Read Tunen Yákɔbɔ 2 Bible Online

Yákɔbɔ 2 - Tunen bible

Yákɔbɔ 2

¹Á bámɛ́á bənísə́, ɛ́sɛ́á nɔ́ ná níə́núə́ nɛkɔmba tálɛ́ná á yəsúə́ Isə́lúkú a Yə́susu Kilísitusu, á muití tuúmə, nɔ sá hɔ́ánana ɔ nifəŋə ɔháá ɔ ətíə́ yɛ bɛndɔ.

²Tɔ́ iŋgətí ɛ́tá ɔwá, bɛndɔ báfandɛ́ bá ná fínə́ ɔ uwənú nɛkɔta, wɔmɔtɛ́ a lɛa mɔmbiaŋɛ na tɔnɔ́mɛ́ná tɔ́ kóolo ɔ tɔnɔnɔ́, lɛŋábákátɔ́ na bɛlɛŋa laŋɔlaŋɔ, wə́ə́ní, hɛtɔyɔ́nɔ́ na bɛyakátákɛ bɛ́ bɛlɛŋa.

³Nɔ məə́sə tála ɔbánɔ́ ɔ mɔndɔ wa lɛŋábákátɔ́ muɛsɛ, nɔ wɛɛ́ya lɛna nɔ sɛ́á: «Tɔ́kɔ́lɛ, ɔ ndə́túə́nə́ háha ɔ yɔkɔ́ yɛɛsɛ.» Ɔ́ yɛ́ɛ́yɛ́ ikúílí, nɔ hɛtɔyɔ́nɔ́ lɛna nɔ sɛ́á: «Káka tɛ́nɛ́má hə́ə́ní, ataná, bɛ́mbátɛ́ná hɔ́yɛ́ ɔ misí ɔhá mɛ ndɔ makɔlɔ́ bɛ́lɛna.»

⁴Ábá nɔ ndɔ kɛa nɔ́yɛ́, tátá nifəŋə nɔ ndɔ háá ɔ uwənú ətíə́ əə́? Táta nɔ ndɔ bɔsɔ́kɔ́ kə́lə́siə ɔbánɔ́ na bɛfɛka bɛbɛ́á əə́?

⁵Nɔ́ ɔ́kɔ́kɛ́ná muɛsɛ á bámɛ́á bənísə́ bá mɔlɛ́má, á Huɛlɛ́ a ná bááyɛ́ tɛ́fá ɔbá bɛndɔ bá ndɔ sinə ɔwá bá lɛa tɔtɔyɔ́nɔ́ ɔkɛaka ɔwá, bá híáná bambiaŋɛ ɔ ətíə́ yɛ ilumininə. A ka kɛaka ɔwá, bá buɛsɛ kúsə́nə́ ɔ ɔwayɛ́ nɛmanɛna ɛ́sɛ́á a ná bílíhə́níə́ ɔ bááyɛ́ ɔbá bá ndɔ wɛɛ́ya hikiə.

⁶Mba uwənú, nɔ ndɔ tɔtɔyɔ́nɔ́ təkəsə! Tátá bambiaŋɛ bá ndɔ bənú təkəsə, bá ndɔ bənú ákánana tɔ́na ɔ busíə́ bɔ́ bikə́lə́síníə́ əə́?

⁷Bəə́bu tɔ́na bá ndɔ ɛmbányɛ yɛ́ niínyə kɔ́ba ɔnɛ́á bá ndɔ bənú ɛ́lɛnɛna.

⁸Ɛ́ɛ! Ábá nɔ ndɔ Umbə́ndə́ wɔ́ Huɛlɛ́ ɔ yəsúə́ Isə́lúkú úndúsiniə ɛ́sɛ́á bá ná tílə́kə ɔ Mətilə bá sɛ́á: «Ɔ ŋɔ wawɔ́á mukúlə́kulə hikəkiə ɛ́sɛ́á aŋɔ́á bɛ́múɛ́tɛ́,» muɛsɛ nɔ́yɛ́.

⁹Mba, ábá nɔ ndɔ nifəŋə háá ətíə́ yɛ bɛndɔ, nɔ lɛa kɔ́átɔ́ ɔ bɔbɛ́á, umbə́ndə́ wɔ́ ndɔ bənú hɔkɛna bɔkɔasɛ́á, nɔ lɛ ndɔ muítə ɔ́kɛ́na.

¹⁰Ɔ taká, ábá mɔndɔ a ndɔ imbə́ndə́ yikimə bítə́tə́niə mbá a ná nɔkɔ́ úmotí, nɔ́yɛ́ yɛ́ ndɔ laa ɔwá, a ná imbə́ndə́ yikimə nɔkɔ bɔkɔasɛ́á,

¹¹Huɛlɛ́ a ndɔ laa a sɛ́á: «Ɔ lɛ lokono», a ndɔ laa tɔ́na a sɛ́á: «Ɔ lɛ ɔnɔnɔ». Nɔ́yɛ́, ábá ɔ sá kɔa ɔ nilókóno mbá ɔ ná kɔ́ɛ́na ɔ muɔnɔ́nɔ, ɔ ná umbə́ndə́ nɔ́kɔ.

¹²Ikúílí nɔ ndɔ hɔ́ɔ́ mbá ata ikúílí nɔ ndɔ kɛa ata yatɛ́, nɔ́ manyá ɔwá Huɛlɛ́ a ŋɔ mɔɛ́ta tɛ́á kə́lə́səkiə ɔ tɔ́mbákɛna na umbə́ndə́ ɔwá wɔ́ ndɔ bukuənjə índiə.

¹³Ɔ taká, ɛnáká Huɛlɛ́ a báá ɔ bɛndɔ ukə́lə́siə, a sa nda bá na mahana ɛlɔáyɛ́ wɛ́ɛ́yɛ́ ɔwá a sa ɔsɔ́kɔ́ mahana wə́ə́, mba, wɛ́ɛ́yɛ́ ɔwá a lɛ́á na mahana, abáka a lɛ mikə́lə́kí kɔlɔma.

¹⁴Á bámɛ́á bənísə́, yatɛ́ mɔsɛ́ŋɛ́ mɔndɔ a lɛ́á itíə́nə́tɔ́ ikúílí a ndɔ laa sɛ́á: «Mɛ báka na ilumininə» ábá a lɛ ndɔ yɛɛ́ta ínə́niə ɔ tɔ́mbákɛna na bɛ́áyɛ́á bɛnyɛná əə́? Yɛ́táyɛ́ ilumininə yɛ́ ŋɔ wɛɛ́ya nuəkəniə əə́?

¹⁵Ábá munísə́ mɛlɛ́mɛndɔ́ ata muəndú a lɛ bá na bɔlɛŋa bɔ́ ɔbɛ́háá mbá ata bɔ́labɔ́nɛ́á buɔsɛ́ tɛ́á,

¹⁶mba, ɔmɔtɛ́ ɔ uwənú ətíə́ a ná wɛɛ́ya lɛ́na a sɛ́á: «Káká ɔ bumbə́nú, bɛ́háá bɛlɛŋa bɛ́ məluŋuluŋu, nɛ́áká bɛ́labɔ́nɛ́á ɔ́ nibínə». Ábá, ɔ sa wɛɛ́ya índiə yatɛ́ ɔyɛ́á a ndɔ sɔ́ka, yatɛ́ mɔsɛ́ŋɛ́ mɔndɔ a lɛ́á itíə́nə́tɔ́ əə́?

¹⁷Yɛ́ lɛa bɔkɔa bɔ́mɔtɛ́ ɔwá, ábá mɔndɔ a sɛ́á a ndɔ lumininə á Kilísitusu, ábá a lɛ ndɔ yáyɛ́á ilumininə ínə́niə ɔ tɔ́mbákɛna bɛ́áyɛ́á biolí, yɛ́ɛ́yɛ́ ilumininə yɛ́ lɛa bɔɔ́la bɔ́ wə́ə́tɔ.

¹⁸Mɔndɔ a ósó laa a sɛ́á: «Bɔ́mɔtɛ́ bɛndɔ bá ndɔ lumininə á Kilísitusu, bɔ́mɔtɛ́ bá ndɔ bɛnyɛná kɛa ɛlɔ́áyɛ́ yə́búə́ ilumininə.» Mɛ ŋɔ wɛɛ́ya bɛ́kámɔsɔna mɛ sɛ́á: «Ínə́níə́ mɛaŋɔ́á yáwɔ́á ilumininə yɛ́ ɛŋaná bɛnyɛná, mba, ɔwámɛ ɛkasɛ mɛ́ aŋɔ́á yámɛ́á ilumininə ínə́níə́ na bɛ́ámɛ́á bɛnyɛná.»

¹⁹Ɔ ndɔ luminə ɔwá, Huɛlɛ́ ɛ́mɔtɛ́ yɛ́ lɛ́á əə́? Muɛsɛ nɔ́yɛ́. Imbúínyi yɛbɛ́á tɔ́na yɛ́ ndɔ nɔ́yɛ́ luminə, yɛ́ ndɔ ndandɛma na bɔkɔ́lɔ́ma.

²⁰Ɔwáwɔ á yaálála, ɔ ndɔ siə ɔ sɛ́á bá aŋɔ́á ínə́níə́ ɔwá, abá mɔndɔ a ndɔ lumininə á Kilísitusu ɛŋaná bɛ́áyɛ́á bɛnyɛná usinə, yɛ́táyɛ́ ilumininə yɛ́ lɛa ndəmə əə́?

²¹Nɔ́ ndɔ yəsúə́ isə́kúlúlúnə́ á Ábɛlaháma bɛ́kɔ́lɔmɔna, nəníə́ Huɛlɛ́ a ná kɛ́áka mbá a nɔ́ wɛɛ́ya ɛ́lɛnɛna wataká əə́? Tátá bɔkɔasɛ́á, a ka wayɛ́á mɔná á Ísakɛ tála ɔ niɔlɔ nɛ́ mahánɛna ɔkɛaka ɔwá, á wɛɛ́ya índíə́ ɔ nɛhánɛna əə́?

²²Ɔ ndɔ sinə muɛsɛ ɔwá, yáyɛ́á ilumininə yɛ́ ka kindəkəniə iŋgində́ na bɛ́áyɛ́á bɛnyɛná, yáyɛ́á ilumininə yɛ́ ka ɔ́nɛ́na ɔ tɔ́mbákɛna na bɛ́áyɛ́á bɛnyɛná.

²³Nɔ́yɛ́ yɛ́ ka bíúndúsiniə ɛ́sɛ́á Mətilə má ndɔ laa má sɛ́á: «Ábɛlaháma a ka nɛ́áyɛ́á nɛkɔmba tálɛ́na á Huɛlɛ́, Huɛlɛ́ a ka nɔ́yɛ́ siəkinə, a ná wɛɛ́ya ɛ́lɛ́nɛ́ná wataká.» Huɛlɛ́ a ná wɛɛ́ya ɛ́lɛ́nɛ́ná yayɛ́á ɛŋgɔ́áyɛ́.

²⁴Nɔ ndɔ sinə ɔwá, Huɛlɛ́ a ndɔ mɔsá mɔndɔ manyɛna ɛ́sɛ́á wataká ɔ tɔ́mbákɛna na bɛnyɛná, tátá ɔ́maná na ilumininə bíbúə́.

²⁵Hɔ́ánánátɔ́ ɛlɔ́áyɛ́ Lahábɛ á mulókóno. Huɛlɛ́ a ka wɛɛ́ya ɛ́lɛnɛna wataká ɔwɔŋgɔkɔnɔ bɛ́áyɛ́á bɛnyɛná bɛɛsɛ bɔkɔasɛ́á, a ka batɛ́ka bá ɛndɛkɛ Ísilahɛ́lɛ tə́tə́kəniə, a ná bəə́bu tilə́síə́ ɔ ɛnɔ́mɛ yinə́yinə́.[1]

²⁶Nɔ́yɛ́ yɛ́ ndɔ siə ɔlaa ɔwá, hɔ́ánánátɔ́ ɛ́sɛ́á mɛɛ́lɔ ɛŋaná umbúínyi yɛ́ lɛ́á wə́ə́tɔ́, ilumininə ɛŋaná bɛnyɛná yɛ́ báka wə́ə́tɔ.