Read Tunen Bimənyí 13 Bible Online

Bimənyí 13 - Tunen bible

Bimənyí 13

¹Mɛ ná mɛnyama mɛbɛ́á yámá tɔ́na ɔ ɔbálaka ɔ nɔmɔ́ yɛ́ ka bá na mɛlɔ́á ɛ́lɛ́ndɔ́lɔ́mɔnɔ na niómo nɛ́ bɛndɔ́ŋɔ, ɔ ɔwayɛ́ bɛndɔ́ŋɔ niómo nɛ́ tutəkə́təkə́, məə́nyə ɔmá má ndɔ Huɛlɛ́ kɛ́kɛ́lɛna ɔ ɔwayɛ́ mɛlɔ́á ɔmbáŋá.

²Mɛnyama ɔyɛ́á mɛ ná síə́kínə, yɛ́ ka báa hɔ́ákátɔ́ ɔ ɛfɔka, máyɛ́á makɔlɔ́ ɛ́sɛ́á má ŋgaŋgɔ́á, wə́yíə́ munuə ɛ́sɛ́á wɔ́ ŋguə́yi. Yaná yɛ́ ná wɛɛ́ya yayɛ́á injiŋə, híə́híə́ hikómo na yayɛ́á iŋgínə́ mɛŋɛ́ŋa túmbíníə́.

³Wúmotí wə́yíə́ mɔlɔ́á ɛ́sɛ́á úmúísíə́tɔ́ na ɛyɛkákɛ yɛ́ bukuəli, mba, bá ka yɛ́táyɛ́ ikuəli bɔ́áka. Misí mikimə yɛ́ ka bámɛnɛna ə́lə́mə́nə́tɔ, yɛ́ ná mɛnyama ɔŋgɔ́kɔ.

⁴Bɛndɔ bəkimə bá ná botólíə́ ɔ yaná ɔ ulúbúnə bɔkɔasɛ́á, a ka mɛnyama iŋgínə́ índiə, bá ná botólíə́ ɔ mɛnyama ɔ ulúbúnə tɔ́na na ɔlaa bá sɛ́á: «Ɛ́yánɛ́ a ŋɔ mɛnyama bíkə́təkiə, ɛ́yánɛ́ a óso ɔ ɔwayɛ́ unuəkiə əə́?»

⁵Bá ná mɛnyama munuə índíə́ ɛlɔ́áyɛ́ bɛtambá bɛ́ ɛŋgásɔ́ ufə́mə́ləniə na Huɛlɛ́ ɔkɛ́kɛ́lɛna, bá ná mɛɛ́ta iŋgínə́ índíə́ yɛ ɔkɛa nɔ́yɛ́ ɔkafámáká ɔ moómo ə́nisə má miilí na ífəndí.

⁶Mɛnyama yɛ́ ná wə́yíə́ munuə úbúnə́ ɛlɔ́áyɛ́ Huɛlɛ́ ɔkɛ́kɛ́lɛna na ɛlɔ́áyɛ́ nɛ́áyɛ́á niínyə ɔsɔ́kɔ́nɛna, Yáyɛ́á yanda yɛnaŋanaŋa ná bááyɛ́ ɔbá bá lɛ́á na bituənínə́ ɔ nɔɔ́mɛná.

⁷Bá ná wɛɛ́ya iŋgínə́, índíə́ yɛ banaŋanaŋa unuəsiə na ɔ uwəbú ɔnɔba. Bá ná wɛɛ́ya iŋgínə́ índíə́ yɛ tutikə, bilúkunə, mohókí na mɔnɔŋɔ məkimə ɔ ɔmanɛna.

⁸Bɛndɔ bəkimə bá misí, bá ŋɔ wɛɛ́ya lúbúnəkə, bááyɛ́ bəkimə ɔbá niínyə nɛ́ lɛ bá tilə́tɔ́ ɔ hiəfulə hɛ́ buɔmɔ́ hɛ́ mɔnándɔ́mbá, ɔwá bá ná ɔ́nɔ́kɔ́ ɔ botolokiə ɔ nɛbɔ́tɛ́ná nɛ́ misí.

⁹Wɛ́ɛ́yɛ́ ɔwá a lɛ́á na məlúə́, á ɔ́kɔ́kɛ́na.

¹⁰Wɛ́ɛ́yɛ́ ɔwá a ndɔ bɔsɔ́kɔ́ háá ɔ ɛbɔka, a ŋɔ ákána ɔ ɛbɔka; wɛ́ɛ́yɛ́ ɔwá a ndɔ ɔ́nɔ́nɔ na mɔkɔ́átá, a ŋɔ wínə ɔ mɔkɔ́átá. Ɔ́ ikúíli yɛ́ nitiŋiminə na ilumininə yɛ́ banaŋanaŋa yɛ́ɛyɛ.

¹¹Əlimə yɛ nɔ́yɛ́, mɛ ná yɛmɔtɛ́ mɛnyama mɛbɛ́á yámá yɛ́ nɔ́ fámálana ɔ misí, yɛ́ ka bá na bɛndɔ́ŋɔ bɛ́fandɛ́ ɛ́sɛ́á bɛ́ mɔnándɔ́mbá, mba, a hɔ́ɔ́kɔ ɛ́sɛ́á yaná.

¹²Yɛ́ iŋgínə́ yɛ mɛnyama yibusíə́ bɛ́kɛakɛna ɔ ɔwayɛ́ busíə́. Yɛ́ ka bá yɛ́ ndɔ misí na bɛ́áyɛ́á bituəniniə íkíniə ɔ mɛnyama yɛ busíə́ ɔ ulúbúnə, ɔyɛ́á bá ná ɛyɛkákɛ yɛ́ bukuəli bɔaka.

¹³Yɛ́ɛ́yɛ́ mɛnyama yɛ niɔŋgɔnɔ ífəndí yɛ́ ka bá yɛ́ ndɔ bisə́mə́tə́ bɛŋɛ́ŋa kɛa ɔ busíə́ bɔ́ bɛndɔ bəkimə, yɛ́ kɛaka ɔwá hiwə hɛ́ húlə́kinə ɔ nɔɔ́mɛná, hɛ́ ndakɔakɔ́na ɔ misí.

¹⁴Yɛ́ bɛndɔ bá misí nənəsəkiə ɔ tɔ́mbákɛna na bisə́mə́tə́ ɔbɛ́á bá ná wɛɛ́ya iŋgínə́ índíə́ yɛ ɔkɛa ɔ busíə́ bɔ́ mɛnyama yibusíə́, yɛ́ bəə́bu lɛ́háka ɔwá, bá ililí tábɔ́náka ɔ niínyə nɛ́ mɛnyama ɔyɛ́á bá ná úmúísíə́ na mɔkɔ́átá, yɛ́ ná niŋə.

¹⁵Yɛ́ ná iŋgínə́ kúsə́nə yɛ umbúínyi wɔ́ buɔmɔ́ ɔ uwíndiə ɔ ililí yɛ́ mɛnyama ɔkɛaka ɔwá yɛ́ hɔɔkɔ, na iŋgínə́ yɛ bááyɛ́ ɔwɔ́nɔ ɔbá bá sá ndá wɛɛ́ya lubunə.

¹⁶Yɛ́ɛ́yɛ́ mɛnyama yɛ́ ka bɛndɔ bəkimə íkíniə ɔwá bá hibílíndíníə́ kúsə́nə ɔ uwəbú mɔkátá wɔ́ bɛnɔ́mɛ ata ɔ nɛbɔ́ka, tɔlɔ́matɔ́, bɛkámɔ, bambiaŋɛ, tɔtɔyɔ́nɔ́, bifəyí mbá ata bɛɔlɛ́.

¹⁷Nɔ́yɛ́, ata mɔndɔ a sa ndá ósó ɔwɔ́ndɔ ata ulúə́ ábá a lɛ bá na hítə́yí hibílíndíníə́, ɔ́ niɔŋɔ́, á niínyə nɛ́ mɛnyama ata ɔmbana wɔ́ bɛala bɛ́ nɛ́áyɛ́á niínyə.

¹⁸Ɔ́ ikúíli yɛ́ ɛmanya ɔ ukusənə yɛ́ɛyɛ, wɛ́ɛ́yɛ́ ɔwá a lɛ́á na ɛŋgɛ́lɛ́, á ɔmbana wɔ́ mɛnyama bulunə, ɔ taká, ɔmbana wɔ́ bɛala bɛ́ mɔndɔ. Wə́yíə́ ɔmbana wɔ́ bɛala wɔ́ lɛa, bɛbɔ́ɛ́yɛa bɛ́lɛ́ndálɔ na moómo álɛ́ndálɔ na bɛ́lɛ́ndálɔ. (666)