Read Tunen Bimənyí 2 Bible Online

Bimənyí 2 - Tunen bible

Bimənyí 2

¹Tilə́kínə ɔ Áŋgɛlɛ yɛ ilúkunə yɛ́ bəlumininə bá Ɛfɛ́sɛ ɔ sɛ́á: «Náana wɛ́ɛ́yɛ́ ɔwá a lɛ́á na tusənji tɔ́lɛ́ndɔ́lɔ́mɔnɔ itíə́tɔ́ ɔ ɔwayɛ́ mɔkátá wɔ́ bɛnɔ́mɛ a ndɔ hɔ́ɔ́, ɔwá a ndɔ kɛnda ətíə́ yɛ bitiəkətiəkə bɛ́ kóolo bɛ́lɛ́ndɔ́lɔ́mɔnɔ:

²Mɛ ndɔ bɛ́áwɔ́á bɛnyɛná manya, biolí bɛ́ məsə́kə na níə́núə́ nitiŋiminə, mɛ ndɔ manya ɔwá ɔ sa ósó ɔ bɛndɔ bá ɛŋgásɔ́ ɔ uhíkə. Ɔ ka bááyɛ́ kɔsɔna ɔbá bá ndɔ bɛ́laa bɔŋgəlimə, mba, bá lɛ nɔ́yɛ́ bámɛ́nɛ́na, ɔ ná funúnə́ tɔ́na ɔwá bá lɛa bakanjakanja.

³Ɔ báka na nitiŋiminə; ɔ ka ɛmɔ́kɛ́ nyááka ɛlɔ́áyɛ́ nɛ́ámɛ́á niínyə, ɔ sa tɔmbɔ.

⁴Mba, hɛkɔma hímotí mɛ ná yámá ɔ ɔwáwɔ, ɔ lɛ ndɔ mɛaŋɔ́á hikiə tɔ́na ɛ́sɛ́á buɔnɔ́.

⁵Bɛ́kɔ́lɔ́mɔ́ná ɔ́ uyə́níə́ ɛbɔ́ka ɔ ná kɔ́ɛ́na, kɔ́ŋɔ́ná mɔlɛ́má, úndúsə́kíníə́ bɛnyɛná bɛ́ buɔnɔ́. Yɛ́ sá bá nɔ́yɛ́, mɛ ŋɔ ndasá ɔ ɔwáwɔ busíə́, mɛ ŋɔ yáwɔ́á itiəkətiəkə hɛ́kɛ́á ɔ ɔwayɛ́ ɛbɔ́ka.

⁶Mba ɔ báka na bɔlɔŋa buɛsɛ, ɔ ndɔ bɛnyɛná bɛ́ ɛndɛkɛ Nikolayíti kóyiə ɛ́sɛ́á mɛaŋɔ́á.»

⁷«Wɛ́ɛ́yɛ́ ɔwá a lɛ́á na məlúə́, á ɔ́kɔ́kɛ́ná muɛsɛ yatɛ́ ɔyɛ́á Umbúínyi wɔ́ ndɔ lɛna ɔ bilúkunə bɛ́ bəlumininə. Ɔ bááyɛ́ ɔbá bá ŋɔ nɔba, mɛ ŋɔ bəə́bu tɔtámátámá níə́kiə tɔ́ bɔlɛ́á ɔbɔ́á bɔ́ ndɔ buɔmɔ́ índiə, bá ŋɔ tɔɛ́ta nɛ́áka ɔ ɛtɔbɔtɔ́bɔ́ ɔyɛ́á Huɛlɛ́ a ná tínímíə́.»

⁸Tilə́kínə ɔ Áŋgɛlɛ yɛ ilúkunə yɛ́ bəlumininə bá Similínə ɔ sɛ́á: «Náana wɛ́ɛ́yɛ́ ɔwá a lɛ́á wəbusíə́, wənitifə́, ɔwá a na báá wə́ə́tɔ́, ɔwá a ná ndáhíáná ɔ buɔmɔ́, a ndɔ hɔ́ɔ́.

⁹Mɛ ndɔ bɔ́áwɔ́á busə́kə manya na bɔ́áwɔ́á bɔtɔyɔ́, mba ɔ taká ɔ lɛa mɔmbiaŋɛ! Mɛ ndɔ bɛkɔ́bálɛ́ bɛ́ bááyɛ́ manya ɔbá bá sɛ́á bəə́bu Bɛyútɛnɛ; mba bá lɛ nɔ́yɛ́ bámɛ́nɛ́ná. Bá lɛa ilúkunə yɛ́ bəlumininə ɔyɛ́á yɛ́ ndɔ Sátana ɔ́kɛ́na.

¹⁰Ɔ lɛ kɔ́lɔ́má ɔ yatɛ́ ɔyɛ́á ɔ ŋɔ ɛmɔ́kɛ́ nyááka. Ɔ́kɔ́kɛna muɛsɛ: Ɛkasɛ Sátana a bənú kɔ́sɔ́na, a ŋɔ bɔ́mɔtɛ́ ɔ uwənú ətíə́ hákɛna ɔ ɛbɔka, nɔ ŋɔ məsə́kə siəkinə ətíə́ yɛ niómo nɛ́ tunó. Bámɛ́nɛ́ná na yɔkɛ́nana ɔ ɔkafámáká ɔ uwə́kunə, mbá mɛ ŋɔ aŋɔ́á hitəkə́ hɛ́ nɛnɔba hɛ́ buɔmɔ́ bɔ́ ikúílíə́kimə índiə.»

¹¹«Wɛ́ɛ́yɛ́ ɔwá a lɛ́á na məlúə́, á ɔkɔ́kɛ́ná muɛsɛ yatɛ́ ɔyɛ́á Umbúínyi wɔ́ ndɔ lɛna ɔ bilúkunə bɛ́ bəlumininə. Ɔwá a ŋɔ nɔba a sa nda nyɛmbɛ́ yɛ ikúílíə́kimə manya.»

¹²Tilə́kínə ɔ Áŋgɛlɛ yɛ ilúkunə yɛ́ bəlumininə bá Bɛlɛkámɛ ɔ sɛ́á: «Wɛ́ɛ́yɛ́ ɔwá a lɛ́á na mɔkɔ́átá lɛ́ákátɔ́ bɛsalɛ bikimə a ndɔ fə́mə́ləniə náana:

¹³Mɛ ndɔ manya ɔhá ɔ ndɔ tuənə; ɔmɔ́yɛ́ hikómo hɛ́ Sátana hɛ́ lɛ́á. Mba, ɔ nabáka bɛ́ɔ́lɔ́kɛ́nátɔ́ ɔ ɔwámɛ niínyə, ɔ sa yámɛ́á ilumininə bɛ́sáŋɔ́na, ata ikúílí bá ná Aŋatibásɛ ɔ wamɛ́á mumbóŋímboŋi wa taká ɔ́nɔ́kɔ́ ɔ uwənú ətíə́, ɔ ɛbɔ́ka ɔyɛ́á Sátana a ndɔ tuənə.

¹⁴Mba, mɛ báka na tɔ́mɔtɛ́ tɔkɔma ɔ ɔwáwɔ ɔlɛna: Ɔ lɛa na bɛndɔ ɔwáwɔ ɔmbɛ́la ɔbá bá lɛ́á bɛ́ɔ́lɔ́kɔ́kɛ́nátɔ́ ɔ bilə́líə́ bɛ́ Bálama, wɛ́ɛ́yɛ́ ɔwá a ná Bálaka lɛ́háká a sɛ́á a baná bá Ísilahɛ́lɛ lámbɛ́na ɔwá bá mɛnyama nɛ́áká yɛ́ hánɛ́nátɔ́ ɔ bililí na nilókóno.

¹⁵Hɔ́ánánátɔ́, bɔ́mɔtɛ́ bá lɛa ɔwáwɔ ɔmbɛ́la ɔbá bá nalɛ́á bɛ́ɔ́lɔ́kɛ́nátɔ́ ɔ bilə́líə́ bɛ́ ɛndɛkɛ Nikolayíti.

¹⁶Nɔ́yɛ́, kɔ́ŋɔ́ná mɔlɛ́má. Yɛ́ sá bá nɔ́yɛ́, mɛ lɛ ɔsákɔna ikúílí tɛ́tɛ́á ɔwáwɔ busíə́, mɛ ŋɔ bəə́bu nuəkiə na mɔkɔ́átá ɔwá wɔ́ ndɔ fáma ɔ ɔwámɛ munuə.»

¹⁷«Wɛ́ɛ́yɛ́ ɔwá a lɛ́á na məlúə́, á ɔ́kɔ́kɛ́na muɛsɛ yatɛ́ ɔyɛ́á Umbúínyi wɔ́ ndɔ lɛna ɔ bilúkunə bɛ́ bəlumininə. Ɔwá a ŋɔ nɔba, mɛ ŋɔ wɛɛ́ya maána yɛ bítə́tɔ́ índiə. Mɛ ŋɔ wɛɛ́ya muɔkɔ wɔ́ laŋɔlaŋɔ índiə ɔwá niínyə niɔ́sɔ nɛ lɛ́á tilə́kə́tɔ́, ɔnɛ́á ata mɔndɔ a lɛ ndɔ manya, úhúlíə́ wɛ́ɛ́yɛ́ ɔwá a ndɔ nɛɛ́ta kusənə.»

¹⁸«Tilə́kínə ɔ Áŋgɛlɛ yɛ ilúkunə yɛ́ bəlumininə bá Tiatíli ɔwá: Wɛ́ɛ́yɛ́ ɔwá a lɛ́á Mɔná wa Huɛlɛ́, ɔwá məə́sə má lɛ́á ɛ́sɛ́á ɔŋgalaŋgata wɔ́ hiwə, ɔwá makɔlɔ́ má lɛ́á ɛ́sɛ́á ilə́ŋú lúnə́kə́tɔ, náana a ndɔ fə́mə́ləniə:

¹⁹Mɛ ndɔ bɛ́áwɔ́á bɛnyɛná manya, nɛ́áwɔ́á nibo, yáwɔ́á ilumininə na nɛ́áwɔ́á nitiŋiminə; bɛ́áwɔ́á bɛnyɛná bɛ́ isíŋáka bɛ́ lɛa biəŋí yáyɛ́ná bíbúsíə́.

²⁰Mba, mɛ báka na hɛkɔma hímotí ɔ ɔwáwɔ ɔlɛna: Ɔ ná Yɛsabɛ́lɛ niása, wɛ́ɛ́yɛ́ muəndú ɔwá a ndɔ bɛ́laa a sɛ́á wɛɛ́ya mɔhɛ́nátɔtányɛ́, a ndɔ bámɛ́á bɔnyɛna nənəsiə, a bəə́bu ínə́kiniə ɔwá bá lókókóno, na mɛnyama ɔnɛ́á yɛ́ hánɛ́nátɔ́ ɔ bililí.

²¹Mɛ ná wɛɛ́ya ikúílí níásɛ́ná ɔwá a mɔlɛ́má kɔŋɔna, mba, a lɛ ndɔ hikiə ɔ nilókóno ɔniasa.

²²Ɛlɔ́áyɛ́ nɔ́yɛ́, ɛkasɛ mɛ wɛɛ́ya ombóko ɔ bɔaná bɔ́ məsə́kə, hɔ́ánánátɔ́ na bɛ́áyɛ́á bikindəniə bɛ́ nilókóno, úhúlíə́ ɔwá, bá ná mɔlɛ́má kɔ́ŋɔ́ná ɔ uwəbú bɛnyɛná.

²³Mɛ ŋɔ manyɔ kɛaka bááyɛ́á baná bá wə́kúnə. Nɔ́yɛ́ mbá bilúkunə bikimə bɛ́ bəlumininə bá ŋɔ manya ɔwá mɛ lɛa wɛ́ɛ́yɛ́ ɔwá a ndɔ tɔsáŋa na mɛlɛ́má yɛ́ mɔsá hinyə. Mɔndɔ tɛ́á ɔ uwənú ətíə́ tɔ́na, mɛ ŋɔ wɛɛ́ya híə́niniə ɔwɔŋgɔkɔnɔ yatɛ́ ɔyɛ́á a ná kɛ́áka.»

²⁴«Mba, mɛ ndɔ bənú nɔ́yɛ́ lɛna ɔ uwənú ɔbá nɔ lɛ́á ɔ Tiatíli, ɔbá nɔ sa bɛ́táyɛ́ bilə́líə́ afana, ɔbá nɔ sa ɔ́kɔ́na yatɛ́ ɔyɛ́á bááyɛ́ bɛndɔ bá ndɔ ɛ́lɛnɛna bá sɛ́á: “Nuúmə́ yɛ ɛndɔnɔ yɛ Sátana”, mɛ ndɔ bənú lɛna náana ɔwá, Mɛ lɛ ndɔ bənú bɔlɔmɔ́ buinə́buinə́ túə́niə.

²⁵Nɔ́ ɔ́nɛ́nɛ́na ɔbánɔ́ ɔ ɔkafámáká ɔ ikúílí ɔyɛ́á mɛ ŋɔ ndahiana.

²⁶Ɔ wɛ́ɛ́yɛ́ ɔwá a ŋɔ nɔba, ɔwá a ŋɔ kɛaka yatɛ́ ɔyɛ́á mɛ ndɔ hikiə ɔkafámáká ɔ nisúki, mɛ ŋɔ wɛɛ́ya nɛmanɛna índiə ɔnɛ́á yamɛ́á Isə́ a ná mɛaŋɔ́á índíə́.

²⁷Mɛ ŋɔ bəə́bu nɛmanɛna nɛ́ mɔnɔŋɔ índiə, bá ŋɔ bə́əbu kɛndakana na nɛmanɛna nɛ́ ilə́ŋú, bá ŋɔ bəə́bu sánɔ́lɔkɔna ɔ́maná ɛ́sɛ́á bibokó bɛ́ ɔmɛtá.

²⁸Mɛ ŋɔ bə́əbu hisənji hɛ́ siísíə́ índiə tɔ́na.»

²⁹«Wɛ́ɛ́yɛ́ ɔwá a lɛ́á na məlúə́, á ɔ́kɔ́kɛ́ná muɛsɛ yatɛ́ ɔyɛ́á Umbúínyi wɔ́ ndɔ lɛna ɔ bilúkunə bɛ́ bəlumininə.»