Read Tunen Yákɔbɔ 3 Bible Online

Yákɔbɔ 3 - Tunen bible

Yákɔbɔ 3

¹Á bámɛ́á bənísə́, nɔ lɛ sulú híána bənú bəəŋí bəkúniə, nɔ ndɔ nɔ́yɛ́ manya muɛsɛ ɔwá, uwəsú á bəkúniə, Huɛlɛ́ a ŋɔ bəsú kə́lə́səkiə na hilóbi hikimə yáyɛ́ná bənə́bənə.

²Abáka tɔ úmbúfəkənə ikúílí tɛ́á ɔ məndínə́ məkimə. Ábá mɔndɔ a ndɔ laa ɔwá abáka a lɛ úmbúfə́nə ɔ ɔwayɛ́ bɛtambá, a lɛa tiísi yɛ mɔndɔ ɔwá a lɛ́á hɔ́ánánátɔ́ ɔ ɔwayɛ́ mɛɛ́lɔ mikimə ɔbɛ́hálɛna.

³Tɔ́ iŋgətí ɛ́tɛ́na, ɔ́ ɛhɔ́sɛ, ikúílí tɔ ná ilə́ŋú háá ɔ ɔwayɛ́ munuə, ɔ́ ɔkɛaka ɔwá yɛ́ bəsú ɔ́kɔ́kɛ́nɛ́na, nɔ́yɛ́, tɔ óso ɔ yɛɛ́ta ɔwakánana ɔ ɛbɔ́ka ɔyɛ́á tɔ ndɔ hikiə.

⁴Nɔ́ lánjɛ siəlínə́ tɔ́na: Ata ɛ́sɛ́á yɛ́ lɛ́á ilíŋə́líŋə́, ata nəníə́ umbúínyi mɔŋɛ́ŋa wɔ́ ndɔ mɛɛ́ta nyɛkɛna, na hɛtɛ́tɛ́tɛ́tɛ́á hɛ́ ɛkáŋa abáka bá mɛɛ́ta kindəkiə, munúkə a mɛɛ́ta ákakana ɔ ɛbɔ́ka ɔyɛ́á a ndɔ hikiə.

⁵Hɔ́ánánátɔ́, nɛbɔ́mbɛ nɛ́ báka hɛláŋálaŋa hɛ́ mɛɛ́lɔ, nɛ́ ayɛ́ óso ɔ ɔbɛ́lɛ́áŋɔna ɛlɔ́áyɛ́ bɛkɔa bɛŋɛ́ŋa ɔbɛ́á a ndɔ kɛa. Nɔ́ siəlínə́ tɔ́na, hɛkasakásá hímotí hɛ́ hiwə abáka hɛ́ bɔtɛ́á bukimə lúə́ŋəkiə.

⁶Nɛbɔ́mbɛ tɔ́na nɛ́ lɛa huɛ́ ɛ́sɛ́á hiwə. Nɛ́ lɛa na məndínə́ məkimə má bɔbɛ́á, ɔ bɛláŋa bikimə bɛ́ mɛɛ́lɔ, nɛɛ́ta abáka nɛ́ yəsúə́ mɛɛ́lɔ tífíləkə, nɛ́ búə́súə́ buɔmɔ́ bukimə lúə́ŋəkiə na hiwə ɔhɛ́á hɛ́ ndɔ húlínə ɔ hiwə hɛ́ ikúílíə́kimə.

⁷Mɔndɔ a báka na iŋgínə́ ɔ məndínə́ məkimə má mɛnyama yɛ́ ɛmbɔ́ma, má tunoní, má mɛnyama ɔyɛ́á yɛ́ ndɔ hələ, na mɛnyama yɛ́ nuíyi ɔ umə́miə.

⁸Mba, mɔndɔ a sa ndóósó ɔ nɛbɔ́mbɛ umə́miə. Nɛ́ báka na bɛkɔa bɛbɛ́á biəŋí, nɛ́ sa ósó utuənə ɛŋaná ubínyúkələ, nɛ́ lɛa úndúə́tɔ́ na ɛkɛmba ɔyɛ́á yɛ́ óso ɔwɔnɔ́nɔ.

⁹Abáka tɔ nɛɛ́ta bɛ́kɛakɛna ɛlɔ́áyɛ́ Isə́lúkú ɔ yəsúə́ Isə́ ɔnyama, abáka tɔ nɛɛ́ta bɛ́kɛakɛna tɔ́na, ɛlɔ́áyɛ́ bɛbɔ́má ɔlɔ́mɛ́na ɔ bɛndɔ, mbá nɔ́yɛ́, á Huɛlɛ́ a ná bəə́bu tábɔ́náka ɔ ɔwayɛ́ iŋgətí.

¹⁰Á bámɛ́á bənísə́, ɔ munuə úmotí abáka bɛtambá bɛ́ tɔnyamáná mbá ata bɛ́ bɛbɔ́má bɛ́ fámáka, yɛ́ sa hɔ́ánana ɔbáá nɔ́yɛ́.

¹¹Hɛnyɔ́nyɔ hɛ́ sa ósó ɔnjɛa ɔ yósi ɛ́mɔtɛ́ mənífə́ maasɛ na mənífə́ mabɛ́á.

¹²Á bámɛ́á bənísə́, baánɛ abáka bufunú bɔ́ mafɔmá hákɛna ataná, butiə bɔ́ əmbunú hákɛna əə́? Hɔ́ánánátɔ́, mənífə́ mabɛ́á má sa ósó ɔnjɛa ɔ hɛnyɔ́nyɔ hímotí na mənífə́ maasɛ.

¹³Ábá mɔndɔ a lɛ́á na ɛmanya na ɛŋgɛ́lɛ́ ɔ uwənú ətíə́, á yɛɛ́ta ínə́níə́ ɔ tɔ́mbákɛna na nɛ́áyɛ́á nibítíkə nɛɛsɛ, na bɛ́áyɛ́á bɛnyɛná ɔbɛ́á a ndɔ úndúsiniə, na nɛlɛaŋɛ nikimə na ɛmanya.

¹⁴Mba, ábá nɔ lɛa na ɛhɛ́tɛ́ yɛŋɛ́ŋa ɔ uwənú mɔlɛ́má na umbúínyi wɔ́ nisə́mə́niə, nɔ lɛ bɛ́lɛ́áŋɔ́na ɔwá nɔ lɛa na ɛmanya. Ikúílí nɔ ndɔ nɔ́yɛ́ kɛa, nɔ ndɔ taká híə́nəsiə bɛkanja.

¹⁵Nɛ́ɛ́yɛ́ nindínə́ nɛ́ ɛmanya yɛ́ lɛ ndɔ húlínə ɔ ɔmbáŋá, yɛ́ ndɔ húlínə ɔ misí, Umbúínyi wɔ́ Huɛlɛ́ wɔ́ lɛ bámɛ́nɛ́na, yɛ́ ndɔ húlínə na umbúínyi mɔbɛ́á.

¹⁶Ɔ taká, ɛbɔ́ka ɔyɛ́á bɛndɔ bá lɛ́á na ɛhɛ́tɛ́, á bá ndɔ sə́mə́niə, ɔmɔ́tɔ́yɛ́ undumbú na məndínə́ məkimə má bɔbɛ́á má lɛ́á.

¹⁷Mba, mɔndɔ ɔwá a lɛ́á na ɛmanya ɔyɛ́á yɛ́ ndɔ húlínə ɔ ɔmbáŋá, a lɛa na mɔlɛ́má ɛŋaná hɛkabalɛ, a lɛa na bumbə́nú, na nɛlɛaŋɛ, a lɛa mɔtɔabɛndɔ, úndúə́tɔ́ na mahana, a buɛsɛ kɛaka ɔ bɛndɔ bəkimə ɛŋaná nifəŋə, a lɛa bɛ́nyɔ́nyɔ́lɔ.

¹⁸Bááyɛ́ ɔbá bá ndɔ bumbə́nú bɛ́kɛna, bá ndɔ bumbə́nú miə ɔ uwəbú mamɛ́ŋɛ́, bá ŋɔ mɔsábɔ́náná kusənə, wííyí mɔsábɔ́náná, ɔ́ ɔbáá wataká á Huɛlɛ́ busíə́.