Read Tunen 2 Bíə́lə 1 Bible Online

2 Bíə́lə 1 - Tunen bible

2 Bíə́lə 1

¹Mɛaŋɔ́á á Símono Bíə́lə á mɔnyɛna na mɔsɔ́másɔma wa Yə́susu Kilísitusu mɛ ndɔ híihi hiəfulə tilə. Mɛ ndɔ tilinə ɔ bááyɛ́ ɔbá bá lɛ́á ná ilumininə ɛ́sɛ́á bəsú, ilumininə yɛ́ lɛa bɔɔ́la bɔ́ mukunə́ mɔŋɛ́ŋa ɛlɔ́áyɛ́ ənú na ɛlɔ́áyɛ́ əsú. Á Yə́susu Kilísitusu a ná kɛ́áká nɔ́yɛ́ ɛlɔ́áyɛ́ əsú bɔkɔasɛ́á, a ndɔ bɛkɔa bikimə kɛa tɛ́nɛ́mátɔ́ ɛŋaná nifəŋə ɔháá. Wɛɛ́ya a lɛ́á yəsúə́ Huɛlɛ́ na munuəniə.

²Huɛlɛ́ á bənú buɛsɛ bɔ́ ɛŋaná iŋgətí kɛ́áka, á bənú bumbə́nú bɔ́ ɛŋaná iŋgətí índíə́ tɔ́na bɔkɔasɛ́á, nɔ lɛa bɛ́ɔ́lɔ́kɔ́kɛ́nátɔ́ á Huɛlɛ́ na Yə́susu Kilísitusu ɔ yəsúə́ Isə́lúkú.

³Ɔ taká, Isə́lúkú a ka bəsú índiə bikimə ɔbɛ́á tɔ ndɔ sɔ́ka ɔ tɔ́mbákɛna na yayɛ́á injiŋə ɔkɛaka ɔwá, tɔ niŋə́kə́ ɛ́sɛ́á Huɛlɛ́ a ndɔ hikiə. A ka bəsú ɛ́lɛakɛna a sɛ́á tɔ́ Huɛlɛ́ mányá ɔkɛaka ɔwá, na wɛɛ́ya na bəsú, tɔ niŋə́kə́ ɔ ɔwayɛ́ tuúmə bɔkɔasɛ́á, a lɛa na mɔlɛ́má muɛsɛ.

⁴Nɔ́yɛ́, a ka bəsú maasɛ má mukunə́ na mɔsɛ́ŋɛ́ mɔŋɛ́ŋa índiə ɔmá a ná bílíhə́níə́ ɔkɛaka ɔwá, má bəsú ɔ́lɔ́, ɔ tɔ́mbákɛna na maáta, nɔ́ ənú bɛ́ɔ́lɔ́ ɔ bilókílókí ɔbɛ́á yənúə́ mɛɛ́lɔ yɛ́ ndɔ siə ɔwá nɔ kɛ́áka ɔ yɛ́ɛyɛ misí, nɔ́ bá na bɔlɔŋa bɔ́ Huɛlɛ́.

⁵Ɛlɔ́áyɛ́ hítə́yí hifílí, nɔ́ ányá na yənúə́ iŋgínə́ yikimə ɔkɛaka ɔwá, nibítíkə nɛɛsɛ nɛ́ bɛ́kɔ́ndá ɔ uwənú ilumininə, bɛkɔa ɔmanya ɔbɛ́á Huɛlɛ́ a ndɔ hikiə bɛ́ bɛ́kɔ́ndá ɔ uwənú nibítíkə.

⁶Nɛbɛ́hálɛna nɛ́ mɛɛ́lɔ nɛ́ bɛ́kɔ́ndá ɔ ɔmanya wɔ́ bɛkɔa ɔbɛ́á Huɛlɛ́ a ndɔ hikiə, nindíŋíminə nɛ́ ayɛ́ bɛ́kɔ́ndá ɔ nɛbɛ́hálɛna nɛ́ mɛɛ́lɔ, uniŋə ɛ́sɛ́á Huɛlɛ́ a ndɔ siə wɔ́ ayɛ́ bɛ́kɔ́ndá ɔ nindíŋíminə,

⁷ɔ tifəkə, uhíkə́nə bənú na bənú wɔ́ bɛ́kɔ́ndá ɔ uniŋə ɛ́sɛ́á Huɛlɛ́ a ndɔ siə, nibo tɔ́na nɛ́ ayɛ́ bɛ́kɔ́ndá ɔ uhíkə́nə wɔ́ bənú na bənú.

⁸Ábá nɔ ná ɔmbana wɔ́ bɛ́táyɛ́ bɛkɔa kɛáka ɔbɛ́á mɛ nɔ́ ɛ́lɛakɛnɛna, mbá nɔ ná kɛ́áká ɔwá bɛ́ áyáka, bɛ́ ŋɔ bənú hə́hə́nəsiə ɔ buolí bɔ́ Huɛlɛ́ ɔ ɔnyɔɔ, bɛ́ ŋɔ kɛaka tɔ́na ɔwá, nɔ ákánána ɔ busíə́ ɔ ɔmanya ɛ́yánɛ́ a lɛ́á yəsúə́ Isə́lúkú á Yə́susu Kilísitusu.

⁹Ɔ taká, wɛ́ɛ́yɛ́ ɔwá a sá ɔ́ŋgɛna ɔ bɛkɔa ɔbɛ́á mɛ nɔ́ ɛ́lɛakɛnɛna, a lɛ ndɔ sinənə muɛsɛ, a lɛa ɛ́sɛ́á mundímə́ndímə. A ayɛ́ fəliə ɔwá Huɛlɛ́ a ka máyɛ́á mabɛ́á má buɔnɔ́ nəŋəsiə.

¹⁰Ɔ́ ɛlɔ́áyɛ́ nɔ́yɛ́, á bənísə́, ɛ́sɛ́á ikúílí Huɛlɛ́ a ná bənú tɛ́fá, a ná bənú ɛ́lɛ́ákɛ́na tɔ́na ɔ ɔwayɛ́ buolí ɔnyɔɔ, nɔ́ ányá ɔwɔŋgɔ ɔ yɛ́táyɛ́ ɛnɔ́mɛ, ɔ ikúílí nɔ ndɔ kɛa nɔ́yɛ́, nɔ sa ndákɔ́ɛ́na ɔ bɔbɛ́á.

¹¹Nɔ́yɛ́, Huɛlɛ́ a ŋɔ bənú hɛkɔ́kɛ kuninə hikimə ɔkɛaka ɔwá nɔ fínə́ ɔ ɔwayɛ́ Nɛmanɛna, ɔ Nɛmanɛna nɛ́ ikúílíə́kimə nɛ́ yəsúə́ Isə́lúkú na Munuəniə á Yə́susu Kilísitusu.

¹²Ɔ́ ɛlɔ́áyɛ́ nɔ́yɛ́ mɛ lɛ́á na ilókí ɔ uwənú ɔ bɛ́táyɛ́ bɛkɔa ɔbɛ́kɔ́lɔmɔnɛna ikúílí tɛ́á, ata nɔ́yɛ́ ɛ́sɛ́á nɔ ndɔ bɛɛ́ta manya buɔnɔ́, nɔ lɛa tɔ́na bɛ́ɔ́lɔ́kɔ́kɛ́nátɔ́ ɔ taká ɔyɛ́á bá ná bənú úkúnə́kíə́.

¹³Mba, mɛ ndɔ fɛka ɔwá, yɛ́ lɛa taká ɛlɔ́áyɛ́ ámɛ, ikúílí ɔyɛ́á mɛ nalɛ́á ɔ buɔmɔ́, mɛ ndɔ bənú bɛ́ɛ́yɛ́ bɛkɔa bɛ́kɔ́lɔmɔnɛna ɔkɛaka ɔwá, nɔ báá ɛmbɛnyɛ́.

¹⁴Mɛ ndɔ manya muɛsɛ ɔwá, ikúílí yɛ́ lɛa hoóyi ɔyɛ́á ɛkasɛ mɛ yɛ́ɛyɛ misí tikə. Á yəsúə́ Isə́lúkú á Yə́susu a ná mɛaŋɔ́á nɔ́yɛ́ mə́nyə́síə́.

¹⁵Mba, mɛ ŋɔ kɛaka ɔ məndínə́ məkimə ɔwá, ata mɛ lɛa wə́ə́tɔ́, nɔ ŋɔ bá nɔ ndɔ bɛ́ɛ́yɛ́ bɛkɔa bɛ́kɔ́lɔmɔna ikúílí tɛ́á ɔbɛ́á mɛ ná bənú lákɛ́na.

¹⁶Ɔ taká, tɔ ka bənú lakɛna nəníə́ yəsúə́ Isə́lúkú á Yə́susu Kilísitusu a ná kɛ́áka ɔwá bá injiŋə yɛ tɔ́áyɛ́á tuúmə siəkínə, tɔ sa bənú nɔ́yɛ́ lɛna ɔ tɔ́mbákɛna na tɔŋanáŋana ɔtɔ́á bá ná kɛ́káká bɔkɔasɛ́á, na mə́súə́ məə́sə tɔ́ ná wɛɛ́ya siəkínə ɔ ɔwayɛ́ tuúmə.

¹⁷Ikúílí Huɛlɛ́ á Isə́ a ná wɛɛ́ya bə́tíə́, a ná wɛɛ́ya tuúmə índíə́ tɔ́na, bá ka nióni nɛ́ Huɛlɛ́ ɔ́kɔ́ á muití tuúmə nɛ́ ndɔ wɛɛ́ya lɛna nɛ́ sɛ́á: «Wɔ́ɔwɔ a lɛa wamɛ́á Mɔná wuhikiə, ɔ ɔwayɛ́ mɛ́ ná tɛfa, a ndɔ mɛaŋɔ́á nɛhɔnɔ itiəsiə.»

¹⁸Bəsú bɛ́múɛ́tɛ́, tɔ ka nɛ́táyɛ́ nióni ɔ́kɔ́kɛna ɔnɛ́á nɛ́ ná húlínə́ ɔ nɔɔ́mɛná, ɛnaka tɔ báá ɔ ɔmáá mɔnaŋanaŋa ɔmbáŋá na Yə́susu.

¹⁹Ɔ ɔyáyɛ́na nɔ́yɛ́, ɛtambá yɛ́ bɔhɛ́nátɔtányɛ́ yɛ́ lɛa ɔ́nɔ́kɛ́nátɔ, nɔ ná hɔ́ánána ɔ yɛɛ́ta uluminə tɔ́na. Nɔ́ mə́núə́ məə́sə tálá umə́ ɛ́sɛ́á abáka nɔ isəmú siəkinə ɔ ətíə́ yɛ tubíndindíə́. Nɔ́ lumínə́ ɔkafámáká ɔwá hisənji ɔhɛ́á hɛ́ ndɔ siísíə́ mənyəsiə hɛ́ fámálána ɔ uwənú mɛlɛ́má. Nɔ́yɛ́ mbá nɔ ŋɔ niŋə́kə́ ətíə́ yɛ isəmú ɔkafámáká ɔ ɔyáá, hisənji tɔ́na hɛ́ ná hɔ́ánána ɔnɔma ɔ uwənú mɛlɛ́má.

²⁰Ubusíə́ bɔ́ bɛkɔa bikimə, nɔ́ náana manyá muɛsɛ ɔwá, ata mɔndɔ a sa ósó ɔ bɛtambá unífúnə na yayɛ́á ɛmanya ɔbɛ́á bɔhɛ́nátɔtányɛ́ bá ná laáka ɔ hiəfulə hɛnaŋanaŋa.

²¹Ɔ taká, yatɛ́ ɔyɛ́á bɔhɛ́nátɔtányɛ́ bá ná laáka yɛ́ ndɔ húlínə na ɛfɛka yɛ́ bɛndɔ, mba, Umbúínyi Mɔnaŋanaŋa wɔ́ ná bá wɔ́ ndɔ kɛa ɔwá, bɛndɔ bá bɛtambá bɛ́ Huɛlɛ́ fə́mə́lə́kə́níə́.