Read Tunen Bimənyí 16 Bible Online

Bimənyí 16 - Tunen bible

Bimənyí 16

¹Nɔ́yɛ́, mɛ ná nióni nɛŋɛ́ŋa ɔ́kɔ́ nɛ́ nɔ́ húlínə ɔ Tɛ́mbɛlɛ, nɛ́ lakɛna ɔ bɛáŋgɛlɛ bɛ́lɛ́ndɔ́lɔ́mɔnɔ nɛ́ sɛ́á: «Nɔ́ ákáná, nɔ ká bɛnyɛ́ná bɛ́lɛ́ndɔ́lɔ́mɔnɔ bɛ́ hilóbi hɛ́ Huɛlɛ́ olókóko ɔ misí.»

²Áŋgɛlɛ yibusíə́ a ná ákana, a ná yayɛ́á ɛnyɛ́ná ólóko ɔ misí. Nɔ́yɛ́, bɛbɛ́ábɛ́á bɛ́ bitóni na bɛ́ bilímbə́kí bɛ́ ná bɛndɔ itíə́kə ɔbá bá ná báá na hibílíndíníə́ hɛ́ mɛnyama, bá yáyɛ́á ililí lúbúnəkə tɔ́na.

³Niɔŋgɔnɔ nɛ́ bɛáŋgɛlɛ bɛ́fandɛ́, a ná yáyɛ́á ɛnyɛ́ná ólóko ɔ nɔmɔ́, nɛ́ ná híáná ɛ́sɛ́á manɔ́ŋɔ́ má muwə́nú, bɛbɔ́tɛ́ná bikimə ɔbɛ́á bɛ́ ná báá ɔ nɔmɔ́, bɛ́ ná wə́kúnə.

⁴Niɔŋgɔnɔ nɛ́ bɛáŋgɛlɛ bɛ́lálɔ́, a ná yáyɛ́á ɛnyɛ́ná ólóko ɔ məə́yi maŋɛ́ŋa na ɔ tɔyábálá, má ná híáná manɔ́ŋɔ́ na manɔ́ŋɔ́.

⁵Əlimə yɛ nɔ́yɛ́, mɛ ná áŋgɛlɛ ɔ́kɔ́ ɔyɛ́á yɛ́ ndɔ məə́yi manɛna, a sɛ́á: «Ɔwáwɔ ɔwá ɔ lɛ́á, ɔwá ɔ ná báá, á mɔnaŋanaŋa, ɔ lɛa tɛ́nɛ́mátɔ́ bɔkɔasɛ́á, ɔ ná bínə́níə́ ɔwá ɔ lɛa mukə́lə́siə wataká.

⁶Ɛ́sɛ́á bá ná manɔ́ŋɔ́ má banaŋanaŋa na má bɔhɛ́nátɔtányɛ́ ólókóko, ɔ́ manɔ́ŋɔ́ mɔ́mɔtɛ́ ɔmá ɔ ná bəə́bu nyə́kíə́, nɔ́yɛ́ yɛ́ ná bəə́bu hɔ́ánánɛ́na.»

⁷Mɛ ná nióni ɔ́kɔ́ nɛ́ nɔ húlínə ɔ niɔlɔ nɛ́ mahánɛna nɛ́ sɛ́á: «Ɛ́ɛ! Á Isə́lúkú á Huɛlɛ́ yɛ injiŋə mikimə bɛ́áwɔ́á bikə́lə́síníə́ bɛ́ lɛa taká, bɛ́ lɛ tɛ́nɛ́mátɔ.»

⁸Niɔŋgɔnɔ nɛ́ bɛáŋgɛlɛ bínisə, a na yáyɛ́á ɛnɛyɛ́ná ólóko ɔ hiɔtɔ́tɔ́; bá ná hiítə iŋgínə́ indíə́ ɔwá a bɛndɔ titə́kíə́ na híə́yíə́ hiwə.

⁹Nɔ́yɛ́, mulúkúlúku mɔŋɛ́ŋa wɔ́ ná bɛndɔ titə́kíə́; bá ná lúmə́ ɔ niínyə nɛ́ Huɛlɛ́ ɔ ɔyaŋɔnɛna, ɔwá a lɛ́á na iŋgínə́ yɛ uwəbú ɔ tɔ́táyɛ́ tukoní ɔlɔ́mɛ́na. Mba, bá sa mɛlɛ́má kɔ́ŋɔ́na ɔkɛaka ɔwá bá Huɛlɛ́ lúbúnə́kə.

¹⁰Niɔŋgɔnɔ nɛ́ bɛáŋgɛlɛ bɛ́lánɔ, a ná yáyɛ́á ɛnyɛ́ná ólóko ɔ hikómo hɛ́ mɛnyama mɛbɛ́á; ibínə́binə yɛ́ ná nɛ́áyɛ́á nɛmanɛna ayɛ́na. Bɛndɔ bá bɛka kótóko na məsə́kə.

¹¹Bá Huɛlɛ́ yɛ́ nɔɔ́mɛná yaŋɔnakɛna ɔwɔŋgɔkɔnɔ mə́búə́ məsə́kə na bíə́búə́ bɛyɛkákɛ bɛ́ bitóni, mba, bá sa mɛlɛ́má kɔ́ŋɔ́na ɔwɔŋgɔkɔnɔ bíə́búə́ bɛyɛkákɛ bɛ́ bitóni, mba, bá sa mɛlɛ́má kɔ́ŋɔ́na ɔwɔŋgɔkɔnɔ bíə́búə́ bɛnyɛná.

¹²Niɔŋgɔnɔ nɛ́ bɛáŋgɛlɛ bɛ́lɛ́ndálɔ, a ná yáyɛ́á ɛnyɛ́ná ólóko ɔ nuíyi nɛŋɛ́ŋa nɛ Ɛfaláta. Nuíyi nɛ́ ná sáá ɔkɛaka ɔwá, bá ɛnɔ́mɛ yɛ́ bənəni tábɔ́náka ɔbá bá ndɔ húlínə ɔ nɛhɔalɛ́nɛ́ná.

¹³Əlimə yɛ nɔ́yɛ́, mɛ ná imbúínyi mɛbɛ́á siəkínə́ ɛ́lálɔ́ ɛ́sɛ́á tuɔndɛ́, yɛ́ fámáka ɔ munuə wɔ́ yaná, wɔ́ mɛnyama mɛbɛ́á, na wɔ́ mɔhɛ́nátɔtányɛ́ wa bɛkanja.

¹⁴Ɔ taká, ɔ́ imbúínyi mɛbɛ́á. Bá ndɔ bisə́mə́tə́ kɛa, bá ndɔ ka bənəni bá misí mikimə kɔ́ána ɔkɛaka ɔwá, bá bəə́bu kɔtáka ɛlɔ́áyɛ́ ituəmə ɔ hinó hɛŋɛ́ŋa hɛ́ Huɛlɛ́ yɛ injiŋə yikimə.

¹⁵Isə́lúkú a sɛ́á: «Ɔ́kɔ́kɛ́na, mɛ báka ɔ ɔsákɔna ɛ́sɛ́á muíbi! Nɛhɔnɔ na wɛ́ɛ́yɛ́ ɔwá a lɛ́á ɛmbɛnyɛ́, ɔwá a ndɔ bɛ́áyɛ́á bɛlɛŋa tə́tə́niə ɔkɛaka ɔwá a lɛ kɛndá ikə́ndəli, mbá a sɔ́ ŋɔ ɛsɛ́má ɔ́kɔ!»

¹⁶Imbúínyi mɛbɛ́á yɛ́ ka bənəni tɔaka ɔ ɛbɔ́ka ɔyɛ́á bá ndɔ ɛ́lɛnɛna na nihókí nɛ́ Hɛ́bɛlɛ bá sɛ́á: «Halamakɛtɔ́nɔ.»

¹⁷Niɔŋgɔnɔ nɛ́ bɛáŋgɛlɛ bɛ́lɛ́ndɔ́lɔ́mɔnɔ, a ná yáyɛ́á ɛnyɛ́ná ólóko ɔ ɔmbáŋá. Bá ná nióni nɛŋɛ́ŋa ɔ́kɔ́ nɛ nɔ́ fámɛ́na ɔ Tɛ́mbɛlɛ, nɛ́ húlə́kinə ɔ hikómo hɛ́ Huɛlɛ́, nɛ́ sɛ́á: «Nɔ́yɛ́ yɛ́ ná bíúndúsíníə́.»

¹⁸Nɔ́yɛ́, a ná mɔanyɛ́mála, moóni má ná fámálána, ɛmalamanda yɛ́ ná sana, misí yɛ́ ná kílímə́lə́ mɔŋɛ́ŋa ɛnya ɔyɛ́á, yɛ́ lɛ boóko ɔ ɔbɛ́kɛa hata yɛ ikúílí ɔyɛ́á mɔndɔ a lɛ́á ɔ misí.

¹⁹Bətínə́ ɔ mɛŋɛ́ŋa yɛ́ ná bísə́lə́níə́ bɛsalɛ bɛ́lálɔ́! Bətínə́ bá mɔnɔŋɔ bá ná nɔkɛ́nɔ́kɛ́á. Nɔ́yɛ́, Huɛlɛ́ a ná Babílono ɔ mɛŋɛ́ŋa bɛ́kɔ́lɔ́mɔ́ná ɔkɛaka ɔwá, a wɛɛ́ya ɛnyɛ́ná nyə́síə́ ɔyɛ́á məluku má híə́yíə́ hilóbi má ndɔ fɛna.

²⁰Biloólo bɛ́ misí bikimə bɛ́ ná sambana, bá sa bá bá ndɔ ɛmáá sinə tɔ́na.

²¹Bilimə́limə́ bɛ́ ɛndánáná bɛ́ húlə́kinə ɔ ɔmbáŋá, bɛ́ bɛndɔ kɔakɔnɛna, bá ná lúmə́ á Huɛlɛ́ ɔ ɔyaŋɔnɛna ɔwɔŋgɔkɔnɔ na hikoní hɛ́ ɛmbɔŋɔ yɛ́ ɛndánáná bɔkɔasɛ́á, yɛ́ ka báá yɛmbɛlana yɛ́ hikoní.