Read Tunen 1 Yɔhánɛsɛ 4 Bible Online

1 Yɔhánɛsɛ 4 - Tunen bible

1 Yɔhánɛsɛ 4

¹Á bɛ́áámɛ́á bɛŋgɔ́áyɛ́ bɛ́ mɔlɛ́má, nɔ lɛ bááyɛ́ bəkimə lumínə ɔbá bá ndɔ bɛ́laa ɔwá, bá lɛa na Umbúínyi Mɔnaŋanaŋa, mba, nɔ́ manyá muɛsɛ ábá wútə́yí umbúínyi wɔ́ ndɔ húlínə na Huɛlɛ́. Mɛ ndɔ nɔ́yɛ́ laa bɔkɔasɛ́á, bɔhɛ́nátɔtányɛ́ bá bɛkanja bəəŋí bá lɛa yambánátɔ́ ɔ misí.

²Nɔ́ siəlínə́ nəníə́ ɛ́kɛ nɔ kɛaka mbá nɔ ŋɔ manyá ábá muití a lɛa na Umbúínyi wɔ́ Huɛlɛ́: Ata ɛ́yánɛ́ ɔwá a ndɔ luminə ɔwá Yə́susu Kilísitusu a ka báá Huɛlɛ́, a ná híána mɔndɔ, wɛ́ɛ́yɛ́ a lɛa na Umbúínyi wɔ́ Huɛlɛ́.

³Mba, ata ɛ́yánɛ́ ɔwá a lɛ ndɔ Yə́susu luminə, a lɛ bá na Umbúínyi wɔ́ Huɛlɛ́, mba, a lɛa na wɔ́ Mukóyíkoyi wa kilísitusu. Nɔ ka ɔ́kɔ́kɛna ɔwá, Mukóyíkoyi wa Kilísitusu a lɛa ɔ ɔsákɔna, isíŋáka a lɛa ndafámátɔ, a lɛa ɔ misí.

⁴Uwənú ɔ bámɛ́á baná, nɔ báka bá Huɛlɛ́, nɔ ka bááyɛ́ bɔhɛ́nátɔtányɛ́ bá bɛkanja nɔba bɔkɔasɛ́á, Umbúínyi ɔwá wɔ́ lɛ́á ɔ uwənú mɔlɛ́má wɔ́ lɛa na iŋgínə́ yáyɛ́ná umbúínyi wɔ́ Mukóyíkoyi ɔwá wɔ́ lɛ́á ɔ misí.

⁵Bááyɛ́ bɔhɛ́nátɔtányɛ́ bá bɛkanja bá báka bá misí, ɔ́ ɛlɔ́áyɛ́ nɔ́yɛ́ bá ndɔ hɔ́ɔ́ ɔ nindínə́ nɛ́ bɛndɔ bá misí, bɛndɔ bá misí bá ndɔ bəə́bu ɔ́kɛ́na tɔ́na.

⁶Mba uwəsú, tɔ báka bá Huɛlɛ́. Wɛ́ɛ́yɛ́ ɔwá a ndɔ Huɛlɛ́ manya, a ndɔ bəsú ɔ́kɛ́na; wɛ́ɛ́yɛ́ ɔwá a lɛ bá wa Huɛlɛ́, a lɛ ndɔ bəsú ɔ́kɛ́na. Ɔ́ nɔ́yɛ́ tɔ óso ɔ nifəŋə ɔmanya ábá mɔndɔ a lɛa na Umbúínyi wɔ́ Huɛlɛ́ ɔwá wɔ́ ndɔ taká yɛ Huɛlɛ́ manya, ataná, a lɛa na umbúínyi wɔ́ Mukóyíkoyi ɔwá wɔ́ ndɔ kɛa wɔ́ sɛ́á á kanjáka.

⁷Á bɛ́ámɛ́á bɛŋgɔ́áyɛ́ bɛ́ mɔlɛ́má, tɔ ənú hikə́kə́níə́ bəsú na bəsú bɔkɔasɛ́á, nibo nɛ́ ndɔ húlínə na Huɛlɛ́. Wɛ́ɛ́yɛ́ ɔwá a ndɔ hikəniə a báka mɔná wa Huɛlɛ́, a ndɔ Huɛlɛ́ manya tɔ́na.

⁸Wɛ́ɛ́yɛ́ ɔwá a lɛ ndɔ hikəniə, a lɛ ndɔ Huɛlɛ́ manya bɔkɔasɛ́á, Huɛlɛ́ a lɛa nibo.

⁹Náana á Huɛlɛ́ a ná ínə́níə́ ɔwá a ndɔ bəsú hikiə: A ka yáyɛ́á yohí yɛ́ Mɔná lɔ́ma ɔ misí ɔkɛaka ɔwá, tɔ buɔmɔ́ kúsə́nə́ ɔ tɔ́mbákɛna na wɛɛ́ya.

¹⁰Tɔ́ siəlínə́ yatɛ́ yɛ́ lɛ́á nibo: Tátá bəsú tɔ ná táŋá á Huɛlɛ́ uhikiə, mba, wɛɛ́ya ɔbánɔ́ a ná táŋá ɔ uwəsú uhikiə, a ná wayɛ́á Mɔná lɔ́má tɔ́na ɔkɛaka ɔwá, a ndábɛ́hánɛ́na ɛlɔ́áyɛ́ mə́súə́ mabɛ́á.

¹¹Á bɛ́ámɛ́á bɛŋgɔ́áyɛ́ bɛ́ mɔlɛ́má, tɔ ná hɔ́ánána uhikəniə bəsú na bəsú bɔkɔasɛ́á, Huɛlɛ́ a ka bəsú hikəkiə isímə.

¹²Ata mɔndɔ a sa ndá Huɛlɛ́ sinə. Mba, ábá tɔ ndɔ hikəniə bəsú na bəsú, a ŋɔ báá na bəsú, a ŋɔ ínə́niə tɔ́na ɔwá a ndɔ bəsú hikiə ɔ ɔyáyɛ́na.

¹³Ɔkɛaka ɔwá tɔ manyá tɔ sɛ́á, Huɛlɛ́ a lɛa na bəsú, bəsú tɔ́na tɔ lɛa na wɛɛ́ya, a ka bəsú wə́yíə́ Umbúínyi índiə.

¹⁴Huɛlɛ́ á Isə́ a ka wayɛ́á Mɔná lɔ́ma ɔkɛaka ɔwá a misí núə́kə́níə́. Tɔ ka wɛɛ́ya siəkinə na mə́súə́ məə́sə, tɔ ndɔ fə́mə́ləniə tɔ́na ɔwá nɔ́yɛ́ yɛ́ lɛa taká.

¹⁵Wɛ́ɛ́yɛ́ ɔwá a ndɔ luminə ɔwá á Yə́susu a lɛ́á Mɔná wa Huɛlɛ́, Huɛlɛ́ a lɛa na wɛɛ́ya, wɛɛ́ya tɔ́na tɔ lɛa na Huɛlɛ́.

¹⁶Mba uwəsú, tɔ ka manya, tɔ ná nibo manyá ɔnɛ́á Huɛlɛ́ a ná bəsú híkə́kíníə́, tɔ ndɔ nɔ́yɛ́ luminə. Huɛlɛ́ a lɛa nibo. Wɛ́ɛ́yɛ́ ɔwá a ndɔ hikəniə, Huɛlɛ́ a lɛa na wɛɛ́ya, wɛɛ́ya tɔ́na a lɛa na Huɛlɛ́.

¹⁷Ábá taká tɔ ndɔ Huɛlɛ́ hikiə, ɔ hinó ɔhɛ́á a ŋɔ bɛndɔ kə́lə́səkiə, tɔ sa ndákɔ́lɔ́má ata bɔkɔa bɔkɔasɛ́á, níə́súə́ nibítíkə ɔ yɛ́ɛyɛ misí nɛ́ lɛa huɛ́ ɛ́sɛ́á nɛ́ Yə́susu Kilísitusu.

¹⁸Wɛ́ɛ́yɛ́ ɔwá a ndɔ hikəniə, a lɛ ndɔ kɔ́lɔ́ma ata bɔkɔa bɔkɔasɛ́á, nibo nɛ́ taká nɛ́ ndɔ bɔkɔ́lɔ́ma kúbə ɔ mɔlɛ́má wɔ́ mɔndɔ. Bɔkɔ́lɔ́ma bɔ́ lɛa ɔ mɔlɛ́má wɔ́ mɔndɔ ɔwá a ndɔ ɛsɔ́kɔ́tɛa táta, wɛ́ɛ́yɛ́ ɔwá a ndɔ kɔ́lɔ́ma a lɛ ndɔ Huɛlɛ́ hikiə taká.

¹⁹Mba uwəsú, tɔ ndɔ bɛndɔ hikiə bɔkɔasɛ́á, Huɛlɛ́ a ka taŋa ɔ uwəsú uhikiə.

²⁰Ábá mɔndɔ a ndɔ laa a sɛ́á: «Mɛ ndɔ Huɛlɛ́ hikiə» mbá nɔ́yɛ́ a ndɔ wayɛ́á munísə́ bánya, a lɛa mɔkanjakanja. Ɔ taká, wɛ́ɛ́yɛ́ ɔwá a lɛ ndɔ munísə́ hikiə ɔwá a ndɔ sinə, a sa ósó á Huɛlɛ́ uhikiə ɔwá a lɛ ndɔ sinə.

²¹Ɔ́ Umbə́ndə́ wúuwu ɔwá Huɛlɛ́ a ná bəsú índíə́: Wɛ́ɛ́yɛ́ ɔwá a ndɔ Huɛlɛ́ hikiə, a ná hɔ́ánáná ɔ wayɛ́á munísə́ uhikiə tɔ́na.