Read Tunen Yákɔbɔ 4 Bible Online

Yákɔbɔ 4 - Tunen bible

Yákɔbɔ 4

¹Hə́níə́ bɛsáká na bɛɔmɔ́nɔ bɛ́ ndɔ húlínə ɔ uwənú ətíə́ əə́? Tátá bɛ́ ndɔ húlínə na mafɛka mabɛ́á ɔmá má lɛ́á ɔ uwənú mɛlɛ́má, má ndɔ bənú lɔ́ma ikúílí tɛ́á ɔ bɛɛ́la bɛ́ yɛ́ɛyɛ misí ukusənə.

²Nɔ lɛa na ilókí yɛ́ bɔɔ́la, mba, nɔ sa ósó ɔ bɔɛ́ta ukusənə, nɔ́yɛ́, nɔ lɛa hoóyi ɔ ɔwɔ́nɔ. Nɔ lɛa na məə́sə tálátɔ́ ɔ bɔɔ́la bɔ́ mɔndɔ, mba, nɔ sɔ́ ŋɔ bɔ́ŋɔ, nɔ́yɛ́, bɛsáká na bɛɔmɔ́nɔ bɛ́ kɔa. Nɔ lɛ bá na yatɛ́ ɔyɛ́á nɔ ndɔ siə bɔkɔasɛ́á, nɔ lɛ ndɔ bɔɛ́ta bata á Huɛlɛ́.

³Nɔ ndɔ Huɛlɛ́ bɔɔ́la bata, nɔ lɛ ndɔ bɔɛ́ta kusənə bɔkɔasɛ́á, bíə́núə́ bɛfɛka bɛ́ báka bɛbɛ́á, nɔ ndɔ bata ɔbánɔ́ yatɛ́ ɛkasɛ yɛ́ bíə́núə́ bilókílókí íyə́síə́.

⁴Uwənú, nɔ báka ɛ́sɛ́á bəəndú bá nɛbambɛa! Nɔ lɛ ndɔ manya ɔwá, ábá ɔ lɛa ɛŋgɔ́áyɛ́ yɛ bɛkɔa bɛ́ misí, ɔ lɛa mubəniə wa Huɛlɛ́ əə́? Wɛ́ɛ́yɛ́ ɔwá a ndɔ siə ɔbáá ɛŋgɔ́áyɛ́ yɛ bɛkɔa bɛ́ misí, a manyá ɔwá a lɛa mubəniə wa Huɛlɛ́.

⁵Nɔ lɛ fɛká ɔwá ɛlɔ́áyɛ́ ndəmə á Mətilə ma ndɔ laa má sɛ́á: «Abáka Huɛlɛ́ a lɛ hikíə́ ɔwá, na wɛɛ́ya na mɔndɔ bá umbúínyi tə́ŋə́kə́níə́ ɔwá wɔ́ lɛ́á ɔ uwəsú mɛɛ́lɔ nuúmə́.»

⁶Mba, abáka Huɛlɛ́ a kɛaka muɛsɛ, mɔlɛ́má muɛsɛ ɔwá a ndɔ bəsú ínə́niə wɔ́ lɛa ɔ ɔwayɛ́ ɔnyɛna yáyɛ́ná bɛɛ́la bikimə, ɔ́ ɛlɔ́áyɛ́ nɔ́yɛ́ Mətilə ma ndɔ laa má sɛ́á: «Abáka Huɛlɛ́ a bə́níə́mə kóyokiə, a bánɛlɛaŋɛ bɛ́kɛakɛna na mɔlɛ́má muɛsɛ.»

⁷Nɔ́yɛ́, nɔ́ bílólósólíə́ á Huɛlɛ́ busíə́, nɔ́ Sátana bɛsaŋɔna, a ŋɔ tɛbakɛna hata na bənú.

⁸Nɔ́ bɛ́nyálɛ́la ɔ ɛmɛ́ŋɛ́ yɛ Huɛlɛ́, wɛɛ́ya tɔ́na a ŋɔ bɛ́nyálɛla ɔ uwənú busíə́. Uwənú á bakɛamabɛ́á, nɔ́ mə́núə́ makátá sɔ́áka ɔ bɔbɛ́á. Uwənú á bɛndɔ bá mɛnyɔ́, nɔ́ yə́núə́ mɛlɛ́má nəŋə́síə́.

⁹Nɔ́ yənúə́ indomí lɛ́nda, nɔ́ lɛláka, nɔ́ bɛ́lɔ́mɔ́nɔ́kɔ, híə́núə́ hiɔnɔ hɛ́ híáná malɛlá, níə́núə́ nɛhɔnɔ tɔ́na, busə́kə.

¹⁰Nɔ́ bílólósólíə́ ɔ busíə́ bɔ́ Isə́lúkú, wɛɛ́ya a ŋɔ bənú bə́ləliə.

¹¹Á bənísə́, nɔ lɛ ndɔ́sáná bənú na bənú. Wɛ́ɛ́yɛ́ ɔwá a ndɔ munísə́ ndɔ́sa ata ɔwá, a ndɔ munísə́ kə́lə́siə, a ndɔ hɛ́na mɔbɛ́á ɔwɔŋgɔkɔnɔ Umbə́ndə́ wɔ́ Huɛlɛ́, a ndɔ muítə kə́lə́siə. Nɔ́yɛ́, ɔkɛaka ɔwá ɔ muítə bɛ́kɛ́ákɛ́na, ɔ híáná ɔbánɔ́ mukə́lə́siə wa umbə́ndə́.

¹²Á Huɛlɛ́ bíbúə́ ɔwá a ndɔ Umbə́ndə́ índiə, ɔwá a ná hɔ́ánána ukə́lə́siə tɔ́na, wɛɛ́ya bíbúə́ a lɛ́á na iŋgínə́ yɛ mɔndɔ unuəniə mbá ata ɔ ɔwayɛ́ unímə́siə. Ɔwáwɔ ɔwá ɔ ndɔ mukúlə́kulə kə́lə́siə, aŋɔ́á ɛ́yánɛ́ əə́?

¹³Nɔ́ ɔ́kɔ́kɛ́ná muɛsɛ! Uwənú ɔbá nɔ ndɔ laa nɔ sɛ́á: «Niɔfɛ́nɛ ata bulílə́, tɔ ŋɔ ákána ɔ yɛ́ɛyɛ mbá ata ɔ yííní bətínə́, tɔ ŋɔ hiɔŋɔ túmbiə hikimə umə́, tɔ ŋɔ nyuŋgə́ kɛaka ɛlɔ́áyɛ́ mɔnɛ́á ukusənə məəŋí.»

¹⁴Nɔ́yɛ́, nɔ lɛ ndɔ manya nəníə́ bulílə́ yɛ́ ŋɔ báá, nɔ lɛ ndɔ manya nəníə́ búə́núə́ buɔmɔ́ bɔ́ bulílə́ bɔ́ ŋɔ bámɛnɛna! Ɔ taká, nɔ báka ɛ́sɛ́á muóyi ɔwá wɔ́ ndɔ bála, tɛ́tɛ́á yɛ ikúílí wɔ́ nímə.

¹⁵Nɔ ná hɔ́ánána ɔlaa ɔbánɔ́ náana nɔ sɛ́á: «Ábá Isə́lúkú a ná hikə́kíə́, tɔ ŋɔ nɔmɔkɔ ɔ misí, tɔ ŋɔ bɔ́ɔbɔ ata búíní kɛaka.»

¹⁶Mba, nɔ báka ɔbánɔ́ bɛndɔ bə́níə́mə na bá nɛbɛ́lɛ́áŋɔna. Yɛ́ɛ́yɛ́ ɛnya yɛ niə́mə nɛ́ lɛ bá nɛɛsɛ.

¹⁷Nɔ́yɛ́, ábá mɔndɔ a ndɔ manya nəníə́ a ná hɔ́ánána ɔ buɛsɛ ɔkɛa mbá a sá bɔɛ́ta kɛa, a lɛ kɔ́átɔ́ ɔ bɔbɛ́á.