Read Tunen 1 Bíə́lə 4 Bible Online

1 Bíə́lə 4 - Tunen bible

1 Bíə́lə 4

¹Ɛ́sɛ́á ikúílí Kilísitusu a ná ɛmɔ́kɛ́ nyááká ɔ ɔwayɛ́ mɛɛ́lɔ, nɔ́ ənú manyá ɔwá nɔ ŋɔ ɛmɔ́kɛ́ nyááka ɛ́sɛ́á wɛɛ́ya bɔkɔasɛ́á, wɛ́ɛ́yɛ́ ɔwá a ná ɛmɔ́kɛ́ nyááká ɔ ɔwayɛ́ mɛɛ́lɔ, a sa ndákɔ́ɛ́ná tɔ́na ɔ bɔbɛ́á.

²Ɛlɔ́áyɛ́ ikúílí ɔyɛ́á yɛ́ nɔ bənú tíkə́nə uniŋə ɔ yɛ́ɛyɛ misí, nɔ niŋə́kə́ ɛ́sɛ́á Huɛlɛ́ a ndɔ siə, nɔ lɛ niŋə́ tɔ́na ɛ́sɛ́á yənúə́ mɛɛ́lɔ yɛ́ ndɔ hikiə.

³Ɔ taká, nɔ ka ikúílí yɛ́ hɔ́ánánátɔ́ túmbə́kiə buɔnɔ́ ɔ ɔkɛa yatɛ́ ɔyɛ́á balɛmanyáhuɛlɛ́ bá ndɔ hikiə. Nɔ ka niŋəkə ɔ nɛbambɛa, ɔ bilókílókí, bohíólóhiolo, ɔ ɛmbáta yɛ ɔnɛ́á na ɔnyɛ́na buɔsɛ́ tɛ́á, na ɔ nilúbúnə nɛ́ bililí ɔbɛ́á abáka Huɛlɛ́ a lɛ hikíə́.

⁴Mba, isíŋáka, balɛmanyáhuɛlɛ́ bá lɛa ə́lə́mə́nə́tɔ́ ɛ́sɛ́á nɔ lɛ ndɔ bíndiə tɔ́na na bəə́bu ɛmbáta, ɔ yɛ́ɛ́yɛ́ ɛnya yɛ́ nibítíkə nɛbɛ́á, nɔ́yɛ́, bá ndɔ bənú kɔ́ba.

⁵Bá ŋɔ binífúnínə́ nɛ́ bíə́búə́ bɛnyɛná bikimə laaka á Huɛlɛ́ busíə́. A lɛa hoóyi ɔ bɔɔmɔ́ na bəwə́nú ukə́lə́siə.

⁶Ɔ́ ɛlɔ́áyɛ́ bááyɛ́ ɔbá bá ná wə́kúnə, ɛnaka bá bámɛ́nɛ́na ɔ misí, Huɛlɛ́ a ka bəə́bu kə́lə́səkiə ɛ́sɛ́á mɔndɔ mukimə, ɛnaka bá wə́kúnə Kilísitusu a ka ká bəə́bu Imbə́nú Yɛɛsɛ nɔŋɔnakɛna ɔkɛaka ɔwá, Umbúínyi Mɔnaŋanaŋa wɔ́ kɛ́áka ɔwá bá niŋə́kə́ ɛ́sɛ́á Huɛlɛ́ a ndɔ hikiə.

⁷Nisúki nɛ́ bɛkɔa bikimə nɛ́ lɛa hoóyi. Nɔ́ kɔbɔkɔ, nɔ́ bámɛ́nɛ́ná ɛmbɛnyɛ́ ɔkɛaka ɔwá, ata bɔkɔa bɔ́ lɛ bənú kótíə́ ɔ ɔbɛ́kálɛ́na.

⁸Ubusíə́ bɔ́ ikúílí, nɔ́ hikə́kə́níə́ mɔŋɛ́ŋa bənú na bənú bɔkɔasɛ́á, ábá ɔ ndɔ ɔsɔ́kɔ́ hikiə, abáka nibo nɛ́ hútú ɔmbana muiŋí wɔ́ máyɛ́á mabɛ́á húə́.

⁹Nɔ́ káhákáná bənú na bənú ɛŋaná ubílúlə.

¹⁰Huɛlɛ́ a ka mɔɛ́ta tɛ́á niəbə índiə, mɔɛ́ta tɛ́á á nɛ́táyɛ́ niəbə bɛ́kɛ́ákɛ́na ɛlɔ́áyɛ́ bɔsɔ́kɔ́ ɔwɔ́lɔ, ábá nɔ ndɔ kɛa nɔ́yɛ́, nɔ lɛa bɛndɔ ɔbá bá ndɔ məndínə́ má bɛkɔa bɛɛsɛ tə́tə́niə ɔbɛ́á Huɛlɛ́ a ná bənú índíə́.

¹¹Wɛ́ɛ́yɛ́ ɔwá a lɛ́á na niəbə nɛ́ ɛtambá, á bɛtambá bɛ́ Huɛlɛ́ túmbə́lə́kə́níə́, wɛ́ɛ́yɛ́ ɔwá a lɛ́á na niəbə nɛ́ bɔsɔ́kɔ́ ɔnyɛna, á iŋgínə́ bɛ́kɛ́ákɛ́ná ɔyɛ́á Huɛlɛ́ a ná wɛɛ́ya índíə́ ɔ nɔ́yɛ́ ɔkɛa. Nɔ́ kɛ́áká nɔ́yɛ́ ɔkɛaka ɔwá, bɛndɔ bəkimə bá Huɛlɛ́ nyámáka ɔ bɛkɔa ɔbánɔ́ bikimə ɔ tɔ́mbákɛna na Yə́susu Kilísitusu ɔwá a ndɔ bɛkɔa bikimə manɛna, tuúmə tukimə tɔ́ báá na wɛɛ́ya ɔ tɔɛya na tɔɛya. Nɔ́yɛ́ bɔ́ lɛ́á!

¹²Á bɛ́ámɛ́á bɛŋgɔ́áyɛ́ bɛ́ mɔlɛ́má, ata nəníə́ nɔ ndɔ məsə́kə maŋɛ́ŋa sinə, nɔ lɛ ə́lə́mə́nə, á Huɛlɛ́ a ndɔ bənú ɔ́kɔ́lɛna ɔkɛaka ɔwá, a siəlínə ábá nɔ ndɔ lumininə ɔ ɔwayɛ́, nɔ́yɛ́ yɛ́ lɛ bənú kɛ́á ɛ́sɛ́á mukiníə́nú wa bɔkɔa.

¹³Mba, nɔ́ bílə́nə́kə́ ɔbánɔ́ bɔkɔasɛ́á, nɔ ndɔ məsə́kə sinə ɛ́sɛ́á Kilísitusu a ná ayɛ́ məsə́kə siəkínə ɔkɛaka ɔwá, ɔ hinó ɔhɛ́á a ŋɔ tɔ́áyɛ́á tuúmə fə́mə́ləniə, nɔ ŋɔ báá ɔ nɛhɔnɔ na ɔ nɛyákɔ.

¹⁴Nɛhɔnɔ na bənú ábá bá ndɔ bənú kɔ́ba bɔkɔasɛ́á nɔ lɛa bɛndɔ bá Kilísitusu. Ikúílí bá ndɔ bənú kɔ́ba, Umbúínyi wɔ́ Huɛlɛ́, Umbúínyi ɔwá wɔ́ lɛ́á na tuúmə wɔ́ ndɔ tuənə na bənú.

¹⁵Yɛ́ sá hɔ́ánana ɔbáá ɔwá, ɔmɔtɛ́ ɔ uwənú ətíə́ á ɛmɔ́kɛ́ nyááká bɔkɔasɛ́á a ná mɔndɔ ɔnɔkɔ, a ná óbókó, ataná, a ná bɔkɔa buinə́buinə́ ɔ bɔbɛ́á kɛáka, ataná, a ná kə́fínə́ ɔ bɛkɔa bɛ́ bɔsɔ́kɔ́.

¹⁶Mba, ábá mɔndɔ a ndɔ məsə́kə sinə bɔkɔasɛ́á a lɛa mulumininə, a lɛ sɛma, ɔ nifəŋə á Huɛlɛ́ mohóloniə híə́níníə́ bɔkɔasɛ́á, bɛndɔ bá ndɔ wɛɛ́ya ɛ́lɛnɛna mulumininə.

¹⁷Ikúílí yɛ́ nɔ́ ndafámá ɔyɛ́á Huɛlɛ́ a ŋɔ bɛndɔ kə́lə́səkiə. A ŋɔ taŋa ɔ bɛndɔ bá yáyɛ́á ilúkunə ukə́lə́siə. Nɔ́yɛ́, ábá bikə́lə́síníə́ bɛ́ nɔ́ taŋɛna ɔ uwəsú, nəníə́ nisúki nɛ́ bááyɛ́ nɛ́ ŋɔ bámɛnɛna ɔbá bá sa lumininə ɔ Imbə́nú Yɛɛsɛ yɛ Huɛlɛ́ əə́?

¹⁸Mətilə má ndɔ laa má sɛ́á: «Ábá wataká a ndɔ məsə́kə sinə mɔŋɛ́ŋa ubusíə́ ɔbɔ́á Huɛlɛ́ á wɛɛ́ya nuəkə́níə́, nəníə́ yɛ́ ŋɔ bámɛnɛna ɛlɔ́áyɛ́ bɛndɔ babɛ́á ɔbá bá lɛ ndɔ Huɛlɛ́ ɔ́kɛ́na əə́?»

¹⁹Nɔ́yɛ́, bááyɛ́ ɔbá bá ndɔ ɛmɔ́kɛ́ nyáá bɔkɔasɛ́á bá ndɔ kɛnda ɛ́sɛ́á Huɛlɛ́ a ndɔ siə, bá ákánána ubusíə́ ɔ ɔkɛa há buɛsɛ. Bá bíndíə́ na mɔlɛ́má mukimə á Huɛlɛ́ ɔwá a ná bəə́bu tábɔ́náka. Abáka a kɛaka yatɛ́ ɔyɛ́á a ná laa.