Read Tunen 2 Yɔhánɛsɛ 1 Bible Online

2 Yɔhánɛsɛ 1 - Tunen bible

2 Yɔhánɛsɛ 1

¹Mɛaŋɔ́á Mukúkə á Kílíya, mɛ ndɔ híihi hiəfulə tilinə ɔ inyə́ yɛ baná ɔwá Huɛlɛ́ a ná tɛ́fá, na ɔ báyɛ́á baná. Mɛ ndɔ bənú hikiə mɔŋɛ́ŋa, tátá mɛaŋɔ́á bíbúə́ mɛ ndɔ bənú hikiə, mba, na bááyɛ́ tɔ́na ɔbá bá ndɔ taká manya.

²Uwəsú, tɔ ndɔ bənú hikiə bɔkɔasɛ́á, taká yɛ́ lɛa ɔ uwəsú mɛlɛ́má, yɛ́ ŋɔ bámɛnɛna tɔ́na na bəsú ɔ ikúílíə́kimə.

³Huɛlɛ́ á Isə́ na Yə́susu Kilísitusu á Mɔná wa Isə́, bá bəsú buɛsɛ kɛ́áka, bá bəsú mɛɛ́luwə, bá bəsú bumbə́nú índíə́ ɔkɛaka ɔwá, tɔ niŋə́kə́ ɔ taká na nibo.

⁴Mɛ ka báá ɔ nɛhɔnɔ nɛŋɛ́ŋa ɛnaka mɛ funúnə ɔwá, bɔ́mɔtɛ́ báwɔ́á baná bá ndɔ niŋə ɔ taká nuúmə́ ɛ́sɛ́á Huɛlɛ́ á Isə́ a ná bəsú nɔ́yɛ́ mánɛ́na.

⁵Isíŋáka á Muəndúə́nyama á Kílíya, mɛ ndɔ aŋɔ́á bata isíŋáka ɔwá, tɔ́ hikə́kə́níə́ bəsú na bəsú. Tátá umbə́ndə́ muɔ́sɔ mɛ ndɔ aŋɔ́á tilinə, mba, ɔ́ wííyí ɔwá tɔ ná kúsə́nə ɔ nɛbalɛ́ná nɛ́ Imbə́nú Yɛɛsɛ.

⁶Náana yɛ́ lɛ́á nibo: Tɔ ná hɔ́ánána ɔwɔkɛ́na ɔ imbə́ndə́ yɛ́ Huɛlɛ́ ɔyɛ́á nɔ ná ɔ́kɔ́náka ɔ nɛbalɛ́ná nɛ́ Imbə́nú Yɛɛsɛ. Yɛ́ lɛa muɛsɛ tɔ́na ɔwá nɔ niŋə́kə́ ətíə́ yɛ nibo ɛ́sɛ́á wútə́yí umbə́ndə́ wɔ́ ndɔ bata.

⁷Bakanjakanja bəəŋí bá ka yambana ɔ misí, bá lɛ ndɔ luminə ɔwá, Yə́susu Kilísitusu a ka híána mɔndɔ, a ka ndásá ɔ misí. Yɛ́ɛ́yɛ́ ɛnya yɛ bɛndɔ bá lɛa bakanjakanja na bokóyíkoyi bá Kilísitusu.

⁸Bənú bɛ́múɛ́tɛ́ nɔ manyaka ɔkɛaka ɔwá, nɔ lɛ mɔsɛ́ŋɛ́ wɔ́ búə́núə́ buolí buɛsɛ nyúə́síə́, mbá nɔ ŋɔ wə́núə́ mɔsábɔ́náná kúsə́nə́ hɔ́ánánátɔ.

⁹Ata ɛ́yánɛ́ ɔwá a lɛ ndɔ kɛndɛna ɔ yatɛ́ ɔyɛ́á Kilísitusu a ná ínə́kíníə́, mbá a ndɔ ɛmbáta híkə, a lɛ bá ɔ nɛtɔana na Huɛlɛ́. Wɛ́ɛ́yɛ́ ɔwá a lɛ́á ndíŋímínə́tɔ́ ɔ yatɛ́ ɔyɛ́á Kilísitusu a ná ínə́kíníə́, a lɛa ɔ nɛtɔana na Isə́ na Mɔná.

¹⁰Ábá mɔndɔ a ná ndásá uwənú busíə́ mbá a sá bənú bɛtambá húlə́ninə ɔbɛ́á Kilísitusu a ná hɔ́ɔ́kɔ́, nɔ lɛ wɛɛ́ya káhá ata ɔ ɔwayɛ́ ubíhóliə uwənú ɔmbɛ́la.

¹¹Wɛ́ɛ́yɛ́ ɔwá a ná wɛɛ́ya káhá, á manyá ɔwá a ndɔ bɛnyɛná bɛbɛ́á bɛ́ muití afana na wɛɛ́ya.

¹²Mɛ lɛa na bɛkɔa biəŋí ɔ uwənú utilinə, mba, mɛ sá hikiə ɔ nɔ́yɛ́ ɔkɛa ɔ hiəfulə nuúmə́ na tíndiə bɔkɔasɛ́á, mɛ ndɔ nánɛna ɔndasá uwənú busíə́, mɛ́ bənú hɔ́kɛ́ná tɔ́na mɛaŋɔ́á bɛ́múɛ́tɛ́ ɔkɛaka ɔwá níə́súə́ nɛhɔnɔ nɛ́ báá úndúə́tɔ.

¹³Baná bá wawɔ́á munísə́ ɔ muəndú ɔwá Huɛlɛ́ a ná tɛ́fá, bá ndɔ bənú bíhóliə.