Read Tunen Bimənyí 12 Bible Online

Bimənyí 12 - Tunen bible

Bimənyí 12

¹Hɛŋgɛtɛ́nɛ́á hɛŋɛ́ŋa hɛ́ ná ɛ́náná ɔ nɔɔ́mɛná; muəndú ɔmɔtɛ́, lɛŋábákátɔ́ na hiɔtɔ́tɔ́, muilí ɔ ɔwayɛ́ matá ma makɔlɔ́, hitəkə́ hɛ́ niómo nɛ́ tisənji na tɔ́fandɛ́ ɔ mɔlɔ́á.

²A ka báá ɛ́mɛ́látɔ, a yə́mə́kə, a məsə́kə ɔ́kɔ́kɛna bɔkɔasɛ́á, a ka bá a ndɔ yɛ́bɛ́na ɔ ubíə́nəkə.

³Hímotí hɛŋgɛtɛ́nɛ́á hɛ́ ná ɛ́náná ɔ nɔɔ́mɛná, ɛŋáŋáláŋá yɛ́ yaná nyɔakátɔ́ bolókotokoto ɛ́sɛ́á hiwə, yɛ́ ka bá na mɛlɔ́á ɛ́lɛ́ndɔ́lɔ́mɔnɔ niómo nɛ́ bɛndɔ́ŋɔ, ɔ ɔwayɛ́ mɛlɔ́á tutəkə́təkə́ tɔ́lɛ́ndɔ́lɔ́mɔnɔ.

⁴Wə́yíə́ mɔlɛ́ŋɛ́ wɔ́ ɛsalɛ ɛ́mɔtɛ́ ɔ mɛɛ́lɔ yɛ bɛsalɛ bɛ́lálɔ́ bɛ́ tusənji tɔ́ nɔɔ́mɛná nyɛkakɛna, tɔ ndakɔakɔ́na ɔ misí. Yaná yɛ́ ná tɛ́nɛ́má á muəndú busíə́ ɔwá a ná báá hoóyi ɔ ubíə́nəkə ɔkɛaka ɔwá, mbá á mɔná nɛ́áká ɔ ɔwayɛ́ nibíbíə́nə.

⁵Muəndú a ná mɔná biənə, mɔná mɛlɛ́mɛndɔ́ ɔwá a ná hɔ́ánána ɔ mɔnɔŋɔ ɔmanɛna na mulúmbə wɔ́ ilə́ŋú. Mba, bá ná mɔná ákánáná ɛmɛ́ŋɛ́ yɛ Huɛlɛ́, na ɔ ɔwayɛ́ hikómo.

⁶Mba, muəndú a ná tɛbákɛ́ná ɔ makɔ́tákɛ, ɔ ɛbɔ́ka ɔyɛ́á Huɛlɛ́ a ná wɛɛ́ya tábɔ́nákɛ́ná ɔkɛaka ɔwá, a wɛɛ́ya níə́kíə́ ɔkafámáká ɔ hikóló na bɛbɔ́ɛ́yɛa bɛ́fandɛ́ na moómo álɛ́ndálɔ má tunó.

⁷Nɔ́yɛ́, ituəmə yɛ́ ná kɔ́á ɔ nɔɔ́mɛná. Mísahɛ́lɛ na bɛ́áyɛ́á bɛáŋgɛlɛ bá yaná nuəkiə. Yaná na bɛ́áyɛ́á bɛáŋgɛlɛ bá bəə́bu nuəkiə tɔ́na.

⁸Mba, bá ná yaná yayɛna, ɛbɔ́ka yɛ́ utuənə yɛ́ sa bá tɔ́na ɛlɔ́áyɛ́ əbú ɔ nɔɔ́mɛná.

⁹Bá ná wɛɛ́ya nyɛkɛ́na, ɔwayɛ́ á ɛŋáŋáláŋá yɛ́ yaná, á miáhɔ yɛ buɔmɔ́, ɔyɛ́á bá ndɔ ɛ́lɛnɛna, yití ataná Sátana, wɛ́ɛ́yɛ́ ɔwá a ndɔ misí mikimə nímbə. Wɛ́ɛ́ya na bɛ́áyɛ́á bɛáŋgɛlɛ bá ná bəə́bu nyɛkɛ́na ɔ misí.

¹⁰Əlimə yɛ nɔ́yɛ́, mɛ ná nióni nɛŋɛ́ŋa ɔ́kɔ́ ɔ nɔɔ́mɛná, nɛ́ sɛ́á: «Ɔ́ ikúíli yɛ́ nibínuəniə yɛ́ɛyɛ, yɛ́ injiŋə na nɛmanɛna nɛ́ yəsúə́ Huɛlɛ́, na iŋgínə́ yɛ yayɛ́á Kilísitusu bɔkɔasɛ́á, bá ka mɔsɔ́mɛna wa bə́súə́ bənísə́ nyɛkɛna, wɛ́ɛ́yɛ́ ɔwá a ná bá a ndɔ bəə́bu sɔ́mɛna bulúə́ na buɔsɛ́ tɛ́á á yəsúə́ Huɛlɛ́ busíə́.

¹¹Bə́súə́ bənísə́ bá ka nɔba ɔ tɔ́mbákɛna manɔ́ŋɔ́ má mɔnándɔ́mbá na imbóŋi yɛ́ Ɛtambá. Bá ka luminə ɔ uwəbú buɔmɔ́ uwíndiə ɔ ɔkafámáká ɔ nyɛmbɛ́.

¹²Ɛlɔ́áyɛ́ nɔ́yɛ́, bílə́nə́kə ɔwáwɔ á nɔɔ́mɛná na bɛ́áwɔ́á bituəniniə, indimisi uwənú á misí na nuíyi nɛ ɛsɛ́lɛ́ ɛ́mɔtɛ́ bɔkɔasɛ́á, Sátana tɔtɔ́átɔ́, a ná tukínə ɔ uwənú ətíə́, a manyaka ɔwá yáyɛ́á ikúíli yɛ́ lɛa nyɔ́hɛ́nátɔ.»

¹³Ɛnaka yaná á yámá ɔwá bá ná wɛɛ́ya nyɛkɛ́na ɔ misí, a ná muəndú bábáka ɔwá a ná mɔná mɛlɛ́mɛndɔ́ biənə.

¹⁴Mba, bá ná bibə́ku bɛ́ ilúmə bɛ́fandɛ́ índíə́ a muəndú ɔkɛaka ɔwá, a hulúlúə́ ɔ makɔ́tákɛ ɔ ɛbɔ́ka yɛ́ tábɔ́nákátɔ ɔyɛ́á bá ná hɔ́ánána ɔ ɔwayɛ́ uníə́siə hata na miáhɔ, ɔkafámáká hikóló na bɛbɔ́ɛ́yɛa bɛ́fandɛ́ na moómo álɛ́ndálɔ má tunó.

¹⁵Nɔ́yɛ́, miáhɔ yɛ́ ná mənífə́ ányákáka á muəndú əlimə ɛ́sɛ́á nuíyi nɛŋɛ́ŋa ɔkɛaka ɔwá mbá má wɛɛ́ya tɔ́ndáná na iŋunu.

¹⁶Mba, misí yɛ́ ná ndásá á muəndú ɔwɔ́lɔ; misí yɛ́ ná bíúbúnə, yɛ́ ná nuíyi mɛnáka ɔnɛ́á yaná yɛ́ ná fɔma.

¹⁷Na hilóbi hikimə ɔwɔŋgɔkɔnɔ na muəndú, yaná yɛ́ ná bilə́ nyaáka ɔ ɔwayɛ́ ɛndɛkɛ ɔyɛ́á yɛ́ ná tikənə, bááyɛ́ ɔbá bá ndɔ imbə́ndə́ yɛ́ Huɛlɛ́ bítə́tə́niə na imbóŋi yɛ Yə́susu tə́tə́niə.

¹⁸Əlimə yɛ nɔ́yɛ́, yaná yɛ́ ná tuə́nə ɔ mɔsɛ́á wɔ́ nuíyi nɛ́ ɛsɛ́lɛ́ ɛ́mɔtɛ́.