Read Tunen Bimənyí 10 Bible Online

Bimənyí 10 - Tunen bible

Bimənyí 10

¹Əlimə yɛ nɔ́yɛ́, mɛ ná yɛ́mɔtɛ́ áŋgɛlɛ yɛ injiŋə yámá ɔwá a ná bá a ndɔ húlínə ɔ nɔɔ́mɛná, lɛŋábákátɔ́ na ɛlɔndɔ́ ɛ́sɛ́á bɔlɛŋa, iboŋoli yɛ́ munyəŋətúləkə ɔ ɔwayɛ́ mɔlɔ́á. Bɔ́áyɛ́á busíə́ bɔ́ nɔmaka ɛ́sɛ́á hiɔtɔ́tɔ́, máyɛ́á makɔlɔ́ ɛ́sɛ́á makɔɛnɛ́ má hiwə.

²A ka bá na hiəfulə hɛtɛ́tɛ́á kúnə́tɔ́ ɔ mɔkátá. A nɔ́ mɔkɔlɔ́ wɔ́ bɛnɔ́mɛ tála ɔ nɔmɔ́, wɔ́ biəní ɔ misí;

³A ná yə́mə́ na nióni nɛŋɛ́ŋa ɛ́sɛ́á ŋguə́yi yɛ ndɔ hiŋə. Ɛnaka a yə́mə́ nɔ́yɛ́, ɛmalamanda ɛ́lɛ́ndɔ́lɔ́mɔnɔ yɛ́ ná sana.

⁴Ikúíli ɛmalamanda ɛ́lɛ́ndɔ́lɔ́mɔnɔ yɛ́ ná sáná, mɛ sɛ́á mɛ tilə́kə, mba, mɛ ná nióni ɔ́kɔ́ ɔ ɔmbáŋá nɛ́ ndɔ mɛaŋɔ́á lɛna nɛ́ sɛ́á: «Ɔ lɛ mɛsɔ́ma fə́mə́lə́níə́ ɔyɛ́á ɛmalamanda yɛ́ ná laa, ɔ lɛ miítə tilə.»

⁵Nɔ́yɛ́, áŋgɛlɛ ɔwá mɛ ná síə́kínə ɔ nɔmɔ́ na ɔ misí, a ná mɔkátá wɔ́ bɛnɔ́mɛ huəlíníə́ ɔ ɔmbáŋá,

⁶A ná bíkúmə́ ɔ tɔ́mbákɛna wɛ́ɛ́yɛ́ ɔwá a ndɔ niŋə tɔɛya na tɔɛya, ɔwá a ná nɔɔ́mɛná bɔ́tá na bɛ́ɛ́yɛ́ ɔbɛ́á bɛ́ lɛ́á umə́, ɔ misí na bɛ́ɛ́yɛ́ ɔbɛ́á bɛ́ lɛ́á umə́, ɔ nɔmɔ́ na bɛ́ɛ́yɛ́ ɔbɛ́á bɛ́ lɛ́á umə́, a sɛ́á ɛnjɛ́ka yɛ́ sa ndábá tɔ́na.

⁷Mba, ɔ buɔsɛ́ ɔbɔ́á bá ŋɔ niɔŋgɔnɔ nɛ́ mɛsɛ́bɛ́ ɛ́lɛ́ndɔ́lɔ́mɔnɔ yɛ́ áŋgɛlɛ ɔ́kɔ́kɛna, ɛnáká á lúmə́ ɔ ɔwayɛ́ mɔsɛ́bɛ́ ɔ ɔlɔ́ŋɔ, nɔ́yɛ́ isə́mə́tə́ yɛ́ yələ́mənə yɛ́ Huɛlɛ́ yɛ́ ŋɔ bíúndúsiniə, ɛ́sɛ́á a ná mə́nyə́síə́ ɔ ɔwayɛ́ bɔnyɛna á bɔhɛ́nátɔtányɛ́.

⁸Nióni ɔnɛ́á mɛ ná ɔ́kɔ́kɛ́na nɛ nɔ́ húlínə ɔ nɔɔ́mɛná, nɛ́ ná manyɔ́ mɛaŋɔ́á hɔ́lɛna nɛ́ sɛ́á: «Káka, káhá hiəfulə hɛ́ kunə́tɔ́ ɔ mɔkátá wɔ́ áŋgɛlɛ yɛ tɛ́nɛ́mátɔ́ ɔ nɔmɔ́ na ɔ misí.»

⁹Mɛ ná ákáná ɔ busíə́ bɔ́ áŋgɛlɛ, mɛ ná wɛɛ́ya batá ɔwá a mɛaŋɔ́á hiəfulə hɛtɛ́tɛ́á índíə́. A ná mɛaŋɔ́á lɛ́na a sɛ́á: «Ɛtá hiítə, nɛ́áká hiítə, hɛ́ ŋɔ bá támákátɔ́ ɛ́sɛ́á buɔyɛ́.»

¹⁰Mɛ ná hiəfulə hɛtɛ́tɛ́á káhá ɔ mɔkátá wɔ́ áŋgɛlɛ, mɛ ná hiítə nɛaka, ikúílí mɛ ná hiítə mɛná, tɔ́ámɛ́á tɔna tɔ́ ná səkə.

¹¹Bá ná mɛaŋɔ́á lɛ́na bá sɛ́á: «Ɔ na hɔ́ánána ɔ manyɔ ɔmbana muiŋí wɔ́ bɛndɔ bá mɔnɔŋɔ, mɔnɔŋɔ, mohókí na bənəni umənyəsiə.»