Read Tunen Hɛ́bɛlɛ 8 Bible Online

Hɛ́bɛlɛ 8 - Tunen bible

Hɛ́bɛlɛ 8

¹Ɔ́ bɔkɔa bɔŋɛ́ŋa bɔ́ɔbɔ ɔbɔ́á tɔ ndɔ laa, tɔ báka na mutitiəmahánɛna mɔŋɛ́ŋa ɔ yɛ́tana ɛnya, a lɛa tuənə́tɔ́ ɔ mɔkátá wɔ́ bɛnɔ́mɛ ɔ hikómo hɛ́ Huɛlɛ́, umə́ a ndɔ manɛna na injiŋə yikimə.

²A ndɔ bɔ́táyɛ́ bɔsɔ́ma úndúsiniə ɔ ɛbɔ́ka ɔyɛ́á Huɛlɛ́ a booko, ɔ́ niɔŋɔ́ ɔ tiísi yɛ yanda yɛ́ mabɛ́kálɛ́na ɔyɛ́á Isə́lúkú a ná fálábáka, tátá mɔndɔ.

³Ata ɔ́ uwə́níə́ mutitiəmahánɛna mɔŋɛ́ŋa a lɛa tínímíə́tɔ́ ɛlɔ́áyɛ́ mahánɛna na bɛnamá uwíndiə; yɛ́ lɛa hɔ́ánánátɔ́ ɔwá wəsu a bámɛ́nɛ́ná tɔ́na na bɔɔ́la uwíndiə.

⁴Ata Kilísitusu a bámɛnɛna ɔ misí, há a sa bá mutitiəmahánɛna bɔkɔasɛ́á, ubusíə́ ɔbɔ́á a ndáfámá ɔ misí, bɛndɔ bá ka báá bá ndɔ mahánɛna índiə á Huɛlɛ́ ɛ́sɛ́á umbə́ndə́ wɔ́ Mósisi wɔ́ ndɔ bata.

⁵Bááyɛ́ bətitiəmahánɛna bá ka báá bá ndɔ búə́búə́ buolí nyɔɔ ɔ miímə yɛ Huɛlɛ́, mba, yɛ́ɛ́yɛ́ miímə yɛ́ lɛa ɔbánɔ́ iŋgətí yɛ tiísi yɛ miímə ɔyɛ́á yɛ́ lɛ́á ɔ nɔɔ́mɛná. Ikúílí Mósisi a ná báá ɔ yanda yɛ́ Huɛlɛ́ ɔfalaba, Huɛlɛ́ a ka wɛɛ́ya lɛna a sɛ́á: «Ɔ siəkinə! Falábáká yɛɛ́ta ɛ́sɛ́á mɛ ná aŋɔ́á ínə́níə́ ɔ ɔmáá ɔmbáŋá.»

⁶Nɔ́yɛ́ tɔ ndɔ sinə ɔwá, buolí bɔ́ Yə́susu bɔ́ ka báá bɔŋɛ́ŋa yáyɛ́ná bɔ́ bááyɛ́ bətitiəmahánɛna, a lɛa tɛ́nɛ́mátɔ ɔ ətíə́ na bɛndɔ na Huɛlɛ́ ɛ́sɛ́á mɔkɔ́kɔ́nɔ́ ɔ nɛtɔana nɛmbányɛ. Nɛ́ɛ́yɛ́ nɛtɔana nɛ́ ná nɛtɔana níbúsíə́ yáyɛ́ná bɔkɔasɛ́á, yatɛ́ ɔyɛ́á Huɛlɛ́ a ndɔ bílíhə́niə umə́, yɛ́ ndɔ bikimə yáyɛ́na ɔbɛ́á tɔ́ ná taŋá ukusənə.

⁷Ata nɛtɔana níbúsíə́ nɛ́ bámɛnɛna ɛŋaná hɛkabalɛ, há Huɛlɛ́ sa nɛɛ́ta sə́njiə na nɛtɔana ninə́ninə́.

⁸Tɔ ndɔ sinə ɔwá, tɔkabalɛ tɔ́ ka báá ɔ nɛ́táyɛ́ nɛtɔana, ɔ́ ɛlɔ́áyɛ́ nɔ́yɛ́ Huɛlɛ́ a ná yáyɛ́á ilúkunə hɛkɔma lúmə́ a sɛ́á: «Siəkínə́nu! Isə́lúkú a ndɔ laa ɔwá, mɔɔsɛ́ má lɛa ɔ ɔsákɔna ɔhá mɛ ŋɔ nɛtɔana niɔ́sɔ halɛna na ilúkunə yɛ́ Ísilahɛ́lɛ na yɛ́ Yútɛa.

⁹Nɛ́ sɔ́ ŋɔ bá ɛ́sɛ́á nɛ́ɛ́yɛ́ ɔnɛ́á mɛ ná hákɛ́ná na bíə́búə́ bisə́kínə́ ɔ ikúílí ɔyɛ́á mɛ ná bəə́bu itíə́ ɔ mɔkátá ɔkɛaka ɔwá, mɛ bəə́bú fə́míə́ ɔ bɔnɔŋɔ bɔ́ Ikíbíto. Bá sa bá na yɔkɛ́nana ɔ nɛ́táyɛ́ nɛtɔana, ɔ́ ɛlɔ́áyɛ́ nɔ́yɛ́ mɛ ná bəə́bú əlimə tumə. Nɔ́yɛ́ Isə́lúkú a ndɔ laa.

¹⁰Náana á nɛtɔana nɛ́ ŋɔ báá ɔnɛ́á mɛ ŋɔ halɛna na ilúkunə yɛ́ Ísilahɛ́lɛ ɔ yɛ́táyɛ́ ikúílí: Mɛ ŋɔ bɛ́ámɛ́á bitíkínə́ tiləkə ɔ uwəbú ɛmanya, mɛ ŋɔ bɛɛ́ta kə́tə́kə ɔ uwəbú mɔlɛ́má. Mɛ ŋɔ bámɛnɛna yəbúə́ Huɛlɛ́, bá ŋɔ bámɛnɛna tɔ́na yamɛ́á ilúkunə. Nɔ́yɛ́ á Isə́lúkú a ndɔ laa.

¹¹Ata ɔmɔtɛ́ uwəbú ətíə́ a sɔ́ ŋɔ bá na ilókí ɔ wayɛ́á mukúlə́kulə uwukúniə ɔkɛaka ɔwá, a mɛaŋɔ́á mánya. Ata ɔmɔtɛ́ uwəbú ətíə́ a sɔ́ ŋɔ bá na ilókí ɔ wayɛ́á munísə́ uwukúniə ɔwá a mɛaŋɔ́á mánya bɔkɔasɛ́á, bəkimə bá ŋɔ mɛaŋɔ́á manya. Bəkimə bá ŋɔ mɛaŋɔ́á manya ɔ botolokiə ɔ tɔlɔ́matɔ́ ɔkafámáká ɔ bahɔ́mɔ́.

¹²Ɔ taká, mɛ ŋɔ bəə́bú túə́búə́ tɔkɔma nɛasɛna, mɛ sa ndá mə́búə́ mabɛ́á bɛ́kɔ́lɔ́mɔ́ná tɔ́na.»

¹³Ikúílí Huɛlɛ́ a ndɔ hɛ́na ɔ nɛtɔana niɔ́sɔ, a ndɔ níbúsíə́ híə́nə́síə́ ɛ́sɛ́á iluní yɛ́ bɔkɔa. Tɔ́ ndɔ manya ɔwá, yatɛ́ ɔyɛ́á yɛ́ lɛ́á lunə́tɔ́ yɛ́ sa ósó ɔ mɔndɔ ɔwɔ́lɔ, yɛ́ ndɔ híána bɔɔ́la ɔbɔ́á bá ómbóko.