Read Tunen Hɛ́bɛlɛ 6 Bible Online

Hɛ́bɛlɛ 6 - Tunen bible

Hɛ́bɛlɛ 6

¹Nɔ́yɛ́, tɔ́ bɛkɔa bíbúsíə́ bákɛ́á ɔwɔŋgɔkɔnɔ na Kilísitusu ɔbɛ́á bá ná bəsú úkúnə́kíə́, tɔ́ ákánána ɔ busíə́ ɔ bɛ́ɛ́yɛ́ bɛ́ bahɔ́mɔ́, tɔ lɛa manyɔ́ ndahíáná ɔ bɛtɛ́kɛ́ná bíbúsíə́ bɛ́ yɛ́táyɛ́ imbə́nú, ɔ́ niɔŋɔ́, tɔ lɛa manyɔ́ bɛndɔ uwukúniə ɔwá, bá mɔlɛ́má kɔ́ŋɔ́ná ɔ biolí ɔbɛ́á bɛ́ ndɔ bəə́bú ákánana ɔ bunímə́, bɛndɔ tɔ́na bá lɛ níə́búə́ nɛkɔmba tálɛ́ná á Huɛlɛ́.

²Tɔ lɛ manyɔ́ binə́níníə́ úkúniə ɔwɔŋgɔkɔnɔ nindínə́ nɛ́ nɛsɔa, ɔwɔŋgɔkɔnɔ ɔ makátá ɔtálɛ́na ɔ bɛndɔ, ɔwɔŋgɔkɔnɔ na nɛhɔŋɔa nɛ́ bəwə́nú, ɔwɔŋgɔkɔnɔ bikə́lə́síníə́ ɔ hinó hɛ́ nitifə́.

³Tɔ́ bɛ́ɛ́yɛ́ bɛkɔa bákɛ́á, tɔ́ ákána ɔ busíə́ ábá Huɛlɛ́ a ná índíə́.

⁴Tɔ lɛ manyɔ́ bɛ́ɛ́yɛ́ bɛkɔa úkúniə bɔkɔasɛ́á, ikúílí bɛndɔ bá ná ɛnɔ́mɛ yɛ́ Huɛlɛ́ níása, yɛ́ lɛa ányákátɔ́ ɔkɛaka ɔwá, bá bəə́bu ɔ́lɔ́ ɔkɛaka ɔwá bá mɔlɛ́má kɔŋɔna, bááyɛ́ bɛndɔ bá ka isəmú siəkinə ɔyɛ́á yɛ́ ndɔ húlínə na Huɛlɛ́, bá ka bɛɛ́la bɛɛsɛ kusənə ɔbɛ́á Huɛlɛ́ a ndɔ índiənə, Umbúínyi Mɔnaŋanaŋa wɔ́ ka fínə ɔ uwəbú mɔlɛ́má.

⁵Bá ka manya ɔwá Ɛtambá yɛ́ Huɛlɛ́ yɛ́ lɛa yɛɛsɛ, bá ka mənjiŋə má misí ɔyɛ́á yɛ́ lɛ́á ɔ ɔsákɔna bɛ́kɛakɛna,

⁶ata nɔ́yɛ́, bá ka híána ɔ uwəbú buɔmɔ́ bɔ́ buɔnɔ́. Yɛ́ lɛa ányákátɔ́ ɔwá bááyɛ́ bɛndɔ bá mɔlɛ́má kɔ́ŋɔ́ná bɔkɔasɛ́á, bá ndɔ manyɔ́ Mɔná wa Huɛlɛ́ ɔ́mɛ́na ɔ ɔmbásá ɔ tɔ́mbákɛna na nɛ́áyɛ́á nibítíkə, bá ndɔ wɛɛ́ya sámbɔ́na tɔ́na ɔkɛaka ɔwá, bɛndɔ bá wɛɛ́ya kɔbaka.

⁷Ikúílí tɛ́á ɔyɛ́á abáka mənífə́ má ɛmbɔŋɔ má misí lufəkə, abáka misí yɛ́ bɛlɔŋɔ́tɛ́ bɛɛsɛ hákɛna ɛlɔ́áyɛ́ bááyɛ́ ɔbá bá ná mɛɛ́ta nyɔɔ́kɔ, ɔ́ niɔŋɔ́, Huɛlɛ́ a ná yɛ́ɛ́yɛ́ misí sána.

⁸Mba, ɛ́bá yɛ́ ná hákɛ́na á bɛnjɔnjɔ́lɔkɛ na imbuə mɛbɛ́á, misí yɛ́ híána bɔɔ́la bɔ́ ndəmə, Huɛlɛ́ a mɛɛ́ta tikisiə, a mɛɛ́ta hiwə háá ɔkɛaka ɔwá yɛ́ nimə.

⁹Ata nɔ́yɛ́, á bɛ́ámɛ́á bɛŋgɔ́áyɛ́, ábá tɔ ndɔ əsú laa nɔ́yɛ́, tɔ lɛ ɛ́mɛ́nɛ́nátɔ́ ɔwá nɔ lɛa ɔ ɛnɔ́mɛ yɛɛsɛ, Huɛlɛ́ tɔ́na a ŋɔ bənú nuəkəniə.

¹⁰Ɔ taká, Huɛlɛ́ a booko mɔndɔ wa tɛ́nɛ́mátɔ. A sa ndá buolí buɛsɛ fəliə ɔbɔ́á nɔ ná nyɔ́ɔ́kɔ, ɔ uwinə́niə ɔwá nɔ ndɔ wɛɛ́ya hikiə, nɔ ka bənísə́ á bəlumininə bənə́bənə́ ɔ́lɔ́kɛna, isíŋáka, nɔ ndɔ nɔ́yɛ́ kɛa ikúílí tɛ́á.

¹¹Mba, tɔ lɛa na ilókí ɔwá mɔɛ́ta tɛ́á ɔ uwənú ətíə́ a kɛ́áká nɔ́yɛ́ ɔ ɔyáyɛ́na ɔkafámáká ɔ nisúki, na ɔmanya ɔwá a lɛa na yatɛ́ ɔyɛ́á a ndɔ táta.

¹²Nɔ lɛ híáná bɔtɔmbɔ́, mba, nɔ́ iŋgətí ɛ́tɛ́na ɔ bááyɛ́ ɔbá bá ná níə́búə́ nɛkɔmba tálɛ́ná á Huɛlɛ́ na nitiŋiminə nikimə, nɔ́yɛ́, bá ná kusə́nə́ tɔ́na yatɛ́ ɔyɛ́á Huɛlɛ́ a ná bílíhə́níə́.

¹³Ɛnaka Huɛlɛ́ a nɛ́áyɛ́á nɛkaka hákɛ́ná na Ábɛlaháma, ɛ́sɛ́á a sa bá na mɔndɔ mɔŋɛ́ŋa ɔ ɔyáyɛ́na mbá á bíkúmínə, a ka bíkumə ɔ tɔ́mbɛ́na na wɛɛ́ya bɛ́múɛ́tɛ́.

¹⁴A ka bíkumə a sɛ́á: «Ɔ taká, mɛ ŋɔ aŋɔ́á úndúsiə na bɛsɔ́nɔ, mɛ ŋɔ kɛaka ɔwá yáwɔ́á ɛndɛkɛ yɛ́ bunə́kə ɔ ɔyáyɛ́na.»

¹⁵Ábɛlaháma a ka ɔ́kɔ, a ná tiŋímínə, Huɛlɛ́ a ná wɛɛ́ya índíə́ yatɛ́ ɔyɛ́á a ná bílíhə́níə́.

¹⁶Ikúílí ɔyɛ́á bɛndɔ bá ndɔ bíkumə, bá ndɔ nɔ́yɛ́ bíkúminə ɔ niínyə nɛ́ mɔndɔ ɔwá a ná bəə́bu yayɛna. Nɔ́yɛ́ yɛ́ ndɔ ínə́niə ɔwá, yatɛ́ ɔyɛ́á bá ná bíkúmínə yɛ́ lɛa taká ɔ nindínə́ ɔnɛ́á, bɛndɔ bá lɛ tə́ŋə́níə́ tɔ́na.

¹⁷Nɔ́yɛ́, Huɛlɛ́ a ka bíkumə ɔ yatɛ́ ɔyɛ́á a ná bɛndɔ bílíhə́níə́ ɔkɛaka ɔ sɛ́á á ínə́niə tə́lə́ŋu ɔwá, ábá a ná bɔkɔa bílíhə́níə́, a bɔɛ́ta úndúsiniə.

¹⁸Nɔ́yɛ́, bɛkɔa bɛ́ lɛa bɛ́fandɛ́ ɔbɛ́á abáka Huɛlɛ́ a lɛ sə́njíə́. A sa ósó ɔ nɔ́yɛ́ ɔlaa ɛlɔ́áyɛ́ ɔkanja. Nɔ́yɛ́ yɛ́ ndɔ kɛa ɔwá, uwəsú ɔbá tɔ ná bítímínə ɔ ɔwayɛ́, nɔ́yɛ́ yɛ́ ndɔ bəsú makɛ́nda índiə ɔwá, tɔ háá ɔ uwəsú mɛlɛ́má tɔ sɛ́á tɔ lɛa na yatɛ́ ɔyɛ́á a ná bəsú bílíhə́níə́.

¹⁹Tɔ ŋɔ kusənə yatɛ́ ɔyɛ́á Huɛlɛ́ a ná bəsú bílíhə́níə́, ɔ́ ɛlɔ́áyɛ́ nɔ́yɛ́ tɔ́ lɛ́á ndíŋímə́tɔ́ ɔ ɔwayɛ́ busíə́ ɛŋaná bɔkɔ́lɔ́ma. Ɔ́ ɛlɔ́áyɛ́ nɔ́yɛ́ tɔ́na tɔ ndɔ nɛbata fɛ́njálana ɔnɛ́á bá ná miímə yɛ Huɛlɛ́ ə́lúnə́níə́, tɔ ka fámá ɔ ɛbɔ́ka ɔyɛ́á a booko.

²⁰Ɔ ɔmɔ́tɔ́yɛ́ Yə́susu a ná taŋá ɔ ufínə uwəsú ɛlɔ́á bɔkɔasɛ́á, a ka híána Mutitiəmahánɛna mɔŋɛ́ŋa ɛlɔ́áyɛ́ ikúílíə́kimə ɛ́sɛ́á á Mɛlɛkisɛtɛ́kɛ ɔ mɔŋɛ́ŋa.