Read Tunen Yákɔbɔ 1 Bible Online

Yákɔbɔ 1 - Tunen bible

Yákɔbɔ 1

¹Ɔwámɛ á Yákɔbɔ, mɔnyɛna wa Huɛlɛ́ na wa Isə́lúkú á Yə́susu Kilísitusu, mɛ ndɔ tilinə ilúkunə yikimə yɛ́ Huɛlɛ́ ɔyɛ́á yɛ́ lɛ́á sasɛ́átɔ́ ɔ misí mikimə, mɛ ndɔ bənú bíhóliə.

²Á bámɛ́á bənísə́, ikúílí nɔ́ lɛ́á ɔ məndínə́ məkimə má mɔkɔ́lɛna, nɔ́ bámɛ́nɛ́ná ɔ nɛhɔnɔ.

³Ábá yə́núə́ ilumininə yɛ́ ndɔ kɛa ɔwá nɔ lɛ kɔɛ́na ɔ mɔkɔ́lɛna, nɔ́yɛ́ yɛ́ ndɔ ínə́niə ɔwá nɔ lɛa ndíŋímínə́tɔ.

⁴Mba, nɔ́ ánya, níə́núə́ nindíŋíminə nɛ́ ákáka ɔ busíə́ ɔkɛaka ɔwá, nɔ báá baasɛ, ɛŋaná hɛkabalɛ, nɔ lɛ sɔ́ká ata bɔɔ́la.

⁵Ábá mɔndɔ ɔ uwənú ətíə́ a lɛ bá na ɛmanya, á batá á Huɛlɛ́ ɔwá a ŋɔ wɛɛ́ya yɛɛ́ta índiə, a ndɔ índiə ɔ bəkimə na mɔlɛ́má muɛsɛ, ɛŋaná ɔkɛ́kɛ́lɛna.

⁶Mba, a ná hɔ́ánána ɔbata na ilumininə, a lɛ ɛ́nyá bɔkɔasɛ́á, wɛ́ɛ́yɛ́ ɔwá a ndɔ ɛ́nya, a lɛa hɔ́ákátɔ́ ɔ uŋunə wɔ́ nɔmɔ́ ɔwá umbúínyi wɔ́ ndɔ huəliniə, wɔ́ húlə́ nyɛkakɛna bɛsalɛ bikimə.

⁷Nɛ́ɛ́yɛ́ nindínə́ nɛ́ mɔndɔ a lɛ fɛká ɔwá, Isə́lúkú a ŋɔ wɛɛ́ya bɔɔ́la índiə.

⁸Ɔ taká, a lɛa mɔndɔ wa mɛnyɔ́, a lɛ bá na nibítíkə tɛ́nɛ́mátɔ.

⁹Munísə́ ɔwá a lɛ́á tɔyɔ́tɔ́ á bílə́nə́kə́ bɔkɔasɛ́á, Huɛlɛ́ a ŋɔ wɛɛ́ya ɛbɔ́ka yɛ́ tuúmə índiə.

¹⁰Mɔmbiaŋɛ á ayɛ́ bílə́nə́kə́ tɔ́na bɔkɔasɛ́á Huɛlɛ́ a ná wɛɛ́ya lolósólíə́, ɔ taká, mɔmbiaŋɛ a ŋɔ wə́ə́, ɛ́sɛ́á abáka ɛsama yɛ́ umbuə yɛ́ yúlúnuə, yɛ́ wə́ə́.

¹¹Ikúílí hiɔtɔ́tɔ́ hɛ́ ná fámá, wə́yíə́ mulúkúlúku wɔ́ bɔlɔŋɔ́tɛ́ kútə́kiə, ɛsama yɛ́ kɔa, bɔ́áyɛ́á bɔhɛka bɔ́ hɔ́á. Nɔ́yɛ́ mɔmbiaŋɛ a ŋɔ kɔ́táka hɔ́ánánátɔ́ ɔ ətíə́ yɛ bɛ́áyɛ́á biolí.

¹²Nɛhɔnɔ na wɛ́ɛ́yɛ́ ɔwá a ná mɔkɔ́lɛna ísíbíníə́ bɔkɔasɛ́á, əlimə yɛ nɔ́yɛ́, Huɛlɛ́ a ŋɔ wɛɛ́ya hitəkə́ índiə, ɔ́ buɔmɔ́ bɔ́ ikúílíə́kimə ɔbɔ́á a ná bílíhə́níə́ ɔ bááyɛ́ ɔbá bá ndɔ wɛɛ́ya hikiə.

¹³Ábá mɔkɔ́lɛna má ná ndá mɔndɔ fámɛ́ná, a lɛ láá a sɛ́á: «Á Huɛlɛ́ a ná mɛaŋɔ́á ɔ́kɔ́lɛ́na.» Ɔ taká, ata bɔɔ́la bɔ́ sa ósó a Huɛlɛ́ ɔlɔ́ma ɔ bɔbɛ́á ɔkɛa, abáka a lɛ mɔndɔ kɔsɔ́na.

¹⁴Mɔndɔ mukimə a ndɔ tɔ́mbɛ́na ɔ mɔkɔ́lɛna ɔ ikúílí a ndɔ bɛ́niasa ɔwá, a kɔɛnɛ́na ɔ hɛlámba hɛ́ bɛ́áyɛ́á bilókílókí bɛ́ bɛ́múɛ́tɛ́.

¹⁵Ikúílí mááyɛ́ mafɛka mabɛ́á má ná mɔŋáka ɔ mɔlɛ́má, má áŋánáka, má bɔbɛ́á bíə́nə, bɔbɛ́á bɔ́ ayɛ́ ɔ́mbɔkɔ, bɔ́ híána hɛkɔma hɛ́ nyɛmbɛ́.

¹⁶Á bənísə́ bá nibo, ata mɔndɔ a lɛ bənú nimbə.

¹⁷Ɔ nɔɔ́mɛná á niəbə nɛ́ mɔsɛ́ŋɛ́ na nɛ́ ɛŋaná hɛkabalɛ nɛ́ ndɔ húlínə. Bɛ́ɛ́yɛ́ bikimə bɛ́ ndɔ húlínə na Huɛlɛ́ ɔwá a lɛ́á ɔ nɔɔ́mɛná á Isə́ yɛ tundondoní ɔtɔ́á tɔ́ ndɔ nɔma. Abáka Huɛlɛ́ a lɛ sə́njíə́, a lɛ bɛ́kɔ́ŋɔ́ná ɔkɛaka ɔwá nɔ́ báá ɔ ibínə́binə.

¹⁸Wɛɛ́ya bɛ́múɛ́tɛ́ a ná híkə́kíə́ uwəsú ɔ buɔmɔ́ uwíndiə ɔ tɔ́mbákɛna na yáyɛ́á Ɛtambá ɔyɛ́á yɛ́ lɛ́á taká ɔkɛaka ɔwá, tɔ bámɛ́nɛ́ná bɛkɔnjakɛ bíbúsíə́ ətíə́ yɛ bɛ́áyɛ́á bɛbɔ́tɛ́ná bikimə.

¹⁹Á bənísə́ bá nibo, nɔ́ ndɔ manyá muɛsɛ ɔwá, mɔɛ́ta tɛ́á a ná hɔ́ánáná ɔbáá na ɛhɔ́tɔ́hɔ́tɔ ɔ Ɛtambá yɛ́ Huɛlɛ́ ɔwɔ́kɔ, a lɛ hútú hɔ́ɔ́, a lɛ hútú liŋə bɔkɔasɛ́á,

²⁰mɔndɔ ɔwá a ndɔ hilóbi kɔ́nda, abáka a lɛ úndúsíníə́ yatɛ́ ɔyɛ́á yɛ́ lɛ́á tɛ́nɛ́mátɔ́ á Huɛlɛ́ busíə́.

²¹Nɔ́yɛ́, nɔ bɛkɔa bikimə bɛ́ məhilə́ níása, na məndínə́ məkimə má macaŋa, nɔ́ Ɛtambá yɛ́ Huɛlɛ́ káhá na buyoyoní ɔyɛ́á a ná nɛ́má ɔ uwənú mɔlɛ́má nuúmə́, yɛ́ báka na iŋgínə́ yɛ uwənú unuəniə.

²²Nɔ lɛ Ɛtambá yɛ́ Huɛlɛ́ ɔ́kɔ́ ɔbánɔ́ na məlúə́, nɔ́ kɛ́áká ɛ́sɛ́á yɛ́ ndɔ laa, ábá nɔ sa nɔ́yɛ́ kɛa, nɔ ndɔ bínímbə bənú bɛ́múɛ́tɛ́.

²³Ɔ taká, ábá mɔndɔ a ndɔ Ɛtambá ɔ́kɔ, a lɛ yɛɛ́ta úndúsíníə́, a báka hɔ́ákátɔ́ ɔ mɔndɔ ɔwá a ndɔ bísíninə ɔ isinínə́ huɛ́ ɛ́sɛ́á a lɛ́á.

²⁴Əlimə yɛ ubísíninə, á ákáná, a fəliə ɔ umisíúmə́ ɛ́sɛ́á a ndɔ bámɛnɛna.

²⁵Mba, mɔndɔ ɔwá a ndɔ Umbə́ndə́ wɔ́ Huɛlɛ́ ɔ́kɔ́na muɛsɛ, wííyí Umbə́ndə́ ɔwá wɔ́ ndɔ bukuənjə húlə́nə, mbá a ndɔ muítə ɔŋgɔ, a lɛ muítə ɔ́kɔ́ ɔbánɔ́ na məlúə́, a bɛ́kɛakɛna muɛsɛ, Huɛlɛ́ a ndɔ wɛ́ɛ́yɛ́ mɔndɔ sana ɔ biolí bikimə ɔbɛ́á a ŋɔ nyɔɔkɔ.

²⁶Ábá mɔndɔ a ndɔ fɛka ɔwá a ndɔ Huɛlɛ́ ɔ́ŋgɔ, mbá a lɛ ndɔ nɛ́áyɛ́á nɛbɔ́mbɛ halɛna, a ndɔ bínímbə wɛɛ́ya bɛ́múɛ́tɛ́. Wííyí mɔkɛnda ɔwá a sɛ́á a ndɔ Huɛlɛ́ ɔ́ŋgɔ wɔ́ lɛa ndəmə.

²⁷Huɛlɛ́ ɔwɔŋgɔ hɔ́ánánátɔ́ ɛ́sɛ́á yəsúə́ Isə́ á Huɛlɛ́ a ndɔ hikiə yɛ́ lɛa ɔwá: Tunə́minú na bilíkə́ ɔwɔ́lɔ ɔ uwəbú məsə́kə, ubítə́tə́niə wɔ́ bɛkɔa bɛbɛ́á bɛ́ misí, ɔkɛaka ɔwá nɔ lɛ bitifilə.