Read Tunen Bimənyí 18 Bible Online

Bimənyí 18 - Tunen bible

Bimənyí 18

¹Əlimə yɛ nɔ́yɛ́, mɛ ná yɛmɔtɛ́ áŋgɛlɛ yámá a ndɔ tukinə ɔ nɔɔ́mɛná. A ka bá na nɛmanɛna nɛŋɛ́ŋa, tɔ́áyɛ́á tuúmə tɔ́na tɔ́ misí numəkiə.

²A ná yə́mə́ nióni nɛŋɛ́ŋa a sɛ́á: «Babílono á bətínə́ mɛŋɛ́ŋa yɛ́ ná kɔakɔ́na, yɛ́ ná kɔakɔ́na óóó! Yɛ́ ná híáná bituənínə́ bɛ́ balɛmba, nibítímínə́ nɛ imbúínyi mɛbɛ́á, nibítímínə́ nɛ́ tunoní tɔbɛ́á, ɔtɔ́á bá ndɔ kə́nyə.

³Bɔkɔasɛ́á tutikə tukimə tɔ́ misí tɔ́ ka məluku má hilóbi hɛ́ nɛ́áyɛ́á nibítífílə nyákɛna, bənəni bá misí bá ka bítífíləkə na wɛɛ́ya, bɛndɔ bá nyuŋgə́ bá misí bá ka bɔ́ŋɛ́na əlimə yɛ nɛ́áyɛ́á nɛmbiaŋɛ nɛ́ ɛŋaná iŋgətí.»

⁴Mɛ ná ɔ́kɔ́ tɔ́na nióni nɛ́ nɔ́ húlínə ɔ nɔɔ́mɛná nɛ́ sɛ́á: «Ə́ə́! Á yámɛ́á ilúkunə, nɔ́ fámáká ɔ yɛ́ɛ́yɛ́ bətínə́ ɔkɛaka ɔwá, a lɛ bənú máyɛ́á mabɛ́á túmbíníə́, tukoní ɔtɔ́á ɛkasɛ tɔ́ nda wɛɛ́ya fámɛ́ná, tɔ́ lɛ bənú kɔɛ́na.

⁵Bɔkɔasɛ́á mabɛ́á má lɛ bɛ́mbátákátɔ́ ɔkafámáká ɔ nɔɔ́mɛná, Huɛlɛ́ a sa bɛ́áyɛ́á bɛkɔa bɛbɛ́á fəliə.

⁶Nɔ́ wɛɛ́ya bɛ́kɛ́ákɛ́ná ɛ́sɛ́á a ná bənə́bənə́ bɛ́kɛ́ákɛ́na, nɔ́ wɛɛ́ya híə́níníə́ bikúílí bɛ́fandɛ́ ɔ ɔyáyɛ́na yatɛ́ ɔyɛ́á a ná kɛ́áka. Ɔ́ ɛnyɛ́ná ɔyɛ́á a ná máyɛ́á məluku ndɔ́mbɔ́sáka, nɔ́ mááyɛ́ ndɔ́mbɔ́sáka umə́ bikúílí bɛ́fandɛ́ ɔ ɔyáyɛ́na.

⁷A ka tuúmə na nɛmbiaŋɛ hikəkiə mɔŋɛ́ŋa. Nɔ́ wɛɛ́ya məsə́kə na mɔmɔ́kɛ́ híə́nə́kíníə́ ɛ́sɛ́á yɛ́ ná hɔ́ánána! A ndɔ bɛ́laa sɛ́á: “Mɛ lɛa tuənə́tɔ́ ɔ hikómo hɛ́ bunəni, mɛ lɛ bá ilíkə́, mɛ sa ndá ɛmɔ́kɛ́ mánya.”

⁸Ɛlɔ́áyɛ́ nɔ́yɛ́, tukoní ɔtɔ́á bá ná wɛɛ́ya tə́tə́níníə́, tɔ ŋɔ nda wɛɛ́ya fámɛ́ná hinó hímotí. Nyɛmbɛ́, ɛmɔ́kɛ́, mətíli, hiwə hɛ́ ŋɔ wɛɛ́ya nímə́siə. Bɔkɔasɛ́á Isə́lúkú á Huɛlɛ́ ɔwá a ná wɛɛ́ya kə́lə́sə́kíə́, a lɛa injiŋə.»

⁹Bənəni bá misí ɔbá bá ná bítífílə́kə́ na wɛɛ́ya, bá ná nɛ́áyɛ́á nɛmbiaŋɛ afákána, bá ŋɔ lɛlaka, bá ŋɔ bɛ́lɔ́mɔ́nɔkɔ ɛlɔ́áyɛ́ ayɛ́. Ɛnáká bá muóyi wɔ́ bətínə́ yámá yɛ́ ndɔ titə.

¹⁰Bá ŋɔ kanyámbɛ́máká ɛlɔ́áyɛ́ máyɛ́á məsə́kə maŋɛ́ŋa na ɔlaa bá sɛ́á: «Ə́ə́! Á Babílono, á bətínə́ ɔ mɛŋɛ́ŋa, ɛmɔ́kɛ́! Ɛmɔ́kɛ́ na aŋɔ́á á bətínə́ yɛ injiŋə. Ɔŋgɛ́ŋɛ́ úmotí wɔ́ ná hɔ́ánána ɔkɛaka ɔwá, Huɛlɛ́ á aŋɔ́á kə́lə́sə́kíə́.»

¹¹Bɛndɔ bá nyuŋgə́ bá ndɔ lɛla, bá ná fíə́kínə́ ɔ bulíkə́ bɔkɔasɛ́á ata mɔndɔ a lɛ ndɔ bíə́búə́ bɛɛ́la bɛ́ nyuŋgə́ ɔ́ndɔ tɔ́na.

¹²Malɔmɔ́ má kóolo, má mɔnɛ́á, má biomí, má miɔkɔ, má tubilə, məndínə́ məkimə ma tɔyɛbɛlɛ tɔ́ mabata, manyɔakánɔ́, má mɔmbɔtɔ, má miasɛmiasɛ, məndínə́ məkimə má malɛ́á má bunumbə, məndínə́ məkimə má bɛɛ́la tábɔ́nákátɔ́ na mabaŋɔ, na malɛ́á má mukunə́ mɔŋɛ́ŋa, na məfíto, na bilə́ŋú, na miɔkɔ mɛɛsɛ,

¹³Na malɔkɔ́, na bitóbósí, na mənumbə, na bɛtɛmá, na mɔlɔ, na məluku, na moló, na iŋuŋú, iŋəŋə́, na bɛfɔŋɔ, na ɛndɔ́mbá, na bɛhɔ́sɛ, na məsínə má bilə́, bɛɔlɛ́ na bɛɔ́ndɔ.

¹⁴Tɔtámátámá ɔtɔ́á ɔ ná bá na ilókí, tɔ ná ákáná hata na aŋɔ́á, iŋísíə́kimə bá sá ndá tɔɛ́ta bɔ́ŋɔ́ tɔ́na.

¹⁵Bɛndɔ bá nyuŋgə́ ɔbá a ná bóŋósíə́ na nɛ́táyɛ́ nioní, bá ŋɔ kanyámbɛ́máká ata ɛlɔ́áyɛ́ bɔkɔ́lɔ́ma bɔ́ máyɛ́á məsə́kə maŋɛ́ŋa, ətíə́ yɛ malɛlá na ɛmɔ́kɛ́.

¹⁶Bá ŋɔ laaka bá sɛ́á: «Ɛmɔ́kɛ́! Ɛmɔ́kɛ́ na aŋɔ́á á bətínə́ ɔ mɛŋɛ́ŋa, lɛŋábákátɔ́ na mitumbə́ yɛ́ mabata, má nyɔakátɔ́ bolókotokoto, má miasɛmiasɛ, má kóolo, má biomí bɛ́ miɔkɔ, má tubilə.

¹⁷Ɔŋgɛ́ŋɛ́ úmotí wɔ́ ka hɔ́ánana ɔkɛaka ɔwá, mááyɛ́ mambiaŋɛ məkimə má niminə.» Bisə́lúkú bikimə bɛ́ bɛlánjɛ, bəkimə ɔbá bá ndɔ nəyə ɔ mənífə́, bənúkə bɛlánjɛ, bəkimə ɔbá bá ndɔ niŋinə ɔ nuíyi nɛ́ ɛsɛ́lɛ́ ɛ́mɔtɛ́, bá ka bámɛnɛna nyámbɛ́mákátɔ.

¹⁸Ɛnaka bá muóyi yámá wɔ́ bətínə́ yɛ́ ndɔ titə, bá yə́mə́kə bá sɛ́á: «Yatɛ́ bətínə́ yɛ́ ná báá mɛŋɛ́ŋa ɛ́sɛ́á bətínə́ Babílono.»

¹⁹Bá umbunə́ bíkúŋunəkinə ɔ mɔlɔ́á, bá lɛlaka, bá bɛ́lɔ́mɔ́nɔkɔ, bá yə́mə́kə bá sɛ́á: «Á bətínə́ ɔ mɛŋɛ́ŋa, ɛmɔ́kɛ́ na aŋɔ́á ɔwá nɛmbiaŋɛ nɛŋɛ́ŋa nɛ́ ná bááyɛ́ bóŋósíə́ ɔbá bá lɛ́á na bɛlánjɛ ɔ nɔmɔ́, ɔŋgɛ́ŋɛ́ úmotí wɔ́ ka hɔ́ánana ɔkɛaka ɔwá, bá wɛɛ́ya nɔkɔ́lɔ́kɔ́na.»

²⁰Ɔwáwɔ á nɔɔ́mɛná, bílə́nə́kə ɛlɔ́áyɛ́ nɛ́áyɛ́á nɛbɛ́nɔ́kɔlɔna, á banaŋanaŋa, á basɔ́másɔma na bɔhɛ́nátɔtányɛ́ bənú tɔ́na nɔ́ bílə́nə́kə́ bɔkɔasɛ́á, Huɛlɛ́ a ka wɛɛ́ya hɔkɛna ɛlɔ́áyɛ́ bɔbɛ́á ɔbɔ́á a ná bənú kɛ́áka.

²¹Nɔ́yɛ́, yɛ́mɔtɛ́ áŋgɛlɛ yɛ injiŋə a ná muɔkɔ mɔŋɛ́ŋa bátá hɔ́ákátɔ́ ɔ ilimə́limə́ yɛ́ nɛsɔ́la, a ná muítə əmbínə́ ətíə́ yɛ nɔmɔ́ na ɔlaa a sɛ́á: «Na yɛ́tana iŋgínə́ mɛŋɛ́ŋa bá ŋɔ Babílono á bətínə́ ɔ mɛŋɛ́ŋa omboko, bá sa ndá wɛɛ́ya bɔ́ŋɔ́ tɔ́na.

²²Bá sa ndá bɔŋana bɔ́ bətəkunə ɔŋɛ́ma, bɔ́ bətəkunə ilolí na bá mɛsɛ́bɛ́ ɔ́kɔ́ tɔ́na ɔ ɔwáwɔ́ ɔmbɛ́la. Bá sa ndá mulúnə́ ata hímotí hilúnə bɔ́ŋɔ́ tɔ́na ɔ ɔwáwɔ ɔmbɛ́la, mbá ata iluluməki yɛ́ nɛsɔ́la.

²³Isəmú yɛ́ itiəkətiəkə yɛ́ sa ndánɔ́má tɔ́na ɔ ɔwáwɔ ɔmbɛ́la, ata nióni nɛ́ bááyɛ́ ɔbá bá nɔ́ húlə ɔbɛ́lɛnana bá sa ndɔ́ɔ́kɔ. Bɔkɔasɛ́á báwɔ́á bɛndɔ bá nyuŋgə́ bá ka bámɛnɛna baŋɛ́ŋa bá misí, bɛ́áwɔ́á bicocí bɛ́ ka tutikə tukimə lə́ŋə́siə.»

²⁴Ɔ ɔwáwɔ ɔmbɛ́la tɔ́na bá ná manɔ́ŋɔ́ má bɔhɛ́nátɔtányɛ́, má banaŋanaŋa na bááyɛ́ bəkimə bɔ́ŋɔ́ ɔbá bá ná ɔ́nɔ́kɔ́ ɔ misí.