Read Tunen Hɛ́bɛlɛ 4 Bible Online

Hɛ́bɛlɛ 4 - Tunen bible

Hɛ́bɛlɛ 4

¹Huɛlɛ́ a ka bəsú bílíhə́niə ɔwá tɔ ŋɔ fínə ɔ ɛbɔ́ka ɔyɛ́á a lɛ́á mbá tɔ́ hɔtɔ́kɔ. Nɔ́yɛ́, tɔ́ bɛ́tátáká muɛsɛ ɔwá ata mɔndɔ ɔ uwənú ətíə́ a lɛ híáná na əlimə ɔ nindínə́ ɔnɛ́á a lɛ ayɛ́ fínə́ umə́.

²Ɔ taká, tɔ ka Imbə́nú Yɛɛsɛ ɔ́kɔ́kɛna hɔ́ánánátɔ́ ɛ́sɛ́á bááyɛ́ ɔbá bá ná báá ɔ makɔ́tákɛ. Mba, yɛ́táyɛ́ Imbə́nú Yɛɛsɛ yɛ́ sa bəə́bu ɔ́lɔ bɔkɔasɛá, bá sa niasa ɔwá yɛ́ bəə́bu fínə́ ɔ mɔlɛ́má, bá níə́búə́ nɛkɔmba tálɛ́ná ɔ ɔwayɛ́.

³Mba, uwəsú ɔbá tɔ ná níə́súə́ nɛkɔmba tálɛ́ná á Huɛlɛ́, tɔ ŋɔ fínə ɔ ɛbɔ́ka ɔyɛ́á a lɛ́á ɔkɛaka ɔwá, tɔ́ hɔtɔ́kɔ. A ka hɔ́kɛna ɔwɔŋgɔkɔnɔ nɛ́táyɛ́ nɛhɔtɔ a sɛ́á: «Na hilóbi hikimə mɛ́ ná bəə́bu bɛ́yɔ́mɔ́kɛ́na ɔwá, bá sa ndəfínə́ ɔ ɛbɔ́ka ɔyɛ́á mɛ lɛ́á ɔkɛaka ɔwá bá hɔtɔ́kɔ!» Huɛlɛ́ a ka bɔ́áyɛ́á buolí hɔ́á ɔ yɛ́táyɛ́ ikúílí ɔyɛ́á a ná misí bɔta.

⁴Ɔ taká, Mətilə má ndɔ laa náana ɔ yɛ́mɔtɛ́ ɛsalɛ ɔwɔŋgɔkɔnɔ niɔŋgɔnɔ nɛ́ tunó tɔ́lɛ́ndɔ́lɔ́mɔnɔ má sɛ́á: «Huɛlɛ́ a ka bɔ́áyɛ́á buolí hɔ́á bukimə, a ná hɔtɔ́kɔ ɔ tunó tɔ́ ná úndúsíníə́ tɔ́lɛ́ndɔ́lɔ́mɔnɔ.»

⁵Bá ndɔ laa tɔ́na ɔ Mətilə bá sɛ́á: «Bá sa ndəfínə́ ɔ ɛbɔ́ka ɔyɛ́á mɛ lɛ́á ɔkɛaka ɔwá bá hɔtɔ́kɔ.»

⁶Bááyɛ́ ɔbá bá ná báá bə́búsíə́ ɔ Ɛtambá yɛ́ Huɛlɛ́ ɔwɔ́kɔ, bá sa əbú fínə ɔ yɛ́táyɛ́ ɛbɔ́ka bɔkɔasɛ́á bá ka kinə ɔwɔkɛ́na. Ɔ nifəŋə, bənə́bənə́ bá ŋɔ óso ufínə ɔmɔ́tɔ́yɛ́.

⁷Ɔ́ ɛ́lɔ́áyɛ́ nɔ́yɛ́ Huɛlɛ́ a ná manyɔ́ hinó hinə́hinə́ tínímiə ɔhɛ́á bá ndɔ ɛ́lɛnɛna bá sɛ́á: «Niɔfɛ́nɛ.» A ka nɔ́yɛ́ hɔ́kɛna mɔŋɛ́ŋa əlimə yɛ ikúílí ɛlɔ́áyɛ́ hítə́yí hinó ɔ ɛsalɛ ɔyɛ́á tɔ nɔ́ húlə ɔfana ɔ tɔ́mbákɛna na munuə wɔ́ Ndə́witi a sɛ́á: «Ábá nɔ ná nióni nɛ́ Huɛlɛ́ ɔ́kɔ́ niɔfɛ́nɛ, nɔ lɛ yə́núə́ mɛlɛ́má nə́tə́síə́».

⁸Ɔ taká, ata yɛ́ báá ɔwá, Yɔ́sua a ka fínə na ilúkunə yɛ́ Ísilahɛ́lɛ ɔ tiísi yɛ bɔnɔŋɔ bɔ́ nɛhɔtɔ, há Huɛlɛ́ a sa hɛ́na ɛlɔ́áyɛ́ hinó hinə́hinə́ hɛ́ nɛhɔtɔ.

⁹Nɔ́yɛ́, hinó hinə́hinə́ hɛ́ nɛhɔtɔ hɛ́ báka ɔ́maná ɛ́sɛ́á niɔŋgɔnɔ nɛ́ tunó tɔ́lɛ́ndɔ́lɔ́mɔnɔ ɛlɔ́áyɛ́ ilúkunə yɛ́ Huɛlɛ́.

¹⁰Ɔ taká, ikúílí mɔndɔ a ná fínə́ ɔ nɛhɔtɔ ɛmɛ́ŋɛ́ yɛ Huɛlɛ́, ɔ́ niɔŋɔ́ muití a lɛ ɔhɔtɔ wɔ́ bɔ́áyɛ́á buolí. Hɔ́ánánátɔ́ ɛ́sɛ́á Huɛlɛ́ a ná bɔ́áyɛ́á buolí hɔ́á, a ná hɔtɔ́kɔ.

¹¹Tɔ́ ányá ɔkɛaka ɔwá tɔ əsú fínə́ ɔ nɛhɔtɔ ɛmɛ́ŋɛ́ yɛ Huɛlɛ́, tɔ́ kɛ́áká ɔ nindínə́ ɔnɛ́á ata ɔmɔtɛ́ uwəsú ətíə́ a lɛ Huɛlɛ́ ɛ́ŋɛ́mána, a lɛ naná tɔ́na ɔ́maná ɛ́sɛ́á bíə́súə́ bisə́kínə́.

¹²Ɔ taká, Ɛtambá yɛ́ Huɛlɛ́ yɛ́ lɛa yɔɔmɔ́, yɛ́ lɛa tɔ́na na injiŋə. Yɛ́ lɛa lɛ́ákátɔ́ yáyɛ́ná mɔkɔ́átá wɔ́ bɛátɛ bɛ́fandɛ́. Yɛ́ ndɔ mɔndɔ nyúɛ́nɛna, yɛ́ ndɔ kafámá tɔ́na ɔ ɛbɔ́ka ɔyɛ́á hɛtányɛ́ na umbúínyi bá ndɔ ɛ́nyánana, yɛ́ ndɔ ka mɔɔŋɔ na mɔsíɔ́lɔlɛ́ itíə́lə. Ɛtambá yɛ́ Huɛlɛ́ yɛ́ ndɔ kɛa ɔwá mɔndɔ a bílúmə́kíníə́ ɔ ɔwayɛ́ mɔlɛ́má na ɔmanya yatɛ́ ɔyɛ́á yɛ́ lɛ́á yɛɛsɛ ɔ ɔkɛa.

¹³Ata bɔɔ́la bɔ́mɔtɛ́ ɔ ətíə́ yɛ bɛbɔ́tɛ́ná bikimə bɔ́ sa ósó á Huɛlɛ́ ubítímə. Bɛɛ́la bikimə bɛ́ lɛa ɔ mianyɔ́ ɔ ɔwayɛ́ məə́sə; ɔ ɔwayɛ́ tɔ ná hɔ́ánána ɔ binífúnínə́ uwíndiə bəsú bəkimə.

¹⁴Nɔ́yɛ́, tɔ báka na mutitiəmahánɛna mɔŋɛ́ŋa ɔwá a ná yáyɛ́nána, á Yə́susu á Mɔná wa Huɛlɛ́, a ka ákána a ná kə́túənə ɔ ɛmɛ́ŋɛ́ yɛ Huɛlɛ́, tɔ́ ɔ́nɛ́nɛ́na ɔ bɛkɔa ɔbɛ́á tɔ ná lúmínínə, tɔ́ bɛɛ́ta fə́mə́lə́níə́ ɔ mianyɔ́.

¹⁵Ɔ taká, wəsúə́ mutitiəmahánɛna mɔŋɛ́ŋa ɔwá tɔ lɛ́á itíə́nə́tɔ́, wɛɛ́ya á lɛ́á na iŋgínə́ yɛ uwəsú ɔwɔ́lɔ ikúílí tɔ lɛ́á tɔmbɔ́tɔ, a ka wɛɛ́ya ɔ́kɔ́lɔkɛna ɔ məndínə́ məkimə ɛ́sɛ́á bəsú, mba, a sa bɔbɛ́á kɛa.

¹⁶Nɔ́yɛ́, tɔ́ bɛ́nyálɛ́lá na yɔnɛ́nɛna yikimə ɔ busíə́ bɔ́ Huɛlɛ́, ɔwayɛ́ ɔwá a ndɔ buɛsɛ kɛa ɔ bɛndɔ ɔkɛaka ɔwá, a bəsú mɛɛ́luwə, a bəsú yayɛ́á nyɔnɔ índíə́ ɔyɛ́á yɛ́ ndɔ bəsú ɛkamɛla índiə ɔ ikúílí ɔyɛ́á a ndɔ hikiə.