Read Tunen 2 Bíə́lə 2 Bible Online

2 Bíə́lə 2 - Tunen bible

2 Bíə́lə 2

¹Bɔhɛ́nátɔtányɛ́ bá bɛkanja bá ka bámɛnɛna buɔnɔ́ ɔ ətíə́ yɛ ilúkunə yɛ́ Ísilahɛ́lɛ. Hɔ́ánánátɔ́, bəkúniə bá bɛkanja bá ɛtambá yɛ́ Huɛlɛ́ bá ŋɔ fámálakana ɔ uwənú ətíə́. Bá ŋɔ bɛndɔ bilə́líə́ bɛ́ bɛkanja úkúnəkiə, bá ŋɔ bɛndɔ úkúnəkiə tɔ́na ɔwá, bá Isə́lúkú bɛ́sáŋɔ́ná mbá nɔ́yɛ́ a ná bəə́bu háŋɔ́ná tɔ́na. Nɔ́yɛ́, bá ŋɔ bunímə́ bísúə́kinə ɔbɔ́á bɔ́ ŋɔ ndafámá həmə́tu.

²Bɛndɔ bəəŋí bá ŋɔ ɔŋgɔkɔ ɔ uwəbú ɛnɔ́mɛ yɛbɛ́á, ɛlɔ́áyɛ́ əbú, bɛndɔ bá ŋɔ ɛnɔ́mɛ yɛ́ Huɛlɛ́ kɔ́báka ɔyɛ́á yɛ́ lɛ́á yɛ́ taká.

³Bááyɛ́ bəkúniə bá bɛkanja bá ŋɔ bənú lakɛna yatɛ́ ɔyɛ́á yɛ́ lɛ bá taká ɔkɛaka ɔwá, bá bíə́núə́ bɛɛ́la ɔ́lɔ́kɛna bɔkɔasɛ́á bá ndɔ məndunə́ hikiə. Mba Huɛlɛ́ a ka bəə́bu kə́lə́səkiə buɔnɔ́ ɔ nindínə́ ɔnɛ́á, tɛ́tɛ́á yɛ ikúílí bá ŋɔ fíə́kinə ɔ məsə́kə ɔmá má sa ndáhɔa.

⁴Ɔ taká, bɛáŋgɛlɛ ɔbá bá ná kɔ́á ɔ bɔbɛ́á, Huɛlɛ́ a sa bəə́bu mahana wə́ə́. Mba, a ka bəə́bu nyɛkɛna ɔ hianyaka hɛ́ məsə́kə ɔ ibínə́binə nuúmə́, a ka bəə́bu hɔkɛna ɔ mɛsáŋa ɛlɔ́áyɛ́ hinó hɛ́ bikə́lə́síníə́ ɔtáta.

⁵Bɛndɔ bá misí yɛ buɔnɔ́ bá ka kɔa ɔ bɔbɛ́á, Huɛlɛ́ a sa bəə́bu mahana wə́ə́. Mba, a ka mulumə mɔŋɛ́ŋa kuəsiə ɔwá wɔ́ ná bááyɛ́ bɛndɔ babɛ́á hɔmbɛ́na: Ɔ́maná á Nówa ɔwá a ná bá a ndɔ taká nɔŋɔna ɔyɛ́á Huɛlɛ́ a ndɔ siə, na bɔ́mɔtɛ́ bɛndɔ bálɛ́ndɔ́lɔ́mɔnɔ a ná mahana wəə.

⁶Huɛlɛ́ a ka bətínə́ yɛ Sótomo na Kɔmɔ́lɔ hɔkɛna, a ná bátáyɛ́ lúə́ŋə́kíə́, mɔlɔ́ wɔ́ ná tikənə, ɔ tɔ́mbákɛna na nɔ́yɛ́, a ka hɛŋgɛtɛ́nɛ́á ínə́niə ɔ yatɛ́ ɔyɛ́á yɛ́ ŋɔ nda bakɛamabɛ́á bəkimə famɛna.

⁷Mba, a ka Lóto ɔ wataká háŋɔ́na ɔwá a ná bá a ndɔ bísə́kə́lə ɔwɔŋgɔkɔnɔ na nibítíkə nɛ́ mɔnyɔ́kɔ́lɛ́ nɛ́ bááyɛ́ bɛndɔ.

⁸Ɔ taká, wɛ́ɛ́yɛ́ mɔndɔ wataká ɔwá a ná bá a ndɔ niŋə ɔ uwəbú ətíə́, a ka bɛkɔa bɛbɛ́á siəkinə, a ná bɛtambá ɔ́kɔ́kɛ́ná tɔ́na ɔbɛ́á bɛ́ ná bá bɛ́ ndɔ fáma ɔ uwəbú munuə. Ɛ́sɛ́á a ná báá wataká, buɔsɛ́ na buɔsɛ́ tɛ́á, a ka bá a ndɔ mə́búə́ malɔŋa mabɛ́á sinə, má ka bá má ndɔ wə́yíə́ mɔlɛ́má tuŋulə.

⁹Nɔ́yɛ́ yɛ́ ndɔ ínə́niə ɔwá, Isə́lúkú a ndɔ manya nəníə́ á bááyɛ́ hutúnə ɔbá bá lɛ́á bɛ́ɔ́lɔ́kɔ́kɛ́nátɔ́ ɔ ɔwayɛ́ ɔ ikúílí yɛ́ ɛmɔ́kɛ́, nəníə́ tɔ́na a bááyɛ́ bákɛ́á ɔbá bá ndɔ bɔbɛ́á kɛa ɔkɛaka ɔwá, a bəə́bu sɔ́kɔ́tɛ́á ɔ hinó hɛ́ bikə́lə́síníə́.

¹⁰Ɔ hítə́yí hinó, a ŋɔ bááyɛ́ sɔ́kɔ́tɛa ɔbá bá ndɔ bɛkɔa bɛbɛ́á kɛa ɔbɛ́á yəbúə́ mɛɛ́lɔ yɛ́ ndɔ hikiə, bá ndɔ nɛmanɛna nɛ́ Huɛlɛ́ yəniə. Bátáyɛ́ bəkúniə bá bɛkanja bá lɛa na niə́mə, bá ndɔ bɛ́lɛ́áŋɔna, bá lɛ kɔ́lɔ́má ɔ bɛbɔ́tɛ́ná bɛ́ nɔɔ́mɛná ɔbɛ́á bɛ́ lɛ́á na tuúmə ɔkɔ́ba.

¹¹Bɛáŋgɛlɛ bá ná bəə́bu yáyɛ́ná ɔ iŋgínə́ na injiŋə, mba abáka bá lɛ bɛ́ɛ́yɛ́ bɛbɔ́tɛ́ná sɔ́mɛ́na, mbá ata uwəbú ɔkɔ́ba ɔ busíə́ bɔ́ Isə́lúkú.

¹²Mba, bááyɛ́ bɛndɔ bá ndɔ bítíkə ɛ́sɛ́á mɛnyama yɛ́ ɛmbɔ́ma. Ikúílí yɛ́ ná kɔmá, bá mɛɛ́ta ɔ́nɔ. Bá ndɔ kɔ́ba yatɛ́ ɔyɛ́á bá lɛ ndɔ manya, bá ŋɔ bəə́bu ɔ́nɔ́kɔ ɛ́sɛ́á mɛnyama yɛ́ ɛmbɔ́ma.

¹³Nɔ́yɛ́, bá ŋɔ mɔsábɔ́náná kusənə ɛlɔ́áyɛ́ bɔbɛ́á bukimə ɔbɔ́á bá ná kɛ́áka. Bá lɛa na nɛhɔnɔ ɔ uwəbú bilókílókí ɔsɔ́mba ɔ ɛnjaŋɛnjaŋɛ yɛ buɔsɛ́. Ikúílí nɔ ndɔ nɛ́á na bəə́bu, ba ndɔ bənú ɛsɛ́má háá ɔ mɛɛ́lɔ na bíə́búə́ bɛkanja, bá ndɔ bənú tífílə.

¹⁴Mə́búə́ məə́sə má lɛa úndúə́tɔ́ na bilókílókí bɛ́ nilókóno, bá sa ndəsúkə́ ɔ bɔbɛ́á ɔ ɔkɛa, bá bɛndɔ bá tɔ́mbɔ́kɔ́tɔ́ halɛakɛna ɔ uwəbú bɛtambá. Wə́búə́ mɔlɛ́má wɔ́ lɛa ɔbánɔ́ ɛlɔ́áyɛ́ bɛndɔ unímbə mbá bá mɔnɛ́á kusə́nə. Huɛlɛ́ a ŋɔ bəə́bu indimisi lɔ́mɛ́na.

¹⁵Bá ka ɛnɔ́mɛ yɛ́ tɛ́nɛ́mátɔ́ niasa, bá ná nanaka, bá ná ɛ́tá á ɛnɔ́mɛ yɛ́ Bálama á mɔná wa Bɔsɔlɔ. A ka hikəkiə á məndunə́ ɔmá bá ná báá bá ndɔ wɛɛ́ya índiə ɛlɔ́áyɛ́ bɔbɛ́á ɔkɛa.

¹⁶Mba, Huɛlɛ́ a ka wɛɛ́ya kɛ́kɛ́lakɛna ɛlɔ́áyɛ́ bɔ́táyɛ́ bɔbɛ́á. A ka kɛaka ɔwá ilínə yɛ́ ɛnjakásɛ á mɛnyama ɔyɛ́á abáka yɛ́ lɛ hɔ́ɔ́, yɛ́ wɛɛ́ya hɔ́kɛ́ná na nióni nɛ́ mɔndɔ ɔkɛaka ɔwá, Bálama a lɛ bɛkɔa bɛ́ nyəkə́ kɛ́á na ɔlaa a sɛ́á a lɛa mɔhɛ́nátɔtányɛ́.

¹⁷Bááyɛ́ bɛndɔ bá lɛa ɛ́sɛ́á tɔnyɔ́nyɔ tɔ́ sáátɔ, ɛ́sɛ́á bɛlɔndɔ́ ɔbɛ́á ɛbɔ́lábɔ́lá yɛ́ ndɔ húlə́ nyɛkɛna. Huɛlɛ́ a ka bəə́bu ɛbɔ́ka tábɔ́nakɛna ɔ ətíə́ yɛ ibínə́binə yɛ́ ndamánamana.

¹⁸Ɔ taká, bá ndɔ bíbə́liə na bɛtambá bɛŋɛ́ŋa mbá nɔ́yɛ́ bíə́búə́ bɛtambá bɛ́ lɛ́á ndəmə, bá ndɔ bɛndɔ nímbə ɔbá bá nɔ́ húlə ɔ ɔbɛ́álɔ́na na bááyɛ́ ɔbá bá ndɔ Huɛlɛ́ manya, bá ndɔ bəə́bu bɛkɔa bɛ́ ɛsɛ́má úkúniə, bɛkɔa tɔ́na ɔbɛ́á yəbúə́ mɛɛ́lɔ yɛ́ ndɔ hikiə.

¹⁹Bá ndɔ bəə́bu bílíhə́niə ɔwá, bá lɛa na kuənjə ɔ ɔkɛa yatɛ́ ɔyɛ́á bá ndɔ hikiə, mbá nɔ́yɛ́ bá lɛ́á bəə́bu bɛ́múɛ́tɛ́ batɛká bá bɔbɛ́á. Ɔ taká, abáka mɔndɔ a báá mɔtɛká wa yatɛ́ ɔyɛ́á yɛ́ ndɔ wɛɛ́ya lɛmɛna.

²⁰Ɔ taká, ábá bɛndɔ bá lɛa na nɛkɔmba tálɛ́nátɔ́ á yəsúə́ Isə́lúkú ná Munuəniə á Yə́susu Kilísitusu; mbá bá ná fámá ɔ bɛkɔa ɔbɛ́á bɛ́ ndɔ bəə́bu tífílə ɔ yɛ́ɛyɛ misí, bá ná bɛ́níása ɔwá bɛ́ɛ́yɛ́ bɛkɔa bɛ́ ndáhíáná ɔ uwəbú mɔlɛ́má, wə́búə́ ɔbáá wɔ́ ŋɔ báá mɔbɛ́á yáyɛ́ná wúbúsíə́.

²¹Yɛ́ ka bá na mɔsɛ́ŋɛ́ ɛlɔ́áyɛ́ əbú ɔwá, bá lɛ ɛnɔ́mɛ yɛ́ taká fúnúnə, yáyɛ́na ɔwá bá yɛɛ́ta manyá, bá yɛɛ́ta niasa, əlimə yɛ ikúílí, bá Ɛtambá yɛ́ Huɛlɛ́ bɛ́sáŋɔ́ná ɔwá bá ná bəə́bu túmbə́lə́níə́.

²²Yatɛ́ ɔyɛ́á yɛ́ ná nda bəə́bu fámɛ́ná, yatɛ́ ɔyɛ́á ɔŋana wɔ́ ndɔ laa wɔ́ sɛ́á: «Ɛmɔ́á yɛ́ nɔ́ kahíáná ɔ ɔwayɛ́ tuənyəki ɔnɛ́á.» Ataná: «Mɛkɔnɛ́fɛ́ yɛ́ bɛ́sɔ́áka, yɛ́ kahíáná ɔ ɔbɛ́njɔ́kɔtɔ ɔ ɔndiɔbɛ.»