Read Tunen Hɛ́bɛlɛ 9 Bible Online

Hɛ́bɛlɛ 9 - Tunen bible

Hɛ́bɛlɛ 9

¹Ɔ nɛtɔana níbúsíə́ bɛndɔ bá ka bá bá ndɔ Huɛlɛ́ lúbúnə ɔ uwəbú ɛnya. Ɛbɔ́ka ɔyɛ́á bɛndɔ bá ná fálábáka ɛlɔ́áyɛ́ ɔwayɛ́ ulúbúnə yɛ́ ka báá ɔ misí.

²Bá ka yanda nambɔna, bá ná sələ́níə́ bɛsalɛ bɛ́fandɛ́ na nɛbata. Bá ituŋí yíbúsíə́ ɛ́lɛakɛnɛna bá sɛ́á ɛbɔ́ka yɛnaŋanaŋa. Bɛɛ́la bɛ́ bitiəkətiəkə ɔbɛ́lɛ́na bɛ́ ka báá umə́, ɛtáka yɛ́ ka báá ɔmɔ́yɛ́, bɛbɛlɛ́tɛ bɛ́ Huɛlɛ́ bɛ́lɛ́nátɔ́ umə́.

³Yɛ́mɔtɛ́ ituŋí yɛ́ ka báá tɔ́na ɔ nuúmə́ əlimə yɛ nɛbata, bá yɛ́táyɛ́ ɛbɔ́ka ɛ́lɛakɛnɛna bá sɛ́á ɛbɔ́ka yɛnaŋanaŋa ɔ ɔyáyɛ́na, ɔhá Huɛlɛ́ a ndɔ tuənə.

⁴Niɔlɔ nɛ́ mahánɛna tábɔ́nákátɔ́ na kóolo ɔhá bá ndɔ bɔlɔ titiə, ikoó yɛ́ nɛtɔana tɔ́na sɔ́tɛ́nátɔ́ kóolo na kóolo. Ɔ yɛ́táyɛ́ ikoó nuúmə́, hisíní hɛ́ ka báá tábɔ́nákátɔ́ na kóolo, maána má ka bámɛ́nɛ́na, na mulúmbə wɔ́ Álɔnɔ ɔwá wɔ́ ná tɔ́sɔ, mabámbɔ́ má miɔkɔ áfandɛ́ tɔ́na ɔmɔ́tɔ́yɛ́, bɛtambá ɔbɛ́á Huɛlɛ́ a ná nɛtɔana hákɛ́na bɛ́ ka báá tilə́kə́tɔ́ umə́.

⁵Bá ná bilíŋgə́liŋgə tábɔ́náká bɛ́fandɛ́ ɔbɛ́á bá ná tálá ɔ ikoó ɔmbáŋá hɔ́ákátɔ́ ɔ yɛmɔtɛ́ ɛnya yɛ bɛáŋgɛlɛ laŋɔlaŋɔ, ɔ́ niɔŋɔ́ sɛ́á Huɛlɛ́ a ka bámɛnɛna ɔmɔ́tɔ́yɛ́. Bibə́ku bɛ́ bɛ́ɛ́yɛ́ bɛáŋgɛlɛ bɛ́ ɛbɔ́ka lindiə ɔyɛ́á bá ndɔ manɔ́ŋɔ́ índiə ɔ nɛhánɛna ɛlɔ́áyɛ́ nɛnɛasɛna nɛ́ mabɛ́á. Mba, tátá isíŋáka tɔ ná hɔ́ánána ɔ bɛ́ɛ́yɛ́ bɛkɔa ɔ ɔhɛ́na hoóyíhoóyi.

⁶Ɔ ikúílí bá ná bɛ́ɛ́yɛ́ bɛkɔa hɔ́nála ɔ ɔbɛ́lɛna, bətitiəmahánɛna bá fíə́kinə ɔ ituŋí yíbúsíə́ buɔsɛ́ tɛ́á ɛlɔ́áyɛ́ búə́búə́ buolí uwundúsiniə.

⁷Mba, ɔ́maná á mutitiəmahánɛna mɔŋɛ́ŋa bíbúə́ a ná bá a ndɔ fínə ɔ ituŋí ɔyɛ́á yɛ́ ná ɔ́ŋgɔ́nɔ ikúílí ɛ́mɔtɛ́ ɔ hiɔŋɔ hikimə. A fínə na manɔ́ŋɔ́ má mɛnyama ɔ ɔhánɛna á Huɛlɛ́ ɛlɔ́áyɛ́ máyɛ́á mabɛ́á bɛ́múɛ́tɛ́, na ɛlɔ́áyɛ́ mabɛ́á má bɛndɔ ɔbá bá ná nɔ́yɛ́ kɛ́áka ɔ bɔlɛmanyá.

⁸Umbúínyi Mɔnaŋanaŋa wɔ́ ndɔ bəsú bɛ́ɛ́yɛ́ bɛkɔa ínə́niə ɔkɛaka ɔwá, tɔ manyá tɔ sɛ́á ikúílí tɛ́á ɔyɛ́á ituŋí yíbúsíə́ yɛ́ nalɛ́á, ɛnɔ́mɛ yɛ́ ufíə́kinə ɔ ɛbɔ́ka yɛnaŋanaŋa ɔ ɔyáyɛ́na yɛ́ nana bíkúnə.

⁹Bɛ́ɛ́yɛ́ bɛkɔa bɛ́ lɛa iŋgətí yɛ́ bɛ́ɛbɛ ɔbɛ́á bɛ́ ndɔ ndafámá ɔ ikúílí yɛ́ yɛ́ɛyɛ ɛhanyɛ, ɔ́ niɔŋɔ́ sɛ́á, bɛɛ́la ɔbɛ́á bá ndɔ índiə á Huɛlɛ́ na mahánɛna má mɛnyama ɔmá tɔ́ ndɔ wɛɛ́ya hánɛna, bɛ́ sa ósó ɔkɛa ɔwá mɔlɛ́má wɔ́ wɛ́ɛ́yɛ́ ɔwá a ndɔ bɛ́ɛ́yɛ́ bɛkɔa kɛa wɔ́ tuə́nə́ yə́ə́bu.

¹⁰Bɛ́ɛ́yɛ́ bɛkɔa bɛ́ ndɔ sinə ɛsalɛ yɛ́ bɛ́labɔ́nɛ́á, məluku na məndínə́ má nibínə́ŋəsiə. Bɛnɛ́ma bɛ́ misí bɛ́ɛ́yɛ́ ɔbɛ́á bɛndɔ bá ná bá bá ndɔ bə́tiə, yɛ́ ka báa ɔwá bá bɛɛ́ta bɛ́sáŋɔ́ná ɔ ikúílí ɔyɛ́á Huɛlɛ́ a ná ɛnya yɛ ɔwayɛ́ ulúbúnə úŋúnə́níə́.

¹¹Kilísitusu a ka ndasá, a lɛa mutitiəmahánɛna mɔŋɛ́ŋa ɔwá a ndɔ bɛɛ́la bɛɛsɛ húlə́nə ɔbɛ́á tɔ ná kúsə́nə. A ka fínə ɔ yanda yɛ́ ɛŋaná hɛkabalɛ, yɛŋɛ́ŋa ɔ yáyɛ́ná yɛ́ buɔnɔ́ ubusíə́ ɔbɔ́á a bɔ́áyɛ́á buolí úndúsíníə́, tátá makátá má mɔndɔ má ná yɛɛ́ta luməkə, nɔ́yɛ́ lɛ bá bɔɔ́la bɔ́ yɛ́ɛyɛ misí.

¹²Ɛnaka Kilísitusu á fínə́ ɔ ɛbɔ́ka ɔyɛ́á Huɛlɛ́ a lɛ́á, a sa manɔ́ŋɔ́ má hɛbɛ́bɛ́ mbá ata má mɔná ɛfɔŋɔ oloko, mba, máyɛ́á manɔ́ŋɔ́ má bɛ́múɛ́tɛ́ a ná ólókóko. A ka fínə umə́ ikúílí ɛ́mɔtɛ́ ɔ mɛɛ́lɔ yɛ bikúílí bikimə ɔkɛaka ɔwá, a mabɛ́á má bɛndɔ sɔáka ikúílíə́kimə.

¹³Bá ka bá bá ndɔ manɔ́ŋɔ́ má tɔbɛ́bɛ́ na má bɔnɔ́mɛ bá bɛfɔŋɔ minə, bá mɔlɔ́ wɔ́ bɛfɔŋɔ titə́kíə́tɔ́ fɔ́mákɛ́na ɔ bɛndɔ bá bɛ́táfálákátɔ́ ɔkɛaka ɔwá, bá yə́búə́ mɛɛ́lɔ nəŋə́síə́ mbá bá Huɛlɛ́ lúbúnə́kə.

¹⁴Manɔ́ŋɔ́ má Kilísitusu má ndɔ nɔ́yɛ́ kɛa ɔ ɔyáyɛ́na. Umbúínyi Mɔnaŋanaŋa wɔ́ ka kɛaka ɔwá, Kilísitusu a bɛ́hánɛ́ná wɛɛ́ya bɛ́múɛ́tɛ́ á Huɛlɛ́. A ka báá ɛŋaná hɛkabalɛ. Máyɛ́á manɔ́ŋɔ́ má ŋɔ yə́súə́ mɛlɛ́má nəŋəsiə ɔkɛaka ɔwá, tɔ lɛa bɛkɔa kɛ́á tɔ́na ɔbɛ́á bɛ́ ndɔ bəsú ákánana ɔ nyɛmbɛ́, ɔkɛaka tɔ́na ɔwá, tɔ Huɛlɛ́ nyɔ́kɛ́na ɔwá a lɛ́á muɔmɔ́.

¹⁵Ɛlɔ́áyɛ́ nɔ́yɛ́, Kilísitusu a lɛa mɔkɔ́kɔ́nɔ́ ɔwá wɔ́ ndɔ bəsú fíniə ɔ nɛtɔana niɔ́sɔ bɔkɔasɛ́á, a ka wə́ə́ ɔkɛaka ɔwá, a bɛndɔ háŋɔ́ná ɔ bɔbɛ́á ɔbɔ́á bá ná kɔɛ́na ɔ nɛtɔana nɛ́ buɔnɔ́, nɔ́yɛ́, bááyɛ́ ɔbá Huɛlɛ́ a ná ɛ́lɛ́ákɛ́na, bá ilíkinənə yɛ́ ikúílíə́kimə kusə́nə ɔyɛ́á a ná bəə́bu bílíhə́níə́.

¹⁶Bá sa ósó ɔ hɛtɔnyɛ́ ɔfana ɛŋaná utíbíniə muɛsɛ ɔwá muití a lɛa wə́ə́tɔ́.

¹⁷Ábá mɔndɔ a lɛa ɔ buɔmɔ́ mbá bá ndɔ híə́yíə́ hɛtɔnyɛ́ fana, hɛ́ lɛ bá na iŋgínə́, mba, ikúílí muití a ná wə́ə́, hɛtɔnyɛ́ hɛ́ lɛa na iŋgínə́.

¹⁸Nɔ́yɛ́ yɛ́ lɛ́á ɔ nɛtɔana ɔnɛ́á Huɛlɛ́ a ná kɛ́áka, a ka nɛtɔana níbúsíə́ kɛaka na manɔ́ŋɔ́ má mɛnyama.

¹⁹Mósisi a ka tɛ́nɛ́ma ɔ busíə́ bɔ́ ilúkunə, a ná bəə́bu imbə́ndə́ fánákɛ́ná nióni nɛŋɛ́ŋa ɔyɛ́á Huɛlɛ́ a ná wɛɛ́ya índíə́, əlimə yɛ nɔ́yɛ́, a ná manɔ́ŋɔ́ má banábɛfɔŋɔ na má bikitə ɛtá latákátɔ́ na mənífə́, a ná mɔlɛ́áfɛ wɔ́ bɔlɛ́á ɛ́tá ɔwá bá ndɔ ɛ́lɛnɛna Isóbo, a ná mahɔtá manyɔakánɔ́ má ɛfɔŋɔ ɔ́lɔ́kɔ́kɛ́na ɔ ɛnjá yɛ mɔlɛ́áfɛ, a ná miəkínə́ ɔ hííyí hiəfulə na ɔ ilúkunə yikimə.

²⁰Ikúílí a ná bá a ndɔ minə a sɛ́á: «Mááma má lɛa manɔ́ŋɔ́ ɔmá Huɛlɛ́ a ná hákɛ́na ɛlɔ́áyɛ́ nɛtɔana na bənú, nɔ́ nɛɛ́ta bə́tə́kíə́.»

²¹Mósisi a ná yanda na bɛ́ɛ́yɛ́ bikimə ɔbɛ́á a báka bətitiəmahánɛna bá bɛ́kɛakɛna á Huɛlɛ́ ulúbúnə olókínə́ na manɔ́ŋɔ́.

²²Ɛ́sɛ́á umbə́ndə́ wɔ́ ndɔ laa, abáka bá bɛɛ́la biəŋí nəŋəsəkiə na manɔ́ŋɔ́, Nɔ́yɛ́, abá bá sá manɔ́ŋɔ́ óloko, abáka Huɛlɛ́ a lɛ bɛndɔ mə́búə́ mabɛ́á nɛasɛna.

²³Ɔ́ niɔŋɔ́, bɛɛ́la bikimə ɔbɛ́á bá ná báá bá ndɔ Huɛlɛ́ lúbúnə ɔ nɛtɔana nɛ́ buɔnɔ́, bɛ́ ka bá bilílí ɔbɛ́á bɛ́ lɛ́á ɔ nɔɔ́mɛná. Umbə́ndə́ wɔ́ Mósisi wɔ́ ndɔ laa ɔwá, bá ná hɔ́ánána ɔ bɛ́ɛ́yɛ́ bɛɛ́la unəŋəsiə. Ɛlɔ́áyɛ́ tiísi yɛ nindínə́ nɛ́ nilúbúnə nɛ́ Huɛlɛ́, nɛ́ lɛa ɔwá nɛ́ manɔ́ŋɔ́ má mɛyama yayɛna.

²⁴Kilísitusu á sa fínə ɔ ɛbɔ́ka yɛnaŋanaŋa ɔyɛ́á bɛndɔ bá ná fálábáká na makátá, ɔyɛ́á yɛ́ lɛ́á ɔbánɔ́ ɛhɔ́ánakana na tiísi yɛ ɛbɔ́ka yɛnaŋanaŋa; a ka fínə wɛɛ́ya bɛ́múɛ́tɛ́ ɔ nɔɔ́mɛná, a lɛa tuənə́tɔ́ isíŋáka á Huɛlɛ́ busíə́ ɛlɔ́áyɛ́ uwəsú unuəniə.

²⁵Hiɔŋɔ tɛ́á, abáka mutitiəmahánɛna mɔŋɛ́ŋa a fínə ɔ ɛbɔ́ka yɛnaŋanaŋa, a bɛnamá índiə na manɔŋɔ́ ɔmá má lɛ bá máyɛ. Mba, Kilísitusu a ka bɛ́hánɛna wɛɛ́ya bɛ́múɛ́tɛ́ ikúílí ɛ́mɔtɛ́ ɔ mɛɛ́lɔ yɛ bikúílí bikimə, tátá hiɔŋɔ tɛ́á ɛ́sɛ́á mutitiəmahánɛna mɔŋɛ́ŋa.

²⁶Yɛ́ sá bá nɔ́yɛ́, há Kilísitusu a ka ɛmɔ́kɛ́ nyááka bikúílí biəŋí ɔ botolokiə ɔ nɛbalɛ́ná nɛ́ misí. Mba, ɛnaka ikúílí yɛ́ bíúndúsíníə́, a ná bɛ́hánɛ́ná ikúílí ɛ́mɔtɛ́ ɔ mɛɛ́lɔ yɛ bikúílí bikimə ɔkɛaka ɔwá, a bɔbɛ́á bɔ́ bɛndɔ sɔtɔkɔ.

²⁷Ɛ́sɛ́á bikətíníə́ bɛ́ bɛndɔ bɛ́ lɛ́á ɔwá bá wə́ə́ ikúílí ɛ́mɔtɛ́, əlimə yɛ nɔ́yɛ́, bá tɛ́nɛ́ma á Huɛlɛ́ busíə́ ɔkɛaka ɔwá a wɛɛ́ya kə́lə́sə́kíə́.

²⁸Hɔ́ánánátɔ́, Kilísitusu a ka bɛ́hánɛna ikúílí ɛ́mɔtɛ́ ɔkɛaka ɔwá, a mabɛ́á má ɔmbana muiŋí sɔtɔkɔ, a ŋɔ manyɔ fámálana, tátá ɛlɔ́áyɛ́ bɔbɛ́á ɔsɔ́tɔ, mba, ɛlɔ́áyɛ́ bɛndɔ unuəniə ɔbá bá ndɔ wɛɛ́ya táta.