Read Tunen Bimənyí 14 Bible Online

Bimənyí 14 - Tunen bible

Bimənyí 14

¹Mɛ ná hiamɛ́la, mɛ ná Mɔnándɔ́mbá yámá tɛ́nɛ́mátɔ́ ɔ ɔmáá wɔ́ Síyono, ɛbɔ́ɛ́yɛa na moómo ə́nisə má tukóló na túnisə tɔ́ bɛndɔ ɔbá bá ná báá wɛɛ́ya, nɛ́áyɛ́á niínyə na nɛ́ yayɛ́á Isə́ tilə́kə́tɔ́ ɔ uwəbú mabɔ́ka.

²Mɛ ná nióni ɔ́kɔ́ nɛ́ nɔ́ húlínə ɔ nɔɔ́mɛná, ɛ́sɛ́á ɛfɛnakɛ yɛ́ məə́yi maŋɛ́ŋa, ɛ́sɛ́á iluluməki yɛŋɛ́ŋa yɛ́ ɛmalamanda, nióni ɔnɛ́á mɛ ná ɔ́kɔ́kɛ́na, nɛ́ ka báá ɛ́sɛ́á bɔŋana bɔ́ bətəkunə ɔŋɛ́ma ikúíli bá ndɔ təkunə.

³Bá ka báá bá ndɔ bɔŋana buɔ́sɔ bɔ́ tɔnyamáná óso ɔ busíə́ bɔ́ hikómo, ɔ busíə́ bɔ́ mɛnyama ínisə na bɛnatákɛ. Mba, ata mɔndɔ a sa óso ɔ bɔ́táyɛ́ bɔŋana ɔwɔkɔ́na, úhúlíə́ ɔ yɛ́ɛ́yɛ́ ɛbɔ́ɛ́yɛa na moómo ə́nisə má tukóló na túnisə tɔ́ bɛndɔ ɔbá Huɛlɛ́ a ná háŋɔ́ná ɔ misí.

⁴Bá sa bɛ́táfála na bəəndú, ɔ taká, bá lɛa bɛkɔ́njɛ́. Ata hə́níə́ Mɔnándɔ́mbá a nɔ́ ákána, bá wɛɛ́ya ɔŋgɔkɔ. Huɛlɛ́ a ka bəə́bu háŋɔ́na ətíə́ yɛ bɛndɔ ɛ́sɛ́á bɛɛ́la bɛtɔ́tɔ́ bíbúsíə́ ɛlɔ́áyɛ́ ayɛ́, na ɛlɔ́áyɛ́ Mɔnándɔ́mbá.

⁵Bá sa bɛkanja ɔ́kɔ ɔ uwəbú munuə, bá lɛa ɛŋaná hɛkabalɛ.

⁶Mɛ ná yɛmɔtɛ́ áŋgɛlɛ yámá tɔ́na ɔyɛ́á yɛ́ ná bá yɛ́ ndɔ hululuə hə́ə́ní hata ɔ ɔmbáŋá. A ka bá na Imbə́nú Yɛɛsɛ yɛ ikúílíə́kimə ɛlɔ́áyɛ́ ɔnɔŋɔnɛna ɔ bituəniniə bɛ́ misí ɔ mɔnɔŋɔ məkimə, ɔ tutikə tukimə, ɔ mohókí na ɔ bilúkunə bikimə.

⁷A laaka na nióni nɛŋɛ́ŋa a sɛ́á: «Nɔ́ Huɛlɛ́ kɔ́lɔ́máka, nɔ́ wɛɛ́ya lúbúnə́kə́ tɔ́na bɔkɔasɛ́á, ɔŋgɛ́ŋɛ́ wɔ́ bɛ́áyɛ́á bikə́lə́síníə́ wɔ́ nɔ́ ndafama. Ɔwayɛ́ á mɔbɔ́ta wa nɔɔ́mɛná na misí, wa nɔmɔ́ na tɔyábálá, nɔ́ wɛɛ́ya lúbúnə́kə.»

⁸Niɔŋgɔnɔ nɛ́ bɛáŋgɛlɛ bɛ́fandɛ́, a ná wɛɛ́ya ɔŋgɔ́ a sɛ́á: «Babílono ɔ mɛŋɛ́ŋa, yɛ́ ná kɔ́á óó!» Ɔwáyɛ́ ɔwá a ná mɔnɔŋɔ məkimə məluku má híə́yíə́ hilóbi hɛŋɛ́ŋa hɛ́ nɛbɛ́táfála nyə́kíníə́.

⁹Niɔŋgɔnɔ nɛ́ bɛáŋgɛlɛ bɛ́lálɔ́ a ná bəə́bu ɔŋgɔ́, a laaka na nióni nɛŋɛ́ŋa a sɛ́á: «Ábá mɔndɔ a ndɔ mɛnyama na yayɛ́á ililí lúbúnə, ábá a ná hibílíndíníə́ kúsə́nə ɔ nɛbɔ́ka ata ɔ mɔkátá,

¹⁰wɛɛ́ya tɔ́na a ŋɔ məluku má hilóbi hɛŋɛ́ŋa hɛ́ Huɛlɛ́ nyáá, sukúnə́tɔ́ ɛŋaná undúmbúlə ɔ ɛnyɛ́ná yɛ́ híə́yíə́ hilóbi, ɔ busíə́ bɔ́ bɛáŋgɛlɛ bɛnaŋanaŋa na Mɔnándɔ́mbá, a ŋɔ məsə́kə maŋɛ́ŋa ma hiwə hɛ́ indusí siəkinə.

¹¹Bááyɛ́ ɔbá bá ndɔ mɛnyama na yáyɛ́á ililí lúbúnə, ata ɛ́yánɛ́ ɔwá a lɛ́á na hibílíndíníə́ hɛ́ nɛ́áyɛ́á niínyə, muóyi wɔ́ búə́búə́ busə́kə wɔ́ ndɔ bála ɔ tɔɛya na tɔɛya, ata na bulúə́ mbá ata na buɔsɛ́ bá lɛ bá na nɛhɔtɔ.»

¹²Ɔ́ ikúílí yɛ́ nitiŋiminə nɛ́ banaŋanaŋa yɛ́ɛ́yɛ́, ɔbá bá ndɔ imbə́ndə́ yɛ́ Huɛlɛ́ tə́tə́niə, na bá nɛkɔmba tálɛ́nátɔ́ á Yə́susu.

¹³Nɔ́yɛ́, mɛ ná nióni ɔ́kɔ́ nɛ́ nɔ́ húlínə ɔ nɔɔ́mɛná nɛ́ sɛ́á: «Tilə́kə ɔwá ɔ botolokiə isíŋáka, nɛhɔnɔ na bááyɛ́ ɔbá bá ná wə́kúnə ɔ bɔlatɔ́ na Isə́lúkú. Ɛ́ɛ! Umbúínyi wɔ́ ndɔ laa ɔwá, bá nɛhɔtɔ kusə́nə ɔ uwəbú biolí bɔkɔasɛ́á, bíə́búə́ bɛnyɛná bɛ́ ndɔ bəə́bu ɔŋgɔ.»

¹⁴Mɛ ná hiamɛ́la, mɛ ná ɛlɔndɔ́ yámá yɛnaŋanaŋa, ɔ yɛ́táyɛ́ ɛlɔndɔ́, ɛbɔ́tɛ́ná, yɛ́ ka báá tuənə́tɔ́ hɔ́ákátɔ́ ɔ mɔndɔ. A ka bá na hitəkə́ hɛ́ kóolo ɔ mɔlɔ́á, mɔsábɔ wɔ́ lɛ́ákátɔ́ ɔ mɔkátá.

¹⁵Nɔ́yɛ́, yɛmɔtɛ́ áŋgɛlɛ a ná fámá ɔ Tɛ́mbɛlɛ, a ná wɛ́ɛ́yɛ́ ɔwá a ná bá tuənə́tɔ́ ɔ ɛlɔndɔ́ uyə́mínə nióni nɛŋɛ́ŋa a sɛ́á: «Híə́ŋə́lílə́ mɔsábɔ, huə́kə, ikúílí yɛ́ məhuə yɛ́ nɔ́ ndafámá bɔkɔasɛ́á, bɛlɔŋɔ́tɛ́ bɛ́ misí bɛ́ lɛa ɔ́nɔ́kɛ́nátɔ.»

¹⁶Nɔ́yɛ́, wɛ́ɛ́yɛ́ ɔwá a ná báá tuənə́tɔ́ ɔ ɛlɔndɔ́, a ná wə́yíə́ mɔsábɔ híə́ŋə́lílə ɔ misí, a ná bɛɛ́la bɛ́ misí húə́kə.

¹⁷Yɛmɔtɛ́ áŋgɛlɛ a ná fámá ɔ Tɛ́mbɛlɛ yɛ nɔɔ́mɛná, wɛɛ́ya tɔ́na na mɔsábɔ wɔ́ lɛ́ákátɔ́ itíə́tɔ.

¹⁸Yɛmɔtɛ́ áŋgɛlɛ a ná fámá ɔ niɔlɔ nɛ́ mahánɛna. A ka bá a ndɔ hiwə manɛna, a ná wɛ́ɛ́yɛ́ ɔwá a ná bá na mɔsábɔ lɛ́ákátɔ́ yə́mínə́ nióni nɛŋɛ́ŋa a sɛ́á: «Híə́ŋə́lílə́ wə́wúə́ mɔsábɔ wɔ́ lɛ́ákátɔ, huə́kə́ bɛcɔ́kɔ́lɔ́ bɛ́ fínyi ɔbɛ́á bɛ́ lɛ́á ɔ misí bɔkɔasɛ́á, tɔ́áyɛ́á tɔtámátámá tɔ́ lɛa ɔ́nɔ́kɛ́nátɔ.»

¹⁹Áŋgɛlɛ a ná wə́yíə́ mɔsábɔ híə́ŋə́lílə ɔ misí. A ná tɔtámátámá tɔ́ fínyi huə́kə́ ɔtɔ́á tɔ́ lɛ́á ɔ misí, a ná tɔɛ́ta sukúnə́kə ɔ mɔsáŋá mɔŋɛ́ŋa wɔ́ hilóbi hɛ́ Huɛlɛ́.

²⁰Bá ná tɔtámátámá hɔ́láka ɔ nɔáta hata na bətínə́, ɔ nɛ́táyɛ́ nɔáta nuúmə́, manɔ́ŋɔ́ má yɔ́láka, má ná yambáná ɔ misí ɔ bɛbɔ́ɛ́yɛa bɛ́lálɔ́ bɛ́ tukóló bɛ́ amaná, má báláka ɔ ɔkafámáká ɔ minuə yɛ́ bɛhɔ́sɛ.