Read Tunen 1 Bíə́lə 5 Bible Online

1 Bíə́lə 5 - Tunen bible

1 Bíə́lə 5

¹Ɔwámɛ, mɛ ndɔ máama məlíhə́ní índiə ɔ bəkúkə ɔbá bá lɛ́á ɔ uwənú ətíə́, mɛaŋɔ́á tɔ́na mukúkə, mɛ lɛa mumbóŋímboŋi wa məsə́kə má Kilísitusu. Mɛ ŋɔ nioko ɛta ɔ tuúmə tɔ́ Kilísitusu ɔ hinó ɔhɛ́á Huɛlɛ́ a ŋɔ kɛaka ɔwá, bá tɔ́táyɛ́ tuúmə siəkínə. Náana mɛ ndɔ bəə́bu lɛna.

²Nɔ́ bɛndɔ kɛndákána ɔbá Huɛlɛ́ a ná bənú índíə́, bá báka ɛ́sɛ́á hiɔ́bɔ. Nɔ́ hiítə kɛndákáná na wə́núə́ mɔlɛ́má mukimə ɛ́sɛ́á Huɛlɛ́ a ndɔ hikiə, tátá ɔ yəə́kə ɔmbáŋá, tátá na ilókí yɛ́ məndunə́ ukusənə, mba, ɛ́sɛ́á nɔ́ ná híkə́kíə́ ɔ nɔ́yɛ́ ɔ ɔkɛa.

³Nɔ lɛ síə́ ɔ bááyɛ́ ɔmámɛ́na ɔbá Huɛlɛ́ a ná bɛ́lɛ́na ɔwá nɔ bəə́bu tataka, mba, nɔ́ bámɛ́nɛ́ná iŋgətí ɛlɔ́áyɛ́ hiɔ́bɔ.

⁴Nɔ́yɛ́, ikúílí Isə́lúkú yɛ batáta a ŋɔ fámálana, a ŋɔ bənú nɛcabɛla índiə ɔnɛ́á nɛ́ ná bikimə yáyɛ́ná, nɛ́ɛ́yɛ́ nɛcabɛla nɛ́ sa ndásɔ́nɔ́á.

⁵Á bɛnɔ́kɔ́nɔkɔ, bənú tɔ́na nɔ́ bəkúkə ɔ́kɔ́kɛ́nɛ́na. Bənú bəkimə, nɔ́ bámɛ́nɛ́ná na nɛlɛaŋɛ ɔ uwənú ətíə́ ɔ bikimə ɔbɛ́á nɔ ndɔ kɛa, nɔ́ bɛ́kɔ́lɔ́mɔ́ná ɔwá, hiəfulə hɛ́ Huɛlɛ́ hɛ́ ndɔ laa hɛ́ sɛ́á: «Huɛlɛ́ a ndɔ bə́níə́mə ɛ́ŋɛ́mana, mba, a buɛsɛ kɛaka ɔ bánɛ́lɛaŋɛ.»

⁶Nɔ́yɛ́ nɔ́ báá na nɛlɛaŋɛ á Huɛlɛ́ busíə́ ɔkɛaka ɔwá, a bənú bə́lə́líə́ ɔ ikúílí ɔyɛ́á a ná tínímíə́. Wɛɛ́ya a lɛ́á winjiŋə.

⁷Nɔ́ yə́núə́ isə́hísə́hí yikimə tálɛ́ná ɔ ɔwayɛ́, ɔ taká, a ndɔ bənú sókóbiə.

⁸Nɔ́ báá ɛmbɛnyɛ́, nɔ́ bɛ́tátáká ikúílí tɛ́á! Wənúə́ mubəniə á Sátana a ndɔ bənú bɛ́nɛ́ŋɛlɛna, a ndɔ siə ɔ uwənú unənəsiə. A ndɔ bənú bɛ́nɛ́ŋɛlɛna ɛ́sɛ́á ŋguə́yi ɔyɛ́á yɛ́ ndɔ hiŋə, yɛ́ mɔndɔ siəkə unyə́ŋə́səniə.

⁹Nɔ lɛ bɛ́níása ɔ ɔwayɛ́ makátá, nɔ́ ɔ́nɛ́nɛ́na ɔ ilumininə. Nɔ́ manyá muɛsɛ ɔwá bə́núə́ bənísə́ ɔ misí ɔbánɔ́ mikimə bá lɛa ɔ yɛ́táyɛ́ ɛnya yɛ məsə́kə.

¹⁰Nɔ ŋɔ bámɛnɛna ɔ məsə́kə ɔ tɛ́tɛ́á yɛ ikúílí, mba, Huɛlɛ́ ɔwá a bɛɛ́la bɛɛsɛ bikimə bɛ́ ndɔ húlínə, ɔwá a ná bənú ɛ́lɛ́ákɛ́na ɔ tɔ́mbákɛna na Kilísitusu, a ŋɔ bənú tínímiə ɔkɛaka ɔwá, nɔ nioko ɛtá ɔ ɔwayɛ́ tuúmə. A ŋɔ bənú óníniə, a ŋɔ bənú iŋgínə́ índiə, a ŋɔ kɛaka ɔwá nɔ lɛ ndɛ́ŋɛ́lá bɔ́ányɛ.

¹¹Wɛɛ́ya a lɛ́á na nɛmanɛna ɛlɔ́áyɛ́ tɔɛya na tɔɛya. Amɛna!

¹²Á Silifɛ́nɛ ɔwá a lɛ́á ɛ́sɛ́á wamɛ á ná mɛaŋɔ́á ɔ́lɔ́ ɔ uwənú ɔ yɛ́ɛyɛ ɛkɛ́tɛ yɛ́ hiəfulə utilinə. A lɛa munísə́ ɔwá bá ná hɔ́ánána ɔ nɛkɔmba ɔtálɛ́na. Mɛ ka bənú tiləkinə ɔkɛaka ɔwá, mɛ bənú makɛ́nda índíə́, mɛ bənú mə́nyə́síə́ nəníə́ Huɛlɛ́ a ná bɛkɔa bɛɛsɛ kɛáka ɛlɔ́áyɛ́ əsú, nɔ́ yɛ́táyɛ́ ɛfɛka bɛ́ɔ́lɔ́kɛ́ná na iŋgínə́ yikimə.

¹³Ilúkunə yɛ́ bəlumininə ɔyɛ́á yɛ́ lɛ́á háha ɔ Babílono, ɔbá Huɛlɛ́ a ná tɛ́fá ɛ́sɛ́á bənú, bá ndɔ bənú bíhóliə, ata á wamɛ́á mɔná á Mə́líkusu tɔ́na a ná bənú bíhólíə́.

¹⁴Nɔ́ bíə́ŋə́lə́kə́níə́ bənú na bənú ɛ́sɛ́á baná bá ninyə́. Uwənú ɔbá nɔ lɛ́á ɔ nɛtɔana na Kilísitusu, Huɛlɛ́ á bənú bəkimə bumbə́nú índíə́!