Read Tunen Hɛ́bɛlɛ 2 Bible Online

Hɛ́bɛlɛ 2 - Tunen bible

Hɛ́bɛlɛ 2

¹Ɔ́ ɛ́lɔ́áyɛ́ nɔ́yɛ́ tɔ́ ná hɔ́ánána ɔ utiŋiminə na iŋgínə́ yikimə ɔ imbə́nú ɔyɛ́á tɔ ná ɔ́kɔ́kɛ́na ɔkɛaka ɔwá, yɛ́ lɛ bəsú ákánána ɔ bunímə́.

²Imbə́nú ɔyɛ́á bɛáŋgɛlɛ bá ná nɔ́ŋɔ́náka ɔ yítə́ní ikúílí, yɛ́ ka wə́yíə́ mɔsɛ́ŋɛ́ ínə́niə, ata, ɛ́yánɛ́ ɔwá a ná yɛɛ́ta yəníə́, ata ɔwá a sa yɛɛ́ta káha, Huɛlɛ́ a ka wɛɛ́ya sɔ́kɔ́tɛa hɔ́ánánátɔ.

³Nɔ́yɛ́, ábá tɔ ná imbə́nú yúbútíníə́ ɔyɛ́á yɛ́ ndɔ bəsú nibínuəniə húlə́ninə, nəníə́ ɛ́kɛ tɔ ɛsɔ́kɔ́tɛa yɛ́ Huɛlɛ́ bɛ́ɔ́lɔ əə́? Isə́lúkú bɛ́múɛ́tɛ́ a ka taŋa ɔ yɛɛ́ta ɔnɔŋɔna, əlimə yɛ nɔ́yɛ́, bááyɛ́ ɔbá bá ná yɛɛ́ta ɔ́kɔ́kɛ́na, bá ná yɛɛ́ta lumínə́, bá ná ɛ́mɛ́nɛ́ná ɔwá bɛ́ɛ́yɛ́ bɛtambá bɛ́ lɛa taká.

⁴Ikúílí bá ná báá bá ndɔ yɛɛ́ta nɔŋɔna, Huɛlɛ́ a ka bəə́bu híkə ɔ tɔ́mbákɛna na tɔŋgɛtɛ́nɛ́á, bɛkɔa bɛ́ yələ́mənə, na məndínə́ məkimə má bisə́mə́tə́, ɔ tɔ́mbákɛna tɔ́na na Umbúínyi Mɔnaŋanaŋa ɔwá a ná áfákɛ́ná ɔ mɔɛ́ta tɛ́á ɔkɛaka ɔwá, bá biolí nyɔ́ɔ́kɔ́ ɛ́sɛ́á Huɛlɛ́ a ndɔ hikiə.

⁵Tátá bɛáŋgɛlɛ á Huɛlɛ́ a ná bɛ́lɛ́na ɔkɛaka ɔwá bá misí ɔ miɔ́sɔ mánákɛ́na ɔyɛ́á tɔ ndɔ hɛ́na isíŋáka.

⁶Mba, wɔmɔtɛ́ mɔndɔ a ndɔ hɛ́na ɔwɔŋgɔkɔnɔ bɔ́táyɛ́ bɔkɔa ɔ yɛ́mɔtɛ́ ɛsalɛ yɛ́ Mətilə a sɛ́á: «Ə́ə́, á Huɛlɛ́, ɛ́yánɛ́ a lɛ́á mɔndɔ ɔkɛaka ɔwá ɔ bá ɔ ndɔ wɛɛ́ya bɛ́kɔ́lɔmɔna əə́? Yatɛ́ bɔɔ́la á mɔsá bɛnama a ayɛ́ lɛ́á ɔkɛaka ɔwá ɔ ndá wɛɛ́ya ɔ́lɔ́ əə́?

⁷Ɔ ka wɛɛ́ya lolosoliə ɔ matá ma bɛáŋgɛlɛ ɛlɔ́áyɛ́ tɛ́tɛ́á yɛ ikúílí, ɔ ná wɛɛ́ya hitəkə́ hɛ́ tuúmə háá tɔ́na na hɛ́ bufəyí ɔ mɔlɔ́á,

⁸ɔ ná bɛkɔa bikimə bɛ́lɛ́na ɔ ɔwayɛ́ matá ma makɔlɔ́.» Ábá Huɛlɛ́ a ka bikimə bɛ́lɛna ɔ matá má makɔlɔ́ má mɔndɔ, nɔ́yɛ́ yɛ́ ndɔ siə ɔlaa ɔwá, a sa tíkə ata bɔɔ́la ɔbɔ́á bɔ́ lɛ bá ɔ ɔwayɛ́ matá ma nɛmanɛna. Mba isíŋáka, tɔ nana sinə́ ɔwá, Huɛlɛ́ a ka bɛkɔa bikimə bɛ́lɛna ɔ matá ma makɔlɔ́ má mɔndɔ.

⁹Mba, isíŋáka, tɔ ndɔ náana manya ɔwá wɛ́ɛ́yɛ́ ɔwá Huɛlɛ́ a ná lólósólíə́ ɔ matá ma bɛáŋgɛlɛ ɛlɔ́áyɛ́ tɛ́tɛ́á yɛ ikúílí, á Yə́susu. Ɔ tɔ́mbákɛna na iwə́mɛɛ́lɔ ɛlɔ́áyɛ́ bɛndɔ, Huɛlɛ́ a ka kɛaka ɔwá a wəə, mba isíŋáka, bá ndɔ wɛɛ́ya sinə́ úndúə́tɔ́ na hibə́təniə na tuúmə bɔkɔasɛ́á, a ka ɛmɔ́kɛ́ nyááka, a ná wínə́ tɔ́na ɛlɔ́áyɛ́ bɛndɔ bəkimə.

¹⁰Ɔ taká, Huɛlɛ́ a lɛa mɔbɔ́tá wa bikimə, a ka bɛɛ́ta bɔ́táka ɛlɔ́áyɛ́ ayɛ́, nɔ́yɛ́ yɛ́ ka báá hɔ́ánánátɔ́ ɔwá a kɛáka a sɛ́á Yə́susu á ɛmɔ́kɛ́ nyááká ubusíə́ ɔbɔ́á á wɛɛ́ya tuəníníə́ ɔ ɛbɔ́ka yɛŋɛ́ŋa ɔkɛaka ɔwá, a ɔmbana muiŋí wɔ́ bɛndɔ bá híáná baná bá Huɛlɛ́. Ɔ taká, Yə́susu a báka wɛ́ɛ́yɛ́ ɔwá a ndɔ bɛndɔ ɛnɔ́mɛ ínə́niə ɔyɛ́á abáka Huɛlɛ́ a bɛndɔ nuəkəniə.

¹¹Nɔ́yɛ́, Yə́susu a ndɔ mɔsá nəŋəsiə ɔ uwəbú mabɛ́á, na wɛɛ́ya na bááyɛ́ ɔbá bá lɛ́á bínə́ŋə́síə́tɔ́ bá lɛa na isə́ ɛ́mɔtɛ́; ɔ́ ɛ́lɔ́áyɛ́ nɔ́yɛ́ a lɛ ndɔ sɛ́ma ɔ uwəbú ɔwɛ́lɛnɛna bááyɛ́á bənísə́.

¹²Wɛɛ́ya bɛ́múɛ́tɛ́ a ndɔ Huɛlɛ́ lɛna tɔ́na a sɛ́á: «Ə́ə́, á Huɛlɛ́, mɛ ndɔ siə ɔwá mɛ bámɛ́á bənísə́ hɔ́kɛ́na ɛ́sɛ́á ɔ lɛ́á, mɛ ŋɔ tɛ́nɛ́ma ɔ busíə́ bɔ́ ilúkunə yɛ́ bəlumininə ɔkɛaka ɔwá mɛ aŋɔ́á nyámáka.»

¹³A ka hɔ́ɔ́kɔ tɔ́na a sɛ́á: «Mɛ ŋɔ nɛ́ámɛ́á nɛkɔmba tálɛ́na á Huɛlɛ́.» A ka hɔ́ɔ́kɔ tɔ́na a sɛ́á: «Ɔ́ mɛaŋɔ́á wɔ́ɔwɔ na baná ɔbá Huɛlɛ́ a ná mɛaŋɔ́á índíə́.»

¹⁴Ɛ́sɛ́á ikúílí bátáyɛ́ baná bá lɛ́á bɛndɔ bá mɛɛ́lɔ na manɔ́ŋɔ́, Yə́susu bɛ́múɛ́tɛ́ a ka híána mɔsá wa mɛɛ́lɔ na manɔ́ŋɔ́ ɛ́sɛ́á bəə́bu. Ɔkɛaka ɔwá, ɔ tɔ́mbákɛna na yayɛ́á nyɛmbɛ́, a ná Sátana ɔkɔ́kɔ ɔwayɛ́ ɔwá a lɛ́á na iŋgínə́ yɛ bɛndɔ uwonósiə.

¹⁵A ka nɔ́yɛ́ kɛaka ɛlɔ́áyɛ́ bááyɛ́ uhutunə ɔbá bɔkɔ́lɔ́ma bɔ́ nyɛmbɛ́ bɔ́ ná híə́nə́síə́ bɛɔlɛ́ ɔ uwəbú buɔmɔ́ ɔbánɔ́ bukimə.

¹⁶Ɔ taká, tátá bɛáŋgɛlɛ sulusulu á Yə́susu a na ndásá ɔwɔ́lɔ, mba, ɔ ɛndɛkɛ Ábɛlaháma.

¹⁷Ɔ́ ɛ́lɔ́áyɛ́ nɔ́yɛ́ a ná híáná ɔ bɛkɔa ɔbánɔ́ bikimə ɛhɔ́ánakana yɛ́ báyɛ́á bənísə́ ɔkɛaka ɔwá, a bámɛ́nɛ́ná mutitiəmahánɛna mɔŋɛ́ŋa, úndúə́tɔ́ na iwə́mɛɛ́lɔ, na yɔkɛ́nana ɔ buolí bɔ́ Huɛlɛ́ ɛlɔ́áyɛ́ nɛnɛasɛna nɛ́ mabɛ́á má bɛndɔ bəkimə.

¹⁸Isíŋáka a lɛa na iŋgínə́ ɔ bááyɛ́ ɔkamɛla ɔbá bá lɛ́á ɔ mɔkɔ́lɛna bɔkɔasɛ́á, wɛɛ́ya bɛ́múɛ́tɛ́ a ka ayɛ́ tɔ́mbɛ́na ɔ mɔkɔ́lɛna, ná ɔ məsə́kə.