Read Tunen Yútu 1 Bible Online

Yútu 1 - Tunen bible

Yútu 1

¹Ɔwámɛ á Yútu, á munínyə́ wa Yákɔbɔ na mɔnyɛna wa Yə́susu Kilísitusu, mɛ ndɔ tilinə ɔ bááyɛ́ ɔbá Huɛlɛ́ á Isə́ a ná ɛ́lɛ́ákɛ́na ɔkɛaka ɔwá bá bámɛ́nɛ́ná báyɛ, a ná hikə́kíə́ tɔna, bááyɛ́ ɔbá a ná tə́tə́níə́ ɛlɔ́áyɛ́ Yə́susu Kilísitusu ɔtáta.

²Huɛlɛ́ a bənú iwə́mɛɛ́lɔ ínə́níə́, a kɛáka ɔwá nɔ niŋə́kə́ ɔ bumbə́nú, ɔwá nɔ niŋə́kə́ tɔ́na ɔ nibo nɛ́ ɛŋaná iŋgətí.

³Á bɛ́ámɛ́á bɛŋgɔ́áyɛ́ bɛ́ mɔlɛ́má, mɛ ka bá na ilókí yɛŋɛ́ŋa ɔwá, mɛ bənú tílə́kínə ɔkɛaka ɔ sɛ́á mɛ bənú lɛ́ná nəníə́ Huɛlɛ́ a ŋɔ bəsú bəkimə nuəkəniə, mba, mɛ ka báá bíə́kíníə́tɔ́ ɔwá mɛ bənú hiítə tilə́kínə ɔkɛaka ɔwá, mɛ bənú makɛ́nda índíə́ ɔ bɔnɔa ɔkɛaka ɔ sɛ́á, bɔkɔa buinə́buinə́ bɔ́ lɛ bɛ́kɔ́ndá ɔ bilə́líə́ ɔbɛ́á Yə́susu a ná bəsú úkúnə́kíə́ ɔ uwəsú á bɛndɔ bá Huɛlɛ́, ɔbɔ́á tɔ ná lúmínə́ tɔ́na, bɔ́táyɛ́ bɔkɔa bɔ́ lɛa bɔ́mɔtɛ́, ata mɔndɔ tɔ́na sa ósó usə́njiə.

⁴Ɔ taká, bɔ́mɔtɛ́ bɛndɔ bá mɔlɛ́má mɔbɛ́á bá ka ndábɛ́ándɔ́na ɔ inditiə uwənú ətíə́, bá ndɔ imbə́nú sə́njiə ɔwɔŋgɔkɔnɔ iwə́mɛɛ́lɔ ɔyɛ́á Huɛlɛ́ a ná bəsú índíə́, bá ndɔ nɔ́yɛ́ kɛa ɔkɛaka ɔwá, bá ɔ́nɛ́ná ɔ uwəbú nibítíkə nɛ́ mɔnyɔ́kɔ́lɛ́. Nɔ́yɛ́, bá ndɔ Yə́susu Kilísitusu ɔ wəsúə́ Munəni bíbúə́ na Isə́lúkú bɛ́sáŋɔ́na. Hata yɛ ikúílí, bá ka tiləkə ɔ Mətilə Manaŋanaŋa ɔwá, Huɛlɛ́ a ŋɔ yɛ́ɛ́yɛ́ ɛnya yɛ bɛndɔ sɔ́kɔ́tɛa ɔbá bá lɛ ndɔ wɛɛ́ya ɔ́kɛ́na.

⁵Yatɛ́ ɔyɛ́á mɛ ndɔ siə ɔ uwənú ɔlɛna, nɔ ndɔ bɛ́táyɛ́ bɛkɔa bikimə manya muɛsɛ, Isə́lúkú á Huɛlɛ́ a ka yáyɛ́á ilúkunə nuəkəniə ɔ makátá má bɛndɔ bá Ikíbíto, mba, əlimə yɛ ikúílí, a ná bááyɛ́ ónósókíə́ ɔ uwəbú ətíə́ ɔbá bá sa níə́búə́ nɛkɔmba tálɛ́na ɔ ɔwayɛ́.

⁶Nɔ́ bɛ́mɔtɛ́ Bɛáŋgɛlɛ bɛ́kɔ́lɔ́mɔ́ná tɔ́na ɔbá bá sa hikiə utuənə ɔ ɛbɔ́ka ɔyɛ́á Huɛlɛ́ a ná bəə́bu bɛ́lɛ́na, bá ná bíə́búə́ bituənínə́ yíyə́kə, Huɛlɛ́ a ka bəə́bu ɔ́lɔ́kɔkɔ na mɛsáŋa, a ná bəə́bu tə́tə́níə́ ɔ ɛbɔ́ka yɛ́ ibínə́binə ndamánamana ɛlɔ́áyɛ́ ikúílíə́kimə ɔkafámáká ɔ hinó ɔhɛ́á a ŋɔ bɛndɔ bəkimə kə́lə́səkiə.

⁷Nɔ́ bətínə́ yɛ Sótomo na yɛ Kɔmɔ́lɔ bɛ́kɔ́lɔ́mɔ́na, na bətínə́ bá mamɛ́ŋɛ́, bɛndɔ bá ka bá na nibítíkə nɛbɛ́á ɛ́sɛ́á bɛ́ɛ́yɛ́ bɛáŋgɛlɛ, bá ka lókókono, bá ka ká bɛáŋgɛlɛ kɔana ɔkɛaka ɔwá bá bəə́bu sianákɛ́nána, mbá nɔ́yɛ́ bɛáŋgɛlɛ bɛ́ lɛ bá ɛ́sɛ́á bɛndɔ. Huɛlɛ́ a ka bəə́bu bɛ́lɛna ɔ hiwə ɔhɛ́á abáka hɛ́ lɛ nimə. Nɔ́yɛ́ yɛ́ lɛa iŋgətí ɔyɛ́á Huɛlɛ́ a ná ínə́níə́ ɛlɔ́áyɛ́ bɛndɔ bá misí.

⁸Ɔ́ nɛ́táyɛ́ nindínə́ bááyɛ́ bɛndɔ ɔbá bá ná ndábɛ́ándɔ́ná ɔ uwənú ətíə́ bá ndɔ bítíkə, níə́búə́ nibíbə́liə nɛ́ ndɔ yəbúə́ mɛɛ́lɔ tífílə, bá nɛmanɛna nɛ́ Kilísitusu yaŋɔnakɛna, bá bɛáŋgɛlɛ kɔ́báka ɔbɛ́á bɛ́ lɛ́á bɛbɔ́tɛ́ná bɛ́ tuúmə.

⁹Ata á Mísahɛ́lɛ á isə́lúkú yɛ bɛáŋgɛlɛ, a sa nɔ́yɛ́ kɛa. A ka bɛtambá bɛ́ Sátana bɛ́sáŋɔ́na, bá ka umimə wɔ́ Mósisi nuəkəniə, a sa kafáma á Sátana ɔkɔ́ba, mba, a ka laa a sɛ́á: «Isə́lúkú bɛ́múɛ́tɛ́ á aŋɔ́á sɔ́kɔ́tɛ́á.»

¹⁰Mba, bááyɛ́ bɛndɔ ba ndɔ bɛkɔa kɔ́ba ɔbɛ́á bá lɛ ndɔ manya, bá ndɔ bɛkɔa kɛa ɛ́sɛ́á bɛála, ɛ́sɛ́á mɛnyama yɛ́ ɛmbɔ́ma, nɔ́yɛ́ yɛ́ lɛa hifílí hɛ́ búə́búə́ bunímə́.

¹¹Ɛmɔ́kɛ́ na bəə́bu bɔkɔasɛ́á, bá ka ɔŋgɔ á ɛnɔ́mɛ yɛ́ Káyɛna, bá ka kɔa ɔ bɔbɛ́á ɛlɔ́áyɛ́ mɔnɛ́á ɛ́sɛ́á á Bálama, bá ná nímínə́ ɛ́sɛ́á á Kɔlɛ́ ɔwá a ná báá na nɛfama, a ka nímínə.

¹²Bá ndɔ bənú ɛsɛ́má índiə, ikúílí ɔyɛ́á nɔ ndɔ nɛ́á ɛ́sɛ́á bənísə́, bá sə́hə́kiniə ɔ túə́búə́ tɔna ɛŋaná ɛsɛ́má, bá lɛ bɛkɔbɛna. Bá lɛa ɛ́sɛ́á bɛlɔndɔ́ ɔbɛ́á umbúínyi wɔ́ ndɔ húlə́ yə́ŋə́lənə ɛŋaná ɛmbɔŋɔ. Bá lɛa huɛ́ ɛ́sɛ́á malɛ́á ɔmá má sa ósó ɔ tɔtámátámá ɔháá ata ɔ ikúílí yɛɛsɛ, ikúílí má ná tɔbɛ́ákɛ́á, má wə́kúnə, má kálásaka.

¹³Bá lɛa hɔ́ákátɔ́ ɔ iŋunu yɛ́ nɔmɔ́, bíə́búə́ bɛnyɛná bɛbɛ́á bɛ́ lɛa ɛ́sɛ́á nyəkə́ ɔyɛ́á abáka iŋunu yɛ́ ányakaka na hilóbi hikimə. Bá lɛa ɛ́sɛ́á tusənji ɔtɔ́á tɔ ndɔ húlə́ nə́kə́lənə, Huɛlɛ́ a ka bəə́bu ɛbɔ́ka tábɔ́nakɛna ɔ ibínə́binə yɛ́ ndə́bə́nəbənə.

¹⁴Á Hɛ́nɔkɔ, á niɔŋgɔnɔ nɛ́ baná bálɛ́ndɔ́lɔ́mɔnɔ bá ɛndɛkɛ Átama, á ná taŋá ɔhɛ́na ɔ hata yɛ ikúílí ɔwɔŋgɔkɔnɔ bááyɛ́ bɛndɔ ɔbá bá ndábɛ́ándɔ́ná ətíə́ yɛ bɛndɔ a sɛ́á: «Nɔ́ ɔ́kɔ́kɛ́ná muɛsɛ ɔwá, Isə́lúkú a báka ɔ ɔsákɔna na bɛ́áyɛ́á bɛáŋgɛlɛ ɔ moómo ɔbánɔ́ má tukóló.

¹⁵A lɛa ɔ ɔsákɔna ɔ mɔsá mukimə ukə́lə́siə. A ŋɔ bááyɛ́ bəkimə hɔkakɛna ɔbá bá ná Huɛlɛ́ bɛ́sáŋɔ́ná ɛlɔ́áyɛ́ bíə́búə́ bɛnyɛná bɛbɛ́á bikimə ɔbɛ́á bá ná kɛ́áka, na bɛkɔ́bálɛ́ ɔbɛ́á bááyɛ́ bɛndɔ bá ɛŋaná hibə́təniə ɔbɛ́á bɛ́ ndɔ Huɛlɛ́ bɛ́tɔ́mɛna.»

¹⁶Bátáyɛ́ bɛndɔ bikúílí bikimə bá ndɔ bílúlə, bá bɛ́kɛ́táka ɛlɔ́áyɛ́ wə́búə́ ɔbáá, bá ɔŋgɔkɛna ɔ bilókílókí bɛ́ yəbúə́ mɛɛ́lɔ, bɛtambá bɛ́ niə́mə bɛ́ fámáka ɔ uwəbú munuə, bá bɛndɔ nímbə́kə ɔbánɔ́ ɛlɔ́áyɛ́ bíə́búə́ bɛɛ́la ɔkátɔ́na.

¹⁷Mba, ɛlɔ́áyɛ́ ənú ɔ bɛ́ámɛ́á bɛŋgɔ́áyɛ́ bɛ́ mɔlɛ́má, nɔ́ bɛ́kɔ́lɔ́mɔ́ná yatɛ́ ɔyɛ́á basɔ́másɔma bá yəsúə́ Isə́lúkú á Yə́susu Kilísitusu bá ná táŋá ɔ uwənú ɔnɔŋɔnɛna.

¹⁸Ɔ taká, bá ka bənú lakɛna bá sɛ́á: «Ɔ bikúílí bɛ́ nitifə́, bɛndɔ bá ŋɔ bámɛnɛna ɔbá bá ŋɔ bənú kɛ́kɛ́lakɛna, bá ŋɔ niŋəkə ɔwɔŋgɔkɔnɔ bíə́búə́ bilókílókí, bá lɛ Huɛlɛ́ ɔ́kɛna»

¹⁹Bəə́bu bá ndɔ kɛsalɛ́á háá ɔ ətíə́ yɛ bɛndɔ, bá ndɔ kɛa ɔbánɔ́ ɛ́sɛ́á abáka bɛndɔ bá misí bá kɛaka, bá lɛ bá na Umbúínyi Mɔnaŋanaŋa.

²⁰Mba, uwənú ɔ bɛ́ámɛ́á bɛŋgɔ́áyɛ́ bɛ́ mɔlɛ́má, nɔ́ ənú ányá ɔkɛaka ɔwá nɔ ɔlɔ́kɛ́náná bənú na bənú, bənú bəkimə nɔ́ báá ɔ́nɛ́nátɔ́ ɔ Imbə́nú yɛɛsɛ ɔyɛ́á nɔ ná lúmínə, ɔyɛ́á yɛ́ ndɔ húlínə na Huɛlɛ́ bɛ́muɛ́tɛ́. Nɔ́ Umbúínyi Mɔnaŋanaŋa batá ɔwá, a bənú ɔ́lɔ́ á Huɛlɛ́ ɔbɛ́kálɛ́na ɔ tɔ́mbákɛna na yayɛ́á injiŋə.

²¹Nɔ́ kɛ́áka ɔwá Huɛlɛ́ a bənú híkə́kíə́ ikúílí tɛ́á ɔ bɛtátɛ́ná ɔwá yəsúə́ Isə́lúkú á Yə́susu Kilísitusu á bənú buɔmɔ́ bɔ́ ikúílíə́kimə índíə́ ɔ tɔ́mbákɛna na yáyɛ́á iwə́mɛɛ́lɔ.

²²Nɔ́ bámɛ́nɛ́ná na mahana ɛlɔ́áyɛ́ bááyɛ́ ɔbá bá ndɔ bíyə́bə.

²³Nɔ́ kɛáka ɔwá bɔ́mɔtɛ́ bá bɛ́ɔ́lɔ́ ɔ hiwə ɔhɛ́á bá ndɔ ákána. Ɔ bə́ə́ní bɔ́mɔtɛ́ tɔ́na, nɔ́ bámɛ́nɛ́ná na mahana ɛlɔ́áyɛ́ əbú, mba, na bɔkɔ́lɔ́ma bukimə. Nɔ lɛ bɛ́tɔ́mɛ́na ata búə́búə́ bɔlɛŋa ɔbɔ́á bɔ́ lɛ́á táfálákátɔ́ na bíə́búə́ bilókílókí bɛ́ mɔsá.

²⁴Tuúmə na wɛ́ɛ́yɛ́ ɔwá a óso ɔ uwənú utə́tə́niə ɔkɛaka ɔwá nɔ lɛ kɔa, a ndɔ bənú hóyiə ɔkɛaka ɔwá, nɔ tɛ́nɛ́má ɔ busíə́ bɔ́ tɔ́áyɛ́á tuúmə, nɔ́ báá ɛŋaná hɛkabalɛ, úndúə́tɔ́ tɔ́na na nɛhɔnɔ.

²⁵Tɔ́ Huɛlɛ́ ɛ́mɔtɛ́ nyámáka ɔwá a ná bəsú núə́kə́níə́ ɔ tɔ́mbákɛna na Yə́susu Kilísitusu ɔ yəsúə́ Isə́lúkú. Tuúmə, bɔŋɛ́ŋa, injiŋə na nɛmanɛna bɛ́ bámɛ́nɛ́na bɛ́áyɛ, ɔ bííní bikúílí, isíŋáka na ɔ iŋísíə́kimə! Amɛna.