Read Tunen Bimənyí 11 Bible Online

Bimənyí 11 - Tunen bible

Bimənyí 11

¹Nɔ́yɛ́, bá ná mɛaŋɔ́á nɛtɔŋɔ índíə́ hɔ́ákátɔ́ ɔ ɛkɛ́ka yɛtɛ́tɛ́á yɛ́ ukətiniə, bá sɛ́á: «Hɔalɛ́na, káka Tɛ́mbɛlɛ yɛ Huɛlɛ́ kə́tə́kíə́ na niɔlɔ nɛ́ mahánɛna, fanáká bááyɛ́ ɔbá bá ndɔ lúbúnə ɔmɔ́yɛ́.

²Mba, ɛlɔ́áyɛ́ niə́lətíə́ nɛ́ Tɛ́mbɛlɛ, níásá nɛɛ́ta, ɔ lɛ nɛɛ́ta kətíə́ bɔkɔasɛ́á, Huɛlɛ́ a ka nɛɛ́ta índiə ɔ mɔnɔŋɔ ɔmá má ŋɔ bətínə́ mɛnaŋanaŋa tafaka ɔ moómo ə́nisə ma miilí na ífəndí.

³Mɛ ŋɔ iŋgínə́ índiə ɔ ɔwámɛ bəmbóŋímboŋi báfandɛ́ lɛŋábákátɔ́ na mikutə ɔkɛaka ɔwá, bá húlə́ mɛsɔ́ma yɛ́ Huɛlɛ́ mənyəsəkiə ɔyɛ́á bá ná kúsə́nə, ɔ hikóló na bɛbɔ́ɛ́yɛa bɛ́fandɛ́ bɛ́ tunó na moómo álɛ́ndálɔ.»

⁴Ɔ́ mááyɛ́ malɛ́á má Olífia áfandɛ́, na bɛ́ɛ́yɛ́ bitiəkətiəkə bɛ́fandɛ́ ɔbɛ́á bɛ́ lɛ́á ɔ busíə́ bɔ́ Isə́lúkú yɛ misí.

⁵Ata ɛ́yánɛ́ ɔwá a ndɔ siə uwəbú ɔ bɔbɛ́á ɔkɛa, hiwə hɛ́ fámá ɔ uwəbú munuə, hɛ́ bə́búə́ bəbəniə titəkiə. Ɛ́ɛ! Ata ɛ́yánɛ́ ɔwá a ná síə́kə ɔ uwəbú ɔ bɔbɛ́á ɔkɛa, nɔ́yɛ́ a ná hɔ́ánána uwínə.

⁶Bá lɛa na iŋgínə́ yɛ ɛmbɔŋɔ ɔ ɔhalɛna ɔkɛaka ɔwá, yɛ́ lɛ kɔ́á ɔ tunó ɔtɔ́á bá lɛ́á ɔ mɛsɔ́ma yɛ Huɛlɛ́ umənyəsiə ɔyɛ́á bá ná kúsə́nə. Bá lɛa na iŋgínə́ yɛ mənífə́ uhíə́nəsiə manɔ́ŋɔ́, na bilibi ɔwayɛna ɔ misí ɛ́sɛ́á bá ŋɔ siəkə.

⁷Mba, ɛnáká bá yəbúə́ mɛsɔ́ma hɔ́nála uyəmbələniə, mɛnyama mɛbɛ́á ɔyɛ́á yɛ́ ndɔ bála ɔ hianyaka, yɛ́ ŋɔ bəə́bu bɔ́áŋaka, yɛ́ ŋɔ bəə́bu yáyɛ́na, yɛ́ ŋɔ bəə́bu ɔ́nɔ́kɔ.

⁸Yə́búə́ imimə yɛ́ ŋɔ tíkə́nəkə sábɛ́tíákánátɔ́ ɔ niaháná nɛ́ bətínə́ mɛŋɛ́ŋa, ɔyɛ́á bá ndɔ ɛ́lɛnɛna ɛ́sɛ́á hɛŋgɛtɛ́nɛ́á hɛ́ Sótomo na Ikíbíto, ɔ ɛbɔ́ka ɔyɛ́á bá ná yəbúə́ Isə́lúkú ɔ́mɔ́kɛ́na ɔ ɔmbásá.

⁹Ɔ tunó tɔ́lálɔ́ na ɛsalɛ, bɛndɔ bá ŋɔ húlə́kəniə ɔ bilúkunə, ɔ tutikə ɔ mohókí na ɔ mɔnɔŋɔ ɔ yə́búə́ imimə ɔ ndəsínə, ɛŋana uwəbú unyəə.

¹⁰Bɛndɔ bá misí báá ŋɔ bámɛnɛna ɔ nɛhɔnɔ, bá ŋɔ lɔtɔkɔnɔ bɔkɔasɛ́á, bááyɛ́ bɔhɛ́nátɔtányɛ́ báfandɛ́ bá ka bəə́bu mɛlɛ́má tuŋuləkə.

¹¹Mba, əlimə yɛ tunó tɔ́lálɔ́ na ɛsalɛ, umbúínyi wɔ́ buɔmɔ́ ɔwá wɔ́ ná húlínə́ na Huɛlɛ́, wɔ́ ná fínə́ ɔ uwəbú mɛlɛ́má, bá ná hɔalɛ́na. Nɔ́yɛ́, bɔkɔ́lɔ́ma bɔŋɛ́ŋa bɔ́ ná bááyɛ́ itíə́ ɔbá bá ná báá bá ndɔ bəə́bu sinə.

¹²Bááyɛ́ bɔhɛ́nátɔtányɛ́ báfandɛ́ bá ná nióni nɛŋɛ́ŋa ɔ́kɔ́ nɛ́ nɔ́ húlínə ɔ nɔɔ́mɛná nɛ́ sɛ́á: «Nɔ́ báláká háha!» Bá ná báláka ɔ nɔɔ́mɛná ɔ bɛlɔndɔ́ nuúmə́, bə́búə́ bəbəniə bá nɔ́ bəə́bu məə́sə tála.

¹³Ɔ umisíúmə́, misí yɛ́ ná ndandɛ́málá na iŋgínə́, ɛsalɛ ɛ́mɔtɛ́ ɔ mɛɛ́lɔ yɛ niómo nɛ bɛsalɛ bɛ́ bətínə́ yɛ́ ná nɔkɛ́nɔ́kɛ́á; tukóló tɔ́lɛ́ndɔ́lɔ́mɔnɔ tɔ́ bɛndɔ tɔ́na bá ná wə́kúnə ɔ mɛ́táyɛ́ lukusu. Na bɔkɔ́lɔ́ma bukimə, bááyɛ́ ɔbá bá sa wə́ə́, bá ná lúmə́ á Huɛlɛ́ yɛ nɔɔ́mɛná ɔ ulúbúnə.

¹⁴Niɔŋgɔnɔ nɛ́ mɔmɔ́kɛ́ áfandɛ́ yɛ́ nɔ́ tɔ́mba. Ɔ́ niɔŋgɔnɔ nɛ́ mɔmɔ́kɛ́ álálɔ́ mááyɛ́ hoóyi ɔ ɔsákɔna.

¹⁵Niɔŋgɔnɔ nɛ́ bɛáŋgɛlɛ bɛ́lɛ́ndɔ́lɔ́mɔnɔ a ná wə́yíə́ mɔsɛ́bɛ́ lɔŋɛla; moóni maŋɛ́ŋa má ná húlínə́ ɔ ɔmbáŋá, má sɛ́á: «Isíŋáka nɛmanɛna nɛ́ misí nɛ́ lɛa ɔ makátá má yəsúə́ Isə́lúkú na yayɛ́á Kilísitusu, a ŋɔ manakɛna ɔ tɔɛya na tɔɛya.»

¹⁶Mááyɛ́ moómo áfandɛ́ má bɛnatákɛ na bínisə ɔbá bá lɛ́á tuənə́kínə́tɔ́ ɔ uwəbú tukómo ɔ busíə́ bɔ́ Huɛlɛ́, bá ná kɔ́á imbúbiə bá Huɛlɛ́ nyamaka bá sɛ́á:

¹⁷«Á Huɛlɛ́ yɛ injiŋə yikimə, ɔwáwɔ ɔwá ɔ lɛ́á, ɔwá ɔ ná báá, tɔ ndɔ aŋɔ́á mohóloniə híə́niniə bɔkɔasɛ́á, ɔ ka yawɔ́á injiŋə bɛ́kɛakɛna, ɔ ná nɛ́áwɔ́á nɛmanɛna tínímíə́.

¹⁸Hilóbi hɛ́ ka mɔnɔŋɔ túána, mba, ɔ́ híə́wúə́ hilóbi hɛ́ ná ɛ́nana. Ɔ́ ikúílí yɛ bikə́lə́síníə́ bɛ́ bəwə́nú yɛ́ɛyɛ, ikúílí yɛ́ mɔsábɔ́náná wɔ́ báwɔ́á bɔnyɛna á bɔhɛ́nátɔtányɛ́, banaŋanaŋa na bááyɛ́ ɔbá bá ndɔ nɛ́áwɔ́á niínyə kɔ́lɔ́ma, á batɛ́tɛ́á, á baŋɛ́ŋa, ɔ́ ikúíli yɛ́ bááyɛ́ unímə́siə ɔbá bá ndɔ misí sakata.»

¹⁹Əlimə yɛ nɔ́yɛ́, Tɛ́mbɛlɛ yɛ Huɛlɛ́ ɔyɛ́á yɛ́ lɛ́á ɔ nɔɔ́mɛná yɛ́ ná bíkúnə, ikoó yɛ́ nɛtɔana yɛ́ ná ɛ́náná ɔ ɔwayɛ́ Tɛ́mbɛlɛ. Nɔ́yɛ́, bɛmɔanyama bɛ́ ná fámálána, biluluməki bɛ́ moóni na bɛ́ ɛmalamanda bɛ́ ná ɔ́kɔnɔ, misí yɛ́ ná ndandɛ́mála, ɛmbɔŋɔ yɛ́ ɛndánáná tɔ́na yɛ́ ná kɔa.