Read Tunen Bimənyí 19 Bible Online

Bimənyí 19 - Tunen bible

Bimənyí 19

¹Əlimə yɛ nɔ́yɛ́, mɛ ná nióni nɛŋɛ́ŋa ɔ́kɔ́ ɛ́sɛ́á iloŋo yɛ́ bɛndɔ ɔ nɔɔ́mɛná nɛ́ sɛ́á: «Áləlúya! Yəsúə́ Huɛlɛ́ a lɛa na nibínuəniə, tuúmə na injiŋə.

²Ɛ́ɛ! Bɛ́áyɛ́á bikə́lə́síníə́ bɛ́ lɛ taká, bɛ́ lɛ tɛ́nɛ́mátɔ, a ka muəndú mɔŋɛ́ŋa wa nilókóno kə́lə́səkiə ɔwá a ná misí tífílə́kə na nɛ́áyɛ́á nɛbɛ́nyɔ́kɔlɔ, a ka wɛɛ́ya imbunə híə́niniə ɛlɔ́áyɛ́ manɔ́ŋɔ́ má báyɛ́á bɔnyɛna ɔmá a ná ólókóko.»

³Bá ná manyɔ́ laa tɔ́na bá sɛ́á: «Áləlúya! Muóyi wɔ́ bətínə́ ɔ mɛŋɛ́ŋa yɛ tiə́tɔ́ wɔ́ ndɔ bála ɔ tɔɛya na tɔɛya.»

⁴Mááyɛ́ moómo áfandɛ́ má bɛnatákɛ na bínisə, na bɛ́ɛ́yɛ́ bɛbɔ́tɛ́ná bɛɔmɔ́ bínisə bá ná kiníə́, bá Huɛlɛ́ lúbúnəkə ɔwá a lɛ́á tuənə́tɔ́ ɔ hikómo bá sɛ́á: «Amɛna, Áləlúya!»

⁵Nɔ́yɛ́, nióni nɛ́ ná fámálána ɔ hikómo nɛ́ sɛ́á: «Uwənú á bɔnyɛna bəkimə, uwənú ɔbá nɔ́ ndɔ wɛɛ́ya kɔ́lɔ́ma, á batɛ́tɛ́á, á baŋɛ́ŋa, nɔ́ yəsúə́ Huɛlɛ́ nyámáka.»

⁶Mɛ ná nióni ɔ́kɔ́ tɔ́na ɛ́sɛ́á nɛ iloŋo yɛ bɛndɔ bəəŋí, ɛ́sɛ́á ɛfɛnakɛ yɛ́ məə́yi maŋɛ́ŋa, ɛ́sɛ́á mətulumə má ɛmalamanda mɛŋɛ́ŋa bá sɛ́á: «Áləlúya! Bɔkɔasɛ́á, Isə́lúkú ɔ yəsúə́ Huɛlɛ́ yɛ injiŋə yikimə a ná nɛ́áyɛ́á nɛmanɛna fə́mə́lə́níə́.»

⁷Tɔ́ bilənəkə, tɔ́ báá ɔ nɛhɔnɔ, tɔ́ wɛɛ́ya tuúmə híə́níníə́ bɔkɔasɛ́á, ɔ́ ɛŋganda yɛ nɛbɛ́lɛna nɛ́ Mɔnándɔ́mbá yɛ́ɛyɛ, yáyɛ́á ɛkɔŋɛna a ná bɛ́tábɔ́náka.

⁸Bá ka wɛɛ́ya hɛyɛbɛlɛ hɛ́ nɛbata índíə́ laŋɔlaŋɔ, naŋátɔ́ ɔwá á lɛŋábáka, ɔ taká, hɛyɛbɛlɛ hɛ́ nɛbata, ɔ́ biolí bɛ́ taká bɛ́ banaŋanaŋa.

⁹Yɛ́ɛyɛ́ áŋgɛlɛ a ná mɛaŋɔ́á lɛ́na a sɛ́á: «Tilə́kə́ ɔwá Nɛhɔnɔ na bááyɛ́ ɔbá bá ná ɛ́lɛ́ákɛ́na ɔ nɛnɛ́á nɛ́ ɛŋganda yɛ nɛbɛ́lɛna nɛ́ Mɔnándɔ́mbá.» A ná láá tɔ́na a sɛ́á: «Ɔ́ tiísi yɛ bɛtambá bɛ́ Huɛlɛ́ bɛ́ɛ́yɛ́.»

¹⁰Nɔ́yɛ́, mɛ ná kiníə́ ɔ ɔwayɛ́ makɔlɔ́ ɛlɔ́áyɛ́ ɔwayɛ́ ulúbúnə, mba, a ná mɛaŋɔ́á lɛ́na a sɛ́á: «Ɔ lɛ tíkə́ nɔ́yɛ́ kɛa, mɛ lɛa ikindəniə yɛ́ buolí ɛlɔ́áyɛ́ áwɔ, na báwɔ́á bənísə́ ɔbá bá ndɔ imbóŋi yɛ Yə́susu kókósiə. Á Huɛlɛ́ ɔ ná hɔ́ánána ulúbúnə.» Ɔ taká, imbóŋi yɛ Yə́susu yɛ́ lɛ́á iŋgínə́ yɛ umbúínyi wɔ́ bimənyə́síníə́ bɛ́ bɔhɛ́nátɔtányɛ́.

¹¹Nɔ́yɛ́, mɛ ná ɔmbáŋá yámá úbúnə́tɔ́, ɛhɔ́sɛ yɛnaŋanaŋa yɛ́ ná bámɛ́nɛ́na, niínyə nɛ́ wɛ́ɛ́yɛ́ ɔwá a ndɔ yɛɛ́ta kɛndana á yɔkɛ́nana, na tiísi. A ndɔ ituəmə nɔa, a kə́lə́səkiə tɔ́na tɛ́nɛ́mátɔ.

¹²Máyɛ́á məə́sə má kɔnjɔkɔ ɛ́sɛ́á hiwə, a ka bá na tutəkə́ tuəŋí ɔ ɔwayɛ́ mɔlɔ́á. A ka bá na niínyə tilə́kə́tɔ́ ɔnɛ́á wɛɛ́ya bíbúə́ a ndɔ nɛɛ́ta manya.

¹³Bɔ́áyɛ́á bɔlɛŋa bɔ́ ka báá manɔ́ŋɔ́ na manɔ́ŋɔ́, nɛ́áyɛ́á niínyə, á Ɛtambá yɛ Huɛlɛ́.

¹⁴Uhímbə́ wɔ́ banɔabilə́ ɔbá bá lɛ́á ɔ nɔɔ́mɛná bá wɛɛ́ya oŋgokoniə tálɛ́mákátɔ́ ɔ bɛhɔ́sɛ bɛnaŋanaŋa, lɛŋábákátɔ́ na tɔyɛbɛlɛ tɔ́ mabata maasɛ, manaŋanaŋa.

¹⁵Mɔkɔ́átá ɔ́mbɔ́kɔ́tɔ́ wɔ́ fámáka ɔ ɔwayɛ́ munuə ɛlɔ́áyɛ́ usúbínə ɔ tutikə. A ŋɔ bəə́bu kɛndakana na mulúmbə wɔ́ nɛmanɛna nɛ́ iŋgínə́. A ŋɔ hisíní tɛsaka ɔhɛ́á məluku má hilóbi hɛ́ Huɛlɛ́ yɛ injiŋə yikimə hɛ́ ndɔ fɛna.

¹⁶Niínyə nɛ́ ka báá tilə́kə́tɔ́ ɔ ɔwayɛ́ bɔlɛŋa na ɔwayɛ́ ɔmbɛna nɛ́ sɛ́á: «Munəni wa bənəni, Isə́lúkú yɛ bisə́lúkú.»

¹⁷Əlimə yɛ nɔ́yɛ́, mɛ ná yɛmɔtɛ́ áŋgɛlɛ yámá tuənə́tɔ́ ɔ hiɔtɔ́tɔ́ ɔmbáŋá. A tunoní tɔ́ ɔmbáŋá tukimə yə́mə́kinə nióni nɛŋɛ́ŋa a sɛ́á: «Sákɔ́nánɔ! Nɔ́ kɔtákána ɛlɔ́áyɛ́ nɛnɛ́á nɛŋɛ́ŋa nɛ́ Huɛlɛ́.

¹⁸Ɛlɔ́áyɛ́ mɛnyama yɛ́ bənəni ɔnɛ́á, yɛ́ bisə́lúkú, yɛ́ bɛndɔ bá injiŋə, yɛ́ bɛhɔ́sɛ na bááyɛ́ ɔbá bá ndɔ bɛɛ́ta kɛndana, mɛnyama yɛ́ bɛndɔ bəkimə, bifəyí na bɛɔ́ndɔ, tɔlɔ́matɔ́ na bahɔ́mɔ́.»

¹⁹Mɛ ná yɛmɔtɛ́ mɛnyama yámá tɔ́na, bənəni bá misí na wə́búə́ uhímbə́ wɔ́ banɔabilə́ kɔtálánátɔ́, ɛlɔ́áyɛ́ wɛ́ɛ́yɛ́ unuəsiə ɔwá a ná báá tálɛ́mátɔ́ ɔ ɛhɔ́sɛ na wə́yíə́ uhímbə́ wɔ́ banɔabilə́.

²⁰Bá ná yɛ́ɛ́yɛ́ mɛnyama na wɛ́ɛ́yɛ́ mɔhɛ́nátɔtányɛ́ wa bɛkanja halɛ́ná ɔwayɛ́ ɔwá a ná tɔŋgɛtɛ́nɛ́á tɔ́ yələ́mənə kɛ́áka ɔ ɔwayɛ́ busíə́ ɛlɔ́áyɛ́, bááyɛ́ unənəsiə ɔbá bá ná hibílíndíníə́ hɛ́ mɛnyama kusə́nə, bá ná yáyɛ́á ililí lúbúnə́kə. Bá ná bəə́bu bəkimə báfandɛ́ əmbínə́ bɔɔmɔ́ ɔ hɛfɛa hɛ́ hiwə hɛ́ məsə́kə.

²¹Bááyɛ́ bɔ́mɔtɛ́ bá ná wə́kúnínə ɔ mɔkɔ́átá ɔwá wɔ́ ná bá wɔ́ ndɔ fáma ɔ munuə wɔ́ wɛ́ɛ́yɛ́ ɔwá a ndɔ ɛhɔ́sɛ kɛndana, tunoní tukimə tɔ́ ná yə́búə́ imimə tɔbɔkɔ, tɔ́ ná nibíə́kínə.