Read Tunen Bimənyí 17 Bible Online

Bimənyí 17 - Tunen bible

Bimənyí 17

¹Nɔ́yɛ́, yɛmɔtɛ́ áŋgɛlɛ ətíə́ yɛ bɛ́lɛ́ndɔ́lɔ́mɔnɔ ɔbá bá ná bá na bɛnyɛ́ná bɛ́lɛ́ndɔ́lɔ́mɔnɔ itíə́kə́tɔ́, yɛ́ ná bɛ́nyálɛ́la, a ná mɛaŋɔ́á lɛ́ná náana a sɛ́á: «Sɔ́nɔ mbá mɛ ŋɔ aŋɔ́á bikə́lə́síníə́ bɛ́ mulókóno mɔŋɛ́ŋa ínə́niə ɔwá a ndɔ tuənə ɔ ɛsɛ́lɛ́ yɛ́ məə́yi maŋɛ́ŋa.

²Bənəni bá misí bá ka bítífíləkə na wɛɛ́ya, bituəniniə bɛ́ misí tɔ́na bá ka híóloko ɔ məluku má nɛ́áyɛ́á nibítífílə.»

³Nɔ́yɛ́, Umbúínyi Mɔnaŋanaŋa wɔ́ ná fínə́ ɔ ɔwámɛ mɛɛ́lɔ, áŋgɛlɛ a ná mɛaŋɔ́á ákánána ɔ makɔ́tákɛ. Mɛ ná muəndú yámá tɔ́na tuənə́tɔ́ ɔ mɛnyama ɔmbáŋá nyɔakátɔ́ bolókotokoto, ɔyɛ́á yɛ́ ná bá na mɛlɔ́á ɛ́lɛ́ndɔ́lɔ́mɔnɔ na niómo nɛ bɛndɔ́ŋɔ, yayɛ́á mɛɛ́lɔ mikimə na məə́nyə ɔmá má ndɔ Huɛlɛ́ yaŋɔnɛna.

⁴Wɛ́ɛ́yɛ́ muəndú a ka bá na bɛlɛŋa bɛɛsɛ nyɔakátɔ́ bolókotokoto, lɛŋábákátɔ́ na tubilə tɔ́ kóolo, na tɔ́ miɔkɔ wɔ́ hinímə. Ɛnyɛ́ná yɛ́ kóolo úndúə́tɔ́ na nyəkə́, na məə́ŋə́ŋə má nɛ́áyɛ́á nilókóno, yɛ́ ka báá ɔ ɔwayɛ́ mɔkátá itíə́tɔ.

⁵Niínyə nɛ́ ɛndɔnɔ nɛ́ ka báá tilə́kə́tɔ́ ɔ ɔwayɛ́ nɛbɔ́ka nɛ́ sɛ́á: «Babílono ɔ mɛŋɛ́ŋa, á inyə́ yɛ bolókóno na nyəkə́ yɛ misí.»

⁶Mɛ ná wɛ́ɛ́yɛ́ muəndú yámá tɔ́na híólótɔ́ na manɔ́ŋɔ́ má banaŋanaŋa, na má bəmbóŋímboŋi bá Yə́susu. Ɛnaka mɛ wɛɛ́ya ɛ́ná, mɛ ná ə́lə́mə́nə mɔŋɛ́ŋa.

⁷Əlimə yɛ nɔ́yɛ́, áŋgɛlɛ a ná mɛaŋɔ́á lɛ́na a sɛ́á: «Ɛlɔ́áyɛ́ yatɛ́ ɔ ná ə́lə́mə́nə əə́? Mɛ ŋɔ aŋɔ́á ɛndɔnɔ yɛ muəndú nífúnəkinə, na yɛ mɛnyama yɛ mɛlɔ́á ɛ́lɛ́ndɔ́lɔ́mɔnɔ na niómo nɛ́ bɛndɔ́ŋɔ ɔyɛ́á yɛ́ wɛɛ́ya lɛ́á túánátɔ.

⁸Mɛnyama ɔyɛ́á ɔ ná siəkínə́, yɛ́ ka bámɛnɛna, mba, yɛ́ lɛ bá tɔ́na. Yɛ́ ŋɔ fáma ɔ hianyaka, yɛ́ ka ákána ɔ bunímə́. Bituəniniə bɛ́ misí ɔbá niínyə nɛ́ lɛ bá tilə́tɔ́ ɔ hiəfulə hɛ́ buɔmɔ́ ɔ botolokiə ɔ nɛbɔ́tɛ́ná nɛ́ misí, bá ŋɔ ə́lə́mənə ɛnáká bá yɛ́ɛ́yɛ́ mɛnyama yámá, bɔkɔasɛ́á yɛ ka bámɛnɛna, yɛ́ lɛ bá tɔ́na, mba, yɛ́ ŋɔ ndahiana.»

⁹«Ɔ́ ikúílí yɛ ɛŋgɛ́lɛ́ na ɛmanya ɔ ukusənə yɛ́ɛyɛ, ɔ yííyí mɛlɔ́á ɛ́lɛ́ndɔ́lɔ́mɔnɔ, ɔ́ ɛmáá ɛ́lɛ́ndɔ́lɔ́mɔnɔ ɔ ɛbɔ́ka ɔyɛ́á muəndú a lɛ́á tuənə́tɔ. Ɔ́ bənəni tɔ́na Bálɛ́ndɔ́lɔ́mɔnɔ.

¹⁰Ɔ uwəbú ətíə́, bálánɔ bá ka kɔa, wa niɔŋgɔnɔ ɛ́lɛ́ndálɔ a ndɔ manɛna, wa niɔŋgɔnɔ ɛ́lɛ́ndɔ́lɔ́mɔnɔ a nana ndáfama, mba, ɛnáká a ndáfámá, a sɔ́ ŋɔ mɔŋa.

¹¹Yɛ́ɛ́yɛ́ mɛnyama ɔyɛ́á yɛ́ ná báá ɔ buɔmɔ́, mba yɛ́ lɛ bá tɔ́na, ɔ́ niɔŋgɔnɔ bɛ́múɛ́tɛ́ nɛ́ bənəni bánámanɛ́. Yɛ́ lɛa ɔmbana wɔ́ bááyɛ́ bálɛ́ndɔ́lɔ́mɔnɔ, yɛ́ nɔ́ ákána tɔ́na ɔ bunímə́.»

¹²«Nɛ́ɛ́yɛ́ niómo nɛ́ bɛndɔ́ŋɔ ɔbɛ́á ɔ ná siəkínə, ɔ́ niómo nɛ́ bənəni ɔbá bá nana nɛmanɛna kusə́nə, mba bá ŋɔ iŋgínə́ yɛ nɛmanɛna afakana na yɛ́ɛ́yɛ́ mɛnyama ɛlɔ́áyɛ́ tɛ́tɛ́á yɛ ikúílí.

¹³Bááyɛ́ bənəni bəkimə bá báka ɔbánɔ́ na ɛfɛka ɛ́mɔtɛ́. Yəbúə́ injiŋə na yəbúə́ iŋgínə́ yɛ́ ŋɔ báá ɛlɔ́áyɛ́ yɛ́ɛ́yɛ́ mɛnyama ɔnyɛna.

¹⁴Bááyɛ́ bəkimə bá ŋɔ Mɔnándɔ́mbá nuəkiə, mba Mɔnándɔ́mbá a ŋɔ nɔba bɔkɔasɛ́á, a lɛa Isə́lúkú yɛ bisə́lúkú, Munəni tɔ́na wa bənəni, na wɛɛ́ya, bááyɛ́ ɔbá Huɛlɛ́ a ná ɛ́lɛ́ákɛ́na, ɔbá a ná tɛ́fá, na bá yɔkɛ́nana bá ŋɔ nɔba tɔ́na.»

¹⁵Yɛ́ɛ́yɛ́ áŋgɛlɛ a ná mɛaŋɔ́á lɛ́ná tɔ́na a sɛ́á: «Mááyɛ́ məə́yi ɔmá ɔ ná siəkínə, ɔ ɛbɔ́ka ɔyɛ́á mulókóno a lɛ́á tuənə́tɔ́, ɔ́ mɔnɔŋɔ, ɔ́ iloŋo yɛ́ bɛndɔ, ɔ́ tutikə na mohókí.

¹⁶Nɛ́ɛ́yɛ́ niómo nɛ́ bɛndɔ́ŋɔ ɔnɛ́á ɔ ná siəkínə na mɛnyama, bá ŋɔ mulókóno bányáka, bá ŋɔ wɛɛ́ya híə́nəsiə ɛkɛndabíbúə́ na ikə́ndəli. Bá ŋɔ yə́yíə́ mɛnyama saŋaka, bá bɛ́áyɛ́á bɛlakɛlakɛ hakáka ɔ hiwə.

¹⁷Ɔ taká, Huɛlɛ́ a ka hikəkiə ɔ wə́yíə́ mɔanɔ uwundúsiniə ɔ uwəbú mɛlɛ́má, wííyí mɔanɔ úmotí wɔ́ ndɔ siə ɔlaa wɔ́ sɛ́á, bá ŋɔ ɛ́mɛ́nɛna iŋgində́ ɔ uwəbú nɛmanɛna ɔbɛ́lɛna ɛlɔ́áyɛ́ yɛ́ɛ́yɛ́ mɛnyama ɔnyɛna, ɔkafámáká ɔ ikúílí ɔyɛ́á Huɛlɛ́ a ŋɔ bɛ́áyɛ́á bɛtambá úndúsiniə.»

¹⁸«Wɛ́ɛ́yɛ́ muəndú tɔ́na ɔwá ɔ ná síə́kínə, ɔ́ bətínə́ mɛŋɛ́ŋa ɔyɛ́á yɛ́ ndɔ bənəni bá misí manɛna.»