Read Tunen Hɛ́bɛlɛ 7 Bible Online

Hɛ́bɛlɛ 7 - Tunen bible

Hɛ́bɛlɛ 7

¹Wɛ́ɛ́yɛ́ mɔndɔ á Mɛlɛkisɛtɛ́kɛ a ka báá munəni ɔ bətínə́ yɛ Salɛ́mɛ, a ka báá tɔ́na mutitiəmahánɛna mɔŋɛ́ŋa wa Huɛlɛ́ yɛ ɔmɔlɔ́mɔ́kɔndɔ. Ɛnaka Ábɛlaháma á ndáhíáná ɔ bilə́, a ka bənəni ɔ́nɔ́kɔ, Mɛlɛkisɛtɛ́kɛ a ná ákáná ɔ ɔwayɛ́ nɛnyáná, a ná wɛɛ́ya saná tɔ́na.

²Ɔ ɔwayɛ́ á Ábɛlaháma a ná ɛsalɛ índíə́ ɛ́mɔtɛ́ ɔ mɛɛ́lɔ yɛ niómo nɛ́ bɛsalɛ bɛ́ bɛɛ́la bikimə ɔbɛ́á a ná ɛ́táká ɔ mikómó. Niínyə níbúsíə́, á Mɛlɛkisɛtɛ́kɛ ɔ́ niɔŋɔ́ sɛ́á: «Munəni ɔwá a lɛ́á taká» a lɛa tɔ́na munəni wa bətínə́ yɛ Salɛ́mɛ, ɔ́ niɔŋɔ́, munəni wa bumbə́nú.

³Ata mɔndɔ a sa bá a ndɔ yayɛ́á isə́ manya mbá ata yayɛ́á inyə́, ata bɛ́áyɛ́á bisə́kínə́ mbá ata ikúílí ɔyɛ́á bá ná wɛɛ́ya biənə, ata buɔsɛ́ ɔbɔ́á a ná wəə. Mba, a ka bá ɛ́sɛ́á Mɔná wa Huɛlɛ́ bɔkɔasɛ́á, bɔ́áyɛ́á buolí bɔ́ mutitiəmahánɛna mɔŋɛ́ŋa bɔ́ lɛa ɛlɔ́áyɛ́ ikúílíə́kimə.

⁴Nɔ́ siəkínə́ ɛ́sɛ́á Mɛlɛkisɛtɛ́kɛ a lɛ́á mɔŋɛ́ŋa! Nəníə́ tɔ́na á Ábɛlaháma ɔ yəsúə́ isə́kínə́ a ná wɛɛ́ya ɛsalɛ yɛɛsɛ ɛ́mɔtɛ́ ɔ mɛɛ́lɔ yɛ niómo nɛ́ bɛsalɛ bikimə índíə́ ɔbɛ́á a ná húlə́kə́nə ɔ bilə́.

⁵Nɔ́yɛ́, bɔ́mɔtɛ́ baná bá ɛndɛkɛ Lə́wi bá lɛa bətitiəmahánɛna, umbə́ndə́ wɔ́ Mósisi wɔ́ ndɔ bəə́bu lɛna ɔwá, ilúkunə yɛ́ Ísilahɛ́lɛ bá ná hɔ́ánána uwəbú ɔ ɛsalɛ ɛ́mɔtɛ́ ɔ mɛɛ́lɔ yɛ niómo nɛ́ bɛsalɛ bɛ́ bɛɛ́la uwíndiə ɔbɛ́á bá lɛ́á itíə́nə́tɔ. Tɔ ndɔ sinə ɔwá bá ka báá bá ndɔ bɛ́ɛ́yɛ́ bɛɛ́la kusənə ɔ makátá má bə́búə́ bənísə́, mbá nɔ́yɛ́ bá lɛ́á bá ɛndɛkɛ Ábɛlaháma.

⁶Mba, Mɛlɛkisɛtɛ́kɛ a sa ayɛ́ bá mɔndɛkɛ Lə́wi, mba, Ábɛlaháma a ka wɛɛ́ya ɛsalɛ ɛ́mɔtɛ́ ɔ niómo nɛ́ bɛsalɛ índiə bɛ́ bɛɛ́la ɔbɛ́á a ná húlə́kə́nə ɔ bilə́. Mɛlɛkisɛtɛ́kɛ a ka Ábɛlaháma sana ɔwá Huɛlɛ́ a ná wɛɛ́ya bílíhə́níə́.

⁷Nɔ́yɛ́, tɔ ndɔ manya muɛsɛ ɔwá, wɛ́ɛ́yɛ́ ɔwá a ndɔ mukúlə́kulə sana, wɛɛ́ya a lɛ́á mɔŋɛ́ŋa yáyɛ́ná ɔsɔ́kɔ́ ɔwá bá ná sana.

⁸Ɛndɛkɛ Lə́wi ɔbá bá ndɔ ɛsalɛ ɛ́mɔtɛ́ ɔ niómo nɛ́ bɛsalɛ bɛ́ bɛɛ́la kusənə, bá lɛa bɛndɔ ɔbá bá ndɔ wə́ə́; mba, ɛlɔ́áyɛ́ Mɛlɛkisɛtɛ́kɛ ɔwá bá ná nioko nɛ́ bɛɛ́la índíə́, bá ndɔ manya ɔwá a nabáka ɔ buɔmɔ́.

⁹Tɔ óso ɔlaa tɔ sɛ́á Lə́wi ɔwá bá ndɔ ɛsalɛ ɛ́mɔtɛ́ ɔ niómo nɛ́ bɛsalɛ índíə́, a ka ayɛ́ nioko índiə á Mɛlɛkisɛtɛ́kɛ bɔkɔasɛ́á, Ábɛlaháma ɔ yəbúə́ isə́kínə́, a ka nioko nɛ́ bɛɛ́la Mɛlɛkisɛtɛ́kɛ índiə.

¹⁰Ɔ́ niɔŋɔ́, Lə́wi a ka bámɛnɛna ɔ tɔsáŋa tɔ́ yayɛ́á isə́kínə́ ɔ ikúílí Ábɛlaháma a ná ndá Mɛlɛkisɛtɛ́kɛ ɛ́nyánána.

¹¹Buolí bɔ́ bətitiəmahánɛna ɔ ɛndɛkɛ Lə́wi bɔ́ sa umbə́ndə́ wɔ́ Huɛlɛ́ úndúsiniə ɔwá a ná láá ɔwɔŋgɔkɔnɔ na bɛnamá, ata bá muítə úndúsíníə́, há wɔmɔtɛ́ mɔhɛ́nátɔtányɛ́ ɛ́sɛ́á á Mɛlɛkisɛtɛ́kɛ a sa ayɛ́ fámálana. Yɛ́ ka báá ɔwá Mutitiəmahánɛna mɔŋɛ́ŋa á bámɛ́nɛ́ná mɔndɛkɛ Lə́wi ɛ́sɛ́á á Álɔnɔ. Ɔ bətitiəmahánɛna bá yɛ́táyɛ́ ɛndɛkɛ, á Huɛlɛ́ a ná umbə́ndə́ índíə́ ɔ bɛndɔ bá Ísilahɛ́lɛ.

¹²Ɔ taká, ikúílí bá ná nindínə́ nɛ́ ɔhíána bətitiəmahánɛna úŋúnə́níə́, bá ná hɔ́ánána umbə́ndə́ uwuŋúnəniə tɔ́na.

¹³Yəsúə́ Isə́lúkú á Yə́susu ɔwá tɔ ndɔ hɛ́na a sa fáma ɛndɛkɛ Lə́wi. A ka fáma ɔ ɛndɛkɛ ɔyɛ́á ata mɔndɔ a lɛ bá mutitiəmahánɛna ɔ niɔlɔ nɛ́ mahánɛna.

¹⁴Ɔ taká, bɛndɔ bəkimə bá ndɔ manya muɛsɛ ɔwá, yəsúə́ Isə́lúkú a ka fáma ɔ hitikə hɛ́ Yúta. Ɛnaka Mósisi a hɔ́kɛ́na ɛlɔ́áyɛ́ bətitiəmahánɛna, a sa laa ɔwá mutitiəmahánɛna a ka fáma ɔ hítə́yí hitikə.

¹⁵Bətitiəmahánɛna bá ɛndɛkɛ Lə́wi bá sa bɛndɔ ɛta á Huɛlɛ́ busíə́. Ɔ́ bɔkɔa bɔ́ɔbɔ ɔbɔ́á bɔ́ ndɔ nɔ́yɛ́ nífúnə muɛsɛ: Wɔmɔtɛ́ mutitiəmahánɛna a ka fámálana ɛ́sɛ́á á Mɛlɛkisɛtɛ́kɛ.

¹⁶A sa híána mutitiəmahánɛna mɔŋɛ́ŋa ɔwɔŋgɔkɔnɔ na umbə́ndə́ wɔ́ hikúlə. A ka híána mutitiəmahánɛna, ɔ tɔ́mbákɛna na injiŋə ɔyɛ́á yɛ ndɔ kɛa ɔwá a bámɛ́nɛ́ná ɔ buɔmɔ́ ikúílíə́kimə.

¹⁷Ɔ taká, Mətilə má ndɔ laa má sɛ́á: «Ɔ lɛa mutitiəmahánɛna ɛlɔ́áyɛ́ ikúílíə́kimə, hɔ́ánánátɔ́ ɛ́sɛ́á Mɛlɛkisɛtɛ́kɛ a ná bámɛ́nɛ́na.»

¹⁸Nɔ́yɛ́, Huɛlɛ́ a ka umbə́ndə́ wɔ́ buɔnɔ́ húə́siə bɔkɔasɛ́á, wɔ́ ka báá tɔmbɔ́kɔ́tɔ, wɔ́ sa bɛndɔ ɔ́lɔ.

¹⁹Ɔ taká, umbə́ndə́ wɔ́ Mósisi wɔ́ sa bɛndɔ ɔ́lɔ ɔkɛaka ɔwá, bá bámɛ́nɛ́na ɛŋaná hɛkabalɛ á Huɛlɛ́ busíə́. Mba isíŋáka, Huɛlɛ́ a ka bəsú bɔɔ́la buinə́buinə́ índiə ɔbɔ́á bɔ́ ná umbə́ndə́ yayɛna, yə́súə́ ɛnánɛna yɛ́ lɛa tálɛ́nátɔ́ ɔ bɔ́táyɛ́ bɔɔ́la, bɔ́ ndɔ kɛa ɔwá tɔ bɛ́nyálɛ́la á Huɛlɛ́ busíə́.

²⁰Bɔ́mɔtɛ́ bɔkɔa bɔ́ báka tɔ́na ɔwá, ɔ ikúílí Huɛlɛ́ a ná Yə́susu tínímíə́ ɛ́sɛ́á mutitiəmahánɛna mɔŋɛ́ŋa, a ka bíkumə. A sa bətitiəmahánɛna bá ɛndɛkɛ Lə́wi bíkúminə.

²¹Mba, Huɛlɛ́ a ka Yə́susu bíkúminə a sɛ́á: «Ɔwámɛ á Isə́lúkú, mɛ ná bíkúmə́, mɛ sa ndá munuə kɔ́ŋɔ́nɛ́na: “Ɔ lɛa mutitiəmahánɛna ɛlɔ́áyɛ́ ikúílíə́kimə.”»

²²Ɛnaka Huɛlɛ́ á nɔ́yɛ́ bíkúmə́, Nɔ́yɛ́ yɛ́ ndɔ ínə́niə ɔwá, nyɔnɔ na Yə́susu, nɛtɔana ɔnɛ́á Huɛlɛ́ a ná kɛ́áká na bəsú, nɛ́ lɛa nɛmbányɛ ɔ yáyɛ́na nɛ́ buɔnɔ́.

²³Bɔ́mɔtɛ́ bɔkɔa bɔ́ báka tɔ́na, bətitiəmahánɛna bá ɛndɛkɛ Lə́wi bá ka báá bəəŋí bɔkɔasɛ́á, nyɛmbɛ́ yɛ́ sa bá yɛ́ ndɔ ókóto ɔwá bá nɔmɔ́kɔ́ iŋíkúílíə́kimə.

²⁴Mba, Yə́susu ɔwayɛ́, a ndɔ nɔmɔ ikúílíə́kimə, bɔ́áyɛ́á bɔsɔ́ma bɔ́ mutitiəmahánɛna bɔ́ sa ndáhɔa.

²⁵Ɔ́ ɛlɔ́áyɛ́ nɔ́yɛ́ a lɛ́á hɔ́ánánátɔ́ ɔ ɔkɛa ɔwá, bááyɛ́ ɔbá bá ndɔ tɔ́mbákɛna ɔ ɔwayɛ́, ɔbá bá ndɔ bɛ́nya á Huɛlɛ́ busíə́, Huɛlɛ́ á bəə́bu nuəkə́níə́ bɔkɔasɛ́á, a báka muɔmɔ́ iŋíkúílíə́kimə, ɔkɛaka ɔwá a Huɛlɛ́ bɛ́kálákɛ́na ɔ ɛlɔ́áyɛ́ əbú.

²⁶A lɛa mutitiəmahánɛna mɔŋɛ́ŋa ɔwá a ná bəsú hɔ́ánánɛ́na: Mɔnaŋanaŋa, ɛŋaná hɛkabalɛ, ɛŋaná bɔbɛ́á, Huɛlɛ́ a ka wɛɛ́ya álɔ́na na bakɛamabɛ́á, a ná wɛɛ́ya tínímíə́ ɔ ɛbɔ́ka yɛŋɛ́ŋa hə́ə́ní ɔ nɔɔ́mɛná.

²⁷A sa hɔ́ánána ɔ bɛnamá uwíndiə buɔsɛ́ tɛ́á ɛlɔ́áyɛ́ mabɛ́á má wɛɛ́ya bɛ́múɛ́tɛ́, əlimə yɛ ikúílí, ɛlɔ́áyɛ́ mabɛ́á má ilúkunə ɔ́maná ɛ́sɛ́á bɔ́mɔtɛ́ bətitiəmahánɛna baŋɛ́ŋa, a ka nɔ́yɛ́ kɛaka ikúílí ɛ́mɔtɛ́ ɔ bikúílí bikimə, ɛnaka a bɛ́hánɛ́ná wɛɛ́ya bɛ́múɛ́tɛ́.

²⁸Ɔ umbə́ndə́ wɔ́ Mósisi, bá ka bá bá ndɔ bɛndɔ tɛ́fa ɔkɛaka ɔwá bá bəə́bu tínímíə́ bətitiəmahánɛna baŋɛ́ŋa, bá ka bá bá ndɔ mabɛ́á kɛa. Mba, ɛnaka umbə́ndə́ wɔ́ tɔ́mbá, Huɛlɛ́ a ka hɔ́ɔ́kɔ, a ná bíkúmə́, a ná wayɛ́á Mɔná tínímíə́ mutitiəmahánɛna ɛlɔ́áyɛ́ ikúílíə́kimə bɔkɔasɛ́á, wɛ́ɛ́yɛ́ wayɛ́á Mɔná, a ka kɛaka ɛ́sɛ́á a ná híkə́kíə́.