Read Tunen 1 Yɔhánɛsɛ 2 Bible Online

1 Yɔhánɛsɛ 2 - Tunen bible

1 Yɔhánɛsɛ 2

¹Á bámɛ́á baná, mɛ ndɔ bənú tilinə ɔkɛaka ɔwá nɔ lɛ bɔbɛ́á kɛ́á tɔ́na. Mba, ábá ɔmɔtɛ́ ɔ uwənú ətíə́ a ná kɔ́ɛ́na ɔ bɔbɛ́á, tɔ báka na mubísúmbə́niə ɔmɔtɛ́ á Isə́ busíə́, á Yə́susu Kilísitusu, ɔ wataká.

²A lɛa mɔndɔ ɔwá a ná bɛ́hánɛ́na ɛlɔ́áyɛ́ nɛnɛasɛna nɛ́ mə́súə́ mabɛ́á, tátá ɔ́maná ɛlɔ́áyɛ́ mə́su bíbúə́, mba, tɔ́na ɛlɔ́áyɛ́ má nɛmɔndɔ mukimə.

³Ábá tɔ ndɔ imbə́ndə́ yɛ́ Huɛlɛ́ tə́tə́niə, tɔ óso ɔwɛmɛ́nɛna ɔwá tɔ ndɔ wɛɛ́ya manya.

⁴Wɛ́ɛ́yɛ́ ɔwá a ndɔ laa a sɛ́á: «Mɛ ndɔ wɛɛ́ya manya», mbá a lɛ ndɔ yə́yíə́ imbə́ndə́ tə́tə́niə, a lɛa mɔkanjakanja, taká yɛ́ lɛ bá tɔna ɔ ɔwayɛ́ mɔlɛ́má.

⁵Mba, wɛ́ɛ́yɛ́ ɔwá a ndɔ ɔ́kɛ́na hɔ́ánánátɔ́ ɔ ɔwayɛ́ Ɛtambá, a ndɔ Huɛlɛ́ hikiə taká ɔ ɔyáyɛ́na. Ɔ́ nɔ́yɛ́ tɔ ná hɔ́ánana ɔkɛa ɔkɛaka ɔwá, mbá tɔ́ manya tɔ sɛ́á tɔ lɛa tɔanátɔ́ na Huɛlɛ́.

⁶Wɛ́ɛ́yɛ́ ɔwá a ndɔ bɛ́laa ɔwá, a lɛa tɔanátɔ́ na Huɛlɛ́, a ná hɔ́ánána ɔwɔŋgɛna ɔ ɛnɔ́mɛ ɔyɛ́á Yə́susu a ná kɛ́ndáka.

⁷Á bɛ́ámɛ́á bɛŋgɔ́áyɛ́ bɛ́ mɔlɛ́má, tátá umbə́ndə́ muɔ́sɔ mɛ ndɔ bənú tilinə, mba, umbə́ndə́ wɔ́ buɔnɔ́ ɔwá nɔ ndɔ manya hata yɛ ikúílí ɔyɛ́á nɔ ná bótólíə́ ɔ Imbə́nú Yɛɛsɛ ɔwɔ́kɔ. Wútə́yí umbə́ndə́ wɔ́ buɔnɔ́, ɔ́ ɛtambá ɔyɛ́á nɔ ndɔ ɔ́kɔ ikúílí tɛ́á.

⁸Mba, yatɛ́ ɔyɛ́á mɛ ndɔ bənú tilinə yɛ́ lɛa ɛ́sɛ́á umbə́ndə́ muɔ́sɔ, nibítíkə nɛ́ Yə́susu Kilísitusu nɛ́ ndɔ ínə́niə ɔwá, wííyí umbə́ndə́ wɔ́ lɛa taká, níə́núə́ nibítíkə nɛ́ ndɔ nɔ́yɛ́ ínə́niə tɔ́na bɔkɔasɛ́á, ibínə́binə yɛ́ nɔ́ tɔ́mba, tiísi yɛ isəmú yɛ́ ndɔ nɔma.

⁹Ábá mɔndɔ a ndɔ bɛ́laa ɔwá, mɛ ndɔ niŋə ətíə́ yɛ isəmú, mbá a ndɔ wayɛ́á munísə́ bánya, muití a nabáka ɔ ətíə́ yɛ ibínə́binə.

¹⁰Wɛ́ɛ́yɛ́ ɔwá a ndɔ wayɛ́á munísə́ hikiə a lɛa ətíə́ yɛ isəmú, bɔkɔa bɔ́ lɛ bá ɔbɔ́á bɔ́ óso ɔ ɔwayɛ́ ukuəsiə.

¹¹Mba, wɛ́ɛ́yɛ́ ɔwá a ndɔ wayɛ́á munísə́ bánya, a lɛa ɔ ibínə́binə nuúmə́, a ndɔ kɛnda ɔ ibínə́binə, a lɛ ndɔ ɛbɔ́ka manya ɔyɛ́á a nɔ́ ákáná bɔkɔasɛ́á, ibínə́binə yɛ́ ná wɛɛ́ya indímə́ lumə.

¹²Á bámɛ́á baná, mɛ ndɔ bənú nɔ́yɛ́ tilinə ɔkɛaka ɔwá mɛ bənú lɛ́ná mɛ sɛ́á: «Huɛlɛ́ a ka tɔ́mbɛ́na na Yə́susu kilísitusu ɔkɛaka ɔwá a bənú mə́núə́ mabɛ́á nɛasɛna.»

¹³Á bɛ́ámɛ́á bisə́, mɛ ndɔ bənú nɔ́yɛ́ tilinə ɔkɛaka ɔwá mɛ bənú lɛɛ́ná mɛ sɛ́á: «Nɔ ndɔ wɛ́ɛ́yɛ́ manya ɔwá a ná bámɛ́nɛ́na ubusíə́ ɔbɔ́á Huɛlɛ́ a misí bɔta.» Uwənú á muánja, mɛ ndɔ bənú tilinə ɔkɛaka ɔwá mɛ bənú lɛ́ná mɛ sɛ́á: «Nɔ ka Sátana nɔba.»

¹⁴Á bámɛ́á baná, mɛ ndɔ bənú nɔ́yɛ́ tilinə ɔkɛaka ɔwá mɛ bənú lɛ́ná mɛ sɛ́á: «Nɔ ndɔ Huɛlɛ́ á Isə́ manya.» Á bisə́, mɛ ndɔ bənú nɔ́yɛ́ tilinə ɔkɛaka ɔwá mɛ bənú lɛ́ná mɛ sɛ́á: «Nɔ ndɔ wɛ́ɛ́yɛ́ manya ɔwá a ná bámɛ́nɛ́na ubusíə́ ɔbɔ́á Huɛlɛ́ a misí bɔta.» Ɔ uwənú á muánja, mɛ ndɔ bənú nɔ́yɛ́ tilinə ɔkɛaka ɔwá mɛ bənú lɛ́ná mɛ sɛ́á: «Nɔ lɛa ɔ́nɛ́nátɔ́ bɔkɔasɛ́á, ɛtambá yɛ́ Huɛlɛ́ yɛ́ báka ɔ uwənú mɔlɛ́má, nɔ ka Sátana nɔba tɔ́na.»

¹⁵Nɔ lɛ mɔlɛ́má háá ɔ bɛkɔa bɛ́ misí, ata bɛɛ́la bikimə ɔbɛ́á bɛ́ lɛ́á ɔ misí. Ábá mɔndɔ a ndɔ mɔlɛ́má háá ɔ bɛkɔa bɛ́ misí, a sa ósó á Huɛlɛ́ Isə́ uhikiə.

¹⁶Ɔ taká, ɔ́ bɛkɔa bɛ́ misí bɛɛ́bɛ: Bilókílókí bɛ́ mɛɛ́lɔ, bilókílókí bɛ́ ukusənə yatɛ́ ɔyɛ́á məə́sə má ná siəkínə, ɔbɛ́lɛ́áŋɔna na nɛ́áyɛ́á nɛbɔ́ŋɔ. Nɔ́yɛ́, bɛ́ɛ́yɛ́ bikimə bɛ́ lɛ ndɔ húlínə na Huɛlɛ́ Isə́, mba, bɛ́ ndɔ húlínə na yɛ́ɛyɛ misí.

¹⁷Misí yɛ́ lɛa ɔ ɔtɔ́mbáka, bɛɛ́la bikimə ɔbɛ́á bɛndɔ bá ndɔ bílókínə bɛ́ ndɔ tɔ́mba tɔ́na, mba, wɛ́ɛ́yɛ́ ɔwá a ndɔ kɛa yatɛ́ ɔyɛ́á Huɛlɛ́ a ndɔ hikiə, a ndɔ niŋə ɔ ikúílíə́kimə.

¹⁸Á bámɛ́á baná, ikúílí yɛ́ nisúki nɛ́ misí nɛ́ lɛa hoóyi, nɔ ka ɔ́kɔ́kɛna ɔwá, Mubəniə wa Kilísitusu a lɛa ɔ ɔsákɔna. Isíŋáka bəbəniə bəəŋí bá Kilísitusu bá báka: Nɔ́yɛ́ yɛ́ ndɔ siə uwəsú ɔlɛna ɔwá, tɔ lɛa ɔ nisúki nɛ́ misí.

¹⁹Bááyɛ́ bɛndɔ bááyɛ́ bá ka bəsú tíkə, mba, bá sa bá na bəsú. Ata bá bámɛnɛna bə́súə́ bɛndɔ, há bá ka tuənə na bəsú. Mba, yɛ́ ka bá ɔwá bá bəsú tíkə́ ɔkɛaka ɔwá, yɛ́ ɛ́náná yɛ́ sɛ́á bá lɛ bá taká bə́súə́ bɛndɔ.

²⁰Ábá ɛlɔ́áyɛ́ ənú, Kilísitusu a ka bənú Umbúínyi Mɔnaŋanaŋa índiə, ɔ́ ɛlɔ́áyɛ́ nɔ́yɛ́ nɔ ndɔ taká manya bənú bəkimə.

²¹Ábá mɛ ka bənú tiləkinə, táta ɔ uwənú ɔlɛna ɔwá, nɔ lɛ ndɔ taká manya, mba bɔkɔasɛ́á, nɔ ndɔ taká manya, nɔ ndɔ manya tɔ́na ɔwá, ɛkanja yɛ́ sa ósó uhúlínə na taká.

²²Ɛ́yánɛ́ a lɛ́á mɔkanjakanja nə́ə əə́? Ɔ́ wɛ́ɛ́yɛ́ ɔwá a ndɔ fə́mə́ləniə ɔwá Yə́susu a lɛ bá Kilísitusu. Wɛɛ́ya a lɛ́á Mukóyíkoyi wa Kilísitusu, a ndɔ Huɛlɛ́ á Isə́ na wayɛ́á Mɔná bɛ́sáŋɔ́na ɔ ikúílí ɛ́mɔtɛ́.

²³Ɔ taká, wɛ́ɛ́yɛ́ ɔwá a ndɔ Mɔná wa Huɛlɛ́ bɛ́sáŋɔ́na, nɔ́yɛ́, a ndɔ Huɛlɛ́ á Isə́ bɛ́sáŋɔ́na, mba, ábá mɔndɔ a ndɔ laa ɔwá, a ndɔ Mɔná wa Huɛlɛ́ luminə, nɔ́yɛ́, a ndɔ Huɛlɛ́ á Isə́ luminə.

²⁴Ɛlɔ́áyɛ́ nɔ́yɛ́, nɔ́ imbə́nú tə́tə́níə́ ɔ uwənú mɔlɛ́má ɔyɛ́á nɔ ná ɔ́kɔ́kɛ́na ɔ nɛbalɛ́ná nɛ́ Imbə́nú Yɛɛsɛ. Ábá nɔ ná tə́tə́níə́ yatɛ́ ɔyɛ́á nɔ ná ɔ́kɔ́kɛ́na ɔ nɛbalɛ́ná nɛ́ Imbə́nú Yɛɛsɛ, bənú tɔ́na nɔ ŋɔ bámɛnɛna tɔanátɔ́ na Mɔná na Isə́.

²⁵Nɔ́ siəlínə́, isíŋáka yatɛ́ ɔyɛ́á Kilísitusu a ná bəsú bílíhə́níə́, ɔ́ buɔmɔ́ bɔ́ ikúílíə́kimə.

²⁶Ɔ́ bɛkɔa bɛ́ɛ́yɛ́ ɔbɛ́á mɛ ná hikə́kíə́ ɔ uwənú utilinə ɔwɔŋgɔkɔnɔ na bááyɛ́ ɔbá bá ndɔ siə ɔ uwənú unənəsiə.

²⁷Ɛlɔ́áyɛ́ ənú, Kilísitusu a ka bənú Umbúínyi Mɔnaŋanaŋa índiə, wútə́yí Umbúínyi wɔ́ lɛa falábákátɔ́ ɔ uwənú mɔlɛ́má. Nɔ́yɛ́, nɔ lɛ bá na ilókí ɔwá bá bənú bɔ́mɔtɛ́ bɔkɔa úkúnə́kíə́. Ɔ taká, Umbúínyi Mɔnaŋanaŋa wɔ́ ndɔ bənú úkúniə bɛkɔa bikimə, yatɛ́ ɔyɛ́á wɔ́ ndɔ bənú úkúniə, yɛ́ lɛa taká, tátá ɛkanja. Ɛlɔ́áyɛ́ nɔyɛ́, nɔ́ kɛndáká ɛ́sɛ́á Umbúínyi Mɔnaŋanaŋa wɔ́ ná bənú úkúnə́kíə́, nɔ́yɛ́ mbá nɔ ŋɔ báá tɔanátɔ́ na Kilísitusu.

²⁸Ɛ́ɛ! Á bámɛ́á baná, tuənə́nu tɔanátɔ́ na Kilísitusu ɔkɛaka ɔwá, mbá tɔ sɔ́ ŋɔ kɔ́lɔ́ma ata bɔkɔa, tɔ́ manyá tɔ́na tɔ sɛ́á a sɔ́ ŋɔ bəsú bulə na ɛsɛ́má ɔ mɛɛ́lɔ ikúílí ɔyɛ́á a ŋɔ ndahiana.

²⁹Nɔ ndɔ manya muɛsɛ ɔwá kilísitusu a lɛa wataká, ɛlɔ́áyɛ́ nɔ́yɛ́, nɔ ná hɔ́ánáná ɔmanya ɔwá, ata ɛ́yánɛ́ ɔwá a ndɔ taká bɛ́kɛna, a lɛa mɔná wa Huɛlɛ́.