Read Tunen Hɛ́bɛlɛ 5 Bible Online

Hɛ́bɛlɛ 5 - Tunen bible

Hɛ́bɛlɛ 5

¹Abáka bá mutitiəmahánɛna tɛ́fa bikúílí bikimə ɔ ətíə́ yɛ bɛndɔ, a lɛa tɔ́na na bɔsɔ́ma bɔ́ ubísúmbə́niə ɛlɔ́áyɛ́ bɛndɔ ɔwɔŋgɔkɔnɔ nəníə́ bá ndɔ niŋə na Huɛlɛ́. Bɔ́áyɛ́á buolí bɔ́ lɛa ɔ bɛnamá na mahánɛna uwíndiə ɛlɔ́áyɛ́ mabɛ́á má bɛndɔ.

²A lɛa hɔ́anánátɔ́ ɔ bááyɛ́ ɔ ɔmanya ɛlɔ́áyɛ́ yatɛ́ bɛndɔ bá ndɔ mabɛ́á kɛa, ataná, ɛlɔ́áyɛ́ yatɛ́ bá ndɔ nɔ́yɛ́ kɛa ɔ bɔlɛmanyá bɔkɔasɛ́á, wɛɛ́ya bɛ́múɛ́tɛ́ tɔ́na a lɛa úndúə́tɔ́ na bɔtɔmbɔ́.

³Ɛlɔ́áyɛ́ bɔ́táyɛ́ bɔtɔmbɔ́, a ná hɔ́ánána ɔ bɛnamá ɔhánɛna ɛlɔ́áyɛ́ máyɛ́á mabɛ́á bɛ́múɛ́tɛ́ na mabɛ́á má ilúkunə.

⁴Ata mɔndɔ a sa ósó ɔ hítə́yí hibə́təniə ubíndiə wɛɛ́ya bɛ́múɛ́tɛ́ ɔhɛ́á á híáná mutitiəmahánɛna mɔŋɛ́ŋa, á Huɛlɛ́ a ndɔ mutitiəmahánɛna mɔŋɛ́ŋa ɛ́lɛna ɛ́sɛ́á a ná Álɔnɔ ɛ́lɛ́ákɛ́na.

⁵Yɛ́ lɛa nɔ́yɛ́ hɔ́ánánátɔ́ ɛlɔ́áyɛ́ Kilísitusu: Ɛnaka á híáná mutitiəmahánɛna mɔŋɛ́ŋa, tátá wɛɛ́ya bɛ́múɛ́tɛ́ a ná tɔ́táyɛ́ tuúmə bíndíə́, tɔ́ ka húlínə na Huɛlɛ́ ɔwá a ná wɛɛ́ya lɛ́na a sɛ́á: «Aŋɔ́á ɔ lɛ́á wamɛ́á Mɔná, ɔ botolokiə niɔfɛ́nɛ mɛ ná híáná yawɔ́á Isə́.»

⁶Huɛlɛ́ a ka laa ɔ yɛ́mɔtɛ́ ɛbɔ́ka a sɛ́á: «Ɔ lɛa mutitiəmahánɛna ɛlɔ́áyɛ́ ikúílíə́kimə, hɔ́ánánátɔ́ ɛ́sɛ́á á Mɛlɛkisɛtɛ́kɛ a ná bámɛ́nɛ́na.»

⁷Ikúílí Kilísitusu ɔwayɛ́ a ná bámɛ́nɛ́na ɔ misí, muyə́mə́yə́mə́ mɔŋɛ́ŋa na bililíní ɔ məə́sə, a ka Huɛlɛ́ yə́mə́kinə, a ná wɛɛ́ya lɛlákɛ́na ɔwayɛ́ ɔwá a lɛ́á na iŋgínə́ yɛ ɔwayɛ́ unuəniə ɔ nyɛmbɛ́; ɛ́sɛ́á a ná báá bílólósólíə́tɔ́ ɔ bɛkɔa bikimə, Huɛlɛ́ a ka máyɛ́á mabɛ́kálɛ́na ɔ́kɔ.

⁸Ata nɔ́yɛ́ ɛ́sɛ́á a lɛ́á Mɔná wa Huɛlɛ́, a ka yɔkɛ́nana ɔ́kɔ́naka ɔ tɔ́mbákɛna na məsə́kə.

⁹Huɛlɛ́ a ka wɛɛ́ya tuəniniə ɔ ɛbɔ́ka yɛŋɛ́ŋa, a ka híána wɛ́ɛ́yɛ́ ɔwá a ndɔ bəkimə nuəniə ikúílíə́kimə.

¹⁰Ɔ taká, Huɛlɛ́ a ka wɛɛ́ya tínímiə mutitiəmahánɛna mɔŋɛ́ŋa hɔ́ánánátɔ́ ɛ́sɛ́á Mɛlɛkisɛtɛ́kɛ a ná bámɛ́nɛ́na.

¹¹Uwəsú, tɔ lɛa na bɛkɔa biəŋí ɔ ɔhɛ́na ɔ yɛ́táyɛ́ ɛsalɛ, mba, yɛ́ lɛa ányákátɔ́ ɔwá tɔ bənú bɛɛ́ta nífúnə́kínə́ bɔkɔasɛ́á, abáka nɔ lɛ hútú bɛkɔa ɔ́kɔ.

¹²Nɔ ná hɔ́ánána ɔbáá bənə́niə bá bɛkɔa ɔbɛ́á nɔ ná ɔ́kɔ́náká hata yɛ ikúílí, mba isíŋáka, bá ná hɔ́ánana ɔ uwənú ɔ tɔkɔakɔ́á uwukúniə ɔwɔŋgɔkɔnɔ Ɛtambá yɛ́ Huɛlɛ́. Nɔ nɔ́ kafámá ɔ ikúílí ɔyɛ́á bá ná hɔ́ánána ɔ uwənú uwíndiə á mabɛ́nyɛ, tátá á bɛsaŋakɛ bɛ́ bɛ́labɔ́nɛ́á.

¹³Wɛ́ɛ́yɛ́ ɔwá a ndɔ nyóho, a lɛa bikúílí bikimə mɔnámusoní. A lɛ ndɔ manya ɔtɛ́fa yatɛ́ ɔyɛ́á yɛ́ lɛ́á taká á Huɛlɛ́ busíə́.

¹⁴Ɔ nifəŋə, bahɔ́mɔ́ abáka bá bɛsaŋakɛ nɛ́áka. Ɔ tɔ́mbákɛna na bɛkɔa ɔbɛ́á bá ná síə́kínə, bá lɛa hɔ́ánánátɔ́ ɔ bɛkɔa ubúlúnə bɛɛsɛ na bɛbɛ́á.