Read Tunen 1 Yɔhánɛsɛ 3 Bible Online

1 Yɔhánɛsɛ 3 - Tunen bible

1 Yɔhánɛsɛ 3

¹Á bɛ́ámɛ́á bɛŋgɔ́áyɛ́ bɛ́ mɔlɛ́má, nɔ́ síə́línə, Huɛlɛ́ á Isə́ a ka bəsú hikəkiə ɛŋaná iŋgətí, a ndɔ bəsú ɛ́lɛnɛna báyɛ́á baná, tɔ nɔ́yɛ́ lɛa hɔ́ánánɛ́nátɔ. Bɛndɔ bá yɛ́ɛ́yɛ́ misí bá sa Huɛlɛ́ manya, ɔ́ ɛlɔ́áyɛ́ nɔ́yɛ́ bá lɛ ndɔ manya ɔwá, tɔ lɛa baná bá Huɛlɛ́.

²Á bɛ́ámɛ́á bɛŋgɔ́áyɛ́ bɛ́ mɔlɛ́má, ɔ botolokiə isíŋáka, tɔ lɛa baná bá Huɛlɛ́, mba, a nana bəsú ínə́níə́ tə́lə́ŋu ɛ́sɛ́á tɔ ŋɔ bámɛnɛna. Tɔ ndɔ nɔ́yɛ́ manya muɛsɛ ɔwá, ɛnáká Kilísitusu a fámálána, tɔ ŋɔ báá hɔ́ákátɔ́ ɔ ɔwayɛ́ bɔkɔasɛ́á, tɔ ŋɔ wɛɛ́ya siəkinə huɛ́ ɛ́sɛ́á a lɛ́á.

³Ata ɛ́yánɛ́ ɔwá a ndɔ nɔ́yɛ́ fɛka ɔ ɔwayɛ́ mɔlɛ́má nuúmə́, a ná hɔ́ánáná uniŋə ɛŋaná hɛkabalɛ ɛ́sɛ́á Yə́susu Kilísitusu bɛ́múɛ́tɛ́ a lɛ́á ɛŋaná hɛkabalɛ.

⁴Ata ɛ́yánɛ́ ɔwá a ná kɔ́á ɔ bɔbɛ́á, a lɛ ndɔ umbə́ndə́ wɔ́ Huɛlɛ́ ɔ́kɛ́na bɔkɔasɛ́á, bɔbɛ́á bɔ́ lɛa ɔwá a lɛ Huɛlɛ́ ɔ́kɛna.

⁵Mba, nɔ ndɔ nɔ́yɛ́ manya muɛsɛ ɔwá, Yə́susu Kilísitusu a ka ndasá ɔ misí ɔkɛaka ɔ sɛ́á a mabɛ́á má bɛndɔ sɔtɔkɔ, mba wɛɛ́ya bɛ́múɛ́tɛ́ a sa bɔbɛ́á kɛa.

⁶Nɔ́yɛ́, ata ɛ́yánɛ́ ɔwá a lɛ́á tɔanátɔ́ na wɛɛ́ya a lɛ bá kɔ́átɔ́ ɔ bɔbɛ́á. Ata ɛ́yánɛ́ ɔwá a ndɔ bɔbɛ́á kɛa a lɛ ndɔ Kilísitusu sinə, a lɛ ndɔ wɛɛ́ya manya tɔ́na.

⁷Á bámɛ́á baná, mɔndɔ a lɛ tíkə́ bənú nənəsiə. Wɛ́ɛ́yɛ́ ɔwá a ndɔ taká bɛ́kɛna, a lɛa wataká, ɛ́sɛ́á Yə́susu Kilísitusu a lɛ́á wataká.

⁸Wɛ́ɛ́yɛ́ ɔwá a ndɔ ákánana ɔ busíə́ ɔ bɔbɛ́á ɔkɛa, a lɛa wa Sátana bɔkɔasɛ́á, Sátana a lɛa mɔkɛamabɛ́á ɔ botolokiə ɔ nɛbalɛ́ná nɛ́ misí. Mɔná wa Huɛlɛ́ a ka sulu ndasá ɔ misí ɔkɛaka ɔwá á biolí bɛ́ sátana katáka.

⁹Ata ɛ́yánɛ́ ɔwá a ná híáná mɔná wa Huɛlɛ́, a lɛ ndɔ bɔbɛ́á kɛa tɔ́na bɔkɔasɛ́á, Ɛtambá yɛ́ Huɛlɛ́ yɛ́ lɛa ɔ ɔwayɛ́ mɔlɛ́má nuúmə́, yɛ́ lɛa tɔ́na ɛ́sɛ́á məfumə́. A sa ósó tɔ́na ɔ bɔbɛ́á ɔkɛa bɔkɔasɛ́á, a ná híáná mɔná wa Huɛlɛ́.

¹⁰Ɔ́ nifəŋə nɛ́ɛnɛ ɔnɛ́á nɛ́ lɛ́á ətíə́ yɛ baná bá Huɛlɛ́, na baná bá Sátana. Ata ɛ́yánɛ́ ɔwá a lɛ ndɔ taká bɛ́kɛna, a lɛ bá wa Huɛlɛ́. Ata wɛ́ɛ́yɛ́ ɔwá a lɛ ndɔ munísə́ hikiə, a lɛ bá wa Huɛlɛ́.

¹¹Ɔ taká, ɔ́ mɛsɔ́ma yɛ́ɛyɛ ɔyɛ́á nɔ ná ɔ́kɔ́kɛ́na ɔ nɛbalɛ́ná nɛ́ Imbə́nú Yɛɛsɛ: Tɔ́ ənú hikə́kə́níə́ bəsú na bəsú.

¹²Tɔ lɛ tuənə́ ɛ́sɛ́á á Káyɛna. A ka báá mɔndɔ wa Sátana, a ka yáyɛ́á ikukə yɛ́ munínyə́ ɔ́nɔ́kɔ. Ɛlɔ́áyɛ́ yatɛ́ a ná wɛɛ́ya ɔ́nɔ́kɛ́na əə́? Ɔ́ bɔkɔasɛ́á bɛkɔa ɔbɛ́á a ná bá ndɔ kɛa bɛ́ sa bá bɛɛsɛ, mbá nɔ́yɛ́ bɛ́ wayɛ́á munínyə́ bɛ́ ka báá tɛ́nɛ́mátɔ́.

¹³Á bənísə́, nɔ lɛ ə́lə́mə́nə ábá bɛndɔ bá misí bá ndɔ bənú bánya.

¹⁴Uwəsú, tɔ ndɔ əsú manya muɛsɛ ɔwá tɔ ka tɔ́mbɛ́na ɔ nyɛmbɛ́ mbá tɔ nɔ́ buɔmɔ́ kusənə: Tɔ ndɔ nɔ́yɛ́ manya bɔkɔasɛ́á, tɔ ndɔ bə́súə́ bənísə́ hikiə. Wɛ́ɛ́yɛ́ ɔwá a lɛ ndɔ hikəniə, a nabáka ɔ nyɛmbɛ́.

¹⁵Ata ɛ́yánɛ́ ɔwá a ndɔ wayɛ́á munísə́ bánya, a lɛa muɔnɔ́bɛndɔ. Nɔ́yɛ́, nɔ ndɔ manya ɔwá, ata muɔnɔ́bɛndɔ ɔmɔtɛ́ a lɛ bá na ɛbɔ́ka ɔ buɔmɔ́ bɔ́ ikúílíə́kimə.

¹⁶Tɔ́ siəlínə́ yatɛ́ yɛ́ lɛ́á nibo: Yə́susu Kilísitusu a ka bɔ́áyɛ́á buɔmɔ́ índiə ɛlɔ́áyɛ́ əsú, bəsú tɔ́na, tɔ ná hɔ́ánáná ɔ búə́súə́ buɔmɔ́ uwíndiə ɛlɔ́áyɛ́ bə́súə́ bənísə́.

¹⁷Ábá mɔndɔ a lɛa na maasɛ məəŋí má yɛ́ɛyɛ misí, mbá a ndɔ wayɛ́á munísə́ siəkinə ɔ nɛsɔ́ka, ábá a ná wɛɛ́ya əlimə túmə́, nəníə́ ɛ́kɛ a óso ɔbɛ́laa ɔwá a ndɔ Huɛlɛ́ hikiə əə́?

¹⁸Á bámɛ́á baná, tɔ lɛ hikə́níə́ ɔbánɔ́ na munuə, mba, na bɛtambá bɛɛsɛ. Tɔ́ nibo ínə́níə́ taká ɔnɛ́á nɛ́ ndɔ ɛ́nána ɔ tɔ́mbákɛna na bɛnyɛná.

¹⁹Ábá tɔ ndɔ kɛa nɔ́yɛ́, tɔ ŋɔ manyɛna ɔwá tɔ lɛa bɛndɔ bá taká, wə́súə́ mɔlɛ́má wɔ́ ŋɔ báá yə́ə́bu á Huɛlɛ́ busíə́.

²⁰Ɔ taká, ata wə́súə́ mɔlɛ́má wɔ́ ndɔ bəsú hɔkɛna, tɔ ndɔ manya ɔwá, Huɛlɛ́ a lɛa mɔŋɛ́ŋa yáyɛ́ná wə́súə́ mɔlɛ́má, a ndɔ manya tɔ́na bɛkɔa bikimə.

²¹Á bɛ́ámɛ́á bɛŋgɔ́áyɛ́ bɛ́ mɔlɛ́má, ábá wə́súə́ mɔlɛ́má wɔ́ lɛ ndɔ bəsú hɔkɛna, tɔ óso ɔtɛ́nɛ́ma á Huɛlɛ́ busíə́ ɛŋaná bɔkɔ́lɔ́ma.

²²Ata yatɛ́ tɔ nɔ́ wɛɛ́ya bata, a ndɔ bəsú índiə bɔkɔasɛ́á, tɔ ndɔ yə́yíə́ imbə́ndə́ bítə́tə́niə, tɔ ndɔ kɛa tɔ́na yatɛ́ ɔyɛ́á a ndɔ hikiə.

²³Ɔ́ wə́yíə́ umbə́ndə́ wúuwu: Tɔ ná hɔ́ánána ɔ níə́súə́ nɛkɔmba ɔtálɛ́na ɔ wayɛ́á Mɔná á Yə́susu Kilísitusu, tɔ́ hikə́kə́níə́ tɔ́na bəsú na bəsú ɛ́sɛ́á Kilísitusu a ná nɔ́yɛ́ bəsú mánɛ́na.

²⁴Wɛ́ɛ́yɛ́ ɔwá a ndɔ imbə́ndə́ yɛ́ Huɛlɛ́ bítə́tə́niə, a lɛa tɔanátɔ́ na Huɛlɛ́, Huɛlɛ́ tɔ́na a báka na wɛɛ́ya. Nɔ́yɛ́, tɔ ndɔ manya muɛsɛ ɔwá Huɛlɛ́ a lɛa na bəsú nyɔnɔ na wə́yíə́ Umbúínyi Mɔnaŋanaŋa ɔwá a ná bəsú índíə́.