Read Tunen Hɛ́bɛlɛ 3 Bible Online

Hɛ́bɛlɛ 3 - Tunen bible

Hɛ́bɛlɛ 3

¹Nɔ́yɛ́ á bənísə́, nɔ báka bɛláŋa bɛ́ ilúkunə yɛ́ Huɛlɛ́, a ka bənú ɛ́lɛakɛna tɔ́na ɔ ɔwayɛ́ buolí. Nɔ́yɛ́, nɔ́ məə́sə tálá á Yə́susu, wɛɛ́ya a lɛ́á wəsúə́ mutitiəmahánɛna mɔŋɛ́ŋa ɔwá Huɛlɛ́ a ná lɔ́ma, ɔ ɔwayɛ́ tɔ́ ná níə́súə́ nɛkɔmba nikimə talɛna.

²Huɛlɛ́ a ka wɛɛ́ya tɛ́fa ɛlɔ́áyɛ́ bɔ́táyɛ́ buolí, a ka wɛɛ́ya ɔ́kɔ́kɛnɛna hɔ́ánánátɔ́ ɛ́sɛ́á Mósisi, ɛnaka a bámɛ́nɛ́na ɔ buolí uwundúsiniə ɔ mɔlɔ́á wɔ́ ilúkunə yɛ́ Huɛlɛ́.

³Abáka bá wɛ́ɛ́yɛ́ bə́təkiə ɔwá a ná miímə falábáká yáyɛ́ná miímə bɛ́múɛ́tɛ́. Nɔ́yɛ́, Yə́susu a ná hɔ́ánána ɔ tuúmə ukusənə yáyɛ́ná Mósisi.

⁴Ɔ taká, ata ɔ́ uyəníə́ miímə, á mɔndɔ abáka a mɛɛ́ta falabaka, mba, á Huɛlɛ́ a lɛ́á mɔfalaba wa bɛkɔa bikimə.

⁵Mósisi a ka ayɛ́ báá na yɔkɛ́nana ɔ ikúílí a ná bámɛ́nɛ́na ɔ buolí ɔ mɔlɔ́á wɔ́ ilúkunə yɛ́ Huɛlɛ́, bɔ́áyɛ́á buolí bɔ́ ka báá ɔ bɛkɔa ɔnɔŋɔna ɔbɛ́á Huɛlɛ́ a ŋɔ laaka.

⁶Mba, Kilísitusu a lɛa Mɔná wa Huɛlɛ́, na yɔkɛ́nana, Huɛlɛ́ a ka wɛɛ́ya yáyɛ́á ilúkunə niasɛna. Bəsú tɔ lɛ́á yáyɛ́á ilúkunə, ábá tɔ ná bɛ́ɛ́yɛ́ bɛkɔa tə́tə́níə́ ɔ uwəsú mɔlɛ́má, tɔ ndɔ bɛɛ́ta táta tɔ́na na nɛhɔnɔ nikimə.

⁷Ɔ́ ɛlɔ́áyɛ́ nɔ́yɛ́, Umbúínyi Mɔnaŋanaŋa wɔ́ ndɔ laa wɔ́ sɛ́á: «Ábá nɔ ná nióni nɛ́ Huɛlɛ́ ɔ́kɔ́ niɔfɛ́nɛ,

⁸nɔ lɛ yə́núə́ mɛlɛ́má nə́tə́síə́ ɛ́sɛ́á bíə́núə́ bisə́kínə́ bá ná mɛaŋɔ́á ɛ́ŋɛ́mána. Ɔ buɔsɛ́ ɔbɔ́á bá ná mɛaŋɔ́á kɔ́sɔ́na ɔ makɔ́tákɛ.

⁹Huɛlɛ́ a ka laa tɔ́na ɔwá, ɔ ɛbɔ́ka ɔyɛ́á bíə́núə́ bisə́kínə́ bá ná mɛaŋɔ́á ɔ́kɔ́lɛ́na ɔkɛaka ɔwá, bá siəkínə yatɛ́ ɔyɛ́á ɛkasɛ mɛ kɛáka, ata nɔ́yɛ́ ɛ́sɛ́á bá ná bɛyɛmbɛlana bɛ́ bɛkɔa siəkínə ɔbɛ́á mɛ ná kɛ́áka uwəbú busíə́

¹⁰hata yɛ moómo ə́nisə má tuɔŋɔ. Ɔ́ ɛlɔ́áyɛ́ nɔ́yɛ́ hilóbi hɛ́ ná mɛaŋɔ́á túáná, mɛ ná bɛndɔ bá yɛ́ɛ́yɛ́ ɛnyɔŋɔnɔ ɛ́ŋɛ́mána, mɛ sɛ́á: “Bikúílí bikimə, mə́búə́ mafɛka má lɛa nanákátɔ, bá sa ɔ́kɔ yatɛ́ ɔyɛ́á mɛ ná síə́kə ɔwá bá kɛáka.”

¹¹Na hilóbi hikimə, mɛ ná yɛ́ɛyɛ ɛyɔmɔ tíkə́ ɔwá, bá sa ndə́fínə́ ɔ ɛbɔ́ka ɔyɛ́á mɛ lɛ́á ɔkɛaka ɔwá bá hɔtɔ́kɔ!»

¹²Á bənísə́, nɔ́ bɛ́tátáka ɔkɛaka ɔwá, ata mɔndɔ ɔ uwənú ətíə́ a lɛ tuənə́ na mɔlɛ́má mɔbɛ́á, mɔlɛ́má ɔwá wɔ́ ndɔ kɛa wɔ́ sɛ́á nɔ lɛa níə́núə́ nɛkɔmba tálɛ́ná á Huɛlɛ́ yɛ buɔmɔ́, nɔ́ wɛɛ́ya ɛ́ŋɛ́mána.

¹³Mba, nɔ́ makɛ́nda índíə́kínə́nə́ buɔsɛ́ na buɔsɛ́ tɛ́á ɔkɛaka ɔwá, bɔbɛ́á bɔ́ lɛ bənú nímbə́ ɔwá mɔndɔ a lɛ Huɛlɛ́ ɔ́kɛna, nɔ́ kɛ́áká nɔ́yɛ́ buɔsɛ́ tɛ́á bɔkɔasɛ́á, ɔ ndafámáká isíŋáka tɔ́ ənú báka ɔ niɔfɛ́nɛ ɛ́sɛ́á Mətilə má ndɔ laa.

¹⁴Ɔ taká, tɔ báka bikindəniə bɛ́ Kilísitusu, ábá tɔ ná níə́súə́ nɛkɔmba tə́tə́níə́ ɔkafámáká ɔ nisúki.

¹⁵Nɔ́yɛ́, Mətilə má ndɔ laa má sɛ́á: «Ábá nɔ ná nióni nɛ́ Huɛlɛ́ ɔ́kɔ́ niɔfɛ́nɛ, nɔ lɛ yə́núə́ mɛlɛ́má nə́tə́síə́ ɛ́sɛ́á bíə́núə́ bisə́kínə́ bá ná kɛ́áka ɔ ikúílí ɔyɛ́á bá ná wɛɛ́ya ɛ́ŋɛ́mána.»

¹⁶Ɔ taká, banɛ́ bá ná Ɛtambá yɛ́ Huɛlɛ́ ɔ́kɔ́kɛ́na mbá bá ná wɛɛ́ya ɛ́ŋɛ́mána əə́? Ɔ́ bááyɛ́ bəkimə ɔbá Mósisi a ná fámákáná ɔ bɔnɔŋɔ bɔ́ Ikíbíto.

¹⁷Ɛlɔ́áyɛ́ banɛ́ á Huɛlɛ́ a ná híə́yíə́ hilóbi kɔ́ndákɛ́na ətíə́ yɛ moómo ə́nisə má tuɔŋɔ əə́? A ka hiítə kɔ́ndákɛna ɔ bɛndɔ ɔbá bá ná bɔbɛ́á kɛáka, bá ná wə́kúnə́ tɔ́na ɔ makɔ́tákɛ.

¹⁸Á banɛ́ á Huɛlɛ́ a ná hɔ́kɛ́na ɔkafámáká ɔ ubíkumə a sɛ́á: «Bá sa ndəfínə́ ɔ ɛbɔ́ka ɔyɛ́á a lɛ́á mbá bá hɔtɔ́kɔ əə́?» A ka nɔ́yɛ́ hɔ́kɛna ɔ bááyɛ́ ɔbá bá ná wɛɛ́ya ɛ́ŋɛ́mána.

¹⁹Ɔ taká, tɔ ndɔ sinə ɔwá, bá sa fínə umə́ bɔkɔasɛ́á bá sa níə́búə́ nɛkɔmba tálɛ́na á Huɛlɛ́.