Read Tunen 1 Bíə́lə 3 Bible Online

1 Bíə́lə 3 - Tunen bible

1 Bíə́lə 3

¹Hɔ́ánánátɔ́ ɛ́sɛ́á bɔnyɛna bá ndɔ bíə́búə́ bisə́lúkú ɔ́kɛ́na, uwənú á bəəndú, nɔ ná hɔ́ánána ɔ bíə́núə́ bibə́ ɔwɔkɛ́na ɔkɛaka ɔwá, ata bɛ́mɔtɛ́ bibə́ bá sá ɛtambá yɛ́ Huɛlɛ́ luminə, bá mɔlɛ́má kɔ́ŋɔ́ná ɔ tɔ́mbákɛna na níə́núə́ nibítíkə, ɛŋaná wə́núə́ munuə uwubúnə.

²Nɔ́yɛ́ yɛ́ ŋɔ bəə́bu hɔ́ánanɛna ɔ usinə nəníə́ níə́núə́ nibítíkə nɛ́ lɛ́á naŋátɔ́ na hibə́təniə.

³Níə́núə́ nɛlɛŋaba nɛ́ sá hɔ́ánana ɔbáá ɔ mianyɔ́, ɛ́sɛ́á nɛnɔa nɛ́ mɔlɔ́á, tubilə tɔ́ kóolo, nɛlɛŋaba nɛ́ mukunə́ mɔŋɛ́ŋa.

⁴Mba, nɔ́ kɛáka ɔwá búə́núə́ bɔhɛka bɔ́ húlínə́ ɔ uwənú mɔlɛ́má nuúmə́, nɔ́ bá na hɛtányɛ́ hɛ́ buyoyoní ná hɛ́ bumbə́nú bɔkɔasɛ́á, abáka yɛ́ɛ́yɛ́ ɛnya yɛ bɔhɛka lɛ tɛŋɛ́á, nɛ́ɛ́yɛ́ nibítíkə nɛ́ lɛa na mukunə́ mɔnɛ́ŋa á Huɛlɛ́ busíə́.

⁵Ɔ yɛ́táyɛ́ ikúílí buɔnɔ́, bəəndú ɔbá bá ná báá bá ndɔ Huɛlɛ́ ɔ́ŋgɔ, bá tátáká yatɛ́ ɔyɛ́á Huɛlɛ́ a ná bílíhə́níə́, bá ka bá bá ndɔ bɛ́tábɔ́na ɔ nɛ́táyɛ́ nindínə́, bá bíə́búə́ bibə́ ɔ́kɔ́kɛnɛna.

⁶Nɔ́yɛ́ Salá a muəndú wa Ábɛlaháma a ná bá a ndɔ kɛa, a yayɛ́á ibə́ ɔ́kɔ́kɛnɛna, a wɛɛ́ya ɛ́lɛakɛnɛna a sɛ́á: «Á yamɛ́á isə́lúkú.» Ábá nɔ ndɔ buɛsɛ kɛa ɛŋaná ɔkɔ́lɔ́ma ata bɔkɔa, nɔ ŋɔ híána ɛ́sɛ́á baná bá Salá.

⁷Uwənú á bibə́, mɔɛ́ta tɛ́á á niŋə́kə́ muɛsɛ na wayɛ́á muəndú, nɔ sulu búə́búə́ bɔlɔŋa bɔ́ tɔmbɔ́kɔ́tɔ́ manyaka, nɔ́ bəə́bu hibə́təniə índíə́kínə bɔkɔasɛ́á, buɔmɔ́ ɔ buɔ́sɔ ɔbɔ́á Huɛlɛ́ a ndɔ bənú índiə ndəmə, a ndɔ ayɛ́ bəə́bu bɔɛ́ta índiə tɔ́na. Ábá nɔ ndɔ kɛa nɔ́yɛ́, ata bɔkɔa bɔ́ sa ósó ukotiə ɔwá, Huɛlɛ́ a lɛ mə́núə́ mabɛ́kálɛ́na ɔkɔ.

⁸Ɔ nitifə́, mɛ ndɔ bənú bəkimə lɛna ɔwá, nɔ́ bámɛ́nɛ́ná munuə úmotí, bɛndɔ bá mahana, nɔ́ hikə́kə́níə́ ɛ́sɛ́á baná bá ninyə́, bɛndɔ bá iwə́mɛɛ́lɔ, bánɛlɛaŋɛ bənú na bənú.

⁹Nɔ lɛ bɔbɛ́á híə́níə́ ɔ mɛɛ́lɔ yɛ bɔbɛ́á, ata ɛkɔ́bálɛ́ ɔ mɛɛ́lɔ yɛ ɛkɔ́bálɛ́. Ɔ nifəŋə, nɔ́ batá ɔwá Huɛlɛ́ a muití sána, ɔ́ ɛlɔ́áyɛ́ nɔ́yɛ́ Huɛlɛ́ a ná bənú ɛ́lɛ́ákɛ́nɛ́na ɔkɛaka ɔwá, a bənú bɛsɔ́nɔ índíə́ ɔbɛ́á a ná bílíhə́níə́.

¹⁰Ɔ taká, Mətilə má sɛ́á: «Wɛ́ɛ́yɛ́ ɔwá a ndɔ buɔmɔ́ buɛsɛ hikiə na tunó tɔ nɛhɔnɔ, a ná hɔ́ánána ubítə́tə́niə ɔwá, bɛtambá bɛbɛ́á bɛ́ lɛ fámá ɔ ɔwayɛ́ munuə na bɛkanja.

¹¹A ná hɔ́ánána ɔ bɔbɛ́á ɔwɛŋɛ́mana, a kɛaka há buɛsɛ, á ndíŋíminə ɔ uniŋə ɔ bumbə́nú na bɔsɔ́kɔ́ ikúílí tɛ́á.

¹²Ɔ taká, məə́sə má Isə́lúkú má lɛa tálátɔ́ ɔ bááyɛ́ ɔbá bá ndɔ bítíkə tɛ́nɛ́mátɔ, a ndɔ mə́búə́ mabɛ́kálɛ́na ɔ́kɔ. Mba, Isə́lúkú a bááyɛ́ lɛa ɛ́ŋɛ́mánátɔ́ ɔbá bá ndɔ bɔbɛ́á kɛa.»

¹³Ɛ́yánɛ́ nə́ə a ŋɔ bənú bɔbɛ́á kɛaka ábá nɔ ndɔ bɛ́ɔ́kɔ́lɛna ɔ buɛsɛ ɔkɛa na wə́núə́ mɔlɛ́má mukimə əə́?

¹⁴Mba, ábá nɔ ndɔ ɛmɔ́kɛ́ nyáá bɔkɔasɛ́á, nɔ ná kɛ́áká taká ɛ́sɛ́á Huɛlɛ́ a ndɔ siə, nɛhɔnɔ na bənú. Nɔ lɛ bɛndɔ kɔ́lɔ́má ɔbá bá ndɔ bənú təkəsə, nɔ lɛ bíyúkúsíníə́.

¹⁵Mba, á Kilísitusu nɔ́ ná hɔ́ánána ɔnyama ɔ uwənú mɛlɛ́má nuúmə́, wɛɛ́ya a lɛ́á yənúə́ Isə́lúkú. Nɔ ná hɔ́ánána ɔbáá bikúílí bikimə hoóyi ɔ binífúnínə́ uwíndiə ɔ busíə́ bɔ́ bááyɛ́ bəkimə ɔbá bá ndɔ bənú bata ɛlɔ́áyɛ́ yatɛ́ nɔ ná wə́núə́ mɔlɛ́má índíə́ nɔ́yɛ́ á Isə́lúkú.

¹⁶Mba, nɔ nɔ́yɛ́ kɛ́ákɛ́na ɔ buyoyoní na hibə́təniə. Nɔ́ báá na nibíkə́lə́siə nɛ́ tɛ́nɛ́mátɔ́ ɔkɛaka ɔwá, ɛsɛ́má yɛ́ bááyɛ́ itíə́ ɔbá bá ndɔ bənú sɔ́kɔ́nɛna. Bááyɛ́ tɔ́na ɔbá ba ndɔ húlə́ bənú hɔ́ɔ́ mɔbɛ́á bɔkɔasɛ́á, nɔ ndɔ ɔŋgɛna ɔ ɛnɔ́mɛ yɛɛsɛ yɛ́ Kilísitusu.

¹⁷Ɔ taká, yɛ́ lɛa muɛsɛ ɔ məsə́kə usinə ikúílí ɔ ndɔ buɛsɛ kɛa, ábá nɔ́yɛ́ yɛ́ lɛa usiə wɔ́ Huɛlɛ́, yáyɛ́na məsə́kə usinə mbá nɔ́yɛ́ ɔ ná bɔbɛ́á kɛ́áka.

¹⁸Kilísitusu wɛɛ́ya bɛ́múɛ́tɛ́ a ka ɛmɔ́kɛ́ nyááka ɛlɔ́áyɛ́ mabɛ́á ma bɛndɔ ɔsɔa, ikúílí ɛ́mɔtɛ́ ɔ bikúílí bikimə, ɔwayɛ́ ɔwá a ná báá wataká, a ka wínə ɛlɔ́áyɛ́ bakɛamabɛ́á ɔkɛaka ɔwá, a bəsú ákánána á Huɛlɛ́ busíə́. Bá ka yayɛ́á mɛɛ́lɔ ɔ́nɔ́kɔ, mba, Umbúínyi Mɔnaŋanaŋa, wɔ́ ka wɛɛ́ya huŋuəsiə.

¹⁹A ka, ákána ɔ Imbə́nú Yɛɛsɛ ɔnɔŋɔnɛna ɔ tɔtányɛ́ tɔ́ bɛndɔ ɔbá bá ná wə́kúnə ɔtɔ́á tɔ́ lɛ́á ɔ ɛbɔka.

²⁰Bááyɛ́ bəwə́nú ɔbá bá sa Huɛlɛ́ bɛ́sáŋɔ́na ɔ bikúílí ɔbɛ́á bɛ́ ná tɔmbaka. Ɔ ikúílí Nówa a ná bá ɔ lánjɛ ɔfalaba, Huɛlɛ́ a ka bá a ndɔ táta ɔwá bá ndə́fíə́kínə, bá ná mɔlɔ́á nata. Ɔmbana mɔtɛ́tɛ́á wɔ́ bɛndɔ, bánámanɛ́ ɔbánɔ́ bá ná báá ɔ lánjɛ nuúmə́, Huɛlɛ́ a ka bəə́bu nuəkəniə ɔ mənífə́.

²¹Mááyɛ́ mənífə́ má ka báá hɛŋgɛtɛ́nɛ́á hɛ́ nɛsɔa ɛ́sɛ́á Huɛlɛ́ a ndɔ tɔ́mbɛ́na niɔfɛ́nɛ ɛlɔ́áyɛ́ uwənú unuəniə. Nɛ́ɛ́yɛ́ nɛsɔa nɛ́ lɛ bá nɛ́ məhilə́ ɔsɔ́tɔ ɔ uwənú mɛɛ́lɔ, mba, nɛ́ lɛa uwinə́niə ɔwá nɔ ka Huɛlɛ́ luminə na mɔlɛ́má úmotí, a ka tɔ́mbɛ́na ɔ nɛsɔa ɛlɔ́áyɛ́ uwənú unuəniə bɔkɔasɛ́á, a ka kɛaka ɔwá Yə́susu Kilísitusu á hɔŋɔ́á ɔ ətíə́ yɛ bəwə́nú.

²²Ɛnaka á hɔŋɔ́á nɔ́yɛ́, a ná báláka ɔ nɔɔ́mɛná, a lɛa tuənə́tɔ́ ɔ mɔkátá wɔ́ bɛnɔ́mɛ wɔ́ Huɛlɛ́, ɔ ɔmɔ́tɔ́yɛ́ a ndɔ bɛáŋgɛlɛ manɛna na məndínə́ má mənjiŋə məkimə ɔmá tɔ lɛ ndɔ sinə.