Read Tunen Bimənyí 15 Bible Online

Bimənyí 15 - Tunen bible

Bimənyí 15

¹Nɔ́yɛ́, mɛ ná hímotí hɛŋgɛtɛ́nɛ́á hɛ́ yələ́mənə yámá hɛŋɛ́ŋa ɔ nɔɔ́mɛná, bɛáŋgɛlɛ bɛ́lɛ́ndɔ́lɔ́mɔnɔ bá nɔ́ tukoní tútifəkə itiəkə, bɔkɔasɛ́á Huɛlɛ́ a nɔ́ híə́yíə́ hilóbi úndúsiniə ɔ tɔ́mbákɛna na bəə́bu.

²Mɛ ná yámá tɔ́na ɛ́sɛ́á nɔmɔ́ naŋákátɔ́ ɛ́sɛ́á isinínə́ latákátɔ́ na hiwə. Mambɛndá ɔmá má ná mɛnyama mɛbɛ́á nɔbá, yáyɛ́á ililí na ɔmbana wɔ́ bɛala bɛ́ nɛ́áyɛ́á niínyə, bá ka bámɛnɛna tɛ́nɛ́mákátɔ́ ɔ nɛ́táyɛ́ nɔmɔ́ nɛ́ isínínə́. Bá ka bá ná ɛŋɛ́ma ɔyɛ́á Huɛlɛ́ a ná bəə́bu índíə́ itíə́kə́tɔ́ ɔ makátá.

³Bá bɔŋana bɔ́ Mósisi á mɔnyɛna wa Huɛlɛ́ na bɔ́ Mɔnándɔ́mbá ósóko bá sɛ́á: «Á Isə́lúkú á Huɛlɛ́ yɛ injiŋə yikimə, bɛ́áwɔ́á biolí bɛ́ lɛa bɛŋɛ́ŋa, bɛ́ lɛ yələ́mənə. Á Munəni wa mɔnɔŋɔ, yə́wúə́ mɛanɔ yɛ́ lɛa tɛ́nɛ́mátɔ́, yɛ́ lɛa taká.

⁴Á isə́lúkú, ɛ́yánɛ́ a óso ukinə ɔ nɛ́áwɔ́á niínyə ɔkɔ́lɔ́ma ata ɔ nɛɛ́ta uwumə́siə əə́? Ɛ́ɛ! Aŋɔ́á bíbúə́ ɔ lɛ́á mɔnaŋanaŋa. Mɔnɔŋɔ məkimə ná ŋɔ ndasákɔ́na, má ŋɔ ndəkiníə́ ɔwáwɔ busíə́, bɔkɔasɛ́á, ɔ ná bɛ́áwɔ́á bikə́lə́síníə́ fə́mə́lə́níə́.»

⁵Əlimə yɛ nɔ́yɛ́, mɛ ka siəkinə: Tɛ́mbɛlɛ ɔyɛ́á yanda yɛnaŋanaŋa yɛ́ ná bámɛ́nɛ́na, yɛ́ ná bíkúnə ɔ nɔɔ́mɛná.

⁶Bɛáŋgɛlɛ tɔ́na ɔbá bá ná bá na tukoní tɔ́lɛ́ndɔ́lɔ́mɔnɔ itíə́kə́tɔ́, bá ná fámáká ɔ Tɛ́mbɛlɛ, lɛŋábákátɔ́ na bɛlɛŋa bɛnaŋanaŋa, bɛ́ nɔmaka laŋɔlaŋɔ, tɔlɔ́ŋa tɔ́ kóolo bítíŋə́kə́tɔ́ ɔ ɛsasa.

⁷Ɔmɔtɛ́ wa yííyí mɛnyama ínisə a ná bɛnyɛ́ná bɛ́lɛ́ndɔ́lɔ́mɔnɔ índíə́ ɔ bɛáŋgɛlɛ bɛ́lɛ́ndɔ́lɔ́mɔnɔ. Bɛnyɛ́ná bɛ́ ka báá úndúə́kə́tɔ́ na hilóbi hɛ́ Huɛlɛ́ ɔwá a ndɔ nɔmɔ ɔ tɔɛya na tɔɛya.

⁸Tuúmə tɔ́ Huɛlɛ́ na yayɛ́á injiŋə, muóyi wɔ́ ná úndúə́ tɔ́na ɔ Tɛ́mbɛlɛ, ata mɔndɔ a sa óso ufínə ɔ tɛ́mbɛlɛ ɔkafámáká ɔwá tukoní tɔ́lɛ́ndɔ́lɔ́mɔnɔ tɔ́ bɛáŋgɛlɛ bɛ́lɛ́ndɔ́lɔ́mɔnɔ tɔ́ bíúndúsíníə́.