Read Tunen 1 Bíə́lə 2 Bible Online

1 Bíə́lə 2 - Tunen bible

1 Bíə́lə 2

¹Ɛlɔ́áyɛ́ nɔ́yɛ́, nɔ́ məndínə́ məkimə má ɛŋgásɔ́ níása, má mənímbə́nə́, má nɛbɛ́nyɔ́nyɔlɔ, bilókílókí na mɔsɔkɔnɔ, nɔ́ bɛ́ɛ́yɛ́ bikimə bɛ́yákáláka.

²Ɛ́sɛ́á abáka bosoní bá mabɛ́nyɛ bílókínə, bənú tɔ́na, nɔ́ Ɛtambá yɛ́ Huɛlɛ́ bílókínə ɔ ɔwɔ́kɔ ikúílí tɛ́á, yɛɛ́ta yɛ́ lɛ́á tiísi yɛ mabɛ́nyɛ má ɛŋaná məhilə́. Nɔ́ mátáyɛ́ mabɛ́nyɛ nyóhóko ɔkɛaka ɔwá nɔ ɔ́mbɔkɔ mbá Huɛlɛ́ á bənú núə́kə́níə́.

³Ɔ taká, Mətilə manaŋanaŋa má ndɔ laa má sɛ́á: «Nɔ ka ɔ́kɔ́lɛna, nɔ ná manya ɔwá Isə́lúkú a lɛa muɛsɛ.»

⁴Nɔ́ tɔ́mbálɛ́la ɔ ɛmɛ́ŋɛ́ yɛ Isə́lúkú á Yə́susu, wɛɛ́ya á lɛ́á muɔkɔ ɔwá wɔ́ ndɔ buɔmɔ́ índiənə mbá nɔ́yɛ́ bɛndɔ bá ná ómbóko, mba, ɔwá Huɛlɛ́ a ná tɛ́fá bɔkɔasɛ́á, a ndɔ wə́yíə́ mukunə́ manya.

⁵Uwənú tɔ́na, nɔ́ bɛ́níása ɔwá Huɛlɛ́ a bənú bɛ́kɛ́ákɛ́na ɛ́sɛ́á miɔkɔ yɛ́ ɔ́nɔ́kɛ́nátɔ́ ɛlɔ́áyɛ́ yayɛ́á miímə ɔfalabɛna, ɔ yɛ́táyɛ́ miímə á Umbúínyi Mɔnaŋanaŋa wɔ́ ndɔ tuənə. Ɔ yɛ́táyɛ́ miímə, bənú nɔ lɛ́á ilúkunə yɛ́ bətitiəmahánɛna, Umbúínyi Mɔnaŋanaŋa wɔ́ ndɔ kɛa ɔwá, nɔ mahánɛna índíə́kínə́ á Huɛlɛ́. Mahánɛna ɔmá Huɛlɛ́ a ŋɔ hikəkiə, a ŋɔ maáta káha ɔ tɔ́mbákɛna na Yə́susu Kilísitusu.

⁶Ɔ taká, Huɛlɛ́ a ndɔ laa ɔ ɔwayɛ́ Mətilə a sɛ́á: «Siəkínə́nu! Mɛ ka muɔkɔ wɔ́ mukunə́ mɔŋɛ́ŋa tɛ́fa ɔwá mɛ ŋɔ tikəlinə ɔ bətínə́ yɛ Síyono. Mútə́yí muɔkɔ wɔ́ lɛ́á muɔkɔ wɔ́ nibə́ŋú. Ata ɛ́yánɛ́ ɔwá a ŋɔ nɛ́áyɛ́á nɛkɔmba tálɛ́na ɔ muítə, a sa ndáyɔ́nɔ́á.»

⁷Wííyí muɔkɔ wɔ́ báka na mukunə́ ɛlɔ́áyɛ́ ənú á bəlumininə. Mba, ɛlɔ́áyɛ́ bááyɛ́ ɔbá bá sa lumininə, Hiəfulə hɛ́ Huɛlɛ́ hɛ́ ndɔ laa hɛ́ sɛ́á: «Muɔkɔ ɔwá bafalaba bá ná ómbóko, wɔ́ ka híána muɔkɔ wɔ́ nihíkíli.»

⁸Hiəfulə hɛ́ ndɔ laa tɔ́na ɔ yɛ́mɔtɛ́ ɛbɔ́ka hɛ́ sɛ́á: «Wííyí muɔkɔ wɔ́ lɛ́á niumbúfə́nínə́, wɔ́ lɛa tɔ́na muɔkɔ mɔŋɛ́ŋa wɔ́ nɛkɔɛnɛ́ná.» Bɛndɔ bá ŋɔ bɛ́lɔ́kaka umə́ bɔkɔasɛ́á, bá ka Ɛtambá yɛ́ Huɛlɛ́ ɔ́kɔ́kɛna, bá sa yɛɛ́ta luminə, ɔ́ nɔ́yɛ́ Huɛlɛ́ a ná tínímíə́ ɔwá yɛ́ bɛ́kɛ́áka ɛlɔ́áyɛ́ əbú.

⁹Mba uwənú, nɔ báka məfumə́ ɔmá Huɛlɛ́ a ná tɛfa, bətitiəmahánɛna bá munəni, hitikə ɔhɛ́á hɛ́ lɛ́á hɛ́ Huɛlɛ́, ilúkunə ɔyɛ́á yɛ́ lɛ́á yɛ́ Huɛlɛ́. A ka kɛaka ɔwá nɔ fámá ɔ ibínə́binə, nɔ fínə́ ɔ ɔwayɛ́ yɛmbɛlana yɛ́ isəmú ɔkɛaka ɔwá, nɔ húlə́ bɛ́áyɛ́á bɛnyɛná bɛɛsɛ nɔŋɔnaka.

¹⁰Ɔ yɛ́táyɛ́ ikúílí buɔnɔ́, nɔ sa bá hitikə hɛ́ Huɛlɛ́, mba, isíŋáka, nɔ lɛa híə́yíə́ hitikə. Ɔ yɛ́táyɛ́ ikúílí buɔnɔ́, Huɛlɛ́ a sa bənú mahana wə́ə́, mba, isíŋáka, a ná bənú mahana wəə.

¹¹Á bɛ́áámɛ́á bɛŋgɔ́áyɛ́ bɛ́ mɔlɛ́má, nɔ́ bɛ́kɔ́lɔmɔna ɔwá, nɔ lɛa batɔ́mbátɔmba, na bəkiníə́nú háha ɔ misí, mɛ ndɔ bənú bata ɔwá, nɔ bɛfɛka bɛbɛ́á bítə́tə́kə́níə́ ɔbɛ́á bɛ́ lɛ́á ɔ uwənú mɔlɛ́má, bɛ́ lɛ ndɔ ókóto ɔwá nɔ kɛ́áká yatɛ́ ɔyɛ́á Huɛlɛ́ a ndɔ hikiə.

¹²Nɔ́ bá na nibítíkə nɛɛsɛ ɔ ətíə́ yɛ balɛmanyáhuɛlɛ́ ɔkɛaka ɔwá ɔ ɛbɔ́ka ɔyɛ́á bá ndɔ bənú sɔ́kɔ́nɛna ɛ́sɛ́á bəcəŋə, bá ŋɔ bá bíə́kíníə́tɔ́ ɔ bíə́núə́ bɛnyɛná bɛɛsɛ ɔmanya, bá Huɛlɛ́ nyámáká tɔ́na ɔ hinó ɔhɛ́á a ŋɔ ndahíáná ɔ bɛndɔ ukə́lə́siə.

¹³Ɛ́sɛ́á nɔ ndɔ ɔŋgɛna ɔ mabaná má Isə́lúkú, nɔ́ bɛndɔ ɔ́kɔ́kɛ́nɛ́na ɔbá bá lɛ́á ɔ nɛmanɛna. Nɔ́ káyɛsa ɔ́kɔ́kɛ́nɛ́na ɔwá a lɛ́á ɔ mɔlɔ́á wɔ́ bənəni bəkimə.

¹⁴Nɔ́ bamanɛna ɔ́kɔ́kɛ́nɛ́ná tɔ́na ɔbá a ná tínímiə ɛlɔ́áyɛ́ bəcəŋə ɔsɔ́kɔ́tɛa na bakɛabuɛsɛ ɔnyama.

¹⁵Ɔ taká, Huɛlɛ́ a ndɔ hikiə ɔwá, nɔ buɛsɛ kɛ́áka ɛlɔ́áyɛ́ minuə yɛ́ bááyɛ́ ukuiyiə ɔbá bá lɛ ndɔ taká luminə.

¹⁶Nɔ́ bítíkə́kə́ ɛ́sɛ́á bɛndɔ bá bukuənjə, nɔ lɛ bítímínə ɔ bɔ́táyɛ́ bukuənjə ɛlɔ́áyɛ́ bɔbɛ́á ɔkɛa, mba, nɔ́ nyɔ́ɔ́kɔ́ ɛ́sɛ́á bɔnyɛna bá Huɛlɛ́.

¹⁷Nɔ́ bɛndɔ bəkimə bə́tə́kíə́, nɔ́ bə́núə́ bənísə́ á bəlumininə hikə́kíə́, nɔ́ Huɛlɛ́ lúbúnə́kə, nɔ́ káyɛsa ɔ́kɔ́kɛ́nɛ́na.

¹⁸Uwənú á bɔnyɛna, nɔ́ bíə́núə́ bisə́lúkú ɔ́kɔ́kɛ́nɛ́na na hibə́təniə hikimə, tátá ɔ́maná ɔ bááyɛ́ ɔbá bá lɛ́á baasɛ, ata yə́ə́bu, mba, na bááyɛ́ ɔbá bá lɛ́á natákátɔ.

¹⁹Ɔ taká, ábá mɔndɔ a ndɔ məsə́kə ísíbiniə itə́mbí ɛlɔ́áyɛ́ Huɛlɛ́, Huɛlɛ́ a ŋɔ nɔ́yɛ́ hikəkiə.

²⁰Ɔ taká, yatɛ́ mɔsɛ́ŋɛ́ wɔ́ lɛ́á ɔ ɛŋɔ́ányɛ́ uwisíbiniə ábá ɔ lɛa kɔ́átɔ əə́? Ábá bá ndɔ aŋɔ́á məsə́kə índiə bɔkɔasɛ́á ɔ ndɔ buɛsɛ kɛa, mbá ɔ ná nɔ́yɛ́ ísə́bíníə́, ɔ ndɔ Huɛlɛ́ hibə́təniə híə́niniə.

²¹Ɔ́ muítə á ná bənú ɛ́lɛ́ákɛ́nɛ́ná bɔkɔasɛ́á, Kilísitusu bɛ́múɛ́tɛ́ a ka məsə́kə siəkinə tɔ́na ɛlɔ́áyɛ́ ənú, a ka bənú iŋgətí tíkínə ɔkɛaka ɔwá nɔ ɔ́ŋgɔ́kɛ́na ɔ ɔwayɛ́ mabaná.

²²A sa ayɛ́ bɔbɛ́á kɛa mbá ata bɛkanja, a sa fə́mə́ləniə ɔ ɔwayɛ́ munuə.

²³Ikúílí bá ná wɛɛ́ya kɔ́báká, a sa ayɛ́ bəə́bu kɔ́ba. Ikúílí bá ná báá bá ndɔ wɛɛ́ya məsə́kə índiə, a sa ayɛ́ bísúkuliə, mba, a ka bíndiə á Huɛlɛ́ ɔwá a ndɔ kə́lə́səniə na taká mikimə.

²⁴Kilísitusu a ka mə́súə́ mabɛ́á túána ɔ ɔwayɛ́ mɛɛ́lɔ ɛlɔ́áyɛ́ uwínə ɔ ɔmbásá ɔkɛaka ɔwá, tɔ wínə́ ɔ uwəsú mabɛ́á mbá tɔ kɛndáká tɛ́nɛ́mátɔ́ ɛ́sɛ́á Huɛlɛ́ a ndɔ hikiə, ɔ tɔ́mbákɛna na bɛ́áyɛ́á bikuəli nɔ́ ná iniŋəsiə kusə́nə.

²⁵Nɔ ka bá nɔ ndɔ húlə́ nəyə ɛ́sɛ́á ɛndɔ́mbá ɔyɛ́á yɛ́ ná nánáka, mba, isíŋáka nɔ ná ndáhíáná ɔ ɛmɛ́ŋɛ́ yɛ mɔkɛndana ɔkɛaka ɔwá a túə́núə́ tɔtányɛ́ tə́tə́kə́níə́.