Read Tunen 2 Bíə́lə 3 Bible Online

2 Bíə́lə 3 - Tunen bible

2 Bíə́lə 3

¹Á bɛ́ámɛ́á bɛŋgɔ́áyɛ́, ɔ́ tuəfulə tɔ́ ná úndúsíníə́ tɔ́fandɛ́ tɔ́ɔtɔ mɛ ndɔ bənú tilinə. Ɔ ətíə́ yɛ tɔ́ɛ́yɛ́ tuəfulə tɔ́fandɛ́, mɛ ka siəkə ɔwá mɛ yə́núə́ ɛbɛ́kɔ́lɔmɔna hunyíə́ ɔkɛaka ɔwá, nɔ bílúmíníə́ muɛsɛ yatɛ́ ɔyɛ́á mɛ ná bənú lákɛ́na.

²Mɛ lɛa na ilókí ɔwá nɔ bɛtambá bɛ́kɔ́lɔ́mɔ́na ɔbɛ́á bɔhɛ́nátɔtányɛ́ bá Huɛlɛ́ a ná lɔ́má, bá ná fə́mə́lə́níə́ ɔ yɛ́táyɛ́ ikúílí kokóóko, Umbə́ndə́ wɔ́ Isə́lúkú na Munuəniə tɔ́na ɔwá bə́núə́ basɔ́másɔma bá ná bənú tikinə.

³Nɔ́ manyá ubusíə́ bɔ́ ikúílí ɔwá, ɔ tunó tɔ́ nitifə́, bɔ́mɔtɛ́ bɛndɔ bá ŋɔ ndafama, bá ŋɔ kɛaka yatɛ́ ɔyɛ́á yəbúə́ mɛɛ́lɔ yɛ́ ndɔ hikiə, bá ŋɔ bənú njɛkɛlakɛna.

⁴Bá ŋɔ bənú lakɛna bá sɛ́á: «Tátá Yə́susu a ka bílíhə́niə ɔwá a ŋɔ ndahíáná əə́? Hə́níə́ a lɛ́á əə́? Bíə́súə́ bisə́ ba nɔ́ hɔ́á ɔ uwə́ə́, bɛkɔa bikimə bɛ́ nabáka ɔ́maná ɛ́sɛ́á bɛ́ ná bámɛ́nɛ́na ɔ ikúílí ɔyɛ́á Huɛlɛ́ a ná misí bɔta.»

⁵Bá ndɔ náana fəliə ɔ tɔŋɔ́ ɔwá, ɔ hata yɛ ikúílí, Huɛlɛ́ a ka nɔɔ́mɛná na misí bɔ́ta ɔ tɔ́mbákɛna na yáyɛ́á ɛtambá. A ka misí ə́lúnəniə na mənífə́, bɛɛ́la bikimə bɛ́ booko nyɔnɔ na mənífə́.

⁶Huɛlɛ́ a ka misí yɛ buɔnɔ́ nímə́siə tɔ́na ɔ tɔ́mbákɛna na mənífə́. Mátáyɛ́ mənífə́, ɔ́ mulumə mɔŋɛ́ŋa ɔwá wɔ́ ná fɛ́ndáka.

⁷Ɔwɔŋgɔkɔnɔ misí na nɔɔ́mɛná yɛ isíŋánána, yɛ́táyɛ́ Ɛtambá ɛ́mɔtɛ́ yɛ́ Huɛlɛ́ yɛ́ ndɔ laa yɛ́ sɛ́á, hiwə hɛ́ ŋɔ bɛɛ́ta nímə́síə́. Huɛlɛ́ a ŋɔ bɛɛ́ta hóyokiə ɔkafámáká ɔ hinó ɔhɛ́á a ŋɔ bɛndɔ kə́lə́səkiə, a bááyɛ́ nímə́síə́ tɔ́na ɔbá bá lɛ ndɔ wɛɛ́ya ɔ́kɛ́na.

⁸Á bɛ́ámɛ́á bɛŋgɔ́áyɛ́, bɔkɔa bɔ́ lɛa bɔ́mɔtɛ́ ɔbɔ́á nɔ sá hɔ́ánana ufəliə: Ɛlɔ́áyɛ́ Isə́lúkú, hinó hímotí hɛ́ lɛa ɛ́sɛ́á hikóló hɛ́ tuɔŋɔ, hikóló hɛ́ tuɔŋɔ ɛ́sɛ́á hinó hímotí.

⁹Isə́lúkú a lɛ bá yɛ́nátɔ́ ɔ ɔwayɛ́ nɛkaka uwundúsiniə ɛ́sɛ́á bɔ́mɔtɛ́ bá ndɔ əbú fɛka. Mba, a ndɔ bɛkɔa bikimə kɛa tɛ́tɛ́á na tɛ́tɛ́á ɛlɔ́áyɛ́ ənú bɔkɔasɛ́á, a lɛ ndɔ hikiə ɔwá ata mɔndɔ ɔmɔtɛ́ á niminə, ɔ nifəŋə, a siəkə ɔwá bəkimə bá ikúílí yámá yɛ́ mɔlɛ́má ɔkɔ́ŋɔ́na.

¹⁰Nɔ́yɛ́, hinó ɔhɛ́á Isə́lúkú a ŋɔ ndahíáná, a ŋɔ húlə ɛ́sɛ́á muíbi. Ɔ hítə́yí hinó, nɔɔ́mɛná yɛ́ ŋɔ luluməkə yɛ́ nyɔ́á mbasɛ́á, hiwə hɛ́ ŋɔ bikimə sə́sə́məkiə ɔbɛ́á bɛ́ lɛ́á umə́, misí na yatɛ́ yikimə ɔyɛ́á yɛ́ lɛ́á ɔmɔ́tɔ́yɛ́ bɛ́ sɔ́ ŋɔ bámɛnɛna tɔ́na.

¹¹Ɛ́sɛ́á ikúílí bɛ́ɛ́yɛ́ bikimə bɛ́ ŋɔ nímínə ɔ nɛ́táyɛ́ nindínə́, nɔ́yɛ́ yɛ́ ndɔ bənú lɛna nəníə́ nɔ ná hɔ́ánáná ɔ ubítíkə. Nɔ́ bítíkə́kə́ ɛ́sɛ́á Huɛlɛ́ a ndɔ hikiə, nɔ́ wɛɛ́ya ɔ́kɔ́kɛ́nɛ́na ɔ bɛkɔa ɔbánɔ́ bikimə.

¹²Uwənú, nɔ ndɔ táta ɔwá hinó hɛ́ Huɛlɛ́ hɛ́ ndáfama, nɔ ndɔ hikiə ɔwá hɛ́ hútú ndafama, ɔ hítə́yí hinó, hiwə hɛ́ ŋɔ nɔɔ́mɛná sə́sə́məkiə, bikimə ɔbɛ́á bɛ́ lɛ́á umə́, bɛ́ ŋɔ lɔ́áŋaka.

¹³Tɔ ndɔ nɔɔ́mɛná na misí miɔ́sɔ táta ɔyɛ́á Huɛlɛ́ a ná bílíhə́níə́, ɔ ɛbɔ́ka ɔyɛ́á bɛndɔ bá ndɔ niŋə na taká mikimə.

¹⁴Á bɛ́ámɛ́á bɛŋgɔ́áyɛ́ bɛ́ mɔlɛ́má, ɔ́ ɛlɔ́áyɛ́ nɔ́yɛ́, ɔ bɛtátɛ́ná bɛ́ hítə́yí hinó, nɔ́ iŋgínə́ háá ɔkɛaka ɔwá búə́núə́ buɔmɔ́ bɔ́ báá naŋátɔ, ɛŋaná hɛkabalɛ á Huɛlɛ́ busíə́, nɔ́ bámɛ́nɛ́ná tɔ́na ɔ bumbə́nú na wɛɛ́ya.

¹⁵Nɔ́ manyá ɔwá, yəsúə́ Isə́lúkú a sɔ́ ŋɔ hútú ndahíáná nɔ́yɛ́ ɔkɛaka ɔwá, a bənú ikúílí índíə́ ɛlɔ́áyɛ́ uwənú unuəniə. Ɔ́ ɛ́lɔ́áyɛ́ nɔ́yɛ́, á wəsúə́ munísə́ na ɛŋgɔ́áyɛ́ á Báwolo a ndɔ bənú tilinə na ɛmanya ɔyɛ́á Huɛlɛ́ a ná wɛɛ́ya índíə́ ɔwá a bənú nɔ́yɛ́ lákɛ́na.

¹⁶Ɔ́ nɔ́yɛ́ tɔ́ná a ná tílə́kə ɔ ɔwayɛ́ tuəfulə tukimə, ɔ ikúílí a ndɔ hɛ́na ɔwɔŋgɔkɔnɔ na nɔ́yɛ́. Bɛ́mɔtɛ́ bɛsalɛ bɛ́ báka umə́ ányákátɔ́ ɔ ɔwɔ́kɔ, bɛála bɛ́ bɛndɔ na bɔ́mɔtɛ́ ɔbá bá sa ɔ́kɔ́na, bá ndɔ bɛtambá nífə, ɛ́sɛ́á bá ndɔ kɛa ɔ bɛ́mɔtɛ́ bɛbɔ́ka ɔ Mətilə má Huɛlɛ́. Bəə́bu bɛ́muɛ́tɛ́ bá ndɔ indimisi yɛ Huɛlɛ́ bísúínə.

¹⁷Mba, uwənú ɔ bɛ́ámɛ́á bɛŋgɔ́áyɛ́ bɛ́ mɔlɛ́má, isíŋáka ɔwá bá ná bənú ókósíə́, nɔ manyaka, nɔ lɛ bɛ́níása ɔwá, bɛndɔ ɔbá bá lɛ ndɔ Huɛlɛ́ ɔ́kɛ́na bá bənú nə́nə́síə́, bəə́bu bɛ́múɛ́tɛ́ bá lɛa nanákátɔ. Nɔ lɛ bɛ́níásá nɔ sɛ́á bá kɛ́áka nɔ́ tɔkɔ́nɔ́á ɔ ɛbɔ́ka yɛɛsɛ ɔyɛ́á nɔ lɛ́á.

¹⁸Mba ɔ nifəŋə, nɔ́ bámɛ́nɛ́ná bikúílí bikimə ɔ yəsúə́ Isə́lúkú na Munuəniə á Yə́susu Kilísitusu ɔmanya ɔkɛaka ɔwá, a bənú buɛsɛ kɛ́áka. Tuúmə tɔ́ báá na wɛɛ́ya isíŋáka na ɔ bikúílí bikimə. Amɛna!