Read Tunen 1 Bíə́lə 1 Bible Online

1 Bíə́lə 1 - Tunen bible

1 Bíə́lə 1

¹Mɛaŋɔ́á Bíə́lə á Mɔsɔ́másɔma wa Yə́susu Kilísitusu mɛ ndɔ híihi hiəfulə tilə. Mɛ ndɔ hiítə tilinə ɔ bááyɛ́ ɔbá Huɛlɛ́ a ná tɛfa, ɔbá bá ndɔ niŋə ɔ ɛsɔ, sámbánátɔ́ ɔ makɛ́tɛ má misí yɛ nɛmanɛna nɛ́ Lɔ́ma: Bɔ́ŋɔ́tɔ, Kalátɛ, Kabatɔ́sɛ, Ásia na yɛ Bitiníə́.

²Huɛlɛ́ á Isə́ a ka bənú tɛ́fa ɔwɔŋgɔkɔnɔ mɔanɔ ɔwá a ná taŋá ɔnánɛna ubusíə́ bɔ́ ikúílí, wə́yíə́ Umbúínyi Mɔnaŋanaŋa, wɔ́ ka kɛaka ɔwá, nɔ híáná báyɛ́á bɛndɔ, a ná bənú bákɛ́á ɔkɛaka ɔwá nɔ Yə́susu Kilísitusu ɔ́kɔ́kɛ́nɛ́na, á bənú sɔ́áká na máyɛ́á manɔ́ŋɔ́. Huɛlɛ́ á bənú buɛsɛ kɛáka, á bənú bumbə́nú índíə́.

³Tɔ́ Huɛlɛ́ á Isə́ yɛ yəsúə́ Isə́lúkú á Yə́susu Kilísitusu nyámáka. A ka kɛaka tɔ ná buɔmɔ́ buɔ́sɔ kusə́nə ɔ tɔ́mbákɛna na yáyɛ́á iwə́mɛɛ́lɔ, nyɔnɔ na nɛhɔŋɔa nɛ́ Yə́susu Kilísitusu ɔ ətíə́ yɛ bəwə́nú, nɔ́yɛ́, tɔ ndɔ manyá ɔwá tɔ ŋɔ kusənə bikimə ɔbɛ́á Huɛlɛ́ a ná bəsú bílíhə́níə́.

⁴Tɔ ŋɔ ɛhálálá kusənə ɔyɛ́á yɛ́ sa ósó unímínə ata ɔfɔnɔ, mbá ata ulunə. Huɛlɛ́ a ka bənú yɛ́táyɛ́ ɛhálálá tə́tə́niniə ɔ nɔɔ́mɛná.

⁵A ka yɛ́táyɛ́ ɛhálálá tə́tə́niniə uwənú ɔbá nɔ ná níə́núə́ nɛkɔmba tálɛ́ná ɔ ɔwayɛ́, a ndɔ bənú tə́tə́niə na yayɛ́á injiŋə ɔkɛaka ɔwá, ɔ ikúíli yɛ́ nitifə́, bá siəkínə́ nəníə́ a ndɔ bənú nuəniə.

⁶Nɔ́yɛ́, nɔ lɛa na nɛhɔnɔ ata ɛ́sɛ́á nɔ ndɔ busə́kə ɔ́kɔ isíŋáka ɔ tɛ́tɛ́á yɛ ikúílí, ɛlɔ́áyɛ́ məndínə́ má məsə́kə ɔmá bɛndɔ bá ndɔ bənú índiə.

⁷Nɔ ŋɔ matáyɛ́ məsə́kə siəkinə ɔkɛaka ɔwá, bá manyá ábá taká nɔ lɛ́á na nɛkɔmba tálɛ́nátɔ́ á Yə́susu. Yə́núə́ ilumininə yɛ́ lɛa na mukunə́ yáyɛ́ná kóolo, ata kóolo bɛ́muɛ́tɛ́ ɔyɛ́á abáka bá sə́ŋúluəkiə ɔ hiwə ɔkɛaka ɔwá bá bɔ́áyɛ́á buɛsɛ manyá, abáka yɛ́ tɛŋɛa. Ɔ tɔ́mbákɛna na yə́núə́ ilumininə, Huɛlɛ́ a ŋɔ bənú tɔnyamáná, tuúmə, na hibə́təniə índiə ɛnáká Yə́susu Kilísitusu á fámálána.

⁸Ɔwayɛ́ ɔwá nɔ ndɔ hikiə ɛŋaná usinə, ɔwá nɔ nana sínə, nɔ ná níə́núə́ nɛkɔmba tálɛ́ná ɔ ɔwayɛ́, ɛlɔ́áyɛ́ nɔ́yɛ́, nɔ́ ənú bílə́nə́kə́ na nɛhɔnɔ nɛŋɛ́ŋa ɔnɛ́á bá sa ósó ɔ binífúnínə́ uwíndiə.

⁹Nɔ báka ɔ nɛhɔnɔ bɔkɔasɛ́á, nɔ ŋɔ kusənə yatɛ́ ɔyɛ́á nɔ ndɔ hikiə ɛnaka nɔ níə́núə́ nɛkɔmba tálɛ́ná á Yə́susu. Yɛ́ lɛ ɔwá Huɛlɛ́ a ka bənú nuəkəniə.

¹⁰Bɔhɛ́nátɔtányɛ́ bá ka hinyəkə, bá ná tímə́kə́ muɛsɛ ɔkɛaka ɔwá, bá manyá nəníə́ Huɛlɛ́ a ŋɔ bɛndɔ nuəkəniə. Bá ka bənú bɛkɔa bɛɛsɛ lakɛna ɔbɛ́á Huɛlɛ́ a ná bílíhə́níə́ ɛlɔ́áyɛ́ ənú.

¹¹Umbúínyi wɔ́ Kilísitusu ɔwá wɔ́ ná bámɛ́nɛ́na ɔ uwəbú mɔlɛ́má, wɔ́ ka taŋa uwəbú ɔlɛna ɔwá, Kilísitusu a ŋɔ məsə́kə siəkinə ubusíə́ ɔbɔ́á a fínə́ ɔ ɔwayɛ́ tuúmə. Bá ka tɔŋgɛtɛ́nɛ́á na ɛhanyɛ siəkə ɔmanya ɔyɛ́á bɛ́ ŋɔ bɛ́tɔ́mbáka ɔkɛaka ɔwá, bá manyá bá sɛ́á ikúíli ɔyɛ́á bɛkɔa ɔbɛ́á Umbúínyi wɔ́ Kilísitusu wɔ́ ná nɔ́ŋɔ́náka yɛ́ ná ndáfáma.

¹²Huɛlɛ́ a ka bɔhɛ́nátɔtányɛ́ mənyəsiə ɔwá, imbə́nú ɔyɛ́á a ná bəə́bu índíə́ ɔkɛaka ɔwá bá nɔŋɔ́náka, yɛ́ sa bá yəbú bíbúə́, mbá yɛ́ ka báá ɛlɔ́áyɛ́ ənú. Ɔ́ yɛ́táyɛ́ imbə́nú Yɛɛsɛ á banɔŋɔna bá ndɔ bənú lɛna niɔfɛ́nɛ, na injiŋə yɛ Umbúínyi Mɔnaŋanaŋa ɔwá wɔ́ ndɔ húlínə ɔ nɔɔ́mɛná ɔwá Huɛlɛ́ a ná lɔma. Bɛáŋgɛlɛ bɛ́múɛ́tɛ́ bá ka hikəkiə ɔ nɔ́yɛ́ ɔmanya.

¹³Ɛlɔ́áyɛ́ nɔ́yɛ́, nɔ́ báá ɛmbɛnyɛ́ ɔ buolí bɔ́ Huɛlɛ́ ɔ ɔnyɔɔ. Nɔ́ wə́núə́ mɔlɛ́má índíə́ ɔ bɔkɔa buɛsɛ ɔbɔ́á Huɛlɛ́ a ŋɔ bənú kɛaka, ɔ́ niɔŋɔ́, a ŋɔ bənú nuəkəniə ɛnáká Kilísitusu á fámálána.

¹⁴Nɔ́ Huɛlɛ́ ɔ́kɔ́kɛ́nɛ́ná ɛ́sɛ́á abáka baná bá isə́ ɔ́kɔ́kɛnɛna, nɔ́ bilókílókí níása ɔbɛ́á nɔ ná bá nɔ ndɔ kɛa ikúílí ɔyɛ́á nɔ sa bá nɔ ndɔ Yə́susu manya.

¹⁵Nɔ́ báá ɛŋaná hɛkabalɛ ɔ uwənú ɛnya yɛ nibítíkə nikimə ɛ́sɛ́á Huɛlɛ́ ɔwá a ná bənú ɛ́lɛ́ákɛ́na a lɛ́á ɛŋaná hɛkabalɛ.

¹⁶Ɔ taká, Huɛlɛ́ a ndɔ laa ɔ ɔwayɛ́ hiəfulə a sɛ́á: «Nɔ́ bámɛ́nɛ́ná ɛŋaná hɛkabalɛ ɛ́sɛ́á mɛaŋɔ́á tɔ́na mɛ lɛ́á ɛŋaná hɛkabalɛ.»

¹⁷Ikúílí nɔ ndɔ bɛ́kálɛ́na, nɔ ndɔ Huɛlɛ́ ɛ́lɛnɛna yənúə́ Isə́. A lɛ ndɔ nifəŋə háá ətíə́ yɛ bɛndɔ. Mba, a ndɔ bəə́bu kə́lə́siə mɔɛ́ta tɛ́á ɔwɔŋgɔkɔnɔ yatɛ́ ɔyɛ́á a ná kɛ́áka, ikúílí ɔyɛ́á yɛ́ nɔ́ bənú tíkə́nə ɔ uniŋə ɔ misí, nɔ́ ínə́níə́ ɔ tɔ́mbákɛna na níə́núə́ nibítíkə ɔwá, nɔ ndɔ Huɛlɛ́ hibə́təniə híə́niniə.

¹⁸Nɔ ndɔ manya muɛsɛ yatɛ́ mukunə́ Huɛlɛ́ a ná bənú háŋɔ́ná ɔ nibítíkə nɛbɛ́á ɔnɛ́á bíə́núə́ bisə́kínə́ bá ná bənú túmbíníə́, tátá na kóolo mbá ata na mɔnɛ́á ɔmá abáka má sɔnɔa a ná bənú haŋɔna.

¹⁹Mba, a ka bənú háŋɔ́na na manɔ́ŋɔ́ má ɛŋaná mukunə́ má Kilísitusu, ɔwá a lɛ́á ɛ́sɛ́á á mɔnándɔ́mbá wa ɛŋaná hɛkɔma mbá ata hɛkabalɛ.

²⁰Huɛlɛ́ a ka wɛɛ́ya tɛ́fa ubusíə́ bɔ́ nɛbɔ́tɛ́ná nɛ́ misí, a ka wɛɛ́ya fə́mə́ləniə ɛlɔ́áyɛ́ búə́núə́ buɛsɛ ɔ bɛ́ɛbɛ bikúílí bɛ́ nitifə́.

²¹Ɔ tɔ́mbákɛna na wɛɛ́ya nɔ́ lɛ́á na nɛkɔmba tálɛ́nátɔ́ á Huɛlɛ́. Á Huɛlɛ́ a ná wɛɛ́ya huŋúə́síə́ ɔ ətíə́ yɛ bəwə́nú, a ná wɛɛ́ya tuúmə híə́níníə́; ɛlɔ́áyɛ́ nɔ́yɛ́, ikúílí nɔ ná yə́núə́ ilumininə tálɛ́ná á Huɛlɛ́, nɔ ndɔ manya ɔwá nɔ lɛa itíə́nə́tɔ́ yatɛ́ ɔyɛ́á nɔ ndɔ siə.

²²Nɔ ka túə́núə́ tɔtányɛ́ sɔaka ɔ ikúílí nɔ́ ná Ɛtambá yɛ́ Huɛlɛ́ ɔ́kɛ́ná ɔkɛaka ɔwá, tiísi yɛ nibo nɛ́ bámɛ́nɛ́na uwənú ətíə́ á bənísə́. Nɔ́yɛ́ nɔ́ hikə́kə́níə́ bənú na bənú na wənúə́ mɔlɛ́má mukimə, nɔ lɛ tɔmbɔ.

²³Tátá bíə́núə́ bisə́ bá ná híánɔ́lɔ́na ɔ uwənú ubíə́nə, bá lɛa biwə́wə́, mba, nyɔnɔ na nifumə́ ɔnɛ́á abáka nɛ́ lɛ fɔnɔ, ɔ tɔ́mbákɛna na ɛtambá yɔɔ́sɔ yɛ́ Huɛlɛ́, yɛ́ ikúílíə́kimə tɔ́na.

²⁴Bá ka tiləkə ɔ hiəfulə hɛ́ Huɛlɛ́ bá sɛ́á: «Mɔndɔ tɛ́á a booko ɛ́sɛ́á umbuə, Nɛ́áyɛ́á nɛbɔ́ŋɔ nikimə nɛ́ booko ɛ́sɛ́á ɛsama. Abáka umbuə wɔ́ kɔ́táka, yáyɛ́á ɛsama tɔ́na yɛ́ ayɛ́ kɔa.

²⁵Mba, ɛtambá yɛ́ Isə́lúkú yɛ́ booko ɛlɔ́áyɛ́ ikúílíə́kimə.» Yɛ́tána ɛtambá, ɔ́ Imbə́nú Yɛɛsɛ ɔyɛ́á bəyəmbələniə bá ná bənú nɔ́ŋɔ́nákɛ́na.