Read Tunen Yákɔbɔ 5 Bible Online

Yákɔbɔ 5 - Tunen bible

Yákɔbɔ 5

¹Uwənú á bambiaŋɛ, nɔ́ ɔ́kɔ́kɛna muɛsɛ! Nɔ́ lɛláká na nióni nɛŋɛ́ŋa ɛlɔ́áyɛ́ mɔmɔ́kɛ́ ɔmá má ndɔ bənú táta!

²Níə́núə́ nɛmbiaŋɛ nɛ́ lɛa fɔnɔ́kɔ́tɔ, nɛsɛ́kɛ́ nɛ́ ná bíə́núə́ bɛlɛŋa hɔ́á ɔsɛ́njɛ́la.

³Maŋgɛ́lɛ́tɛ ma ndɔ yənúə́ kóolo na sílíba sɛ́njɛ́la, mátáyɛ́ maŋgɛ́lɛ́tɛ má ndɔ bənú lɛna yatɛ́ ɔyɛ́á ɛkasɛ yɛ́ ndá bənú famɛna, má ŋɔ yənúə́ mɛɛ́lɔ sɛ́njɛ́laka ɛ́sɛ́á abáka hiwə hɛ́ bɔɔ́la lúə́ŋəkiə. Nɔ ná maasɛ bɛ́kɔ́tákɛ́ná ɔ ikúílí ɔyɛ́á misí yɛ́ nɔ́ kafámá ɔ nisúki.

⁴Nɔ ná kinə́ ɔ bɔnyɛna ɔ ɔsábɔ́na ɔbá bá ná húə́kə ɔ uwənú bɛtɔbɔtɔ́bɔ́, bá ndɔ bísə́kə́lə, yə́búə́ ɛmbɛ́kɛ́tɛ́ yɛ́ ka káfámá ɔ məlúə́ má Huɛlɛ́ á Isə́lúkú yɛ bɔɛ́na.

⁵Nɔ ka niŋəkə ɔ yɛ́ɛyɛ misí ɔ nɛmbiaŋɛ, ata bɔɔ́la bɔ́ sa bənú áŋgɛ́na. Nɔ ka bílúkə́kə na bɛɛ́la bɛɛsɛ, nɔ ná mbɛlɛ́máká ɛ́sɛ́á bilúkə́ ɔbɛ́á bá nɔ́ ákánana ɔ nɛkamɛnyama.

⁶Nɔ ka bátaká hɔkakɛna, nɔ ná bəə́bu ɔnɔkɔ, bá sa əbú bísúkuliə.

⁷Á bənísə́, nɔ́ ísíbíníə́ ɔkafámáká ɔ ikúílí ɔyɛ́á Isə́lúkú a ŋɔ ndahiana. Nɔ́ siəlínə́ ɛ́sɛ́á abáka mɔnyɔɔ ɛtɔbɔtɔ́bɔ́ ayɛ́ ísíbiniə ɔkafámáká ɔ ikúílí ɔyɛ́á ɛkasɛ bɛlɔŋɔ́tɛ́ bɛɛsɛ bɛ́ tɔtámátámá hákɛ́na. A ndɔ manya muɛsɛ ɔwá, ɛmɔ́lá yíbúsíə́ na yútifəkə yɛ́ ná hɔ́ánána ɔnaa.

⁸Bənú tɔ́na nɔ ənú ísíbíníə́, nɔ́ mɔlɛ́má óníníə́ bɔkɔasɛ́á, nɛndahíáná nɛ́ Isə́lúkú nɛ́ lɛa hoóyi.

⁹Á bənísə́, nɔ lɛ bísə́kə́lə́ bənú na bənú ɔkɛaka ɔwá Huɛlɛ́ a lɛ bənú kə́lə́síə́. Nɔ́ siəlínə, mukə́lə́siə a nɔ́ ndafama, a lɛa ɔ hɛkɔ́kɛ.

¹⁰Á bənísə́, nɔ́ bɔhɛ́nátɔtányɛ́ bɛ́kɔ́lɔ́mɔ́na, bá ka hɔ́kɛ́na ɔ niínyə nɛ́ Isə́lúkú. Nɔ́ iŋgətí ɛ́tɛ́na ɔ uwəbú, bá ka məsə́kə siəkinə, bá ka ísíbiniə.

¹¹Nɔ́ siəlínə, tɔ ndɔ bɛndɔ bá nisíbiniə nyama ɔwá bá lɛa na nɛhɔnɔ, nɔ ka ɔ́kɔ́kɛna ɛ́sɛ́á Yóbo a ná məsə́kə ísə́bíníə́ hata yɛ ikúílí. Tɔ ndɔ manya tɔ́na yatɛ́ á Isə́lúkú á Huɛlɛ́ a ná wɛɛ́ya índíə́ ɔ əlimə yɛ ikúílí bɔkɔasɛ́á, Isə́lúkú a lɛ úndúə́tɔ́ na iwə́mɛɛ́lɔ na mɔlɛ́má muɛsɛ.

¹²Á bámɛ́á bənísə́, ubusíə́ bɔ́ bikimə, nɔ lɛ bíkúmə. Nɔ lɛ bíkúmə́ ɔ tɔ́mbákɛna na nɔɔ́mɛná, nɔ lɛ bíkúmə́ ɔ tɔ́mbákɛna na misí mbá ata ɔ́ uníə́níə́ nindínə́. Yənúə́ ɛ́ɛ yɛ́ bámɛ́nɛ́ná ɛ́ɛ, yənúə́ bóo tɔ́na yɛ́ bámɛ́nɛ́ná bóo ɔkɛaka ɔwá, Huɛlɛ́ a lɛ bənú hɔ́kɛ́na.

¹³Ábá ɔmɔtɛ́ ɔ uwənú ətíə́ a lɛa ɔ məsə́kə, á bɛ́kálákɛ́na. Ába a lɛ ɔ nɛhɔnɔ, á Huɛlɛ́ maŋana ósókínə.

¹⁴Ábá ɔmɔtɛ́ ɔ uwənú ətíə́ a ndɔ náá, á bəkúkə bá Ilúkunə yɛ́ bəlumininə ɛ́lɛ́ákɛ́na, bá wɛɛ́ya ɛbánda fofókíə́ ɔ niínyə nɛ́ Isə́lúkú á Yə́susu, bá wɛɛ́ya bɛ́kálákɛ́nɛ́na.

¹⁵Ikúílí ɔ ndɔ bɛ́kálɛ́na na nɛkɔmba nikimə tálɛ́nátɔ́ á Huɛlɛ́, mabɛ́kálɛ́na má ŋɔ ɛnákɛnákɛ buhuhə índiə. Isə́lúkú a ŋɔ wɛɛ́ya niŋəsiə, a ŋɔ wɛɛ́ya máyɛ́á mabɛ́á nɛasɛ́ná ɔmá a ná kɛ́áka.

¹⁶Nɔ́yɛ́, nɔ́ mə́núə́ mabɛ́á fə́mə́lə́kə́níə́ bənú na bənú, nɔ́ bɛ́kálákɛ́ná tɔ́na báaba ɛlɔ́áyɛ́ bə́ə́ní ɔkɛaka ɔwá Huɛlɛ́ a bənú níŋə́síə́. Uŋgə́lə́kí wɔ́ mɔndɔ wataká á Huɛlɛ́ busíə́ wɔ́ booko na iŋgínə́ ɔ ɔyáyɛ́na.

¹⁷Əlíə́ a ka báá mɔndɔ ɛ́sɛ́á bəsú, a ka bɛ́kálákɛna na iŋgínə́ ɔkɛaka ɔwá ɛmbɔŋɔ yɛ́ lɛ naa, nɔ́yɛ́, yɛ́ sa naa ɔ ətíə́ yɛ tuɔŋɔ tɔ́lálɔ́ na miilí ɛ́lɛ́ndálɔ.

¹⁸Əlimə yɛ nɔ́yɛ́, a ná manyɔ́ bɛ́kálákɛna, ɛmɔ́lá yɛ́ ná naáka, nɔ́yɛ́, misí yɛ́ ná bɛ́áyɛ́á bɛlɔŋɔ́tɛ́ hákɛ́na.

¹⁹Á bámɛ́á bənísə́, ábá ɔmɔtɛ́ ɔ uwənú ətíə́ a ná bísúə́lə́ hata na ɛnɔ́mɛ yɛ́ Huɛlɛ́, mbá á mukúlə́kulə a ná ndá wɛɛ́ya híánáná ɔ taká,

²⁰nɔ́ manyá ɔwá, wɛ́ɛ́yɛ́ ɔwá a ná ndá mɔkɛamabɛ́á híánáná ɔ ɛnɔ́mɛ yɛ́ taká, a ŋɔ wɛɛ́ya ɔ́lɔ ɔ buɔmɔ́ bɔ́ ikúílíə́kimə ukusənə, a ŋɔ wɛɛ́ya ɔ́lɔ ɔkɛaka ɔwá, Huɛlɛ́ á wɛɛ́ya máyɛ́á mabɛ́á məəŋí nɛasɛ́ná tɔ́na.