkinə á Huɛlɛ́ busíə́. Nɔ́ kɛáka ɔwá bá búə́búə́ buolí úndúsíníə́ na nɛhɔnɔ nikimə, bá lɛ bisəkələ, ábá bá ndɔ bísə́kə́lə ikúílí bá ndɔ búə́búə́ buolí nyɔɔ, nɔ́yɛ́ yɛ́ sɔ́ ŋɔ bənú ɔ́lɔ ata bɔkɔa.

¹⁸Nɔ́ bɛ́kálákɛ́na ɛlɔ́áyɛ́ əsú. Tɔ ndɔ manya muɛsɛ ɔwá, tɔ lɛa ɛ́mɛ́nɛ́nátɔ́ ɔwá wə́súə́ mɔlɛ́má wɔ́ lɛ ndɔ bəsú kə́lə́siə bɔkɔasɛ́á, tɔ ndɔ siə ɔ ɔkɛa yatɛ́ ɔyɛ́á lɛ́á yɛɛsɛ ɔ bɛkɔa ɔbánɔ́ bikimə.

¹⁹Mɛ ndɔ bənú bata na ɔwɛmbɛ́na ɔwá, nɔ́ Huɛlɛ́ bɛ́kálákɛ́na, á lumínə ɔwá mɛ ndáhíáná tɔfá uwənú busíə́.

²⁰Huɛlɛ́ ɔwá a lɛ́á hɛnyɔ́nyɔ hɛ́ bumbə́nú a ka kɛaka ɔwá yəsúə́ á Isə́lúkú á Yə́susu á hɔŋɔ́á ɔ ətíə́ yɛ bəwə́nú. Ɛ́sɛ́á a ná hɔ́ŋɔ́á ətíə́ yɛ bəwə́nú, a ka híána Muníə́siə mɔŋɛ́ŋa wa ɛndɔ́mbá yɛ́ Huɛlɛ́ bɔkɔasɛ́á, a ka nɛtɔana nɛ́ ikúílíə́kimə óníniə na máyɛ́á manɔ́ŋɔ́.

²¹Huɛlɛ́ á bənú iŋgínə́ índíə́ yɛ ɔkɛa yatɛ́ yikimə ɔyɛ́á yɛ́ lɛ́á yɛɛsɛ, ɔkɛaka ɔwá nɔ kɛndáká ɛ́sɛ́á a ndɔ siə; ɔ tɔ́mbákɛna na Yə́susu Kilísitusu, á kɛ́áka ɛlɔ́áyɛ́ əsú yatɛ́ ɔyɛ́á yɛ́ ndɔ wɛɛ́ya hikiə. Tuúmə tɔ́ bámɛ́nɛ́ná na Yə́susu Kilísitusu ɔ tɔɛya na tɔɛya! Amɛna.

²²Á bənísə́, Mɛ ndɔ bənú bɛ́táŋɔ́na ɔkɛaka ɔwá, ɛŋaná ubísə́kə́lə, nɔ bɛ́ɛbɛ bɛtambá bɛ́ makɛ́nda ɛtá ɔ uwənú mɔlɛ́má ɔbɛ́á mɛ ná bənú lákɛ́na. Hiəfulə ɔhɛ́á mɛ ná bənú tílə́línə hɛ́ lɛ bá hɛtatánɛ.

²³Mɛ ndɔ siə ɔ uwənú ɔlɛna ɔwá, bá ka wəsúə́ munísə́ á Timotíó sɔ́ŋɔ́na. Ábá a ná hútú ndafámá ɔ ɔwámɛ busíə́, na mɛaŋɔ́á na wɛɛ́ya tɔ ŋɔ nda bənú síə́línə.

²⁴Nɔ́ bə́núə́ bakɛndana bəkimə bíhólíə́, na bááyɛ́ bəkimə tɔ́na ɔbá bá lɛ́á bɛláŋa bɛ́ ilúkunə yɛ́ Huɛlɛ́. Bááyɛ́ bəkimə ɔbá bá lɛ́á ɔ bɔnɔŋɔ bɔ́ Itália bá ndɔ bənú bíhóliə.

²⁵Huɛlɛ́ á bənú bəkimə buɛsɛ kɛ́áka.